HETA vése ningo jahasa umi situasión ijetuʼúva ha ñanekevranta asýva, ha legálmente upéva ñanembosufrieterei (Prov. 12:25). ¿Oikómavapa nderehe upéva? ¿Ndépa reñandúmava sapyʼánte neremeʼẽveimaha? Oiméramo upéicha, nereiméi neaño. ¿Mbaʼérepa jaikuaa upéva? Pórke oĩ hetaiterei ñande apytépe orekóva umi rresponsavilida ijetuʼúva chupekuéra. Algúno okuida vaʼerã ihentekuéra hasykatúvare, ótro katu omano chugui iñamígo térã ihénte ohayhuetereíva, operhudika vaieterei chupe peteĩ desástre naturál, ha umícha. Jahasa jave koʼãichagua situasión jasufrieterei ha ikatu voi ñañedeprimi ha ñanembohasyete upéva. ¿Mbaʼépa ikatu ñanepytyvõ upéicha jave? a

Tuichaiterei ñanepytyvõta ñaanalisáramo rréi David ehémplo. Haʼe ningo ombohovái vaʼekue heta situasión ijetuʼuetereíva, ha inklusíve oĩ vaʼekue voi umi ojukaséva chupe (1 Sam. 17:34, 35; 18:10, 11). ¿Mbaʼépa oipytyvõ vaʼekue Davídpe ani hag̃ua oñekevrantaiterei? ¿Ha mbaʼéichapa ñanepytyvõta ñandéve jasegíramo la iñehémplo?

Heta vése ningo Davídgui ojoʼapaite vaʼekue umi provléma. Epensamína por ehémplo la oiko vaʼekuére hese okañy aja rréi Saúlgui. Haʼe ha isoldadokuéra ou jeýrõ guare peteĩ gerrahágui, tuichaiterei oñemondýi pórke otopa umi iñenemigokuéra omondapaite hague chuguikuéra umi kósa orekóva, ohapypaite chuguikuéra umi hóga, ha ojagarrapaite prisionéro ifamiliakuérape. ¿Mbaʼépa ojapo hikuái upe situasiónpe? La Biblia heʼi: “David ha umi ótro kuimbaʼe oñepyrũ hasẽ soro, hetaiterei ojaheʼógui hikuái, ikangypa opytávo” anga. Ha ndahaʼéi voi upévante, upéi katu David soldadokuéra entéroma ipochyeterei, ha ojukaséma katu chupe (1 Sam. 30:1-6). Jahecha upéicharõ David ombohovái hague upe moméntope 3 provléma tuichaitereíva: Ojapeligra la ifamília, umi isoldadokuéra jepe ojukase chupe, ha rréi Saúl osegi gueteri opersegi chupe. ¡Eñeimahinamíntena mbaʼeichaitépa oiméne oñekevranta anga raʼe David!

¿Mbaʼépa ojapo haʼe upe situasiónpe? Ensegída voi “oñemoag̃ui Ijára Jehováre, ha upéva omombarete jey chupe”. Primeroite voi haʼe oñemboʼe Jehovápe, ha upéi ojepyʼamongeta imanduʼa hag̃ua mbaʼéichapa Haʼe oipytyvõma kuri chupe anteve (1 Sam. 17:37; Sal. 18:2, 6). David ontende oikotevẽterei hague Jehová ogia chupe, ha upévare oporandu kuri chupe mbaʼépa ojapo vaʼerã. Ha oikuaa rire mbaʼépa Jehová oipota ojapo, ensegída voi ojapo upéva. Upéicha rupi Jehová ovendesi chupe ha avei umi soldádo oĩ vaʼekuépe hendive, ha haʼekuéra ikatu kuri orrekuperapaite jey la ifamília ha ikosakuéra (1 Sam. 30:7-9, 18, 19). ¿Epillápa raʼe mbaʼe mbaʼépa ojapo David? Haʼe oñemboʼe Jehovápe ha ojerure chupe ajúda, ojepyʼamongeta imanduʼa hag̃ua mbaʼéichapa Jehová oipytyvõma kuri chupe anteve, ha osegi Jehová gía. ¿Mbaʼéichapa ikatu jasegi iñehémplo? Jahechamína mbohapy mbaʼe ikatúva jajapo.

1) Eñemboʼe. Káda ves ke reñekevrantaiterei, ikatu eñemboʼe Jehovápe ha ejerure chupe ajúda. Ñamombeʼupaitéramo Jehovápe umi mbaʼe ñañandúva, upéva tuichaiterei ñanembovevýita ha ñanetrankilisáta. Ha oiméramo upe momentoitépe ndaikatúi ñañemboʼe Jehovápe trankílamente, ikatu jajapo upéva makeséa ñande pyʼapýpe, ha mbykymi jepe jaʼe chupe la ñandepyʼapýva. Káda ves ke jajerure Jehovápe ajúda jasegíta hína David ehémplo, pórke haʼe heʼi vaʼekue: “Jehová ningo peteĩ lugár  isegúro porãva, haʼete peteĩ kuéva tuicháva ikatuhápe ajeprotehe, haʼe siémpre chesalva. Che Jára ningo chéve g̃uarã haʼete peteĩ ita guasu, hendápe ikatu aha añemoʼã hag̃ua” (Sal. 18:2). ¿Péro ikatu piko ñanepytyvõ rreálmente pe ñemboʼe? ¡Si ikatu! Peteĩ prekursóra hérava Kahlia heʼi voi: “Añemboʼe rire, ¡tuichaiterei añetrankilisa! Ahechakuaa añemboʼe jave, ifasilveha chéve apensa hag̃ua Jehováicha ha avei ajeroviaitereive hag̃ua hese”. Jahechakuaa upéicharõ pe ñemboʼe haʼeha peteĩ rregálo iporãitereíva Jehová omeʼẽva ñandéve, ha tuichaiterei ñanepytyvõva ñañekevrantaiterei jave.

2) Ejepyʼamongeta. ¿Nemanduʼápa nde algúna situasión ijetuʼuetereíva ikatu vaʼekue regueropuʼaka Jehová nepytyvõ rupínte? Jajepyʼamongetárõ umi mbaʼe Jehová ojapóma vaʼekuére ñanderehehápe ha ótro isiervokuéra rehehápe, tuichaiterei ñanembarete jeýta ha jajeroviavéta hese (Sal. 18:17-19). Peteĩ ansiáno hérava Joshua heʼi voi: “Che areko peteĩ lístape entéro umi orasión Jehová okontestáma vaʼekue chéve. Ha upéva tuichaiterei chepytyvõ chemanduʼa hag̃ua mbaʼéichapa haʼe okontesta chéve espesífikamente peteĩ mbaʼe ajerure vaʼekue chupe”. Jahechaháicha, jajepyʼamongetáramo umi mbaʼe Jehová ojapóma vaʼekuére ñanderehehápe, ñanembarete jeýta ha ndajaikomoʼãi ñañekevrantaiterei.

3) Esegi Jehová gía. Jadesidi mboyve oimeraẽ mbaʼe, iporãta jahekáramo Jehová gía la Bíbliape (Sal. 19:7, 11). Oĩ ermáno ojapóva upéva oanalisávo espesífikamente peteĩ téxto, ha upéicha ifasilve chupekuéra opilla hag̃ua mbaʼéichapa ikatu ojapo la oaprendéva upévagui. Peteĩ ansiáno hérava Jarrod heʼi voi: “Ainvestiga porãvo peteĩ téxto, ikatu aaprende hetaitereive mbaʼe upévagui ha chepytyvõ antende hag̃ua la Jehová chemboʼeséva hína. Upéicha rupi la astudiáva opokoiterei cherehe, ha upéi ikatu ajapo la aaprendéva”. Ñañehaʼãmbaitéramo jasegi Jehová gía, ifasilvéta ñandéve ñaaguanta hag̃ua ñañekevrantaitereíramo jepe.

David ohechakuaa vaʼekue oikotevẽtereiha Jehová ajúda pono oñekevrantaiterei. Ha haʼe ovaloraiterei vaʼekue la Jehová ojapóva hesehápe, upévare heʼi vaʼekue: “Ñandejára, nde chemombarete rupi umi murálla ári jepe ikatu ahasa. Ñandejára hína pe chemombaretéva” (Sal. 18:29, 32). Sapyʼánte ikatu ñañandu pe provléma ñambohováiva ojoguaha peteĩ murálla ijyvatetereívape, ha ndaikatumoʼãiva voi jahasa. Péro Jehová ñanepytyvõramo, ikatúta jajapo upéva ha jasupera oimehaichagua provléma. Ñañemboʼéramo Jehovápe, jajepyʼamongetáramo umi mbaʼe haʼe ojapóma vaʼekuére ñanderehehápe, ha jasegíramo igía, ikatu ñaime segúro haʼe si o si ñanepytyvõtaha ani hag̃ua ñañekevrantaiterei.