MYIT tsang ai lam gaw, grai li ai lit kaba hte bung ai. (Gsh 12:25) Nang myit tsang ga ai kun? N dang hkam na daram myit tsang ga ai kun? Rai yang, nang hkrai sha n re. Anhte law malawng gaw, tsawra ai marai langai si mat ai majaw, shingra tsin-yam hkrum ai majaw, kaga ni hpe gawn lajang ya ra ai majaw, kaga lama ma a majaw, myit masin, hkum hkrang pu ba chye ai. Myit tsang ai lam hpe awng dang hkra hparan lu na matu, hpa gaw karum ya lu na kun? a

Hkawhkam Dawi a mabyin hpe bai sumru ai kaw na, myit tsang lam hpe hparan ai hte seng nna, law law sharin la lu ai. Dawi gaw, mayak mahkak law law hkrum wa ai. Asak shoihpa hkrum ai aten ni pyi nga ai. (1 Sa 17:34, 35; 18:10, 11) Myit tsang ai lam ni hpe shi gara hku hparan wa ai kun? Shi hpe anhte gara hku kasi la mai ai kun?

Dawi gaw, mayak mahkak amyu myu hpe kalang ta hkrum wa ai. Ga shadawn, Hkawhkam Shawlu hkan sat ai majaw, hprawng nga ai aten hta, grai sawng ai masa langai hte hkrum wa ai. Majan langai gasat ngut nna, Zekla mare de Dawi hte shi a masha ni bai wa ai shaloi, hpyen ni gaw, nta ni hpe wan nat ai, nta masha ni hpe rim mat wa ai hpe shanhte chye dat ai. Dawi hpa galaw ai kun? “Dawi hte shi a masha ni gaw jahtau hkrap nna, ba htum mat hkra hkrap nga ma ai.” Shi kamhpa ai masha ni “nlung hte jawm kabai” ai majaw, grau myit tsang mat ai. (1 Sa 30:1-6) Manghkang kaba masum hpe kalang ta hkrum sha ai. Nta masha ni shoihpa hkrum ai. Tinang na masha gaw, tinang hpe bai sat na matu shakut ai. Hkawhkam Shawlu mung hkan rim nga ai. Dawi kade daram myit tsang nga na hpe myit yu u.

Dawi hpa galaw ai kun? Kalang ta, “Karai Kasang Yehowa hta n-gun dating wu ai.” Gara hku nna kun? Shawoi galaw ai zawn, karum ya na matu Yehowa kaw akyu hpyi ai. Moi Karai Kasang karum ya wa ai lam ni hpe bai myit ai. (1 Sa 17:37; Shk 18:2, 6) Yehowa a lam matsun ra ai hpe chye ai majaw, hpa galaw ra na hte seng nna Yehowa hpe san ai. Yehowa a lam matsun lu la ai shaloi, kalang ta hkan galaw ai. De a majaw, shi hte shi a masha ni shaman chyeju lu wa ai. Nta masha ni hte arung arai mahkra bai lu ai. (1 Sa 30:7-9, 18, 19) Dawi galaw wa ai lam masum hpe sadi hkrup ai kun? Karum shingtau lu na matu, Yehowa kaw akyu hpyi ai. Lai wa sai aten hta, Yehowa galaw ya wa ai lam ni hpe bai sumru ai. Yehowa a lam matsun hte maren tatut galaw ai. Dawi hpe gara hku kasi la mai ai kun? Lam masum hpe bawngban yu ga.

1. Akyu hpyi. Myit tsang shagu, karum shingtau hte nyan hpaji lu na matu, Yehowa kaw akyu hpyi mai ai. Myit tsang ai lam yawng tsun dan ai hku nna, grai na hkra akyu hpyi mai ai. Myit kaw na mung akyu hpyi mai ai. Yehowa hpang karum hpyi shagu, “Yehowa gaw nye a lunghkrung, nye a hpyen dap, nye a hkye hkrang la ai Wa, Nye a Karai Wa, ngai shingbyi nga ai nye a lungpu, . . . rai nga li ai” ngu tsun wa ai Dawi zawn, kamhpa myit nga ai hpe madun nga ai. (Shk 18:2) Akyu hpyi ai gaw, gaja wa bungli byin ai kun? Ningshawng nauna Kaliya ndai hku tsun ai: “Akyu hpyi ngut ai hpang myit simsa lam lu la ai. Yehowa zawn myit chye na matu karum shingtau lu ai. Karai hpe grau kamhpa wa ai.” Akyu hpyi ai gaw,  myit tsang ai hpe hparan na matu, Yehowa lajang ya ai atsam kaba ai karum shingtau lam re.

2. Bai sumru. Yehowa a karum shingtau lam a majaw, prat hta hkam sharang lu wa ai chyam dinglik ai lam ni nga ai kun? Tinang hpe mung, moi prat na mayam ni hpe mung, Yehowa gara hku madi shadaw ya ai hpe bai myit ai shaloi, myit simsa lam lu wa na. Karai hpe grau kamhpa wa na. (Shk 18:17-19) Myitsu salang hpunau Joshuwa gaw, “mahtai lu ai lam ni hpe jahpan galaw da ai. Dai gaw, Yehowa hpang lama ma hpe laksan hpyi nna, mahtai lu wa ai aten hpe bai dum na matu karum ya ai” ngu tsun ai. Anhte hpe Yehowa gara hku karum ya wa ai hpe bai myit yu na nga yang, myit tsang ai lam hpe awng dang na matu n-gun lu wa na re.

3. Tatut galaw. Hpa galaw na hpe n dawdan shi yang, kamhpa mai ai lam matsun re ai Chyum Laika hta tam sawk sagawn u. (Shk 19:7, 11) Chyum daw langai hpe tam sawk sagawn ai shaloi, masha law law gaw, tinang hte gara hku seng ai hpe grau chye wa ma ai. Myitsu salang hpunau Jeret ndai hku tsun ai: “Tam sawk sagawn ai shaloi, daw kaji langai ngai hpe grau chye na wa ai. Yehowa tsun mayu ai hpe grau chye wa ai. Myit masin de shang mat nna, tatut hkan sa na matu karum ya ai.” Chyum Laika hta lawm ai Yehowa a lam matsun hpe tam nna, dai hte maren galaw na nga yang, myit tsang lam hpe awng dang hkra hparan lu na re.

Myit tsang ai lam hpe awng dang hkra hparan na matu, Yehowa a karum shingtau lam ra ai hpe Dawi chye ai. Karai a karum shingtau lam hpe Dawi chyeju dum ai majaw, “Karai Kasang hte bunghku hpe shingtawt lu nngai. Dai Karai Wa, ngai hpe n-gun hte shingkyit kyit ya” ai ngu tsun ai. (Shk 18:29, 32) Anhte mung, hkrum nga ai mayak mahkak ni gaw, grai tsaw ai mare bunghku zawn sha hkamsha hkrup chye ai. Raitim, mare bunghku hte bung ai gara zawn mayak mahkak ni hpe mung, Yehowa a karum shingtau lam hte tawt lai lu ai. Yehowa kaw akyu hpyi nna karum hpyi na, Karai Kasang galaw ya ai lam ni hpe bai sumru na, Karai a lam matsun hte maren tatut galaw na nga yang, myit tsang ai lam ni hpe awng dang hkra hparan lu na re. Ra nga ai n-gun atsam hte nyan hpaji lu la na re.