MÍ GÁN yí magbọjẹ jlẹdo agbàn pinpẹn he to ahun ji na mí de go. (Howh. 12:25) Be a ko pehẹ magbọjẹ sinsinyẹn de to gbẹzan towe mẹ pọ́n ya? Be e ko jọ pọ́n bọ a do numọtolanmẹ lọ dọ emi ma sọgan sọ doakọnnanu humọ ya? Eyin mọ wẹ, e ma yin hiẹ ṣo wẹ e to mọ na. Susu mítọn lẹ wẹ dona penukundo hagbẹ whẹndo tọn he to azọ̀njẹ de go, ko hẹn mẹvivẹ́ de bu to okú mẹ, ko jiya nugbajẹmẹji jọwamọ tọn de tọn kavi pehẹ ninọmẹ devo de he ko hẹn mí vọgán to agbasa mẹ, to apọ̀nmẹ podọ to numọtolanmẹ-liho. Amọ́, etẹwẹ sọgan gọalọna mí nado pehẹ magbọjẹ lẹ * po kọdetọn dagbe po?

Mí gán plọn nususu gando lehe mí gán pehẹ magbọjẹ do go, eyin mí gbadopọnna apajlẹ Ahọlu Davidi tọn. E pannukọn ninọmẹ sinsinyẹn lẹ to gbẹzan etọn mẹ, etlẹ yin dehe gán hẹn okú wá na ẹn lẹ to whedelẹnu. (1 Sam. 17:34, 35; 18:10, 11) Nawẹ Davidi pehẹ magbọjẹ lẹ po kọdetọn dagbe po gbọn? Nawẹ mí gán hodo apajlẹ etọn gbọn?

Davidi pehẹ whlepọn susu to ojlẹ dopolọ mẹ. Di apajlẹ, lẹnnupọndo nujijọ de ji he wá aimẹ whenue e to hinhọ̀n na Ahọlu Sauli he to okú etọn dín klinkán-klinkán. Whenue Davidi po sunnu etọn lẹ po lẹkọ sọn awhànfun gbé to gbèdopo, yé jẹflumẹ sinsinyẹn whenue yé mọdọ kẹntọ lẹ ko fìn nutindo yetọn lẹ, fiọ ohọ̀ yetọn lẹ bo ko sọ bẹ hagbẹ whẹndo tọn yetọn lẹ sọyi di kanlinmọ. Nawẹ Davidi yinuwa gbọn? “Davidi po sunnu he to e dè lẹ po jẹ avivi ji po ogbè lélé po kaka bọ huhlọn vọ̀ do yé nado viavi.” Gbọnvona ayimajai Davidi tọn, sunnu he go e dejido lẹ sọ “to didọ dọ yé na dlan zannu do e hù.” (1 Sam. 30:1-6) Todin Davidi pannukọn nuhahun sinsinyẹn atọ̀n to ojlẹ dopolọ mẹ: Whẹndo etọn to owù mẹ, e to budi dọ sunnu etọn lẹ na hù i, podọ Ahọlu Sauli gbẹ́ to ogbé etọn yàn. Yí nukun homẹ tọn do pọ́n magbọjẹ he Davidi dona ko tindo!

Etẹwẹ Davidi wà? To afọdopolọji e “na huhlọn ede to Jehovah Jiwheyẹwhe etọn mẹ.” Nawẹ Davidi sọgan ko wà ehe gbọn? Aṣa Davidi tọn wẹ nado nọ biọ alọgọ Jehovah tọn to odẹ̀ mẹ, bosọ lẹnnupọndo lehe Ewọ ko gọalọna ẹn wayi do ji. (1 Sam. 17:37; Salm. 18:2, 6) Davidi mọdọ emi dona dín anademẹ Jehovah tọn, enẹwutu e kanse Jehovah lehe e dona yinuwa do. Whenue Davidi mọ anademẹ Jehovah tọn yí godo, e yinuwa to afọdopolọji. Taidi kọdetọn de, Jehovah dona ewọ po sunnu etọn lẹ po bọ yé gọ̀ hagbẹ whẹndo tọn po nutindo yetọn lẹ po yí. (1 Sam. 30:7-9, 18, 19) Be a doayi onú atọ̀n he Davidi wà lẹ go ya? E hodẹ̀ nado biọ alọgọ Jehovah tọn, e lẹnayihamẹpọn do nuhe Jehovah ko wà na ẹn wayi lẹ ji, bosọ yinuwa sọgbe hẹ anademẹ Jehovah tọn. Nawẹ mí gán hodo apajlẹ Davidi tọn gbọn? Mì gbọ mí ni lẹnnupọndo aliho atọ̀n delẹ ji.

1. Nọ hodẹ̀. Mí gán hodẹ̀ hlan Jehovah bo biọ alọgọ po nuyọnẹn po, whedepopenu he mí jẹ magbọjẹ lẹ tindo ji. Mí gán de agbàn sọn kọ̀ji na míde, eyin mí nọ yí whenu zan nado dọ nuhe to ahun ji na mí lẹ na ẹn. Kavi mí gán hodẹ̀ kleun de to ahun mẹ eyin nuhe ninọmẹ mítọn na mí dotẹnmẹ nado wà lẹpo niyẹn. Whedepopenu he mí lẹhlan Jehovah nado mọ alọgọ, mí nọ dohia dọ mí tindo jidide dopolọ taidi Davidi he dọmọ: “Jehovah wẹ awinyan po figángán ṣie po, podọ Ewọ wẹ nọ whlẹn mi gán. Jiwheyẹwhe ṣie wẹ osé ṣie, mẹhe mẹ yẹn  nọ dín fibẹtado te.” (Salm. 18:2) Be odẹ̀ nọ diọ nude nugbonugbo ya? Mẹmẹyọnnu gbehosọnalitọ de he nọ yin Kahlia dọmọ: “To whenue n’ko hodẹ̀ godo, n’nọ vò sọn ahun mẹ. Odẹ̀ nọ gọalọna mi nado hẹn linlẹn ṣie sọgbe hẹ linlẹn Jehovah tọn, podọ jidide ṣie to ewọ mẹ sọ nọ jideji.” Na nugbo tọn, awuwledainanu huhlọnnọ de wẹ odẹ̀ yin sọn Jehovah dè he nọ gọalọna mí nado pehẹ magbọjẹ.

2. Nọ lẹnayihamẹpọn. Dile a to nulẹnpọndo nuhe ko jọ wayi to gbẹzan towe mẹ lẹ ji, be a gán flin whlepọn he a penugo bo doakọnna, na Jehovah gọalọna we wutu lẹ ya? Eyin mí lẹnayihamẹpọn do lehe Jehovah ko gọalọna míwlẹ po devizọnwatọ etọn hohowhenu tọn lẹ po do ji, jijọho ahun mẹ tọn mítọn nọ jideji bọ mí sọ nọ dejido ewọ go dogọ. (Salm. 18:17-19) Mẹho agun tọn de he nọ yin Joshua dọmọ: “N’tindo kandai de he bẹ odẹ̀ ṣie he Jehovah na gblọndo yetọn lẹ hẹn. Ehe ko gọalọna mi nado flin whenue n’biọ onú tangan de Jehovah, bọ e na mi nuhe n’do hudo etọn lọ pẹẹ.” Mọwẹ, eyin mí lẹnnupọn sisosiso do nuhe Jehovah ko wà na mí wayi lẹ ji, mí nọ vọ́ huhlọn mọyi nado diahi hẹ magbọjẹ.

3. Nọ yinuwa. Whẹpo mí nido basi dide lehe mí na yinuwa to ninọmẹ de mẹ do tọn, mí gán lẹhlan Ohó Jiwheyẹwhe tọn nado mọ anademẹ dejidego hugan lẹ. (Salm. 19:7, 11) Mẹsusu wẹ ko mọdọ eyin yé basi dodinnanu do wefọ tangan de ji, yé nọ mọnukunnujẹ lehe wefọ lọ gando yé go do mẹ dogọ. Mẹho agun tọn de he nọ yin Jarrod dọmọ: “Eyin n’basi dodinnanu, e nọ gọalọna mi nado mọ adà wefọ de tọn susu lẹ, podọ nado mọnukunnujẹ nuhe Jehovah jlo na dọna mi mẹ. Ehe nọ zọ́n bọ wefọ lọ nọ họnwun na mi ganji, bọ n’nọ penugo nado yinuwa sọgbe hẹ anademẹ etọn.” Eyin mí nọ dín anademẹ Jehovah tọn to Owe-wiwe lẹ mẹ bosọ nọ yinuwa sọgbe hẹ ẹ, mí nọ penugo dogọ nado pehẹ magbọjẹ.

Davidi mọnukunnujẹemẹ dọ eyin alọgọ Jehovah tọn dẹ́n, emi ma gán pehẹ magbọjẹ po kọdetọn dagbe po. E yọ́n pinpẹn alọgọ Jehovah tọn sọmọ bọ e yin whinwhàn nado dọmọ: “Po huhlọn Jiwheyẹwhe tọn po wẹ yẹn sọgan lọ́n dasá adó. Jiwheyẹwhe nugbo lọ wẹ mẹlọ he yí huhlọn ṣinyọ́n na mi.” (Salm. 18:29, 32) E gán nọ ṣí na mí dọ whlepọn mítọn lẹ taidi adó he mí ma gán lọ́n dasá lẹ. Amọ́, po alọgọ Jehovah tọn po, mí gán duto nuhahun sinsinyẹn depope ji! Na nugbo tọn, eyin mí nọ hodẹ̀ bo nọ biọ alọgọ Jehovah tọn, nọ lẹnayihamẹpọn do nuhe ewọ ko wà na mí lẹ ji bosọ nọ yinuwa sọgbe hẹ anademẹ etọn, mí gán deji dọ ewọ na na mí huhlọn po nuyọnẹn he mí do hudo etọn po nado pehẹ magbọjẹ mítọn lẹ po kọdetọn dagbe po!