KUKABAKAN NI MICIM kudy mwa kwiikal bu bujit budy bwiituneemen budy mu micim yiitut. (Tus. 12:25) Ukaady mutatok bwaal waakady ukabakanok ni micim mu shikacil iibuh eeny? Udy mumvwokoh micim yikubusik bwa myand yiwukakabakan naay eeny? Biby biikal naak, kwiin kayeeb. Bavul ba kutudy bady mwa kwiikal bakooyelok mu mabok bwa myand yibakwaakwaat, cileejel, kwambulwiish mwiin mu cisak ubeebeel, kufwiish muut utudy bakat, kukab bwa cihuh cidy cilongek, eecy kutaatameen bwaal bukwaabw budy bukooyesh makand miitut ma nyeet, meej miitut, ni mushind utwaalaalakan. Ki i biny bidy mwa kwiitwambulwiish bwiitut kutaatameen hatukaakabakan ni micim? *

Tudy mwa kulongel bikasakan ha mushind utudy mwa kutaatameen kukabakan ni micim hakukontonon cileejel cya Mukaleng Davih. Uhetel makab mavul mu shikacil indiy, ni buumy bwindiy bwaakady misang yikwaabw mu buuhund (1 Sam. 17:34, 35; 18:10, 11) I mushind kaay waakady Davih mutaatameen myand yaakady yimutond? I mushind kaay utudy mwa kwiidikij cileejel cindiy?

Ha ciisang kahand Davih uhetel makab mavul. Twangat cileejel eecy, lang ket bwa cyaakady cimufikil haakadyey uy lubil bwa kasokot Mukaleng Sawul waakady ukaam kumuzuh. Haakady Davih ni baat bindiy bahingomw ku cibel kwa Sikilak, bumvwiil bibiih hasangenobw balwiish baman kwiib biit byaabab, boosh nzubw, ni kwangatobw bisak byaabab ku buhik. Davih ulongel biny? “Davih ni baat bindiy batangil kukabakan, baadil bikasakan masonj maah ni kuh mu mees.” Bwaal bukwaabw bulongel bwa Davih iikunying, i bwa baat bindiy baleebel “bwa kumwaasobw mabw kumuzuh.” (1 Sam. 30:1-6) Davih waakady mutaatameen myand yitam yisat musang aakaabumw: Cisak cindiy cyaakady mu buuhund, ni waakady ni mooy bwa baat bindiy baakady bakaam bwa kumuzuh, ni Mukaleng Sawul waakady wend umwiihat bwa kumukwaat. Lang ket mwaakady Davih mwa kukabakan ni micim!

I bwaal kaay bwiiyil Davih kulong? Musang umw, waakady “mubiikan Yehow Mawej indiy.” I mushind kaay waakadyey mwa kulong nook? Davih waakady mulomb Yehow dyambulwiish ni kulangiley ha mushind waakadyey mumwambulwiish kal. (1 Sam. 17:37; Mus. 18:2, 6, NWT.) Davih utadil neey: byaakady bikaam alomb buludik bwa Yehow bwa cyaakadyey mwa kulong. Hahetel Davih buludik bwa Yehow, ulongel myand musang umw, Yehow ubeneshel Davih ni baat bindiy ni kuhetobw biin mu bisak byaababw ni biit. (1 Sam. 30:7-9, 18, 19) Udy mukwaatok myand yisat yilongel Davih eeny? Waakady musambil Yehow bwa amwambulwiish, kulangiley ha myand yaakady Yehow mumulongel, ni kukooyeley buludik bwa Yehow. I mushind kaay utudy mwa kwiidikij Davih? Tukontononaay myand yisat eey.

1. Sambil. Diib dyoos ditumvumvw micim yikabakan, tudy mwa kusambil Yehow bwa iitwambulwiish ni meej. Tudy mwa kumvw bilengel hatumwaamwambil myand yoos yidy yiitutond. Eecy tudy mwa kusambil mu may makeeh, tusambil mund-mund bilondeshel shikacil utwiikal nend ciisang aacy. Diib dyoos tukakaam bwa Yehow iitwambulwiish, tuleeleej mutudy bamuteekel micim teng bu Davih uleebel neey: “Mawej i diibw dya muland dyaam dikasakan ni uulaalam. Mawej aam i diibw dya muland munady musokot.” (Mus. 18:2, NWT.) Diisambil dikakalok mudimw biin-biin eeny? Seb’aa njil Kahlia uleeleeb neey: “Hanamaaman kusambil, micim yaam yidyaakal yishaal talal. Diisambil diyambambulwiish bwa kulang bu  mulaalang Yehow, ni bwa kumuteekel bikasakan micim.” Biin-biin, diisambil i cya bukish cya kudy Yehow, ni ditwambambulwiish bwa kutaatameen malang-lang mady mu micim.

2. Kulang. Uw mulangil ha myand yidy yikufikil, udy mwa kulang neey: waakady mwa kwiiyitaatameen teng ku dyambulwiish dya Yehow eeny? Hatulaalangil ha mushind waakady Yehow mwambulwiish biin mudimw bindiy ba kal, tuheehet diitalal dya mu micim ni twiiyiiy kumuteekel micim bikasakan. (Mis. 18:17-19) “Nady ni mulong-long a masambil maalabul,” ki muleeleeb Joshua udy mukul. “Bwaal oobw buyambulwiishil bwa kuvuluk biisang binalombel Yehow bwaal kahand bwa habwaah ni uyaakishil teng cinaakady nakaam.” Ing, Hatulaalangil a myand yikaady Yehow mwiitulongel, tuheehet bukash bwa kutungunuk ni kul diivit ni kukabakan kwiitut kwa micim.

3. Kukooyel. Kuuhal kwiitut kwangat dihangadik bwa citudy mwa kulong mu shikacil kahand, bikaam tutal may ma kulond ma kuteekel micim mady mu Diiy dya Mawej. (Mis. 19:7, 11) Bavul bataatal neey: hadyobw bakaam verseh uheehetangan ni bwaal budyobw naabw, bady mwa kumvw bilengel mudy kukooyel kwa verseh oow mwa kwiibambulwiish mu shikacil aabab. Jarrod udy mukul umvumvwiij neey: “Kujoojolol myand mu mikand yiitut kuyambambulwiish bwa kumanyik myand yoos yitam yidy mu verseh ni bwa kumvw cidy Yehow ukaam bwa nalong. Kulong nook kuyambambulwiish biin-biin bwa kwiitab myand yinaloolong ni bwa kwiiyikooyel.” Hatukaakaam buludik bwa Yehow mu Bibl ni twiibukooyel, biikaakal biheehel bwiitut kuhet diitalal dya mu micim ni musangal ciisang citukaakabakan ni micim.

Davih utadil neey: bwa kuhit bilengel ni kukabakan kwa micim, byaakady bikaam alomb dyambulwiish kudy Yehow. Waakady wanyish dyambulwiish dya Yehow bikasakan ki bwabiny uleebel may aam: “ni Mawej aam, nady mwa kutuhik ciman cya cibunj. Mawej oow i yiy uuyaakaakish diikand.” (Mis. 18:29, 32, NWT) Tudy mwa kutal neey: makab miitut mamweemweek bu biman bya cibunj bitudy katuy mwa kutuhik. Ki ku dyambulwiish dya Yehow, tudy mwa kutaatameen makab ning ma bicy! Ing, hatuloolomb Yehow dyambulwiish, hatulaalangil ha byoos bidyey mwiitulongel, ni tukooyel buludik bwindiy, biloolong bwa twiikal batwiishibw neey: wiiyiiy kwiitwaakish diikand ni meej matukakaam bwa kutaatameen kukabakan kwiitut kwa micim!