O HELE itena kutubhangesa kudivwa kala muxima watuneme. (Jisa. 12:25) O kwila eye watale kya hadi mukonda dya kukala ni hele? Wadivwile kya kwila, kiwandatena dingi kukolokota? Se kyene, ejiya kwila, k’eye ngó. Avulu mudyetu twamulanga muthu wakate, twafundu ndandu, twadibhana ni mavuwa mba ibhidi yengi yatubhekela kutohoka ni hele. Maji ihi itena kutukwatekesa kutolola o hele? *

Tutena kukatula mbote yavulu mukudilonga kyebhi Sobha Davidi kyatolola o hele. Ku mwenyu wê wadibhana ni ibhidi yabhonzo, kate wabhiti mu kilwezu kya kufwa. (1 Sam. 17:34, 35; 18:10, 11) Kyebhi Davidi kyatena kuditunda kyambote sumbala wadibhana ni hele? Kyebhi kitutena kukayela o phangu yê?

Davidi wadibhana ni ibhidi yavulu mu kithangana kimoxi. Mukifika, tala ngó o maka amoneka kyoso kyexile mulenga Sobha Sawulu. Kyoso Davidi ni masoladi mê kyavutuka mu kutolola o ita, asange o jinguma anyana o ima yâ yoso, jinzo jâ a jyoha, ambata o miji yâ. Ihi yabhange Davidi? “Davidi, ni mundu ala nê kumoxi, exi bulukutu ni kudila anga adila katé kala dingi ni nguzu, kingumba o kudila, mukonda atokokaku.” Phala kubandekesa dingi ku ibhidi ya Davidi, o makwenze a adyelela, exile muxinganeka “kumububa ni matadi.” (1 Sam. 30:1-6) Kindala Davidi wexile mudibhana ni ibhidi itatu yonene, mukithangana kimoxi: Mwiji wê wexile mu kanjila kajokota, katenene kudyelela ku masoladi mê, mukonda exile muxinganeka kumujibha, o Sobha Sawulu wexile hanji kumusota. O kwila hele yofele yexilenayu Davidi?

Mukusuluka ihi yabhange Davidi? Sé kulaleka, Davidi wa “dikolesa muxima mwa Jihova Nzambi yê.” Kyebhi Davidi kyejitena kubhanga kiki? Twejiya kuma, Davidi wexile ni kifwa kya kubhinga kikwatekesu kwa Jihova bhukaxi ka musambu, ni kuxinganeka kyebhi Nzambi kyamukwatekesele m’ukulu. (1 Sam. 17:37; Jisá. 18:2, 6) Davidi watonginina kwila, wabhingile kusota kwijiya o itendelesu ya Jihova, kyenyiki, wabhingi kwa Mukunji wadikota Abiyatale: “Ngakudyondo, efodi ngibhekeleyu kunu,” phala atene kwijiya o kixinganeku kya Jihova. Kyoso Davidi kyatambula o itendelesu ya Jihova, wabhange yoso yamutangela sé kulaleka. Kyenyiki, Davidi ni masoladi mê, a abesowala kwala Jihova, atena kubhulula o miji yâ ni kutambula o jimbote jâ. (1 Sam. 30:7-9, 18, 19) Wamono o ima itatu yabhange Davidi? Mwene wasambe kwa Jihova mukubhinga kikwatekesu, waxinganeka kyebhi Jihova kyamubhulwile m’ukulu, wabhange kala kyamutendelesa Jihova. Kyebhi kitutena kukayela o phangu ya Davidi? Tutale maukexilu atatu.

1. Samba. Kyosokyoso o kithangana kitukala ni hele, tutena kubhinga o kikwatekesu ni unjimu kwa Jihova bhukaxi ka musambu. Kumuxima kutululula dingi kyoso kitutangela kwa Jihova o ima yamutubhekela o hele. Tutena kusamba kumuxima, se o kithangana kikibhana kuzwela ni dizwi dya swina. Ithangana yoso itubhinga o kikwatekesu kwa Jihova, twamulondekesa kwila twamudyelela, kala kyabhangele Davidi. Mwene wambe: ‘Jihova mwene ditadi dyami dya kipena, mwene mbonge yami ya kudikondela, muzokedi wakungikudila.’  (Jisá. 18:2) O kwila o musambu ukwatekesa mwene? Sayi muboki wathembu yoso amwixana Kahlia wambe: “Kyoso kingisamba, ngikala ni kutululuka ku muxima. O musambu ungikwatekesa kubanza kala kibanza Jihova, ni kumudyelela we dingi.” Mu kidi, o musambu ujitu wakatunda watubhana Jihova phala kudibhana ni hele.

2. Xinganeka kyebhi Jihova kyakukwatekesa m’ukulu. Kyoso ki uxinganeka o ima yabhiti ku mwenyu wé, o kwila ulembalala ibhidi iwatena ngó kutulola mukonda dya kikwatekesu kya Jihova? Kuxinganeka kyebhi Jihova kyene mutukwatekesa ni kyebhi kya kwatekesa o jiselevende jê m’ukulu, kutubhana nguzu, kubandekesa we o kidyelelu kyetu kwa mwene. (Jisá. 18:17-19) Sayi kafunga amwixana Joshua wambe: “Eme ngene musoneka o misambu yoso yangitambwijila kya Jihova. Kubhanga kiki kwangikwatekesa kulembalala o ithangana yoso ingabhingile kima kwa Jihova, mwene yu wangibhanakyu kala kingabhindamene.” Kyene mwene! Kyoso kituxinganeka mu ithangana yoso itwatambula o kikwatekesu kya Jihova m’ukulu, tukala ni nguzu itwabhindamena phala kutolola o ixinganeku itubhekela o hele.

3. Bhanga kima. Ande dya kusola kubhanga kima, sota kutokwesa o Mak’â Nzambi phala usange itendelesu i utena kudyelela. (Jisá. 19:7, 11) Avulu atonginina kwila, kyoso kyatokwesa velusu ya Bibidya, atendela dingi kyambote kyebhi kyatokala ku ikumbidila kumwenyu wâ. Sayi kafunga amwixana Jarrod, wajimbulula: “Kutokwesa kungikwatekesa kumona o ima yoso yalungu ni velusu, ni kutendela ihi yamesena kungilonga Jihova. Kubhanga kiki kungikwatekesa kuxikina mwene mu ima ingamutanga, ni kukayela o itendelesu ya Jihova mukubhanga o ima.” Kyoso kitusota o itendelesu ya Jihova mu Mak’â mê, anga tu ikumbidila, kikyandatubhonza kusanga o paze ni kusanguluka kyoso kitudibhana ni hele.

Davidi watendela kwila, phala kutolola o hele yê, mwene wabhindamene o kikwatekesu kya Jihova. Mwene wabhanene valolo mu kikwatekesu kyamubhele Jihova, o kiki kyamubhangesa kusoneka: “Mu kutena kwa Nzambi yami ngi tuka imbaka. Nzambi mwene wangibhana o ukwenze.” (Jisá. 18:29, 32) Sayi bhabha tutena kudivwa kwila, o ibhidi yetu yabhonzo kyavulu, kitwandatena ku itolola mba kukolokota. Maji ni kikwatekesu kya Jihova, tutena kukolokota kabasa ibhidi itudibhananayu, né mwene yabhonzo! Kyene mwene. O kubhinga kikwatekesu kwa Jihova bhukaxi ka musambu, kuxinganeka mu yoso yabhange kya phala kutukwatekesa ni kukayela o itendelesu yê mu kubhanga o ima, kwanda tudyelelesa kwila, mwene wandatubhana o nguzu ni unjimu utwabhindamena phala kutolola o hele yetu!