HAMI be i ko doni gwiliman min be mɔgɔ barika ban (Talenw 12:25). Koo dɔ delila ka hamiba bila i la wa? Yala i y’a miiri ko i tɛna se k’o muɲu tugun wa? N’o lo, i k’a lɔn ko i kelen tɛ. Koo dɔw b’a to an caaman sɛgɛnninba lo, an be hami wala an hakili ɲagaminin lo. Misali la, dɔw b’u somɔgɔ banabagatɔ dɔ ladonna, dɔw ka mɔgɔ kanulen dɔ sara ani dɔw be tɔɔrɔla balawoko dɔ kosɔn. Mun lo be se k’an dɛmɛ ka hamiko muɲu? *

An ka masacɛ Dawuda ka koo lajɛ. O bena an dɛmɛ k’a lɔn an be se ka see sɔrɔ hami kan cogo min na. A ye gwɛlɛya caaman sɔrɔ ani tuma dɔw la, a niin yɛrɛ tun be farati la (1 Sam. 17:34, 35; 18:10, 11). Dawuda ye see sɔrɔ hami kan cogo di? An be se k’a ladegi cogo di?

Dawuda ye gwɛlɛya caaman sɔrɔ wagati kelen na. Masacɛ Sayuli tun b’a ɲinina k’a faga. An k’a filɛ min y’a sɔrɔ a bolitɔ Sayuli ɲɛ. Dawuda n’a ka kɛlɛdenw tun tagara Israɛl juguw kɛlɛ. U kɔseginin soo, u dusu kasira kosɔbɛ k’a ye ko u juguw y’u ka minanw soɲɛ, k’u ka soow jɛni ani k’u somɔgɔw minɛ ka taga n’u ye. Dawuda y’o koo ta cogo di? “Dawuda n’a kɔmɔgɔw kasira kosɔbɛ fɔɔ u barika tagara ban, u tun te se ka kasi tugu.” Dɔ farala Dawuda ka haminankow kan tuma min na a kɔmɔgɔw “tun b’a fɔra k’olu b’a bon ni kabakuru ye k’a faga.” (1 Sam. 30:1-6). Gwɛlɛyaba saba bɛɛ lo tun be Dawuda kan: A ka denbayamɔgɔw niin tun be farati la, a kɔmɔgɔw tun b’a fɛ k’a faga ani masacɛ Sayuli tun b’a magwɛnna. Miiri k’a filɛ Dawuda tun be hamina kosɔbɛ cogo min na!

Dawuda ye mun lo kɛ o kɔ? A sinna k’a “jaa gwɛlɛya Masaba a ka Ala barika la.” N’a sɔrɔ a y’o kɛ cogo di? Dawuda tun ka teli ka Jehova deli walisa ka dɛmɛ ɲini a fɛ. A tun be miiri fana k’a filɛ Jehova y’a dɛmɛ cogo min na wagati tɛmɛninw na (1 Sam. 17:37; Zab. 18:3, 7). Dawuda fɛ, a tun kɔrɔtanin lo a k’a ɲini k’a lɔn Jehova b’a fɛ a ka min kɛ. O kama, a y’a ɲini k’a lɔn Jehova b’a fɛ a ka min kɛ. Tuma min na a y’o lɔn, a sinna k’o kɛ. O y’a to Jehova ye ale n’a ka kɛlɛdenw duga. U sera k’u somɔgɔw kisi ani k’u ka minanw bɔsi u juguw la (1 Sam. 30:7-9, 18, 19). I y’a kɔrɔsi Dawuda ye koo saba minw kɛ wa? A ye Jehova deli ko a k’a dɛmɛ, a miirila k’a filɛ Jehova y’a dɛmɛ cogo min na fɔlɔ la ani Jehova ye min fɔ a ye, a y’o kɛ. An be se ka Dawuda ladegi cogo di? An ka koo saba lajɛ.

1. Delili kɛ. Tuma o tuma ni haminanko b’i kan, Jehova deli a k’i dɛmɛ ani a ka hakilitigiya di i ma. N’i ye wagati ta k’a deli ani k’i ka haminankow bɛɛ fɔ a ye, o bena i lafiya. N’i tɛ se ka delili jan kɛ, delili surun dɔ kɛ i kaan jukɔrɔ. I mana Jehova deli ko a k’i dɛmɛ, i b’a yira ko i lanin b’a la i ko Dawuda tun lanin b’a la cogo min na. Ale ko: “Masaba le ye ne tangakabakuru, ni ne dogoyɔrɔ, ani ne kunmabɔbaga ye. Ne ka Ala le ye ne tangakabakuru ye, ne be dogo  a kɔrɔ.” (Zab. 18:3). Yala delili be se k’i dɛmɛ tiɲɛn na wa? Balimamuso Kahlia ye piyɔniye ye ani a ko: “Delili kɛnin kɔ, n’ b’a ye ko n’ lafiyanin lo. Delili be n’ dɛmɛ ka koow jati i ko Jehova b’u jati cogo min na ani ka n’ jigi la a kan kosɔbɛ.” Siga t’a la, delili ye Jehova ka labɛn kabakoman dɔ ye min b’an dɛmɛ ka see sɔrɔ haminankow kan.

2. Miiri. Jehova ye i dɛmɛ ka gwɛlɛya minw muɲu, miiri o la. N’i miirila k’a filɛ Jehova ye ele ani a sagokɛla wɛrɛw dɛmɛ cogo min na galen, o bena i barika bonya ani ka dɔ fara i ka limaniya kan (Zab. 18:18-20). Joshua ye diinan mɔgɔkɔrɔ ye ani a ko: “Jehova ye n’ ka delili minw jaabi, n’ b’u sɛbɛ ka bila. O be n’ dɛmɛ k’a to n’ hakili la wagati minw na n’ ye n’ makoɲɛfɛn dɔ deli Jehova fɛ ani a y’o di n’ ma.” Jehova ye koo minw kɛ an ye ka ban, n’an be miiri o la, an bena fanga kura sɔrɔ ka an ka haminankow muɲu.

3. Jehova be min ɲini i fɛ, o kɛ. N’an b’a fɛ ka koo dɔ latigɛ, an ka ɲi k’a to Bibulu k’an ɲɛminɛ. A ka ladiliw ɲɔgɔn tɛ yen (Zab. 19:8, 12). Mɔgɔ caaman y’a ye ko n’u ye sɛgɛsɛgɛri kɛ vɛrise dɔ koo la, u b’a faamu bɛrɛbɛrɛ u be se k’a sira tagama cogo min na. Jarrod ye diinan mɔgɔkɔrɔ ye. A ko: “Ni n’ ye sɛgɛsɛgɛri kɛ vɛrise dɔ koo la, o be n’ dɛmɛ ka koo caaman faamu ani ka Jehova ka miiriya faamu. N’ be min kalan, o b’a to n’ be la o la sɔbɛ la. O la Jehova be min ɲini n’ fɛ, n’ be se k’o kɛ.” N’an be Jehova ka cikanw ɲini Bibulu kɔnɔ ani n’an b’u sira tagama, a bena nɔgɔya an ma ka an ka haminankow muɲu.

Dawuda tun b’a faamu ko walisa ka see sɔrɔ a ka haminankow kan, a mako be Jehova ka dɛmɛ na. A tun be Jehova waleɲuman lɔn kosɔbɛ a ka dɛmɛ kosɔn, fɔɔ a ko: “Ne be se ka dugu laminikogo sago ele lo barika la. [Ele] lo be barika don ne la.” (Zab. 18:30, 33). A be se ka kɛ an ɲɛɛ na ko an ka gwɛlɛyaw be i ko kogo, an tɛ se ka min sago. Nka Jehova be se k’an dɛmɛ ka gwɛlɛya sifa bɛɛ muɲu! O la, an ka to ka Jehova deli a k’an dɛmɛ. A ye min kɛ an ye ka tɛmɛ, an ka to ka miiri o la ani a be min ɲini an fɛ, an k’o kɛ. N’an y’o kɛ, an be se ka la a la ko an mako be fanga ni hakilitigiya min na walisa ka see sɔrɔ an ka haminankow kan, Jehova bena o di an ma!