OMULAGO gwakaba nka muzigo guzidohere oku murhima gwerhu. (Mez. 12:25) Wachigerere kugwarha omulago gukuchubukire omu kalamo si? Onachiyunva nka lero orhakachigala kugulwisa? Akaba ntyo ku bili, arhali wenyine. Banene mu rhwewe bayunvirhe bahwererwe, bashurhirwe n’omulago, n’okubona oku ebintu bibachubukire eju ya mpanvu zinene. Omufano, baguma bashishikeere omulwala, abandi bafisize omuzigirwa, hali n’abandi balibukire eju y’echinjira. Aliko si, bichi byakarhurhabala rhugale kulwisa rhunahime omulago? *

Rhwakamenya okuntu rhwalwisa omulago gwerhu omu kulola omufano gwa Mwami Daudi. Alihurene bibazo binene bikomeere omu kalamo, chiro na mango maguma alibwirir’arhafa. (1 Sa. 17:34, 35; 18:10, 11) Gurhe Daudi alilwisize n’okuhima omulago? Nka gurhe rhwakayiganya omufano gwage?

Daudi alihurene bigeregezo binene chaligumiza. Waza gurhe byalimuberere amango aliri emunda alibirhiraga yi Mwami Sauli w’omunizi arhamuyirha. Lusiku luguma, Daudi n’abambali bage babere barhenga emunda bajaga omu byabo by’echisoda, byalibalumire oku murhima bwenene okubugana abanzi babo bazimbire ebirugu byabo, badwikire enju zabo, banahekere emilala yabo minyago. Daudi ajira gurhe? Yewe n’abambali bage “bahwanza kulaka bwenene bachoka.” Kandi alishubire kuyunva kahinda kanene, bulala abambali bage ‘balimugalukiire oku mubiri balonza bamuyirhe n’amabale.’ (1 Sa. 30:1-6) Ahala rhubwene oku Daudi alihurene bibazo bisharhu chaligumiza: Omulala gwage gwaliri omu buhanya, abambali bage nabo balonza mpu bamuyirhe, na Mwami Sauli naye aliri amuhiga. Jaga wawaza mulago gungana gurhe Daudi akaba ey’aligwerhe!

Bichi alijirire? Han’aho “achikomeza kugerera Yehova Mungu wage.” Nka gurhe agalaga kujira ntyo? Daudi alikoomere kusalira Yehova amurhabale n’okuyibuka eby’amujirire omu mango magerere. (1 Sa. 17:37; Zb. 18:2, 6) Alibwene oku kuli kwinja aheme Yehova obwerekezi, na ntyo amubaza bichi ajirage. Oku Daudi anamala kuyunva obwerekezi bwa Yehova, han’aho ajira nk’oku abwirirwe. Echola charhuma Yehova amugisha yewe n’abambali bage, banagalula emilala n’ebirugu byabo. (1 Sa. 30:7-9, 18, 19) Ka wanabwene bintu bisharhu Daudi alijirire? Alihemere Yehova oburhabale omu sala, aliri ayibuka gurhe Yehova amurhabalaga omu siku zagerere, anakolesa obwerekezi Yehova amuhaga. Gurhe si rhwakayiganya Daudi? Tala njira esharhu rhwakamuyiganyamo.

1. Osalire. Amango moshi rhwamayunva omulago, rhwakasalira Yehova arhurhabale arhuhe n’obwengehe. Rhwayunva rhuluhukire nka rhwamabwira Yehova omu sala byoshi birhuli oku murhima. Changwa rhwakajira esala liyufuhire, elya bwisirire, akaba lirhwakagala kujira nk’oku ehali rhulimo mw’akola kasanzi enali. Amango moshi rhwamahema Yehova oburhabale, rhwanachizeraye kuguma na Daudi waderhaga mpu: “Yehova ali ntaza yani na chisenge chani, yen’Olala onanyokola. Mungu wani ali lubale lwani nanchibishamo.” (Zb. 18:2) Ka kweri esala linarhabala? Mwali-werhu Kahlia w’omupainiya ashambere ntya:  “Enyuma y’okusalira, inanyunva ntulerere. Esala lyantabere kufarhisa amawazo mani n’ama Yehova, inamulangalire kulusha.” Omu bukweri, esala luli luhembo lwinja bwenene Yehova arhuhere lunarhurhabala kulwisa ebibazo.

2. Oyibuke ebi Yehova akujirire. Nk’oshubire kugeza omu bwenge ebi wagereremo, wakayibuka ebigeregezo wagalaga kuhima oku Burhabale bwa Yehova bonyine si? Amango rhwamayibuka okuntu Yehova arhurhabere nk’oku analiri arhabala abakozi bage ba mira, rhwayunva rhurhulerere n’okuchizeraye bwenene. (Zb. 18:17-19) Mushamuka muguma mpu ye Joshua aderhe, “Imenyere masala manene nahaabirwe kw’ebishubizo. Echola chinantabala kuyibuka amango moshi nahemere Yehova chintu chilebe, anampa ech’inkeneere.” Nechi, amango rhwamawaza gurhe koshi Yehova arhushishikere, rhwagwarha emisi rhukeneere y’okulwisa omulago.

3. Okolese obwerekezi. Embere rhurhole esimikiro y’echi rhwajira omu hali yoshi-yoshi rhulimo, rhwakarhanga kulonza empanulo zakarhurhabala omu Chinwa cha Mungu. (Zb. 19:7, 11) Banene babwene kw’amango bamalonza emyazi elolere lwandiko lulebe, yibaja bayunva bwinja nka gurhe olola lwandiko luhumire oku kalamo kabo. Omushamuka oyirikirwe Jarrod afasiriye ntya: “Okulonza emyazi kunantabala menye binene oku bilolere olwandiko, n’okuyunva bichi Yehova ambwirire. Kunarhuma nayunva bwinja eb’indi nasoma, nanaja nakolesa obwerekezi ampere.” Nka rhulonzeze obwerekezi bwa Yehova omu Mandiko n’okubukulikira, rhwagwarha emisi y’okulwisa omulago.

Daudi alirhegerere oku y’agala kulwisa anahime omulago, alikeneere oburhabale bwa Yehova. Aligwerhe shukrani nene oku burhabale Yehova amuhaga, n’echola charhuma aderha mpu: “Oku misi ya Mungu, nakashona oku chibambazi. Mungu w’okuli yewanyambisize emisi.” (Zb. 18:29, 32) Hali oku rhwakabona nk’ebibazo byerhu biyumangire nka bibambazi birhakashonwako. Aliko kugerera oburhabale bwa Yehova, rhwakagala kushona ku ngasi chibambazi ch’echigeregezo cherhu! Kweri, rhukahema Yehova oburhabale omu sala, rhunayibuke byoshi arhujirire, n’okukolesa obwerekezi arhuhere, rhwakachizera oku arhuha emisi n’obwengehe rhukeneere yirhugala kulwisa rhunahime emilago yerhu!