OSHISHO otashi dulu okukala sha wilila po omitima detu. (Omayel. 12:25) Mbela owa shakeneka nale onghalo yonhumba, oyo ye ku ningifa u kale u na oshisho sha pitilila? Mbela owa li u udite kutya ito dulu vali okulididimikila onghalo ya tya ngaho? Ngeenge osho, haave auke. Vahapu vomufye otashi dulika hatu file oshisho ovanhu vonhumba, twa filwa umwe oo tu hole, twa hangwa koshiponga shopaushitwe, ile twa taalela onghalo imwe ya yukila oko. Onghalo ya tya ngaho, oye tu ningifa tuha kale vali tu na eenghono dopalutu, ye tu kuma pamaliudo nopamadiladilo. Oshike tashi dulu oku tu kwafela tu ungaunge nomupondo noshisho? *

Ohatu dulu okulihonga shihapu shi na sha nanghee hatu dulu okuungaunga noshisho koshihopaenenwa shohamba David. Oya li ya shakeneka omaupyakadi mahapu monghalamwenyo yayo. Nopeemhito dimwe, oya li ya taalela efyo nokuli. (1 Sam. 17:34, 35; 18:10, 11) David okwa li a ungaunga ngahelipi noshisho? Ongahelipi hatu dulu oku mu hopaenena?

David okwa li a taalela omaupyakadi mahapu poshikando shimwe. Pashihopaenenwa, diladila ashike shi na sha nonghalo oyo ya ka holoka po, ofimbo a li ta i onhapo ohamba idipai, Saul. Eshi David novakwaita vaye va aluka kolwoodi, ova li va kumwa, eshi va hanga ovatondi vavo va vaka po omamona avo, va xwika po omaumbo avo nova twala oilyo yomaukwaneumbo avo moukwatwa. David okwa li e linyenga ngahelipi? Ombiibeli oya ti: “David novakwaita vaye ava va li puye va yelula ondaka yavo ndele tava lili fiyo va loloka okulila.” Onghee hano, eshi sha weda ko vali koudjuu waDavid, osheshi ovalumenhu vaye ovo a li e lineekela “va popya kutya na dipawe nomamanya.” (1 Sam. 30:1-6) David okwa li a taalela omaupyakadi atatu a kwata moiti poshikando shimwe: Oukwaneumbo waye owa li u li moshiponga, ovalumenhu vaye ova li va hala oku mu dipaa nokwa li natango ta tewatewa kohamba Saul. Diladila ashike nghee David a li a wililwa po koshisho!

Mbela David okwa li a ninga po shike? Okwa li a katuka onghatu diva, opo “e lipameke mOmwene Kalunga kaye.” Osho mbela okwe shi ninga ngahelipi? David okwa kala ha pula alushe Jehova meilikano e mu kwafele nokudilonga kunghee e mu kwafela monakudiwa. (1 Sam. 17:37; Eps. 18:2, 6) David okwa li a mona kutya okwa pumbwa okukonga ewiliko kuJehova. Okwa pula Jehova osho e na okuninga po. Konima eshi David a pewa ewiliko kuJehova, okwa li a katuka onghatu meendelelo. Oshidjemo? David novalumenhu vaye ova li va nangekwa noupuna kuJehova nova dula okwaalula oilyo yomaukwaneumbo avo nosho yo omamona avo. (1 Sam. 30:7-9, 18, 19) Mbela owa didilika eenghatu nhatu odo David a li a katuka? Okwa li a ilikana kuJehova e mu kwafele, a dilonga kunghee Jehova e mu kwafela monakudiwa nokwa katuka onghatu metwokumwe newiliko laJehova. Ongahelipi hatu dulu okuhopaenena David? Natu ka taleni keenghedi nhatu.

1. Ilikana. Ngeenge tu na oshisho, ohatu dulu okwiilikana kuJehova e tu kwafele noku tu pe ounongo. Eilikano ohali tu kwafele tu mu mbubulile omutima wetu notuha kale twa wililwa po. Ile ngeenge onghalo otai shi pitike, ilikana pauxupi momutima. Efimbo keshe hatu ilikana kuJehova e tu kwafele, ohatu kala tu na omukumo ngaashi David, oo a ti: “Omwene oye emanya lange la pama, nohotengulu  yange, nomuxupifi wange. Kalunga kange Oye omhunda yange oko handi tondokele.” (Eps. 18:2) Mbela eilikano ohali tu kwafele ngoo shili? Omumwameme omukokolindjila wedina Kahlia okwa ti: “Konima ngeenge nda ilikana, ohandi kala ndi na ombili. Eilikano ohali kwafele nge ndi kale handi diladila ngaashi Jehova nokukala nde mu lineekela shi dulife nale.” Heeno, eilikano oli li efiloshisho la dja kuJehova, olo hali tu kwafele tu dule okuungaunga noshisho.

2. Dilonga. Ngeenge to tale konakudiwa, mbela oto dimbuluka omashongo oo wa li wa dula oku e lididimikila kekwafo laJehova? Ngeenge hatu diladila kunghee Jehova e tu kwafela nosho yo nghee a kwafela ovapiya vaye monakudiwa, otashi ke tu pa eenghono nokukala twe lineekela muye. (Eps. 18:17-19) Omukulunhuongalo wedina Joshua okwa ti: “Ondi na omusholondodo womailikano a nyamukulwa. Osho ohashi kwafele nge ndi dimbuluke oikando omo nda pula Jehova a kwafele nge kondadalunde nokwa pa nge osho nda pumbwa.” Onghee hano, ngeenge otwa kala hatu dilonga kunghee Jehova a ungaunga nafye monakudiwa, otashi ke tu pameka tu dule okufinda oshisho.

3. Katuka onghatu. Ofimbo inatu tokola osho tu na okuninga po monghalo yonhumba, otwa pumbwa okukala hatu kongo ewiliko mEendjovo daKalunga, odo di shii okulineekelwa. (Eps. 19:7, 11) Vahapu ohava mono shiwa okuninga omapekaapeko omushangwa wonhumba, molwaashi ohashi va kwafele va ude ko oitukulwa aishe yovelishe noku i tula moilonga mokukalamwenyo kwavo. Omukulunhuongalo wedina Jarrod okwa ti: “Okuninga omapekaapeko ohaku kwafele nge ndi ude ko oitukulwa aishe yovelishe nondi ude ko osho Jehova ta lombwele nge. Osho ohashi kumu omutima wange nondi dule okukatuka onghatu metwokumwe newiliko laye.” Onghee hano, ngeenge hatu kongo ewiliko kuJehova okupitila mOmishangwa nokushikula ewiliko la tya ngaho, ohatu ka dula okufinda oshisho.

David okwa li e shii kutya okwa pumbwa ewiliko laJehova, opo a dule okufinda oshisho. Okwa li a pandula neenghono ekwafo olo a li a pewa kuJehova, nomolwaashi a popya a ti: “Pamwe naKalunga kange ohandi nhuka engholo. Kalunga ou ta dike nge eenghono.” (Eps. 18:29, 32) Omafimbo amwe, otashi dulika tu kale tu udite kutya omashongo oo twa taalela okwa kwata moiti noitatu dulu oku e lididimikila. Ashike kekwafo laJehova, ohatu dulu oku e lididimikila. Ngeenge otwa kala hatu ilikana kuJehova e tu kwafele, hatu dilonga kwaashishe osho e tu ningila nokukatuka onghatu metwokumwe newiliko olo te tu pe, ohatu ka kala nelineekelo kutya ote ke tu pa eenghono nounongo oo twa pumbwa, opo tu lididimikile oisho nomupondo.