PENGIRAU ulih ngasuh kitai berasai tusah ati. (J-lam. 12:25) Kala nuan berasai merinsa ketegal balat irau? Kala nuan ngasaika diri enda ulih tan napi nya agi? Enti pia, nuan enda kediri. Mayuh ari kitai irau, berasai lelak sereta balat tusah ati ketegal mayuh kebuah. Ambika chunto, sekeda ari kitai engka benung nyaga diri sebilik ke sakit, sekeda engka udah lenyau orang ke dikesayauka, tauka napi pengerusak alam. Tang nama ulih nulung kitai mujur mutarka pengirau? a

Kitai ulih belajar mayuh pasal chara mutarka pengirau ari chunto Raja David. Iya mayuh kali napi penusah ba pengidup iya, indah napi utai ti ulih nganu nyawa iya. (1 Sam. 17:34, 35; 18:10, 11) Tang baka ni David udah mujur napi pengirau nya? Baka ni kitai ulih nunda teladan iya?

David napi mayuh penanggul ba maya ti sama. Perundingka utai ke nyadi ba David lebuh iya benung ngerarika diri ari Raja Saul ke deka munuh iya. Bisi sekali, David enggau bala ke enggau iya pulai ngagai Siklak. Sida amat tekenyit meda barang sida dirumpak, rumah sida ditunu sereta ruang bilik sida udah ditaban bala munsuh. Nama asai ati David? Bup Kudus madahka: “David enggau bala iya lalu enda ngetu-ngetu nyabak datai ke sida nyau lepi.” David balat agi tusah ati laban bala ke amat dipechayaka iya berengkah bejaku pasal “deka nuku iya ngena batu.” (1 Sam. 30:1-6) David diatu napi tiga penanggul ti amat besai ba maya ti sama: Ruang bilik iya dalam bahaya, bala ke enggau iya deka munuh iya, lalu Raja Saul benung begagaika iya. Naka meh pemalat pengirau ke ditapi David!

Nama utai ke digaga David pengudah nya? Tekala nya, David ‘bekering ba Jehovah Petara iya.’ Baka ni David ngereja tu? David besampi ngagai Jehovah minta tulung lalu ngenang baru pasal baka ni Jehovah kala nulung iya suba. (1 Sam. 17:37; Mas. 18:2, 6) Udah nya, David nanya iring ari Jehovah pasal utai ke patut dikereja iya. Pengudah David nerima iring, iya terus nitihka nya. Asil iya, Jehovah merekatka David enggau semua bala ke enggau iya. Lalu sida ulih nyelamatka ruang bilik sida sereta ngulihka baru semua utai ti udah dirampas munsuh. (1 Sam. 30:7-9, 18, 19) Kati nuan bisi beratika tiga iti pekara ke digaga David? (1) David besampi minta tulung ari Jehovah, (2) David ngenang baru chara Jehovah nulung iya suba, lalu (3) David ngereja utai nitihka iring ari Jehovah. Aram kitai beratika tiga iti chara kitai ulih neladan David.

1. Besampi. Lebuh kitai berengkah berasai irau, kitai ulih besampi minta Jehovah nulung kitai sereta meri penemu-dalam. Kitai deka berasai nyamai agi pengudah besampi sereta mantaika semua pengirau kitai ngagai Jehovah. Tauka kitai ulih nyebut sampi ti pandak dalam ati nitihka utai ke nyadi ba maya nya. Ninting kali kitai minta tulung Jehovah, kitai nunjukka diri arapka Iya baka David ke madah: ‘Jehovah nyadika penyaga aku. Iya nyadi kuta aku ti tegap. Petara aku nyadika penyaga aku, lalu aku likun begulai enggau Iya.’ (Mas. 18:2) Kati sampi amat ulih nulung kitai? Peratika utai ke dipadah seiku pengerintis ke benama Kahlia: “Pengudah besampi, aku berasai nyamai agi. Sampi nulung aku bisi runding ti sejalai enggau Jehovah lalu tu ngasuh aku majak agi arapka Iya.” Endang amat, sampi siti pemeri  ari Jehovah. Sampi amat bekuasa lalu ulih nulung kitai mutarka pengirau.

2. Ngenang baru chara Jehovah nulung nuan suba. Lebuh nuan ngenang utai ke kala nyadi ba pengidup nuan, kati nuan ulih ngenang baru pasal baka ni Jehovah kala nulung nuan tan natka penanggul suba? Ulih nuan berunding baka ni Jehovah kala nulung nembiak Iya kelia menya? Enti kitai ngereja nya, kitai deka dikeringka sereta majak agi arapka Jehovah. (Mas. 18:17-19) Seiku tuai gempuru ke benama Joshua madahka: “Tiap kali sampi aku disaut, aku ngaga lis. Chara tu udah nulung aku ngenang baru chara Jehovah nyaut sampi aku lalu meri utai ke diguna aku.” Nya alai, kitai patut ngenang baru chara Jehovah kala nulung kitai suba. Enggau nya, kitai deka bulih pengering kena mutarka pengirau.

3. Ngereja utai nitihka iring Jehovah. Sebedau kitai ngaga pemutus, kitai enda tau enda ngiga iring Petara nengah Bup Kudus. (Mas. 19:7, 11) Mayuh bala menyadi Kristian bulih penguntung pengudah sida mansik ayat Bup Kudus. Pengudah ngereja nya, sida senang agi meretika chara sida ulih nitihka ayat Bup Kudus nya ba pengidup. Seiku tuai gempuru ke benama Jarrod madahka: “Ngaga pansik udah nulung aku meretika agi pasal sesiti ayat. Nya nulung aku meretika utai ti deka dikenataika Jehovah ngagai aku. Enggau tu, aku pechaya agi enggau utai ke dibacha lalu aku ulih ngereja utai nitihka iring Jehovah.” Lebuh kitai ngiga iring Jehovah nengah Bup Kudus sereta ngereja utai sejalai enggau nya, kitai deka bulih pengelantang ati sereta pengaga ati taja pan napi pengirau.

David nemu enti iya deka mujur mutarka pengirau, iya begunaka tulung Jehovah. Iya amat beterima kasih ke sukung Jehovah, ketegal nya iya diperansang deka madah: ‘Nuan meri aku pengering kena ngalahka [“dinding,” NWT] kuta. Iya nya meh Petara ti ngasuh aku kering.’ (Mas. 18:29, 32) Kekadang kitai engka ngasaika penanggul kitai baka dinding. Tang enggau saup ari Jehovah, kitai ulih tan natka sebarang penanggul. Nya alai, kitai patut besampi minta tulung ari Jehovah, ngenang baru chara Jehovah nulung kitai suba sereta ngereja utai nitihka iring Iya. Enggau ngereja nya, kitai andal Jehovah tentu deka meri kitai pengering sereta penemu-dalam ngambika ulih mujur mutarka pengirau!