LÈ ON moun angwasé, sé konsi i ni on biten ki lou asi tchè a-y (Pwov. 12:25). Ès ou ja viv on sitiyasyon ki té ka angwasé-w bon angwasé la ? Ès ou ni lenprésyon kè sa two fò ba-w é kè ou pé’é pé ankò ? Si sé ka a-w, fò ou sav kè a pa vou tousèl ki ka rèsanti sa. Ni onlo adan nou ki ka santi-nou las, ki angwasé bon angwasé la oben ki tris toubònman akòz dè plizyè sitiyasyon diféran. Pa ègzanp ni sèwten adan nou ki ka pran swen a on moun an fanmi a yo, ki pèd on moun yo té enmé oben ki ka rété on koté ni on katastwòf ki fèt. Men ka ki pé édé-nou andiré lèwvwè nou angwasé a ?

Lè nou ka gadé sa ki rivé David, nou pé aprann onlo biten adan domenn-lasa. I jwenn onlo sitiyasyon ki té difisil toubònman adan vi a-y é délè i manké mò (1 Sam. 17:34, 35 ; 18:10, 11). Ka ki édé David andiré lèwvwè i té ka santi-y angwasé ? É kijan nou pé imité ègzanp a-y ?

Dépawfwa, David jwenn plizyè éprèv anmenmtan. An-nou vwè ka ki rivé-y lèwvwè i té oblijé chapé kò a-y pas Sayil té vé tchouyé-y. On jou, David é sé boug a-y la té Ziklag é yo té ka viré akaz a yo. Lèwgadé, lè yo rivé, yo konstaté kè déotwa lènmi volé biten a yo, brilé kaz a yo é pati èvè fanmi a yo. Kijan David réyaji ? David é sé boug a-y la « mèt-yo ka pléré joustan yo pa té ni fòs pléré ankò. » Aprésa, David vin pi istrésé ankò, pas sòlda a-y, kivédi moun i té ka fè konfyans, di konsa kè yo kay tchouyé-y a koudwòch (1 Sam. 30:1-6). A moman-lasa, David té ni 3 pwoblèm a jéré anmenmtan : fanmi a-y té andanjé, sé boug-la ki té èvè-y la té vé tchouyé-y é Sayil té ka kouri dèyè-y pou tchouyé-y toujou. Ou ka imajiné jan David dwèt té angwasé !

Ka David fè aprésa ? Onfwamenm, ‘i chèché fòs owa Jéova Bondyé a-y’. Men kijan i fè sa ? David té ni labitid priyé Jéova pou mandé-y édé-y, é i té ni labitid réfléchi asi jan Jéova té ja sové-y avan (1 Sam. 17:37 ; Sòm 18:2, 6). David té sav kè i té bizwen konsèy a Jéova, sé pousa i mandé Jéova ka pou i té fè. Lèwvwè Jéova di-y ka pou i té fè, i pa pèd tan pou aji. Alò Jéova béni David é sé boug-la ki té èvè-y la é grasa-y yo sové fanmi a yo é yo woupran tout biten a yo (1 Sam. 30:7-9, 18, 19). Ès ou vwè sé 3 biten-la David fè la ? I priyé Jéova pou mandé-y édé-y, i sonjé sa Jéova té ja fè ba-y avan, é i aji tousuit lèwvwè Jéova di-y ka pou i té fè. An-nou vwè kijan nou pé imité David adan sé 3 domenn-lasa.

1) Priyé. Dépi ou ka koumansé santi kè ni on biten ki ka angwasé-w, priyé Jéova pou mandé-y édé-w é mandé-y ba-w sajès. Lagé tousa ki ka enkyété-w anlè-y. Pousa, pran tout tan a-w pou palé ba-y é di-y tousa ou ka rèsanti. É siwvwè ou adan on sitiyasyon ki pa’a pèwmèt-vou fè sa, fè on ti priyè toukout adan tchè a-w. Chakfwa ou ka mandé Jéova édé-w, ou ka montré-y kè ou ka fè-y konfyans kon David. Mi sa i ni lokazyon di : « Jéova sé gwo wòch an mwen, sé fòs an mwen é sé-y ki ka sové-mwen. Bondyé an mwen sé gwo wòch an mwen, sé owa-y an ka kouri kaché » (Sòm 18:2). Men ès lapriyè sé on biten ki vréman éfikas ? Mi sa Kahlia on sè ki pyonyé ka di asi sa : « Lèwvwè an ka fin priyé Jéova, an ka santi-mwen byen pas sa ka trankilizé-mwen. Lapriyè ka édé-mwen vwè sitiyasyon an mwen kon Jéova ka vwè-y é sa ka édé-mwen fè Jéova konfyans plis ankò. » Lapriyè ni onlo pouvwa é sé on bèl  kado Jéova fè-nou pas sa ka édé-nou andiré lèwvwè nou enkyèt.

2) Sonjé. Lèwvwè ou ka réfléchi asi tousa ki ja pasé adan vi a-w, ès ou ka sonjé tout sé éprèv-la ou réyisi andiré la enki pas Jéova édé-w ? Lè ou ka réfléchi asi tousa biten Jéova ja fè pou édé ki vou ki sèwvitè a-y ki viv an tan lontan, ou ka ni plis konfyans adan-y ankò é sa ka wouba-w fòs (Sòm 18:17-19). Mi sa on ansyen non a-y sé Joshua ka èspliké : « Chakfwa Jéova ka réponn a priyè an mwen, an ka maké sa on koté. Kifè, konnyéla an ni on lis ki ka édé-mwen sonjé tout sé fwa-la an mandé Jéova on biten an pawtikilyé é kè i ban-mwen ègzaktèman sa an té bizwen. » Lè nou ka réfléchi asi tousa Jéova ja fè pou nou, sa ka ban-nou fòs pou goumé èvè sa ki ka angwasé-nou.

3) Aji. Lè ou ka viv on sitiyasyon ki ka angwasé-w, avan ou pran on désizyon chèché pou vwè ka Pawòl a Bondyé ka di asi sa ; sé la ou ké touvé méyè konsèy ki tini (Sòm 19:7, 11). Ni onlo moun ki rann-yo kont kè lèwvwè yo ka fè rèchèch asi on vèwsé, yo ka konprann-li pibyen é yo ka vwè pibyen kijan pou yo apliké-y adan vi a yo. Mi sa on ansyen, non a-y sé Jarrod ka èspliké : « Lèwvwè an ka fè rèchèch asi on vèwsé, sa ka édé-mwen konprann-li pibyen é sa ka édé-mwen vwè sa Jéova vé kè an fè. Vèwsé-lasa ka rantré anfon a tchè an mwen é sa ka pousé-mwen aji kon Jéova vé. » Si nou ka chèché konsèy a Jéova adan Labib é si nou ka mété-yo an pratik, sa ké édé-nou andiré pli fasilman lèwvwè nou ké angwasé.

David té byen konprann kè pou i té pé sa andiré lèwvwè i té angwasé, i té bizwen Jéova édé-y. Tèlman i té ni rèkonésans pou tousa Jéova té ka fè pou édé-y, mi sa i di : « Grasa puisans a Bondyé, an pé monté asi on miray. [...] Vré Dyé-la sé sila ki ka ban-mwen fòs » (Sòm 18:29, 32). Délè, nou pé ni lenprésyon kè sé éprèv-la nou ka jwenn la kon dé gwo miray douvan nou. Men grasa Jéova, nou pé rivé about a nenpòt ki éprèv ! Si nou ka priyé Jéova pou mandé-y édé-nou, si nou ka sonjé tousa i ja fè pou nou é si nou ka aji annakò èvè sé konsèy-la i ka ban-nou la, nou pé sèten kè i ké ban-nou fòs-la é sajès-la nou bizwen la pou nou andiré lèwvwè nou angwasé !