JA TÖIBIKATA krubäte ye abokän tribe doboko ye kwrere tä ni mike ulire krubäte (Prov. 12:25). ¿Kukwe ye kwrere ben mä tärä ja tuin? ¿Kä ñan kitera nüke mäi o ñan kitera kwentari mäi? Ye erere akräke mä ye ñan aibe tä ja tuin kukwe yebe. Ni kwati tä ni iti ngübare, ni mräkä tare nikwe krütani nikän, kukwe tare nakaninkä aune kukwe mada mada tare ben nita ja tuin. Kukwe ye tä ni mike nainte ja ngrabarebiti, ja töibiti aune ja ruin ño nie yebiti. ¿Dre raba ni dimike ja tuakäre ja töibikata krubäte yebe? a

Rei David käkwe kukwe bämikani ye raba ni dimike ja tuakäre ja töibikata krubäte yebe. Niarakwe ja tuani kukwe taretare ben aune ja nire kwe namani kukwe tare te (1 Sam. 17:34, 35; 18:10, 11). ¿Dre nuainbare kwe ja tuakäre ja töibikata krubäte yebe? ¿Ni raba dre nuainne ja ngwankäre niara erere?

David käkwe ja tuani kukwe taretare ben kä arabe ngwane. Ñodre rei Saúl tö namani niara kämikabätä yebätä nämäne ngitie ye ngwane dre namani bare yebätä ani töbike. Niara aune nitre rükä kwe nämäne rüre aune nükaninta ngwane, niaratre rüe käkwe jondron kwetre goibare kän, ju kwetre kukwani aune mräkätre kwe jänikani, ye täbätä nükanintre. ¿Davidkwe ja töi mikani ño? Biblia tä niere: “David bätä nitre rükä kwe namani muen krubäte. Muabare kwetre nememe di ñan namani muakäre ngwane”. Aune bätuakäre nitre ie niara nämäne tö ngwen namani täkämana jäbiti (1 Sam. 30:1-6). Kukwe tare ketamä ben David nämäne ja tuin aune kä arabe näire: mräkätre kwe nämäne kukwe tare te, nitre rükä kwe nämäne rätekä gata yebiti aune Saúl nämäne näin jiebiti. ¿David nämäne ja töibikaire krubäte ye mä raba bämike ja okwäte?

¿Ye ngwane dre nuainbare kwe? Ben gwairebe Jehová känänbare kwe ja dimikakäre. ¿Aune nuainbare ño kwe? Käre Jehovakwe David dimikadre ye David nämäne ribere Jehovai aune Jehovakwe dre nuainbarera mekeranike kräke yebätä nämäne töbiketari (1 Sam. 17:37; Sal. 18:2, 6). Jehovakwe jie ngwandre ye David nämäne ribere jai nükani gare ie. Aisete dre nuaindre kwe ye ngwanintari kwe Jehovai. Aune Jehovakwe kukwe niebare ie ngwane ben gwairebe ja töi mikani kwe kukwe nuainne, ye köböire Jehovakwe kukwe kwin mikani nemen bare David aune nitre rükä kwe kräke aune mräkätre kwe bätä jondron kwetre namaninta kwetre (1 Sam. 30:7-9, 18, 19). ¿David kukwe ketamä meden nuainbare nibira gare mäi? Orabare kwe Jehovai ja di käräkäre ie, Jehovakwe dre nuainbare kräke mekeranike yebätä töbikataribare kwe aune Jehovakwe dre niebare ie ye erere nuainbare kwe. ¿Ni raba ja ngwen ño David erere? Kukwe ketamä ni raba nuainne ye ani mike gare jai.

1. Nikwe oradre. Ni kite ja töibikaire krubäte ngwane nikwe dre nuaindre yebätä Jehovakwe ni dimikadre yekäre nikwe oradre ie. Nikwe oradre raire aune kukwe meden tä ni mike töbike krubäte ye nikwe niedre ie ye köböire ja rabaita ruinta kwin nie. O oradre jötrö aune käbube ye aibe rabadre nuaindre nie ye ngwane, ni raba nuainne arato. Batire batire nita ja di kärere Jehovai ngwane, Davidkwe tö ngwanbare Jehovai ye erere nita nuainne. Salmos 18:2 yekänti niebare kwe: “Jehová abokän jäkwata tikwe, ti kriemikara kwin, ti mikaka kwäre. Ngöbö tikwe abokän jä tikwe, bätä tita ja kriemike”. ¿Orasion ye raba ni dimike ya? Prekursora iti kädekata Kahlia tä niere: “Tita orare ye bitikäre  jata nemen ruin kwin tie. Orasion ye tä ti dimike ja töi mike Jehovata töbike ño ye erere aune tö ngwen ie”. Erametre orasion ye jondron ütiäte krubäte biani Jehovakwe nie ye tä ni dimike ja tuakäre töbikata krubäte yebe.

2. Nikwe töbikadretari. Mätä nikren ja jiebiti ngwane kukwe ruärebätä Jehovakwe ñan mä dimikadre akräke mä ñan raba kä ngwen nüke jai, ¿kukwe ye kwrere törö mäi? Jehovakwe nitre niara mikaka täte mekerabe dimikani ño aune tä mä dimike ño yebätä mäkwe töbikadretari, ye käkwe mä dimikai tö ngwen bäri niarai aune ja rabaita ruin jäme mäi (Sal. 18:17-19). Ni umbre ji ngwanka kädekata Joshua tä niere: “Tikwe dre käräbarera orasionte Jehovai ye erere tä mike nemen bare ti kräke orasion ye tä tikani täräbätä jai tikwe. Tikwe dre käräbare metrere ie aune ye erere mikani nemen bare kwe ti kräke kä debe näre te ye ti raba ngwen törö jai”. Jehovata dre nuainne ni kräke yebätä nikwe töbikaitari ngwane, ye käkwe ja di biainta nie ja tuakäre ja töibikata krubäte yebe, ye nemen gare metre nie.

3. Nikwe kukwe nuaindre. Nikwe kukwe diandre nuaindre jai kukwe keteitibätä ye känenkri nikwe kukwe känändre jai Bibliabätä, ñobätä ñan aune Biblia ye abokän tärä bäri kwin ni jie ngwankäre (Sal. 19:7, 11). Bersikulo keteitibätä kukwe känändre kukwe mikakäre gare bäri jai, ye köböire kukwe ye mikadre ño täte ye tä nüke gare bäri kwin ye nükanina gare nitre kwati ie. Jarrod, abokän ni umbre ji ngwanka, tä niere: “Tita kukwe känene bäri kukwe mikakäre gare jai ye köböire bersikulo yebätä kukwe meden meden tärä ye tä nemen gare tie, ye köböire Jehová tö dre niei tie ye tä nüke gare tie. Kukwe kwe tä mate ti brukwäte aune kukwe meden tuin kwin ie, ye ti töta nemen nuainbätä”. Jehovakwe ni jie ngwandre ye nita känene Bibliabätä aune kukwe nuain mananta kwe mikakäre täte ye nita mike täte ngwane, nita nemen juto biare ja tuakäre ja töibikata krubäte yebe.

Jehovakwe David dimikadre ja tuakäre ja töibikata krubäte yebe, ye nämäne ribere jai nämene gare David ie. Ngöbö nämäne dimike yebätä nämäne debe bien, aisete niebare kwe: “Ngöbö diebiti ti raba niken kibita kunkwane” aune niebare kwe arato “Ngöbö metre ye ja di bianka tie” (Sal. 18:29, 32). Kukwe tare ben nita ja tuin ye abokän ki kwrere ñan nemen nuäre ni kräke dikakakärebätä kunkwäre raba nemen ruin nie, akwa Jehová die köböire ni raba ja tuin kukwe yebe. Jehovakwe ni dimikadre yebätä nikwe oradre ie, dre nuainbarera kwe ni kräke yebätä nikwe töbikadretari aune dre niedre kwe nie ye erere nikwe nuaindre, ye köböire niarakwe ja di biain nie aune ni mikai töbike kwin kwe ja tuakäre ja töibikata krubäte yebe ye tädre gare metre nie.