LINKPƆ́N sixú cí agban kpinkpɛn ɖé ɖɔhun ɖo hǔn jí nú mǐ. (Nǔx. 12:25) A ka ko se wǔvɛ́ kpɔ́n, ɖó a ɖo linkpɔ́n mɛ wútu a? A ka nɔ mɔ ɖɔ fí e é jɛ din é ɔ, é hú gǎn émí bɔ émí kún sɔ́ sixú dɛ ɖ’é nu ó wɛ a? Ényí mɔ̌ hǔn, hwiɖokpó wɛ nǔ nɔ cí mɔ̌ ná ǎ. Mǐ mɛ gěgé wɛ agbɔ̌n ko kpé, bɔ mǐ ɖó linkpɔ́n, lobo lɛ́ flú bǐ ɖó hwɛjijɔ vovo lɛ́ wú. Ði kpɔ́ndéwú ɔ, mɛɖé lɛ́ ɖo nukún kpé dó hɛ̌nnumɔ yětɔn e ɖo azɔn jɛ wɛ é ɖé wú wɛ, mɛvívɛ́ mɛɖé lɛ́ tɔn kú, bɔ mɛ ɖěvo lɛ́ ɖo wǔvɛ́ se wɛ ɖó adla e gba nǔ ɖo xá yětɔn mɛ é ɖé wútu. Amɔ̌, étɛ́ ka sixú d’alɔ mǐ bɔ mǐ ná ɖí xwi xá linkpɔ́n, b’ɛ ná kpa mǐ ganjí? *

Kpɔ́ndéwú axɔ́sú Davídi tɔn gbígbéjé kpɔ́n sixú kplɔ́n nǔ gěgé mǐ dó lěe mǐ sixú ɖí xwi xá linkpɔ́n gbɔn é wú. Ninɔmɛ vɛ́ wǔ gěgé mɛ wɛ é gbɔn ɖo gbɛzán tɔn mɛ; gbɛ tɔn tlɛ lɛ́ nɔ axɔ́ nu hweɖélɛ́nu. (1 Sam. 17:34, 35; 18:10, 11) Étɛ́ ka d’alɔ Davídi b’ɛ dɛ hwenu e é ɖo linkpɔ́n mɛ é? Nɛ̌ mǐ ka sixú xwedó kpɔ́ndéwú tɔn gbɔn?

Davídi ɖí xwi xá tagba gěgé hwe ɖokpó ɔ nu. Ði kpɔ́ndéwú ɔ, hwenu e é ɖo hinhɔn nú axɔ́sú Sawúlu e ɖo tíntɛ́nkpɔ́n wɛ bá hu i é ɔ, lin tamɛ dó nǔ e jɛ dó jǐ tɔn é jí. Hwenu e Davídi kpó mɛ tɔn lɛ́ kpó lɛ́ kɔ wá xwé yětɔn gbe ɖo Siklági é ɔ, yě mɔ bɔ kɛntɔ́ yětɔn lɛ́ ko fin nǔɖókan yětɔn lɛ́, dó xwé yětɔn lɛ́ zo, lobo bɛ́ mɛ yětɔn lɛ́ hɛn yi kannumɔgbénu. Nɛ̌ Davídi ka wa nǔ gbɔn? “Davídi kpó mɛ e kpó é kpó zɔn lɛ́ bǐ kpó wlí avǐ bó ya káká bɔ agbɔ̌n kpé yě.” Linkpɔ́n e mɛ Davídi ɖe é lɛ́ jɛjí hwenu e súnnu e wú é ɖeji dó lɛ́ é lɛ́ ɖɔ ɖɔ émí ná “nyi awǐnnyaglo dó hu i” é. (1 Sam. 30:1-6) Ninɔmɛ syɛ́nsyɛ́n atɔn wɛ Davídi ɖo xwi ɖí xá wɛ zɛ̌ɛ́n: Xwédo tɔn ɖo axɔ́ nu, é ɖo xɛsi ɖi wɛ ɖɔ ahwanfuntɔ́ émítɔn lɛ́ ná hu émí, bɔ axɔ́sú Sawúlu lɔ lɛ́ ɖo gbě tɔn mɛ. Dǒ nukún linkpɔ́n e mɛ Davídi ná ko ɖe é mɛ kpɔ́n!

Étɛ́ Davídi ka wa bɔ d’é wú? Afɔjí afɔjí ɔ, ‘é gán jɛ Jehovah, Mawu tɔn wú.’ Nɛ̌ Davídi ka kpé wú bó wa énɛ́ gbɔn? Aca Davídi tɔn wɛ é ko nyí bɔ é nɔ xo ɖɛ sɛ́dó Jehovah dó byɔ́ alɔdó, lobo nɔ lɛ́ lin tamɛ dó lěe É ko d’alɔ ɛ wá yi gbɔn é jí. (1 Sam. 17:37; Ðɛh. 18:3, 7) Davídi mɔ ɖɔ é byɔ́ ɖɔ émí ní ba alixlɛ́mɛ Jehovah tɔn, énɛ́ wú ɔ, é kan nǔ e é ɖó ná wa é byɔ́ Jehovah. Ée Jehovah ná alixlɛ́mɛ lɛ́ Davídi gúdo é ɔ, tɛn tɔn mɛ jɛ́n é wa nǔ sɔgbe xá. Wǎgbɔ tɔn ɔ, Jehovah kɔn nyɔ̌ná dó é kpó mɛ tɔn lɛ́ kpó jí, bɔ yě hwlɛ́n mɛ e ɖo xwédo yětɔn mɛ lɛ́ é, bó bɛ́ nǔɖókan yětɔn lɛ́ wá yi xwé. (1 Sam. 30:7-9, 18, 19) A ka ɖ’ayi nǔ atɔn e Davídi wa lɛ́ é wú a? É xo ɖɛ sɛ́dó Jehovah dó byɔ́ alɔdó, bó lin tamɛ dó lěe Jehovah ko wa nǔ xá ɛ gbɔn wá yi é jí, lobo lɛ́ wa nǔ sɔgbe xá alixlɛ́mɛ e Jehovah ná ɛ é. Nɛ̌ mǐ ka sixú xwedó kpɔ́ndéwú Davídi tɔn gbɔn? Ð’ayi ninɔmɛ atɔn élɔ́ lɛ́ wú.

1. Nɔ xo ɖɛ. Hweɖébǔnu e mǐ jɛ linkpɔ́n ɖó jí é ɔ, mǐ sixú nɔ xo ɖɛ sɛ́dó Jehovah ɖɔ é ní d’alɔ mǐ, bó lɛ́ ná mǐ nǔnywɛ́. Ényí mǐ nɔ ɖɔ nǔ e ɖo linkpɔ́n ɖó nú mǐ wɛ lɛ́ é bǐ n’i ɔ, énɛ́ sixú d’alɔ mǐ bɔ mǐ ná mɔ mǐɖée mɛ. Alǒ, mǐ sixú xo ɖɛ kléwún ɖé dó xomɛ, ényí nǔ e wú mǐ sixú kpé, bó wa ɖo ninɔmɛ ɔ mɛ é bǐ jɛ́n nɛ́ ɔ nɛ́. Hweɖébǔnu e mǐ ba alɔdó Jehovah tɔn é ɔ, mǐ nɔ xlɛ́ ɖɔ mǐ ɖeji dó wǔ tɔn, lěe Davídi e ɖɔ xó élɔ́ lɛ́ é ɖeji dó wǔ tɔn gbɔn é: ‘Jehovah wɛ nyí só ce; é wɛ nyí ahohó ce; é wɛ nyí mɛhwlɛ́ngántɔ́ ce, é wɛ nyí Mawu ce, só ce; é glɔ́ wɛ un nɔ hɔn hwlá cí.’ (Ðɛh. 18:3) Ðɛ ka nɔ d’alɔ dóó a? Nɔví nyɔ̌nu gběxosín-alijítɔ́ e nɔ nyí Kahlia é ɖɔ: “Un xo ɖɛ gúdo ɔ, un nɔ ɖó fífá ɖo ayi mɛ. Ðɛ nɔ d’alɔ mì, bɔ un nɔ lin nǔ lěe  Jehovah nɔ lin nǔ gbɔn é hú gǎn, bɔ jiɖe e un ɖó dó wǔ tɔn é nɔ lɛ́ jɛjí.” Nǔgbó ɔ, ɖɛ ɔ, nǔníná agbɔ̌nnɔ ɖé wɛ bó gosín Jehovah gɔ́n, bó nɔ d’alɔ mǐ bɔ mǐ nɔ ɖí xwi xá linkpɔ́n.

2. Nɔ lin tamɛ dó lěe Jehovah ko d’alɔ we wá yi gbɔn é jí. Nú a ɖo tamɛ lin dó nǔ e ko jɛ ɖo gbɛzán towe mɛ wá yi lɛ́ é jí wɛ ɔ, a ka ná sixú flín tagba e nu alɔdó Jehovah tɔn mɛvo ɔ, a ma ná sixú dɛ ɖe ǎ lɛ́ é a? Ényí mǐ ɖo tamɛ lin dó lěe Jehovah ko d’alɔ mǐ kpó mɛsɛntɔ́ tɔn e nɔ gbɛ ɖo hwexónu lɛ́ é kpó gbɔn é jí wɛ ɔ, mǐ nɔ ɖó fífá ayi mɛ tɔn hú gǎn, bɔ jiɖe e mǐ ɖó dó wǔ tɔn é nɔ lɛ́ jɛjí. (Ðɛh. 18:18-20) Mɛxó agun tɔn ɖé nɔ nyí Joshua, bó ɖɔ: “Un nɔ sɔ́ kɛ́n ɖɛ ɖěɖěe sín sinkɔn Jehovah ko ná mì lɛ́ é tɔn. Énɛ́ nɔ d’alɔ mì bɔ un nɔ flín hwe ɖěɖěe nu un byɔ́ nǔ tají e sín hudó un ɖó é ɖé Jehovah, bɔ é ná mì pɛ́ɛ é.” Ɛɛn, ényí mǐ nɔ lin tamɛ dó nǔ e Jehovah ko wa nǔ mǐ wá yi lɛ́ é jí ɔ, hlɔ̌nhlɔ́n ɖěvo nɔ lɛ́ wá mǐ wú, bɔ mǐ nɔ ɖí xwi xá linkpɔ́n.

3. Nɔ wa nǔ. Cóbónú mǐ ná wá gbeta nǔ e mǐ ná wa ɖo ninɔmɛ ɖé mɛ é tɔn kɔn ɔ, mǐ sixú ba do nú nǔ ɖo Xó Mawu tɔn mɛ, bó ná dó sixú mɔ alixlɛ́mɛ e wú è sixú ɖeji dó hú gǎn lɛ́ é. (Ðɛh. 19:8, 12) Mɛ gěgé nɔ mɔ ɖɔ ényí émí ba do nú nǔ dó wěmafɔ tají ɖé jí ɔ, énɛ́ nɔ zɔ́n bɔ émí nɔ kpé wú bó nɔ mɔ nǔ jɛ lěe wěmafɔ ɔ kan émí gbɔn é wú hú gǎn. Mɛxó agun tɔn ɖé nɔ nyí Jarrod, bó tínmɛ ɖɔ: “Dobanúnǔ nɔ d’alɔ mì bɔ un nɔ mɔ nǔ jɛ nǔ ɖěɖěe kúnkplá wěmafɔ ɖé é bǐ wú, bó nɔ lɛ́ mɔ nǔ jɛ nǔ e ɖɔ nú mì wɛ Jehovah ɖe é wú. Énɛ́ nɔ d’alɔ mì bɔ un nɔ ɖi nǔ nǔgbó nǔgbó nú nǔ e xa wɛ un ɖe é, bó nɔ kpé wú lobo nɔ wa nǔ sɔgbe xá alixlɛ́mɛ tɔn.” Ényí mǐ nɔ ba alixlɛ́mɛ Jehovah tɔn ɖo Mawuxówéma ɔ mɛ, bó nɔ lɛ́ xwedó alixlɛ́mɛ énɛ́ ɔ, é ná bɔ wǔ nú mǐ hú gǎn, bɔ mǐ ná ɖó fífá, lobo lɛ́ ɖó awǎjijɛ hwenu e mǐ ɖo linkpɔ́n mɛ é.

Davídi mɔ nǔ jɛ wú ɖɔ cóbónú émí ná ɖí xwi xá linkpɔ́n bónú é ná kpa émí ɔ, émí ɖó hudó alɔdó Jehovah tɔn tɔn. Gǔdo e Jehovah nɔ n’i é su nukún tɔn mɛ sɔmɔ̌, b’ɛ ɖɔ: “Mawu ce ɖo kpɔ́ xá mì ɔ, un nɔ lɔ́n d’asá ahohó. É wɛ nɔ́ ná hlɔ̌nhlɔ́n mì.” (Ðɛh. 18:30, 33). Mǐ sixú nɔ mɔ ɖɔ tagba mǐtɔn lɛ́ cí ahohó e mǐ ma sixú lɔ́n d’asá ǎ lɛ́ é ɖɔhun. Amɔ̌, kpó alɔdó Jehovah tɔn kpó ɔ, mǐ sixú ɖu ɖo tagba e cí ahohó ɖɔhun lɛ́ é bǐ jí! Nǔgbó ɔ, ényí mǐ nɔ xo ɖɛ sɛ́dó Jehovah dó byɔ́ alɔdó, nɔ lin tamɛ dó nǔ e é ko bló nú mǐ wá yi lɛ́ é bǐ jí, bó nɔ lɛ́ xwedó alixlɛ́mɛ tɔn ɔ, mǐ sixú kú d’é jí ɖɔ é ná ná mǐ hlɔ̌nhlɔ́n kpó nǔnywɛ́ kpó e sín hudó mǐ ɖó, bá ɖí xwi xá linkpɔ́n mǐtɔn lɛ́ b’ɛ ná kpa mǐ é!