BIJIKILA bitulengela kupopomenwa bingi. (Maana. 12:25) Nanchi mwakimanamapo na mambo a bijikila nyi? Nanchi mulanguluka’mba bijikila bimuvujila kyakuba kechi mwakonsha kuchinchika nenyi? Inge ibyo, yukai kuba’mba ne atweba bonse twikala na bijikila. Atweba bamo tubena kulama wa mu kisemi wakolwa, bamo bafwisha balunda nabo nangwa balongo babo, bakwabo nabo babena kumanama na mambo a bya malwa biponakotu abyo bine. Pano ñanyi bintu byakonsha kwitukwasha inge tuji na bijikila? *

Twakonsha kufunjilako byavula ku Mfumu Davida pa bya kuchinchika inge tuji na bijikila. Wapichile mu bya malwa byavula bingi mu bwikalo bwanji kyakuba pa bimye bimo bakebelenga ne kumwipaya. (1 Sam. 17:34, 35; 18:10, 11) Pano ñanyi bintu byakwashishe Davida kuchinchika? Twakonsha kuchinchika byepi byonka byachinchikile Davida?

Davida wapichile mu bya malwa byavula bingi. Akilangulukai pa byamwekejile Davida byo bakebelenga kumwipaya ku Mfumu Saulo. Davida ne bantu banji byo babwelele ku Zikilagi, bataaine kuba’mba byonse byo bajinga nabyo bebisenda, basoka muzhi wabo yense kabiji batwajile mu buzha bisemi byabo byonse. Davida waubilepo byepi? Baibolo waamba’mba: “Davida ne bantu bo ajinga nabo batendekele kujila mabingo, kufikatu ne bulume bwa kujila byo bwapwile.” Kikwabo kyaletejile Davida bijikila ke banabalume bo aketekejile. Wibomvwine saka bamba “bya kumwasa mabwe.” (1 Sam. 30:1-6) Onkao mambo, Davida wapichile mu makatazho akatampe asatu pa kimye kimo. Kitanshi, kisemi kyanji kyajinga mu kizumba. Kya bubiji banabalume bo ajinga nabo bakebelenga kumwipaya, ne kya busatu Mfumu Saulo watwajijile kumupangisha kuba’mba amwipaye. Kinetu Davida wajinga na makatazho avula bingi.

Ñanyi kintu kyamukoseshe Davida? Baibolo waamba’mba: “Davida wakosele na mambo a bukwasho bwa Yehoba Lesa wanji.” Davida walombanga kwi Yehoba kabiji wavulukanga Yehoba byo amukwashishe pa bintu byo apichilemo kala. (1 Sam. 17:37; Sala. 18:2, 6) Davida wayukile’mba wafwainwa kulomba kwi Yehoba kuba’mba amutangijile. Onkao mambo, walombele kwi Yehoba kuba’mba amubuule byo afwainwa kuba. Ponkapotu Davida waubile byo bamubuujile kwi Yehoba. Ne kyafuminemo, Yehoba wapesheshe Davida ne banabalume bo ajinga nabo kabiji baangachile bintu byabo byonse byo basendele ne kupokolola bisemi byabo. (1 Sam. 30:7-9, 18, 19) Nanchi mwamona bintu bisatu byanema byaubile Davida nyi? Walombele kwi Yehoba kuba’mba amukwashe. Wavulukile Yehoba byo amukwashishe pa bintu byo apichilemo kala. Kabiji waubile byamwambijile Yehoba. Twakonsha kulondela byepi byaubile Davida? Twafwainwa kuba bintu bisatu byaubile Davida.

1. Lombainga. Inge twaikala na bijikila twafwainwa kulombanga kwi Yehoba kuba’mba etukwashe ne kwitupa maana. Kulomba kwi Yehoba kimye kyabaya ne kumubuula byonse biji ku muchima kuketulengela kukasuluka. Nangwa twakonsha kulomba kishinshi lulombelo lwipi, kwesakana na biji bintu pa kyokyo kimye. Inge ketulombe kwi Yehoba kuba’mba etukwashe, kino  kimwesha’mba twaketekela mwi aye byonka byamuketekejile Davida. Waambile’mba: “Yehoba jo jibwe jami jikatampe, yo nsakwa yami yakosa kabiji ye umpokolola. Lesa wami jo jibwe jami, mo mo mfyama.” (Sala. 18:2) Nanchi lulombelo lwakonsha kwitukwasha nyi? Nyenga umo painiya wa jizhina ja Kahlia waambile’mba: “Inge nalomba kwi Yehoba nkasuluka bingi. Kulomba kunkwasha kwikala na milanguluko yawama kabiji ntwajijila kuketekela mwi Yehoba.” Kinetu lulombelo ke kintu kyanema bingi kitupa Yehoba mambo kitukwasha kuchinchika inge tuji na bijikila.

2. Vulukainga Yehoba byo emukwashishe pa bintu byo mwapichilemo kala. Inge mwalanguluka pa bwikalo bwenu, nanchi mubena kuvulukapo Yehoba byo emukwashishe kuchinchika makatazho amo o mwapichilemo mu bwikalo bwenu nyi? Inge twavuluka Yehoba byo etukwashishe ne byo akwashishe bakalume banji ba kala, lwitabilo lwetu lukoselako kabiji tutwajijila kuketekela mwi aye. (Sala. 18:17-19) Mukulumpe mu kipwilo aye Joshua waambile’mba: “Nanemba bintu byonse byankumbwile Yehoba. Kino kinkwasha kuvuluka bintu byonse byo nalombele kwi Yehoba kabiji wankumbwijile monka mo nalombejile.” Kwambatu kine, inge ketulanguluke pa bintu bitubila Yehoba, tuyuka mwakubila na bijikila.

3. Ubainga byaamba Baibolo. Saka tukyangye kufuukula mwakubila na lukatazho, patanshi twafwainwa kumona byaambapo Mambo a Lesa pa kuba’mba etutangijile. (Sala. 19:7, 11) Bavula bataana kuba’mba kukebakeba mu binembelo kwibakwasha kuyuka byo bafwainwa kwingijisha byobyo binembelo mu bwikalo bwabo. Mukulumpe mu kipwilo aye Jarrod waambile’mba: “Kukebakeba bishinka pa kinembelo kunkwasha kuyuka mwatala kyokyo kinembelo ne kumvwisha bibena kukeba Yehoba kuba’mba ngube. Kuba bino kunkwasha kuketekela bishinka byo natanga ne kwibyuba.” Umvwe ke tukebekebe bishinka mu Binembelo ne kulondela byo byaamba, tukekala na lusekelo nangwa kyakuba tuji na bijikila.

Davida wayukile kuba’mba Yehoba ye wafwainwe kumukwasha kuchinchika bya malwa byo apichilengamo. Davida wasanchilanga bingi Yehoba pa byo amukwashanga. O ene mambo o aambijile’mba: “Na bulume bwa Lesa nakonsha kukanjila ku lubumbulu. Lesa wa kine ye umvwika bulume.” (Sala. 18:29, 32) Kimo kimye twakonsha kulanguluka’mba kechi twakonsha kuchinchika makatazho o tubena kupitamo ne. Pano bino Yehoba wafwainwa kwitukwasha kuchinchika ano makatazho. Inge twalomba, kuvuluka byo etukwashishepo kala ne kulondela lutangijilo lwanji, twafwainwa kuketekela kuba’mba uketupa bulume ne maana a kwitukwasha kuchinchika inge tuji na bijikila.