EESÜ SÜPÜLA matsüin waaʼin sutuma tü shapawaakalü aaʼin (Prov. 12:25). ¿Alatüiche tia pümüin? ¿Isasüche püchiki püchecherüin paaʼin soʼunnaa tia? Müle pukuwaʼipa, nnojoishi piain neʼe alatüin amüin tia. Waʼakajee, eeshi chira eekai naaʼinmajüin wanee wayuu, eekai outuin wanee nüpüshi otta eekai alatüin kasa mojusü eere kepiain nia. Sünainjee tia, eesü süpüla matsüin waaʼin otta mojuin waaʼin. ¿Kasa waaʼinrajatka suulia shapaain maʼin waaʼin? a

Eesü süpüla nnojoluin shapaain maʼin waaʼin waaʼinrüle tü naaʼinrakat David. Wainma kasa alataka nümüin otta ajachijünüshi nia (1 Sam. 17:34, 35; 18:10, 11). ¿Kasa naaʼinraka David suulia shapaain maʼin naaʼin? ¿Kasa waaʼinrajatka süpüla washatüin nukuwaʼipa?

Pachiiruajaasü tü kasa mojusü alatakat nümüin David. Jülüjataa waaʼin tü alatakat wanaa sümaa nuʼluwataain nuulia chi aluwataaikai Saúl suulia nuʼutuin naaʼin. Nüntapa David nipialuʼumüin namaa na nümaajanakana süchikijee wanee atkawaa, neʼrüin suʼluwajünüin nakorolo, saʼajünüin nepia otta namaanüin na napüshikana. Niʼyalajaka maʼin David namaa na nümaajanakana, ajaʼttüsü naaʼin sutuma naʼyalajüin maʼin. Nayasaʼa joo na nümaataraliikana David noʼutee aaʼinchi joo nia süka ipa (1 Sam. 30:1-6). Apünüinsü tü kasa mojusü pachiiruajaakalü alatüin nümüin David: amaanüshii na nüpüshikana sutuma nüʼünüü, oʼutunee aaʼinchi nia natuma na nümaataraliikana otta achajaana achikichi nia nutuma chi aluwataaikai Saúl. ¡Shapaakajasaʼa naaʼin David!

¿Kasa naaʼinraka soʼunnaa tia? Awataamaatüshi nia nünainmüin Jehová süpüla nuchuntuin kaalinwaa nümüin. ¿Jamüsü sukuwaʼipa nutuma? Oʼuraajawaishi David nümüin Jehová süpüla nuchuntuin kaalinwaa otta jülüjasü naaʼin tü kasa anasü naaʼinrakat nüpüleerua sümaiwa (1 Sam. 17:37; Sal. 18:2, 6). Süka niyaawatüin saaʼu David nuʼunirüinjatüin nukuwaʼipa Jehová, nüsakirüin nia süchiirua tü naaʼinrajatkat. Nusoutapa Jehová nümüin David, naaʼinramaatüin tü nümakat nümüin. Sutuma tia, anasü nukuwaʼipa namaa na nümaajanakana nutuma Jehová. Nasaajaain na napüshikana noulia naʼünüü otta nasaajaain tü nakorolokot (1 Sam. 30:7-9, 18, 19). ¿Jarat tü apünüinsükat kasa naaʼinraka David? Oʼuraajüshi nia nümüin Jehová süpüla nuchuntuin kaalinwaa nümüin, nüsakireʼerüin naaʼin sünain tü kasa anasü naaʼinrakat nüpüleerua sümaiwa otta naaʼinramaatüin tü nuluwataakalü anain nia. ¿Kasa waaʼinrajatka süpüla washatüin nukuwaʼipa David? Wekirajaa sünain apünüinsü kasa.

1. Woʼuraaja. Anashii woʼuraajüle nümüin Jehová shapaʼawaipa waaʼin süpüla watüjaain saaʼu tü waaʼinrajatkat. Kamaʼale waya sünain aashajawaa nümaa Jehová jee waküjale nümüin süpüshuaʼa tü shapaakalü atuma waaʼin, jutateerü waaʼin. Nnojoliire süpüla kamaʼain waya sünain oʼuraajaa nümüin soʼu wanee kaʼi, eesüjaʼa süpüla motsoʼoin wanüiki nümüin jee waküjale shia nümüin suluʼu waaʼin. Wachuntawaipa kaalinwaa nümüin Jehová, jaʼyasü waaʼu weʼitaain waaʼin nünain maʼaka naaʼinrüin shia David. Müshi nia: «Müshi Jehová aka saaʼin wanee ipa miyoʼu tamüin, chi katchinkai atuma taaʼin, chi taashikai atuma taya. Chi Tamaleiwasekai müshi aka saaʼin wanee ipa tounjulaaya tamüin» (Sal. 18:2). ¿Aneetche waaʼin  woʼuraajüle? Anuu sünüiki wanee pürekutsoot Kahlia sünülia: «Anasü taaʼin süchikijee toʼuraajüin. Sutuma toʼuraajüin pansaasü taaʼin sümaa tü jülüjakat naaʼin Jehová otta teʼitaain maʼin taaʼin nünain». Anasü maʼin oʼuraajaa nümüin Jehová suulia shapaain maʼin waaʼin.

2. Wasakireʼera waaʼin. ¿Sotusüche paaʼin wanee kasa naaʼinraka Jehová püpüleerua soʼu wanee kaʼi kapüleeka oʼu pümüin püchecherüin paaʼin? Wasakireʼerüle waaʼin sünain tü kasa naaʼinrapuʼukat Jehová napüleerua na aʼyataapuʼukana nümüin otta tü naaʼinrakat wapüleerua maaʼulu, weʼitaajeerü maʼin waaʼin nünain otta aneerü waaʼin (Sal. 18:17-19). Anuu nünüiki wanee laülaashi, Joshua nünülia: «Tashajüin tü kasa nusoutakat tamüin Jehová soʼu tü kaʼi choʼujaakalü oʼu shia tamüin suulia motojuin taaʼin tü kasa naaʼinrakat tapüleerua». Wasakireʼerüle waaʼin sünain tü kasa naaʼinrakat Jehová wapüleerua, katsüinjeerü waaʼin otta nnojoleerü shapaain maʼin waaʼin.

3. Waaʼinra tü sümakat Bibliaka. Süpüla watüjaain saaʼu tü waaʼinrajatkat soʼunnaa wanee kasa alataka wamüin, anasü jülüjale waaʼin tü sümakat tü Bibliakat, jama shiain anain süpüla oʼunirüin wakuwaʼipa (Sal. 19:7, 11). Wainma maʼin na wayuu ayaawatakana saaʼu tü naaʼinrajatkat nekirajaapa maʼin sünain wanee wetsiikulo. Anuu nünüiki wanee laülaashi, Jarrod nünülia: «Tekirajaapa maʼin sünain wanee wetsiikulo, tayaawata aaʼu tü aküjüneekalü achiki. Sutuma müin sukuwaʼipa tatuma, tayaawata aaʼu tü nüküjeekalü achiki Jehová tamüin, antüsü suluʼumüin taaʼin tü pütchikat otta taaʼinrüin tü talatüinjatkalü atuma naaʼin Jehová». Wachajaale maʼin sukuwaʼipa süpüla nuʼunirüin wakuwaʼipa Jehová sükajee tü Bibliakat sümaa waaʼinrüin tü sümakat, nnojoleena jooin maʼin waya süpüla tü shapawaakalü aaʼin.

Nütüjaa aaʼu David choʼujaain nükaalinjünüin nutuma Jehová suulia shapaain maʼin naaʼin. Kojutusü nümüin nükaalinjünüin nutuma, anuujeseʼe nünüiki: «Pükaalinjeechi taya süpüla talatüin süsepü wanee pueulo». Anuu sooʼomüin nünüiki: «Katchinsü taaʼin nutuma chi Maleiwa shiimainshikai» (Sal. 18:29, 32). Eesüjaʼa jülüjale waaʼin kapüleein maʼin tü alatakat wamüin maʼaka kapüleein sülatünüin wanee süsepü pueulo, wounteetpejeʼe walatüin süchikumüin tia nükaalinjale waya Jehová. Woʼuraajüle süpüla wachuntuin kaalinwaa nümüin Jehová, wasakireʼerüle waaʼin sünain tü kasa naaʼinrakat wapüleerua otta waaʼinramaatüle tü keeʼireekat naaʼin wapüleerua, katsüinjeerü waaʼin otta jutateerü waaʼin suulia shapawaa aaʼin.