ANGWAS-A, a kou roun fardo ki ka pézé asou nou tchò (Prov. 12:25). Détan, ès to ka santi sa kalité angwas-a ? Ès détan to ka santi ki to pa ké rivé tchenbé ? A pa to rounso ki annan sa sitiasyon-an. Roun patché annan nou las, yé angwasé épi yé tris akoz di plizyèr bagaj. Parèkzanp, i gen sa ki ka pran swen di roun moun ki malad annan yé fanmi, roun ran pédi roun moun yé kontan, é rounòt ran ka soufri paské yé pasé anba roun katastròf natirèl. Mé kisa ki pouvé idé nou tchenbé lò nou angwasé a ?

Èkzanp David ké idé nou bokou annan sa zafè-a. I jwenn roun patché sitiasyon difisil, é détan i jik manké mouri (1 Sam. 17:34, 35 ; 18:10, 11). Kouman i rivé kontinyé vansé magré sa sitiasyon-yan ? É kouman to pouvé imité l’ ?

Détan plizyèr problèm tonbé asou David an menm tan. Annou wè parèkzanp sa ki rivé li lò rwa Sayil té ka kouri dèyè l’ pou tchwé l’. Roun jou, David ké mouché-ya ki té ké li té fin rouvini di roun lagèr, é yé wè ki yé lèlmi té vòlò tout yé bagaj, yé té boulé yé kaz é yé té mennen yé fanmi alé ké yé. Kouman David réyaji ? « David ké wonm-yan ki té ké li [...] mété pléré atè jistan yé pa té gen fòrs pou pléré ankò. » É magré i té ka fè so sòlda-ya konfyans, yé jis « ménasé li tchwé l’ ké ròch ». É akoz di sa, David té pi angwasé ankò (1 Sam. 30:1-6). Donk i té gen trwa bagaj ki té ka fè li enkyèt é ki i té divèt jéré an menm tan : so fanmi té an danjé, so sòlda té lé tchwé l’ é Sayil té dèyè l’ toujou. Imajiné kouman David té divèt angwasé séryé !

Mé istwè-a ka kontinyé konsa : « David trapé kouraj gras a Jéova so Bondjé. » David té gen labitid priyè pou Jéova idé l’, é i té ka réfléchi souvan asou sa Jéova té ja fè pou idé l’ (1 Sam. 17:37 ; Ps. 18:2, 6). I té savé ki i té bézwen Jéova bay li konsèy, donk i doumandé l’ sa i té pou fè. É lò Jéova di li sa i té divèt fè, i aji lanmenm. Atò, Jéova béni David ké mouché-ya ki té ké li. I pèrmèt yé libéré yé fanmi é roupran tout yé bagaj (1 Sam. 30:7-9, 18, 19). Ès to wè ki trwa bagaj David fè ? I priyè pou Jéova idé li, i sonjé sa so Bondjé té ja fè pou li é i aji soulon sa Jéova té ka di li fè. Annou wè kouman to pouvé imité David annan sa trwa bagaj-ya.

1) Priyè. Chak kou to ka santi angwas-a ka monté, priyè pou Jéova idé to é pou i bay to sajès. Palé ké li lontan é di li tousa to ka rousanti pou jité asou li tousa ki ka fè to enkyèt. É si to annan roun sitiasyon ki pa ka pèrmèt to fè sa, priyè vitman annan to tchò. Lò to ka doumandé Jéova idé to, to ka montré ki to ka fè li konfyans kou David ki di : « Jéova sa mo gro ròch, koté mo an sékirité ké sa-la ki ka sové mo. Mo Bondjé sa mo gro ròch, sa-la koté mo ka alé séré » (Ps. 18:2). Mé ès lapriyè ka maché vré ? Kahlia, roun sò ki pyonyé, ka réponn : « Lò mo fin priyè, mo ka santi mo kò byen. Lapriyè ka idé mo wè bagaj-ya kou Jéova ka wè yé é i ka idé mo fè l’ plis konfyans. » Lapriyè-a fò toubonnman ; a roun kado di Jéova ki ka idé nou tchenbé lò nou angwasé.

 2) Sonjé... Lò to ka sonjé sa ki rivé to annan to lavi, ès to ka rivé sonjé problèm to rivé sipòrté sèlman paské Jéova idé to ? Si to ka réfléchi asou sa Jéova ja fè pou idé to, é sa i fè osi pou idé so sèrvitèr, to ké santi to kò pi byen é to ké fè Jéova plis konfyans (Ps. 18:17-19). Roun ansyen yé ka aplé Joshua ka èspliké : « Mo marké asou roun papyé plizyèr lapriyè Jéova réponn. Sa ka idé mo sonjé chak kou mo doumandé li roun bagaj èspésyal é i bay mo èkzaktéman sa mo té bézwen. » Lò nou ka réfléchi asou tousa Jéova ja fè pou nou, nou ka viré gen fòrs pou briga ké sa zafè angwas-a.

3) Fè roun bagaj. Anvan to désidé sa to ké fè annan roun sitiasyon, alé chaché annan Paròl Bondjé-a ; to ké jwenn pi bon konsèy to pouvé gen (Ps. 19:7, 11). Bokou moun wè ki lò yé ka fè réchèrch asou roun vèrsé èspésyal, yé ka konprann pi byen kouman yé pouvé apliké l’ annan yé lavi. Jarrod ki sa roun ansyen ka èspliké : « Lò mo ka fè réchèrch asou roun vèrsé, sa ka idé mo konprann vèrsé-a pi byen é sa ka idé mo wè sa Jéova lé mo fè. Sa vèrsé-a ka rété annan mo tchò é ka pousé mo aji soulon sa mo anprann. » Si nou ka chaché konsèy Jéova-ya annan Labib-a é si nou ka apliké yé, sa ké pi fasil pou nou tchenbé lò nou angwasé.

David té ka konprann ki, pou i té rivé tchenbé lò i té angwasé, i té bézwen Jéova idé li. Afòrs i té gen rékonésans pou sa i té ka fè pou idé l’ i chanté : « Gras a pwisans Bondjé, mo pouvé monté asou roun miray. [...] Vré Bondjé-a, a li ki ka bay mo fòrs » (Ps. 18:29, 32). Détan, éprèv-ya ka yenki lévé douvan nou kou miray. Mé gras a Jéova, nou pouvé sipòrté nenpòrt ki kalité éprèv ! Si nou ka priyè Jéova pou doumandé li idé nou, si nou ka sonjé tousa i ja fè pou nou é si nou ka aji dapré konsèy i ka bay nou, nou pouvé sir ki i ké bay nou fòrs ké sajès nou bézwen pou nou rivé tchenbé lò nou angwasé.