MĨTANGĨKO no ĩtũme ngoro itũ ĩritũhĩrũo. (Thim. 12:25) Hihi nĩ harĩ hĩndĩ ũrĩ waigua ũhinyĩrĩirio nĩ mĩtangĩko? Kũrĩ hĩndĩ ũiguaga ta ũkinyĩte mũico? Angĩkorũo nĩ ũiguaga ũguo, korũo na ma atĩ ndũrĩ wiki. Aingĩ aitũ no tũkorũo nĩ tũrarũmbũiya mũndũ mũrwaru, tũgakuĩrũo nĩ mũndũ twendete, tũkagũmĩrũo nĩ gĩcanjama kĩa ndũire, o na kana tũgacemania na ũndũ ũratũhinyĩrĩria kĩĩmeciria na kĩĩmwĩrĩ. No nĩ kĩĩ kĩngĩtũteithia rĩrĩa tũrĩ na mĩtangĩko? a

No twĩrute maũndũ maingĩ mangĩtũteithia rĩrĩa tũratangĩka tũngĩthuthuria ngerekano ya Mũthamaki Daudi. Nĩ aacemanirie na maũndũ maingĩ maritũ ũtũũro-inĩ wake, o na nginyagia rĩmwe agakorũo arĩ hakuhĩ gũkua. (1 Sam. 17:34, 35; 18:10, 11) Nĩ kĩĩ gĩateithirie Daudi hĩndĩ ĩrĩa aarĩ na mĩtangĩko? Na tũngĩĩgerekania atĩa na kĩonereria gĩake?

Daudi nĩ aacemanirie na magerio maingĩ ihinda-inĩ rĩmwe. Kwa ngerekano, ta wĩcirie ũrĩa gwathiire hĩndĩ ĩrĩa oorĩire Mũthamaki Saulu, ũrĩa weendaga kũmũũraga. Hĩndĩ ĩrĩa Daudi na arũme arĩa maarĩ nake maacokaga Zikilagi maumĩte ita-inĩ, nĩ maamakire gũkora atĩ thũ ciao nĩ ciaiyĩte indo ciao, igacina mĩciĩ yao, na ikanyita andũ a famĩlĩ ciao mĩgwate. Daudi eekire atĩa? Bibilia yugaga: “Daudi na arũme acio maarĩ nake makĩambĩrĩria kũrĩra maanĩrĩire nginya magĩthirũo nĩ hinya wa kũrĩra.” Ũndũ ũrĩa watangaga Daudi o na makĩria nĩ gũkorũo arũme arĩa maarĩ nake “mooigaga nĩ mekũmũhũũra na mahiga.” (1 Sam. 30:1-6) Rĩu Daudi aarĩ na maũndũ matatũ maritũ maamũtangaga ihinda-inĩ rĩmwe: Famĩlĩ yake yarĩ ũgwati-inĩ, nĩ eetigagĩra arũme arĩa maarĩ nake matikae kũmũũraga, na Mũthamaki Saulu no aamũcaragia. Kwoguo no mũhaka Daudi akorũo nĩ aarĩ na mĩtangĩko mĩingĩ.

Hihi Daudi aarũmbũyanirie na maũndũ macio atĩa? Atekũrĩa marĩĩgu, “[eeheire] hinya kũgerera Jehova Ngai wake.” Daudi eekire ũguo na njĩra ĩrĩkũ? Eekire o ta ũrĩa aamenyerete, nĩ aahoire Jehova amũteithie na agĩcoka agĩĩcũrania igũrũ rĩgiĩ ũrĩa anamũteithia mahinda mahĩtũku. (1 Sam. 17:37; Thab. 18:2, 6) Daudi nĩ oonire bata wa gũcaria ũtongoria wa Jehova, nĩ ũndũ ũcio agĩtuĩria ũhoro kũrĩ we wa ũrĩa aagĩrĩirũo gwĩka. Thutha wa Daudi kwamũkĩra ũtongoria wa Jehova, nĩ aawathĩkĩire o na ihenya. Nĩ ũndũ ũcio, we na arũme arĩa maarĩ nake nĩ maarathimirũo nĩ Jehova, na makĩhota kũhonokia andũ a famĩlĩ ciao o hamwe na indo ciao. (1 Sam. 30:7-9, 18, 19) Hihi nĩ wona maũndũ matatũ marĩa Daudi eekire? Nĩ aahoire Jehova amũteithie, agĩĩcũrania ũhoro wĩgiĩ maũndũ marĩa Jehova aamwĩkĩire mbere ĩyo, na agĩathĩkĩra ũtongoria wake. Tũngĩĩgerekania atĩa na Daudi? Tũkwarĩrĩria njĩra ithatũ.

1. Hoya. Rĩrĩa rĩothe waigua ũgĩtangĩka, no ũhoe Jehova agũteithie na akũhe ũũgĩ. Tũngĩmũitũrũragĩra ngoro citũ kũgerera mahoya no tũigue tũhũthĩirũo. Ningĩ no tũhoe ihoya ikuhĩ rĩa ngoro angĩkorũo ũguo noguo tũngĩhota gwĩka hĩndĩ ĩyo. Rĩrĩa rĩothe twahoya Jehova ũteithio, tuonanagia atĩ nĩ tũmwĩhokete o ta Daudi ũrĩa waugire ũũ: “Jehova nĩwe ndũmba yakwa ya ihiga na mwĩgitio wakwa na Ũrĩa ũũhonokagia. Ngai wakwa nĩwe rwaro rwakwa rwa ihiga, na njũragĩra harĩ we.” (Thab. 18:2) Hihi mahoya nĩ mateithagia? Mwarĩ wa Ithe witũ ũmwe painia wĩtagwo Kahlia  aaugire ũũ: “Thutha wa kũhoya nĩ njiguaga ndĩ na thayũ. Mahoya nĩ mandeithagia kũhaanania mwĩcirĩrie wakwa na mwĩcirĩrie wa Jehova na ngahota kũmwĩhoka makĩria.” Hatarĩ nganja, mahoya nĩ kĩheo kĩa bata kuuma kũrĩ Jehova gĩa gũtũteithia rĩrĩa tũrĩ na mĩtangĩko.

2. Wĩcũranie. Ũngĩciria ũhoro wa ũtũũro waku-rĩ, hihi no ũririkane magerio wanakirĩrĩria no ũndũ tu wa gũteithio nĩ Jehova? Rĩrĩa twecũrania ũrĩa Jehova anatũteithia na ũrĩa anateithia ndungata ciake mahinda mahĩtũku, nĩ tũgĩaga na thayũ wa ngoro na tũkahota kũmwĩhoka makĩria. (Thab. 18:17-19) Mũthuri ũmwe wa kĩũngano wĩtagwo Joshua aaugire ũũ: “Ndĩ na handũ nyandĩkĩte mahoya marĩa ndanacokerio. Ũndũ ũcio nĩ ũndeithagia kũririkana mahinda marĩa ndanahoya Jehova kĩndũ kĩna na akahe o kĩrĩa ngũbataraga.” Kwoguo rĩrĩa twecũrania ũhoro wa maũndũ marĩa Jehova anatwĩkĩra, nĩ tũgĩaga na hinya wa gũthiĩ na mbere kũrũa na mĩtangĩko.

3. Athĩka. Tũtanatua itua rĩa ũrĩa tũgwĩka ũndũ-inĩ mũna, no tũcarie ũtongoria wa kwĩhokeka kuuma Kiugo-inĩ kĩa Ngai. (Thab. 19:7, 11) Andũ aingĩ nĩ monete atĩ mangĩka ũthuthuria wĩgiĩ rĩandĩko rĩna, nĩ mataũkagĩrũo ũrĩa mangĩhũthĩra rĩandĩko rĩu ũtũũro-inĩ wao. Mũthuri ũmwe wa kĩũngano wĩtagwo Jarrod aaugire ũũ: “Gwĩka ũthuthuria nĩ kũndeithagia gũtaũkĩrũo nĩ mũhari mũna na ngamenya ũrĩa Jehova arenda njĩke. Ũndũ ũcio nĩ ũteithagia ũhoro ũcio ũkaingĩra ngoro na ngahota gwathĩkĩra ũtongoria wa Jehova.” Rĩrĩa twacaria ũtongoria wa Jehova kuuma Maandĩko-inĩ na twaũrũmĩrĩra, nĩ tũhotaga kũgĩa na thayũ na gĩkeno o na tũgĩtangĩkaga.

Daudi nĩ aamenyaga atĩ nĩguo ahote kũrũa na mĩtangĩko, nĩ aabataraga ũteithio wa Jehova. Nĩ aacokagia ngatho mũno nĩ ũndũ wa ũteithio wa Jehova nginya akiuga ũũ: “Kũgerera hinya wa Ngai no hote kũrũga rũthingo. Ngai ũrĩa wa ma nĩwe ũũhumbaga hinya.” (Thab. 18:29, 32) No tuone magerio maitũ matariĩ ta rũthingo rũraihu tũtangĩhota kũrũga. No Jehova no atũteithie gũkirĩrĩria magerio o mothe matariĩ ta rũthingo rũraihu. Tũngĩhoya Jehova ũteithio, twĩcũranie ũhoro wĩgiĩ maũndũ marĩa anatwĩkĩra, na twathĩkĩre ũtongoria wake, nĩ tũrĩkoragwo na ma atĩ nĩ arĩtũheaga ũteithio na ũũgĩ ũrĩa tũrabatara wa gũtũteithia gũkirĩrĩria hĩndĩ ya mĩtangĩko.