KON nabalaka kita, daw pareho lang nga may mabug-at kita nga ginapas-an, kag daw nagapin-ot ang aton dughan. (Hulu. 12:25) Nabudlayan ka bala bangod sang grabe nga kabalaka? Pamatyag mo bala daw indi mo na ini masarangan? Indi lang ikaw ang nakaeksperiensia sini. Madamo sa aton ang nabalaka, na-depress, kag daw nadulaan sang kusog bangod sang lainlain nga mga rason. Halimbawa, ang iban may ginaatipan nga miembro sang ila pamilya nga nagamasakit, ang iban napatyan sang pinalangga, kag ang iban nahalitan sang kalamidad. Pero ano ang makabulig sa aton kon nabalaka kita? a

Madamo kita sing matun-an sa halimbawa ni Hari David parte sa dapat naton himuon kon nabalaka kita. Nakaeksperiensia sia sang madamo nga kabudlayan, kag may mga tion pa gani nga ara sa katalagman ang iya kabuhi. (1 Sam. 17:34, 35; 18:10, 11) Ano ang nakabulig kay David sang nabalaka sia? Paano naton sia mailog?

May tion nga nagdulungan ang mga problema ni David. Halimbawa, binagbinaga ang tion nga nagapalagyo sia kay gusto sia patyon ni Hari Saul. Pagbalik ni David kag sang iya mga tinawo halin sa pagpakig-away, nakibot gid sila kay ginkuha sang ila mga kaaway ang ila mga pagkabutang, ginsunog ang ila mga balay, kag ginbihag ang ila mga pamilya. Ano ang nabatyagan ni David? “Naghibi sing mabaskog si David kag ang iya mga tinawo tubtob wala na sila sing ihibi.” Nadugangan pa gid ang kabalaka ni David kay nagsiling ang ginasaligan niya nga mga tinawo nga “batuhon nila sia.” (1 Sam. 30:1-6) Tatlo ang problema ni David: Ara sa katalagman ang iya pamilya, gusto sia patyon sang iya mga tinawo, kag ginalagas sia ni Hari Saul. Gani posible nga grabe gid ang kabalaka ni David.

Ano ang ginhimo ni David? ‘Ginpabakod niya dayon ang iya kaugalingon paagi sa bulig ni Jehova nga iya Dios.’ Paano ini nahimo ni David? Kabalo kita nga pirme nagapangamuyo si David kay Jehova para mangayo sang bulig, kag ginapamalandungan niya kon paano sia ginbuligan ni Jehova sang una. (1 Sam. 17:37; Sal. 18:2, 6) Kabalo si David nga kinahanglan niya ang bulig ni Jehova, gani ginpamangkot niya si Jehova kon ano ang dapat niya himuon. Pagkabaton ni David sang instruksion ni Jehova, gintuman niya ini dayon. Gani ginpakamaayo ni Jehova si David kag ang iya mga tinawo. Naluwas nila ang ila mga pamilya kag nabawi nila ang ila mga pagkabutang. (1 Sam. 30:7-9, 18, 19) Natalupangdan mo bala kon ano ang ginhimo ni David? Tatlo ang iya ginhimo. Nangamuyo sia kay Jehova nga buligan sia, ginpamalandungan niya kon paano sia ginbuligan ni Jehova sang una, kag gintuman niya ang instruksion ni Jehova. Paano naton mailog si David? Binagbinagon naton ang tatlo ka paagi.

1. Mangamuyo. Kon nabalaka kita, puede kita mangamuyo kay Jehova nga buligan kita kag hatagan kita sing kaalam. Kon isugid naton sa iya ang tanan naton nga ginakabalak-an, makabulig ini sa aton nga magtawhay ang aton hunahuna. Puede man kita makapangamuyo sing hipos kag sing malip-ot kon amo lang ina ang aton mahimo sa isa ka sitwasyon. Sa kada tion nga nagapangayo kita sang bulig kay Jehova, ginapakita naton nga nagasalig kita sa iya pareho kay David. Nagsiling si David: “Si Jehova amo ang akon  daku nga bato kag ang akon kuta kag ang akon Manluluwas. Ang akon Dios amo ang akon igang, nga akon dalangpan.” (Sal. 18:2) Epektibo gid man bala ang pangamuyo? Ang isa ka sister nga payunir nga si Kahlia nagsiling: “Pagkatapos ko mangamuyo, nagatawhay ang akon hunahuna. Ginabuligan ako sang pangamuyo nga ilugon ang panghunahuna ni Jehova kag mas magsalig sa iya.” Gani, ang pangamuyo isa ka regalo ni Jehova nga makabulig gid sa aton kon nabalaka kita.

2. Magpamalandong. Hunahunaa ang mga tion nga nasarangan mo ang imo problema bangod ginbuligan ka ni Jehova. Kon pamalandungan naton kon paano kita ginbuligan ni Jehova kag ang iya mga alagad sang una, nagalig-on kita kag mas nagasalig kita sa iya. (Sal. 18:17-19) “May ara ako listahan sang akon mga pangamuyo nga ginsabat ni Jehova,” siling sang gulang nga si Joshua. “Nakabulig ini sa akon nga madumduman ang mga tion nga ginhatag ni Jehova kon ano ang akon ginpangabay.” Kon pamalandungan naton kon paano kita ginbuligan ni Jehova sang una, mapalig-on kita sini nga mangin mabakod kon nabalaka kita.

3. Magtuman. Antes kita magdesisyon kon ano ang dapat naton himuon sa isa ka sitwasyon, dapat kita magpagiya sa Pulong sang Dios nga amo ang makahatag sang pinakamasaligan nga laygay. (Sal. 19:7, 11) Madamo ang nagasiling nga kon naga-research sila parte sa isa ka teksto, nagabulig ini sa ila nga mahangpan kon paano nila ini maaplikar. Ang isa ka gulang nga si Jarrod nagsiling: “Kon naga-research ako, mabal-an ko ang tanan nga dapat ko matun-an parte sa isa ka teksto kag mahangpan ko kon ano ang gusto ni Jehova nga himuon ko. Nagabulig ini sa akon nga patihan gid ang akon ginatun-an para matuman ko sia.” Kon nagapagiya kita kay Jehova paagi sa pagtuon sang Biblia kag kon ginatuman naton ang iya laygay, mas masarangan naton ang kabalaka.

Nahangpan ni David nga para masarangan niya ang kabalaka, kinahanglan niya ang bulig ni Jehova. Nagapasalamat gid sia sa bulig ni Jehova, gani nagsiling sia: “Paagi sa gahom sang Dios mataklas ko ang pader. Ang matuod nga Dios nagahatag sa akon sing kusog.” (Sal. 18:29, 32) Posible nagabatyag kita nga ang aton mga problema daw pareho sa pader nga indi naton mataklas. Pero sa bulig ni Jehova, masarangan naton ang bisan ano nga problema. Huo, kon mangamuyo kita kay Jehova nga buligan kita, kon pamalandungan naton ang tanan nga ginhimo ni Jehova para sa aton, kag kon tumanon naton ang iya laygay, makasalig kita nga hatagan niya kita sing kusog kag kaalam para masarangan naton ang kabalaka.