OMERIKENDERO ye ri tjimuna otjiṋa otjizeu komitima vyetu. (Omiano 12:25) Wa rora okuwa momuinyo mena romerikendero? U rimuna kutja ko nokuyenena okuyetjinda rukwao? Indu tji u rimuna nao, kaove erike. Ovengi vetu tu rimuna okuurwa, tu rimuna okukara nomerikendero, nu tu rimuna ombameno mena romapu pekepeke. Otjotjihorera, tjiva ve vatera ouṋepo weṱunḓu rawo mbwa vera, tjiva va zepaisa ovasuverwa vawo, nu tjiva va muna ouzeu mena rotjiwonga. Nungwari, hapo otjikeṋa tji matji yenene okutuvatera okutjinda omerikendero nondoṋeno? a

Eṱe matu yenene okurihonga ovingi ohunga nokutjinda omerikendero mokukonḓonona otjihorera tjOmbara David. Eye wa kara mozongaro ozonḓeu tjinene mehupo re, nu nandarire povikando tjiva omuinyo we wa ri moumba. (1 Sam. 17:34, 35; 18:10, 11) Otjikeṋa tji tja vatera David okutjinda omerikendero we nondoṋeno? Matu horere vi ku ye?

David wa ri nomauzeu pekepeke moruveze rumwe. Ripura na imbi mbya tjitwa eye tjaa taura kOmbara Saul ndjaai vanga okumuzepa. Indu David novarwe ve vovita tji va kotoka konganda koSiklag, owo va vaza oviṋa vyawo avya vakwa, ozonganda zawo aza nyoswa nomaṱunḓu wawo aya huurwa i yovanavita na wo. David wa tjita vi? ‘David novarwe ve vovita va rira tjinene nga tji va pungara.’ David wina wa harera ko omerikendero tjinene, mena rokutja ovarwe ve vovita “va tanda okumuzepa nomawe.” (1 Sam. 30:1-6) David wa ri momauzeu yetatu omanene motjikando tjimwe. Eṱunḓu re ra ri moumba, ovarwe ve vovita aave vanga okumuzepa, nu Ombara Saul ngunda aa paha okumuzepa. Ripura nomerikendero David nga ri na yo.

Okuzambo David wa tjita vi? Eye tjimanga “wa yanḓipara, tjinga e riyameka ku Muhona, Ndjambi we.” David mape ya ihi we tji tjita vi? Eṱe matu tjiwa kutja David aruhe aa kumbu ku Jehova kutja me mu vatere, nu ee ripurire komuano Jehova me mu vatera morukapitaveze. (1 Sam. 17:37; Eps. 18:2, 6) David aa tjiwa kutja ma hepa omuhunga okuza ku Jehova, ku nao eye wa pura ku Jehova kutja nga tjite vi. David tja za nokupewa omuhunga i Jehova, eye wa toorera ko omukambo tjimanga. Mena ranao, David novarwe ve vovita va serwa ondaya i Jehova. Nowo va yama omaṱunḓu wawo nokukotora ovihuurwa avihe. (1 Sam. 30:7-9, 18, 19) Hapo wa munu oviṋa vitatu David mbya tjita? Eye wa kumba ku Jehova kutja me mu vatere, nu we ripurira komuano Jehova me mu vatera morukapitaveze, na toorere ko omukambo komuhunga Jehova mbwe mu pa. Omomuano uṋe mu matu yenene okuhorera ku David? Tara komiano vitatu.

1. Kumba. Eṱe matu yenene okukumba ku Jehova okuningira ombatero nounongo, indu tji twa utu okurimuna kutja tu nozongendo. Indu tji twe mu raere oviṋa avihe mbi mavi tu kendisa, iho matji tu vatere kutja tu kutuke momuinyo. Poo eṱe matu yenene okuhungira ongumbiro osupi momuinyo, ndoovazu ongaro mu tu ri kai nokutuyandjera okuhungira oviṋa ovingi. Otjikando atjihe tji matu paha ombatero ku Jehova, tu raisa ongamburiro otja indji David ndja ri na yo indu tja tja: “Muhona Eye oruuwa rwandje; Eye otjiṱunga tjandje otjinamasa. Ndjambi Eye omaundiro wandje, nu pu Ye me kara po nokuhinooma.” (Eps. 18:2) Hapo ongumbiro tjiri i vatera? Omukazendu omukambure omukandjira wena Kahlia wa tja: “Ami mbi rimuna  ohange tji mba zu nokukumba. Ongumbiro i ndji vatera okukara noumune tjimuna imbwi owa Jehova, nu ongamburiro yandje mu Ye i kurira ko.” Ongumbiro tjiri otjiyandjewa tjapeke okuza ku Jehova tji tji tu vatera okutjinda ozongendo.

2. Ripura nomuano Jehova me ku vatera morukapitaveze. Indu tji we ripura na imbi mbya tjitwa kove morukapitaveze, hapo pe nomauzeu ngu wa yenena okutjinda mena rokutja Jehova we ku vatera? Indu tji matu ripura nomuano Jehova me tu vatera, nomuano ma vatera ovakarere ve morukapitaveze, tu hara ohange momuinyo nu tu kurisa ongamburiro yetu mu Ye. (Eps. 18:17-19) Omunene wombongo wena Joshua wa tja: “Ami mba tjanga ozongumbiro zandje nḓa zirwa. Ihi tje ndji vatera okuzemburuka ovikando mbi mba ningira oviṋa ku Jehova, neye we ndji pa oviṋa mbyee hepa.” Indu tji matu ripura nomuano Jehova me tu vatera morukapitaveze, ku tu pa omasa ngu matu hepa okutjinda ozongendo nḓu tu na zo.

3. Toorera ko omukambo. Ngunda atu hi ya toorera ko omukambo kongaro mu tu ri, eṱe matu hepa okupaha omuhunga okuza mEmbo ra Mukuru. (Eps. 19:7, 11) Ovengi ve muna kutja tji va tjiti omakonḓononeno wetjangwa rorive, owo ve yenena okurizuva nawa nokumuna kutja mave ri ungurisa vi mehupo rawo. Omunene wombongo wena Jarrod wa tja: “Okutjita omakonḓononeno ku ndji vatera okurihonga ovingi ohunga nezeva rorive, nokuzuva nawa imbi Jehova mbi me ndji raere. Ihi tji ndji vatera okukara nongamburiro mu imbi mbi me lese, kutja mbi yenene okutoorera ko omukambo komuhunga mbu me ndji pe.” Indu tji matu paha omuhunga wa Jehova okuza kOmatjangwa nokukongorera omuhunga mbwo, ma rire oupupu ku eṱe okukara nohange nondjoroka, nandarire kutja tu nozongendo.

David aa tjiwa kutja eye aa hepa ombatero ya Jehova kutja ma yenene okutjinda ozongendo ze nondoṋeno. Eye wa ri nondangi tjinene ku Jehova komuano mbwe mu vatera, nga tja tja: “Puna Ndjambi wandje me havere ovendjipirukire. Ndjambi ngwi Eye otjiṱunga tjandje otjinamasa.” (Eps. 18:29, 32) Eṱe mape ya atu munu kutja omauzeu wetu omazeu okutjinda poo okuzengurura. Posi yokutja nombatero ya Jehova, eṱe matu yenene okutuurunga omauzeu omanene ngamwa ayehe. Indu tji twa kumbu ku Jehova kutja me tu vatere, natu ripurire koviṋa avihe mbye tu tjitira, okuzambo atu toorere ko omikambo komuhunga mbwe tu pe, eṱe matu yenene okukara nongamburiro kutja eye me tu pe omasa nounongo mbu matu hepa, kutja tu yenene okutjinda ozongendo zetu nondoṋeno.