KEV nyuaj siab ntxhov plawv zoo yam li ib lub nra tsuam rawv saum yus xwb pwg. (Pajlug 12:25) Koj puas tau raug kev nyuaj siab ntxhov plawv dua li hauv koj lub neej? Puas ua rau koj puas siab puas ntsws thiab ua tsis tsheej dab tsi? Muaj coob leej ntau tus kuj raug tib yam li koj thiab. Peb ib txhia yuav tau tu cov neeg muaj mob muaj nkeeg hauv peb tsev neeg, ntsib kev ploj kev tuag hauv lub cuab lub yig, raug cua daj cua dub los sis lwm yam uas piav tsis txhij tsis txhua. Thaum peb raug tej yam zoo li no, yuav ua rau peb tsis xav ua dab tsi, lwj siab ntsuav, thiab xav nyob ib leeg ntsiag to. Yog li ntawd, peb yuav nrhiav kev pab qhov twg los? a

Cia peb mus nyeem txog Vaj Ntxwv Daviv xwv thiaj pab tau peb thev taus tej kev nyuaj siab ntxhov plawv. Daviv raug ntau ntau yam hauv nws lub neej, tej thaum kuj ua rau nws yuav luag raug kev ploj kev tuag. (1 Xamuyees 17:34, 35; 18:10, 11) Yog li ntawd, thaum Daviv raug kev nyuaj siab ntxhov plawv nws ho nrhiav tau kev pab li cas? Peb khaws tau nws tus yam ntxwv li cas?

Muaj ib zaug Daviv raug ntau ntau yam hauv nws lub neej. Xws li thaum Vaj Ntxwv Xa-ules nrhiav nws tua pov tseg. Daviv thiab nws cov neeg tau mus ua rog rov los, lawv txawm pom tias lawv cov yeeb ncuab twb tuaj txeeb lawv tej txhiam laj txhiam xwm nqa mus tag lawm, muab lawv tej tsev hlawv tag, thiab ntes lawv poj niam me nyuam mus tag huv tib si. Yog li ntawd, Daviv yuav ua zaj twg tsav twg? “Daviv thiab nws cov neeg tsa suab hlo quaj tsis ntsiag mus txog thaum lawv zog ntaug tas.” Tsis tas li ntawd, Daviv cov neeg hais tias “lawv yuav muab pobzeb ntaus Daviv.” (1 Xamuyees 30:1-6) Daviv thooj txhij raug 3 yam teeb meem loj kawg nkaus hauv nws lub neej: Nws tsev tib neeg los raug luag ntes, nws cov neeg los tseem yuav muab nws tua, thiab Vaj Ntxwv Xa-ules los haj tseem caum nws tua tsis so. Daviv lub nra no mas hnyav kawg nkaus li.

Tom qab Daviv raug tej no, nws ua li cas xwb? Daviv kheev thov Yehauvas pab thiab xav txog tej yam uas Yehauvas twb tau pab nws dua los lawm. Twb yog vim li ntawd, “[Yehauvas] uas yog Daviv tus Vajtswv txhawb Daviv lub zog.” (1 Xamuyees 17:37; Phau Ntawv Nkauj 18:2, 6) Daviv paub hais tias nws yuav tsum tau thov Yehauvas pab. Yog li ntawd, nws thiaj tig mus cuag Yehauvas. Tom qab Yehauvas teb nws ces nws txawm coj raws nraim li Yehauvas qhia. Yehauvas thiaj li foom koob hmoov rau Daviv thiab nws cov neeg. Yog li ntawd, lawv thiaj li mus txeeb tau lawv tej txhiam laj txhiam xwm thiab coj tau lawv poj niam me nyuam rov qab los. (1 Xamuyees 30:7-9, 18, 19) Nco ntsoov cim 3 yam Daviv tau ua no cia. Nws thov Yehauvas pab, xav txog tej yam Yehauvas tau pab nws dua los lawm, thiab coj raws li Yehauvas tau qhia rau nws. Peb khaws tau Daviv tus yam ntxwv li cas? Cia peb mus tham 3 yam no.

1. Thov. Txhua txhua zaus peb muaj kev nyuaj siab ntxhov plawv, cia li thov Yehauvas pab tsav tswv yim rau peb. Yog peb qhia txhua yam kev nyuaj siab rau Yehauvas ces peb lub nra yuav sib lawm hov ntau. Yog hais tias peb ho nyob tej qho chaw tsis zoo thov nrov nrov los cia thov tsawg tsuag hauv nruab siab tuaj xwb los tau. Txhua txhua zaus peb mus cuag Yehauvas ces twb yog peb tso siab rau Yehauvas tib yam li Daviv tias: “[Yehauvas] yog tus tiv thaiv kuv; nws yog kuv lub chaw fajxwm uas ruaj khov. Kuv tus Vajtswv yog tus tiv thaiv kuv, kuv nrog nws nyob tso siab  plhuav.” (Phau Ntawv Nkauj 18:2) Yehauvas puas teb peb tej lus thov tiag tiag? Muaj ib tug tho kev uas npe hu ua Kab Lias (Kahlia) hais tias: “Tom qab kuv thov tag, kuv lub siab txawm tus yees. Kev thov pab tau kuv kom xav ib yam li Yehauvas xav thiab kuv yim huab tso siab rau nws ntxiv.” Muaj tseeb tiag, kev thov zoo li ib qho khoom pub uas Yehauvas muab rau peb daws peb tej kev nyuaj siab ntxhov plawv.

2. Xav txog. Yog koj xav txog koj lub yav tag los, puas muaj ib zaug uas Yehauvas tau pab koj thev dhau ib yam twg? Yog peb ua tib zoo xav txog tej yam Yehauvas tau pab peb thiab cov ntseeg txheej puag thaum ub ces yuav pab tau peb yim huab tso siab rau Yehauvas. (Phau Ntawv Nkauj 18:17-19) Muaj ib tug txwj laus npe hu Ntsosuam (Joshua) tau hais tias: “Kuv yeej cim tseg txhua yam Yehauvas tau teb kuv dua los lawm. Tej no pab tau kuv nco txog txhua lub sij hawm kuv thov Yehauvas rau ib yam twg thiab nws teb raws li kuv lub siab xav.” Muaj tseeb tiag, yog peb xav txog tej Yehauvas tau pab peb ces yuav txhawb tau kom peb peem tiag thaum raug kev nyuaj siab ntxhov plawv.

3. Coj raws li. Ua ntej peb yuav txiav txim siab ua ib yam dab tsi, cia peb mus soj ntsuas Vajtswv Txoj Lus ua ntej tso. (Phau Ntawv Nkauj 19:7, 11) Muaj coob leej ntau tus tau hais tias thaum lawv mus tshawb nrhiav ib nqes Vajlugkub twg mas lawv nkag siab nqe Vajlugkub ntawd zoo dua los pab rau lawv lub neej. Muaj ib tug txwj laus npe hu ua Ntselaum (Jarrod) hais li no: “Mus tshawb nrhiav tej nqe Vajlugkub pab tau kuv nkag siab nqe ntawd zoo dua thiab to taub hais tias Yehauvas xav kom kuv ua li cas. Ua li no pab tau kuv ntseeg txhua yam uas kuv tau nyeem thiab ua raws li ntawd.” Thaum peb mus tshawb nrhiav Yehauvas Txoj Lus seb nws xav li cas thiab peb coj raws nraim li tej peb nrhiav tau ntawd ces yuav pab peb thev dhau peb tej kev nyuaj siab ntxhov plawv.

Daviv paub ntsoov hais tias yuav kom nws dim nws tej kev nyuaj siab ntxhov plawv, yuav tsum muaj Yehauvas pab. Nws ris Yehauvas txiaj ntsig kawg nkaus li, nws thiaj li tau hais li no tias: “Kuv tus Vajtswv pab kuv thiaj caws qia hla tau ntsa loog. Vajtswv yog tus uas muab zog rau kuv hnav.” (Phau Ntawv Nkauj 18:29, 32) Tej thaud peb xav hais tias peb yuav dhia tsis dhau peb tej kev nyuaj siab ntxhov plawv. Tiam sis yog muaj Yehauvas pab lawm ces peb yuav dhia dhau txhua yam kev nyuaj siab ntxhov plawv. Yog li ntawd, thaum peb thov Yehauvas pab, xav txog tej yam Yehauvas tau pab peb dua los lawm, thiab coj raws li Yehauvas tau qhia rau peb ces peb yeej tso siab tau tias Yehauvas yuav txhab ntxiv peb lub dag zog thiab pub tswv yim rau peb thev dhau txhua yam kev nyuaj siab ntxhov plawv.