E KONA ni kabotauaki te raraoma ma te rawawatannano. (TaeRab. 12:25) Iai te tai ae ko rangi n raraoma iai? Ko a tia n namakinna ae ko aki kona n tokanikai iai? Ngkana ngaia anne, tiaki tii ngkoe. A bati i buakora ake a namakina te mamaara, te rawawatannano, ao te raraoma i aani bukina aika kakaokoro. A a tia tabeman n tararuaia aia utu aika aoraki, e mate ae tangiraki irouia, ao tabeman a aitara ma te kabuanibwai ae karina. Ma tera ae kona ni buokira n tokanikai i aon te raraoma? *

E bati ae ti kona n reiakinna ibukin arora n tokanikai i aon te raraoma man iaiangoan ana katoto te Uea are Tawita. E bon aitara ma kangaanga aika kakaiaki ao n tabetai, e bon ruanikai naba maiuna. (1Tam. 17:34, 35; 18:10, 11) Ma e kangaa n tokanikai i aon te raraoma? Ao ti na kangaa ni kakairi iroun Tawita?

E kaaitara Tawita ma kangaanga aika bati n tii te taina. Iangoa te baere riki nakoina ngke e birinako mairoun te Uea are Tauro are kataia n tiringnga. Ngke e oki man te buaka Tawita ma ana rorobuaka, ao a a noria ae a a tia aia kairiribai n roko ni kimoai aia bwai, a kabueki aia auti, ao a kairiianako aia utu bwa aia toro. Tera aron Tawita iai? “A takarua n tang Tawita ma rorobuaka ake raona ni karokoa ae a aikoa kona n tang bwa ai akea korakoraia.” E a rawawata riki Tawita ngke a a tua ana rorobuaka ake e onimakinia bwa a na “karebanaia n atibu.” (1Tam. 30:1-6) Tenua ngkai ana kangaanga Tawita aika kakaiaki n tii te taina: E a ruanikai maiuia ana utu, e maaku bwa a na tiringnga ana rorobuaka ke a na aki, ao e teimatoa n ukoukoria te Uea are Tauro. Iangoa ngkanne korakoran raraomana.

Ma tera are e karaoia Tawita imwina? E waekoa ni “kakorakoraa Tawita iroun Iehova ae Atuana.” E kangaa ni karaoa aei? Ti ataia bwa e tatataro nakon Iehova ibukini buokana ao e iaiangoa arona ngkoa ngke e buokaki iroun Iehova. (1Tam. 17:37; TaiAre. 18:2, 6) E ataia Tawita ae e riai n ukera ana kairiri Iehova, ngaia are e a titirakina Iehova te bwai ae riai ni karaoia. Ao ngke e reke irouna ana kairiri Iehova, e a bon ira naba nanona. E boni kakabwaiaaki Tawita ma ana rorobuaka iroun Iehova ao a a manga kaoki aia bwai ma aia utu. (1Tam. 30:7-9, 18, 19) Ko nori baika tenua ake e karaoi Tawita? Eng, e tataro nakon Iehova ibukini buokana, e iaiangoa aroni buokana ngkoa iroun Iehova, ao e mwakuri ana kairiri Iehova. Ti na kangaa ni kakairi iroun Tawita? Iangoi aanga aika tenua aikai:

1. Tataro. Ngkana ti a moanna n raraoma, ti kona n tataro nakon Iehova ibukini buokara ao te wanawana. Ti kabebeteaki ngkana ti bunrii baike ti raraomaeakin. Ti kona naba n tataro n te aro ae kimototo ke ni bon i nanora ngkana tii anne moa ae ti kona ni karaoia. N taai ake ti bubutii iai buokara mairoun Iehova, ti kaotia iai bwa ti kakairi iroun Tawita are kangai: “Bon au bwaa ae rietata Iehova ao au nono, ao boni Ngaia ae kamaiuai. Bon au bwaa Atuau ae I kamanoai irouna.” (TaiAre. 18:2) E ibuobuoki te tataro? E taku te tari te aine ae bwaiania ae arana  Kahlia: “Imwin au tataro, I a namakina te rau. E buokai te tataro bwa N na kakairi n aron Iehova n iaiango, ao n onimakinna riki.” Eng, te tataro bon ana bwaintituaraoi Iehova ae buokira n tokanikai i aon te raraoma.

2. Iaiangoi. Ngkana ko iaiangoi baike a riki nakoim ngkoa, ko na kona n uringi kataakim ake ko a tia n tokanikai i aoia man ana ibuobuoki Iehova? Ngkana ti iaiangoa aron Iehova ni buokira ao ni buokia naba ana toro ake ngkoa, ti na boni karekea iai korakorara ao n onimakinna riki. (TaiAre. 18:17-19) E taku te unimwaane n te ekaretia ae Joshua: “I tataui mwin au tataro ake a a tia ni kaekaaki. Ao I buokaki iai n ururingi taai ake I butiia iai Iehova te bwai teuana ao e bon anganai raoi te bwai ae I kainnanoia.” Eng, ngkana ti iaiangoa aroni buokara ngkoa iroun Iehova, ti a karekea iai te korakora ae ti kainnanoia ibukini buakanakin te iango n raraoma.

3. Mwakuri. Imwain iangoan te bae ti na karaoia n taai ni kangaanga, ti riai n ukeuke moa n Ana Taeka te Atua ibukin te kairiri ae rangi n onimakinaki. (TaiAre. 19:7, 11) A bati aika noria bwa ngkana a karaoa aia ukeuke n te kibu teuana, a a ota riki iai n aroia ni maiuakinna. E taku Jarrod ae te unimwaane n te ekaretia: “I buokaki n au kakaae n atai bwaai riki tabeua aika kaineti ma te kibu anne ao I a ota riki n te bwai ae e tuangai Iehova. I buokaki naba iai bwa N na kakoauai baike I wareki ao n ongeaba ni kairiri ake iai.” Ngkana ti ukera ana kairiri Iehova man te Baibara ao ni maiuakinna, e na bebete riki iroura reken te rau ao te kukurei n taai ake ti raraoma iai.

E ataia Tawita bwa ngkana e na tokanikai man te raraoma, e na boni kainnanoa ana ibuobuoki Iehova. E kakaitau naba n ana boutoka Iehova ao e kangai: “I kona n tamwarakea te oo ni mwaakan te Atua. Bon te Atua ae koaua ae ngaia ae kunnikaiai n te korakora.” (TaiAre. 18:29, 32) Ti bae naba n namakinna n tabetai ae a a rangi ni kakaiaki ara kangaanga ao ti a aki kona n tokanikai i aoia. Ma ti boni kona n tokanikai man ana ibuobuoki Iehova! Eng, ngkana ti tataro nakon Iehova ibukini buokara, ti iaiangoi arona ngkoa ni buokira, ao n ongeaba n ana kairiri, ti na boni kona ni kakoauaa iai bwa e na anganira te korakora ao te wanawana bwa ti aonga n tokanikai i aon raraomara.