TI ËNGSTLICHKHEETE khene wii een xweyer kewicht uf unser hërts sin. (Xpr. 12:25) Host tuu xon tayn hërts xweyer kexpiirt weeche ti ëngstlichkheete? Host tuu xon ketenkt tas tuu es net mee aus hale khenst? Wën yaa, tuu pist net aleen. Fiile fon uns hon uns xon ëngstlich, tiifsinich un miit kexpiirt weeche unerxiitliche uersache. Tsum payxpiil: etliche phase yemant fon sayn familye uf woo krank is; anere hon een keliipte im toot ferloer; un noch anere hon een natuer unklik mit kemacht. Awer, was khan uns helfe ti ëngstlichkheete aus hale? a

Te kheenich Tawi sayn payxpiil khan uns fiil lërne wii mit te ëngstlichkheete um keen. Tee hot fiile xweyere situatsyoone in sayn leepe mit kemacht. Als mool, waar soo kaar sayn leepe ins kefoer. (1 Sam. 17:34, 35; 18:10, 11) Was hot Tawi keholef sayn ëngstlichkheete aus hale? Wii khene mer tëm sayn payxpiil noo mache?

Tawi hot fiile propleeme uf een mool mit kemacht. Tsum payxpiil, kuk mool was pasiirt is wii Tawi am aus rayse waar fon tëm kheenich Saul, woo tëm um pringe wolt. Tawi un sayn mëner hon sich ferxrok wii se fon een khampf tsurik khom sin: sayn faynte hate sayn tinge kextool, sayn hayser ferprënt un sayn familye wech kenom. Wii hot Tawi sich aan kextelt? “Tawi un sayne mëner hon aan kefang hart prile, pis se khee kraft mee hate fer se prile.” Tawi sayn situatsyoon is noch xlimer kep: tëm sayn mëner “hon kesaat tas se Tawi mit xteen ferxmayse teete”. (1 Sam. 30:1-6) Tawi hot 3 xweyere propleeme uf een mool mit kemacht: sayn familye waar ins kefoer, tëm sayn mëner wolte tëm um pringe, un te kheenich Saul waar tëm am yachte. Tawi wërt wool sich aarich ëngstlich kexpiirt hon!

Was hot Tawi tan kemacht? Tee hot sich klaych “in Yeehoowa, sayn Kot, kextërekt”. Wii meecht Tawi tas kemacht hon? Meyer wise tas Tawi hot ofts hilef tsu Yeehoowa torich ti kepeete ferlangt; tee hot aach triwer noo ketenkt aan wii Kot tëm friier keholef hat. (1 Sam. 17:37; Psal. 18:2, 6) Tawi wust tas eyer must Yeehoowa sayn oryentiirung kriin; tan, hot eyer tsu Yeehoowa kefroot was eyer mache solt. Noo tas Yeehoowa tëm kesaat hot was se mache, hot eyer tas klaych kemacht. Tes weeche, hot Yeehoowa tëm un sayn mëner keseechent, un tii hon sayn familye un tinge tsurik kriit. (1 Sam. 30:7-9, 18, 19) Host tuu kemërkt was fer 3 tinge Tawi kemacht hot? Tee hot hilef tsu Yeehoowa im kepeet ferlangt, triwer noo ketenkt aan wii Yeehoowa tëm xon friier keholef hat, un tan Yeehoowa sayn oryentiirunge aan keheert. Wole mer yets 3 aate siin wii mer Tawi noo mache khene.

1. Peet. Imer wëns tuu ëngstlich pist, khanst tuu tsu Yeehoowa peete fer hilef un kluucheet ferlange. Tuu tuust tich peser fine noo tas tuu tayn hërts tsu tëm uf machst. Awer wën ti situatsyoon tich net lost, khanst tuu een khorts un ruych kepeet mache. Imer wëns tuu Yeehoowa suuchst fer hilef kriin, tuust tuu Tawi noo mache. Tëm sayn wërter tuun taytlich tsayche tas eyer uf Kot ketraut hot: “Yeehoowa is mayne fels, mayn xits plats un tee woo mich fray macht. Mayne Kot is mayne fels, aan weem ich mich ferxtekele.” (Psal. 18:2) Meecht tas kepeet wërklich helfe? Een pyoneerin woo Kahlia heest, saat: “Noo peete,  fine ich mich in ruu. Tas kepeet helft mich soo wii Yeehoowa tenke un mee uf tëm traue.” Yawool, tas kepeet helft uns mit te ëngstlichkheete um keen. Tas is sicher een kroose kexenk fon Yeehoowa.

2. Tenk triwer noo. Wëns tuu triwer noo tenkst aan was xon in tayn leepe pasiirt is, khanst tuu tich traan tenke fon propleeme woos tuu ploos aus kehal host weeche Yeehoowa sayn hilef? Wën mer triwer noo tenke aan wii Yeehoowa uns un sayn tiiner friier xon keholef hot, kriin mer fiil kraft un mer tuun noch mee uf tëm traue. (Psal. 18:17-19) “Ich hon een list fon kepeete woo Kot xon keantwort hot — saat een elteste woo Joshua heest. — Tas helft mich traan tenke aan te tsayte woo ich etwas spetsiifix fer Yeehoowa ferlangt hon un tee hot mich kep kraat was ich praucht.” Yawool, tuu tuust kraft kriin fer wayter keeche tayn ëngstlichkheete khëmpfe wëns tuu triwer noo tenkst aan wii Yeehoowa tich xon keholef hot.

3. Heer aan. Eeps tuu ëntxlist was se mache, khanst tuu Kot sayn Wort uner suuche fer oryentiirunge kriin. (Psal. 19:7, 11) Fiile hon raus kriit tas se khene peser ferxteen wii een tekst in tëne sayn leepe phast wën se tëm uner suuche. Een elteste woo Jarrod heest, saat: “Unersuuchunge mache, helft mich mee iwer een wersikel lërne un soo ferxteen ich peser was Yeehoowa mich am saan is. Tas helft mich wërklich klaape aan was ich leese, tas ich khan ti oryentiirunge aan wëne.” Wën mer ti Piipel xtutiire fer Yeehoowa sayn oryentiirunge kriin un tan tiise oryentiirunge aan wëne, wërts laychter fer uns friit un frooheet fine wën mer ëngstlich sin.

Tawi hot ferxtan tas, fer mit te ëngstlichkheete um keen, mist eyer Yeehoowa sayn hilef hon; un tee waar aarich petanklich weeche tiise hilef. Tes weeche, hot eyer kesaat: “Mit Kot sayn kraft khan ich een mauer ruf krapele. (…) Te woere Kot is tee woo mich mit kraft aan tsiit.” (Psal. 18:29, 32) Als mool, khene mer tenke tas unser propleeme soo wii maure sin, woo mer net triwer wech khome khene. Awer mit Yeehoowa sayn hilef, khene mer kwalkee propleem aus hale, een tuun wii xweyer tee is. Yawool, wën mer hilef tsu Yeehoowa im kepeet ferlange, wën mer triwer noo tenke aan ales was eyer xon fer uns kemacht hot, un wën mer sayn oryentiirunge aan heere, khene mer uns sicher sin: Tee kept uns ti kluucheet un ti kraft woo mer mise hon fer ti ëngstlichkheete aus hale!