LALOHEKWARAHI be gau metauna ta bamona iseda kudouna ia hametaua. (Aon. 12:25) Lalohekwarahi dainai hisihisi oi mamia, a? Nega haida oi mamia oi haheauka diba lasi, a? Bema oibe, oi sibona ese unai oi mamia lasi. Badina idauidau dainai iseda goada ia ore, ita lalohekwarahi bona lalometau. Hegeregere, haida be famili lalonai gorere tauna idia naria, haida be edia lalokau tauna ta ia mase, bona haida be disasta dainai idia hisihisi. To dahaka ese ita do ia durua lalohekwarahi negadiai ita haheauka totona? a

King Davida ena haheitalai ese ita ia durua lalohekwarahi ita haheaukalaia totona. Ia be hekwakwanai momo ia davaria, bona nega haida kahirakahira ia mase. (1 Sam. 17:34, 35; 18:10, 11) Dahaka ese Davida ia durua, lalohekwarahi negadiai ia haheauka totona? Edena dala ai iena haheitalai ita tohotohoa?

Davida be nega tamona lalonai hekwakwanai momo ia davaria. Hegeregere, King Saulo ia ura Davida ia alaia dainai ia heau neganai, ia vara gauna mani ita laloa. Davida bona ena tatau be tuari amo idia giroa neganai, idia hoa badina edia inai taudia ese edia kohu idia henaoa, edia siti idia gabua, bona edia famili idia abia lao. Davida be dahaka ia karaia? Baibel ia gwau, “Davida bona ia ida idia noho tatau idia taitai badabada matamaia, ela bona edia goada ia ore, bona idia tai noho diba lasi.” Danu, Davida ia lalometau bada, badina iena tatau “idia ura nadi amo ia idia hodoa.” (1 Sam. 30:1-6) Davida be nega tamona hekwakwanai badadia toi ia davaria: Iena famili be dika idia davaria, ia gari badina iena tatau idia ura ia idia hamasea, bona King Saulo ese ia tahua noho. Unai dainai, reana Davida be ia lalohekwarahi bada!

Gabeai Davida be dahaka ia karaia? Ia be maoromaoro “ena Dirava Iehova amo goada ia abia.” Edena dala ai unai bamona ia karaia? Ia be nega momo Iehova ena heduru totona ia guriguri bona guna ia durua daladia ia laloa lou. (1 Sam. 17:37; Sal. 18:2, 6) Davida ia diba Iehova ena hakaua dalana ia tahua be namo, unai dainai dahaka do ia karaia totona Iehova ia noia. Ia ese Iehova ena hakaua dalana ia diba murinai, maoromaoro kara ta ia karaia. Unai dainai, Iehova ese Davida bona ena tatau ia hanamoa, bona edia ruma bese idia hamauria bona edia kohu idia abia lou. (1 Sam. 30:7-9, 18, 19) Davida ese ia karaia gaudia toi oi itaia, a? Ia be Iehova ena heduru totona ia guriguri, Iehova ese guna ia durua daladia ia laloa lou, bona Iehova ena hakaua dalana hegeregerena kara ta ita karaia. Edena dala ai Davida ita tohotohoa? Mani dala toi ita laloa.

1. Guriguri. Ita lalohekwarahi negadiai, Iehova ena heduru bona aonega totona ita guriguri. Ia dekenai eda lalohekwarahi ibounai ita gwauraia neganai, eda hemami do ia namo. Eiava hekwakwanai ta ia vara haraga neganai, eda lalona ai guriguri kwadogina ita gwauraia diba. Bema nega ibounai Iehova ena heduru totona ita noinoi, ita be Davida hegeregerena Iehova ita abidadama henia. Davida ia gwau: “Iehova be egu nadi badana bona egu magu aukana, bona lau ia hamauria Diravana. Lauegu Dirava be lauegu nadi badana, ia be egu heau mauri gabuna.” (Sal. 18:2) Guriguri ena namo be dahaka? Painia taihu ta, Kalia, ia gwau: “Guriguri murinai, maino lau  abia. Guriguri karana ese lau ia durua, Iehova ena lalohadai lau abia bona ia lau abidadama henia goada.” Oibe, guriguri karana be Iehova ena harihari gauna, bona ita ia durua lalohekwarahi ita haheaukalaia totona.

2. Laloa lou. Oi dekenai idia vara gaudia oi laloa lou neganai, Iehova ena heduru dainai oi haheaukalaia metau haida oi laloa, a? Iehova ese guna bona hari ena hesiai taudia ia durua dalana ita laloa neganai, maino ita abia bona ia dekenai iseda abidadama ia goada. (Sal. 18:17-19) Elda ta, Joshua, ia gwau, “Lau dekenai Iehova ese egu guriguri ia haerelaia ena lista ia noho. Unai ese lau ia durua, Iehova ese egu noinoi ia haerelaia negadia lau laloatao totona.” Oibe, Iehova ese guna ita totona ia karaia gaudia ita laloa lou neganai, goada matamata ita abia ita haheauka noho totona.

3. Kara ta karaia. Hekwakwanai negadiai gau ta ita do karaia lasi neganai, Baibel amo hakaua dalana ita tahua be namo. (Sal. 19:7, 11) Momo be siri ta dekenai tahua gaukara idia karaia neganai, unai siri ese idia ia durua dalana idia lalopararalaia. Elda ladana Jarrod ia gwau: “Tahua gaukara ese lau ia durua, siri ta ena anina lau dibaia bona Iehova ese lau ia hamaoroa gaudia lau lalopararalaia. Unai ese lau ia durua lau duahia gauna lau abia dae momokani, unai amo Dirava ena hakaua dalana lau badinaia.” Baibel ai Iehova ena hakaua dalana ita tahua bona badinaia neganai, lalohekwarahi negadiai ita haheauka diba.

Davida ia laloparara hekwakwanai ia haheaukalaia totona Iehova ena heduru ia tahua be namo. Ia ese Iehova ena heduru ia laloa bada dainai, ia gwau: “Dirava ena siahu amo magu ta lau roho hanaia diba. Dirava momokanina ese lau dekenai goada ia henia.” (Sal. 18:29, 32) Reana ita laloa iseda hekwakwanai ita hamaoromaoroa eiava haheaukalaia diba lasi. To Iehova ena heduru amo hekwakwanai badadia ita haheaukalaia diba! Oibe, Iehova ena heduru totona ita guriguri, ita totona ia karaia gau namodia ita laloa lou, bona iena hakaua dalana hegeregerena kara ta ita karaia neganai, ita diba momokani Iehova ese goada bona aonega do ia henia lalohekwarahi gaudia ita haheaukalaia totona!