AMAGHANIRYO anganabya ng’ekindu ekirithohire okwa muthima wethu. (Emi. 12:25) Wune wathayowa nabi busana n’amaghaniryo? Wune wathayowa nga siwendithasya thoka erighuma? Kyamabya ikwakiri kithya, siwuli iwuwene. Abangyi omw’ithwe banganabya ibanathwanire, eriholerwa, eriwako ekitsinduli, kutse eribya omwa yindi mibere eya baghunza amani kinyamubiri, omwa bulengekania, n’omw’iyowa. Aliwe ni kyahi ekyanga thuwathikya erithoka erighumira amaghaniryo? *

Thwangan’igha bingyi ngoku thwanga ghumira amaghaniryo omw’ilebya eky’erileberyako ky’Omwami Dawudi. Mwanabya omwa mibere mingyi eyikalire, nibya n’okwa bundi buthuku engebe yiwe eribya omwa kabi. (1 Sam. 17:34, 35; 18:10, 11) Dawudi mwathoka athi erighumira amaghaniryo? Thwanga gherererya thuthi eky’erileberyako kiwe?

Dawudi mwabana ebitsibu bingyi okwa buthuku bughumerere. Ng’eky’erileberyako, thalengekania okwa kyabya kyabere inianemuthibitha akasagha Omwami Saulo, omwithi. Dawudi n’abalhume biwe babere bakalhua omwa malhwa, mubasweka bak’eya esyonzighu syabu isyabiriba ebindu byabu, erihisya amanyumba wabu, n’erithwalha esyofamile syabu sy’omwa bunyewa. Dawudi mwakolhaki? “Dawudi n’abandu ababya nayu, mubasumba emirenge yabu, mubalira, erihika okw’ilhuha ndeke.” Eryongera okwa maghaniryo wa Dawudi, abalhume biwe abakayikethera babya ibanemukania okw’imwitha omo mabwe. (1 Sam. 30:1-6) Dawudi mwabya iniamathunga ebitsibu bisathu ebikalha-kalire murundi mughuma: Eka yiwe yabya omwa kabi, abalhume biwe ibakanza erimwitha, n’Omwami Saulo iniane mumuhambya. Thathera akasasani Dawudi ng’abya omwa maghaniryo mangahi!

Neryo aho kandi Dawudi mwakolhaki? Mwalhuaho ‘iniayibanira amaaka omo Yehova Nyamuhanga wiwe.’ Dawudi angabya imwakolha eki ky’athi? Ngoku anabya akakolha, Dawudi mwasaba Yehova y’obuwathikya n’erilengekania okwa mibere Yehova amuwathikirayamo kera. (1 Sam. 17:37; Esy. 18:2, 6) Dawudi mwalhangira ekiyithawa ky’erisondekania obusondoli bwa Yehova, neryo amasaba Yehova y’ekyo atholere erikolha. Dawudi abere abiribana obusondoli bwa Yehova, aho naho mwayira eky’erikolha. Ekyalhwiririramo, Yehova mwamutsumulha iyo n’abalhume biwe, kandi mubasubana n’esyofamile syabu n’ebindu byabu. (1 Sam. 30:7-9, 18, 19) Wanamalhangira ebindu bisathu ebyo Dawudi akolha? Mwasaba Yehova y’obuwathikya, amalengekania okwa ebya Yehova amukolera kera, n’erikolha erikwamana n’obusondoli bwa Yehova. Thwanga gherererya thuthi Dawudi? Lengekanaya okwa syonzira isathu.

1. Saba. Endambi yosi-yosi eya thwanga yowiramu ithwabiribya omwa maghaniryo, thwangana saba Yehova y’obuwathikya n’amenge. Thwangana kehya amaghaniryo omw’isaba n’erimubwira ebyosi ebiri okwa muthima. Kutse ithwangana saba omusabe mukuhi omwa bukuthu, ekyo kyamabya iky’ekikendi thokekana erikwamana n’emibere eyathulimu. Obuli erisaba Yehova y’obuwathikya, thukakanganaya ku thumuyikethere nga Dawudi oyuwabugha athi: “Omwami Mukulhu ni muhanganiri waghe, n’ahabambire haghe, n’omulhamya waghe; ni Nyamuhanga waghe,  n’omuhanganiri waghe aho ngasaghira.” (Esy. 18:2) Mbwino kwenene omusabe akanawathikaya? Mwali wethu omutemburi oyukahulhawamo Kahlia akabugha athi: “Ngabya nabirisaba, ngathekana. Erisaba likaleka ingahambania amalengekania waghe n’awa Yehova, n’eriyikethera lyaghe omw’iyo iryongera.” Omo kwenene, omusabe ni kihembo ky’amaaka ekya Yehova abirithuha ekikathuwathikaya erighumira amaghaniryo.

2. Lengekanaya. Wukabya wukasubya ameso w’enyuma, wangan’ibuka ebitsibu ebya wathoka erighumira busana n’obuwathikya bwa Yehova? Thukabya thukalengekania okwa mibere Yehova athuwathikirayamo kuthya n’abaghombe biwe abakera, thukasika n’eryongera erimuyikethera. (Esy. 18:17-19) Omusyakulhu oyukahulhawamo Joshua akabugha athi: “Ngawithe elisti ey’emisabe eyabirisubwamo. Eki kyabiringwathikya eryibuka emirundi eyo nasabiramo Yehova ekindu kirebe kandi inianyiha ekyonyine-nyine ekyo nabya ingayithagha.” Neryo kwesi, thukabya thukalengekania okwa bya Yehova abirithukolera, thukathasyabana akaghalha k’erilholha embere erirwanisya amaghaniryo.

3. Yira eky’erikolha. Thuthe thwathwamu eky’erikolha okwa mibere mirebe, omwa Kinywe kya Nyamuhanga mwathwanga sonderya obusondoli obw’eriyikethera. (Esy. 19:7, 11) Abangyi babiriminya ngoku bakabya bakasekulya okw’isako lirebe, bakayitheghereraya ndeke erisako eryo nga likahamba lithi oko ngebe yabu. Omusyakulhu oyukahulhawamo Jarrod akasoborera athi: “Erisekulya likangwathikaya eriminya bingyi okw’isako kandi ingaminya ebya Yehova akambwira. Eki kikaleka omwatsi oyo iniahika okwa muthima waghe neryo ingaghendera okwa busondoli bwiwe.” Thwamasondekania obusondoli bwa Yehova erilhua omo Masako n’eribughenderako, thukathoka erirwanisya amaghaniryo.

Dawudi mwaminya ngoku akayithagha obuwathikya bwa Yehova erithoka erighumira amaghaniryo. Mwasima obuwathikya bwa Yehova bwa kutsibu kyamaleka iniabugha athi: “Busana na Nyamuhanga waghe ngalenga oko lhuhimbo.” Kandi mwabugha athi “Nyamuhanga yukamba amaaka.” (2Sam. 22:30; Esy. 18:32) Thwangana yowa ebitsibu byethu nga biri ng’olhuhimbo olhwa thuthe thwanga lengako. Aliwe omwa buwathikya bwa Yehova thwangana singura ekitsibu kyosi-kyosi ekiri ng’olhuhimbo! Omo kwenene, thwamasaba Yehova y’obuwathikya, thukalengekania okwa byosi eby’abirithukolera, n’erikolha erikwamana n’obusondoli bwiwe, ithwangana yikethera ngoku akendi thuha amaaka n’amenge ebya thukayithagha erithoka erighumira amaghaniryo wethu!