နလဲၤခီဖျိ တၢ်သူၣ်ကိၢ်သးဂီၤ ကန့ၢ်ဒ်လဲၣ်
တၢ်သူၣ်ကိၢ်သးဂီၤန့ၣ် လီၤဂာ်ဒ်သိးဒီး တၢ်ဝံတၢ်ယိးဖးဒိၣ်တခါ. (ကတိၤဒိ ၁၂:၂၅) ခီဖျိလၢ နသူၣ်ကိၢ်သးဂီၤတၢ်အဃိ နတသးခုလၢၤဘၣ်န့ၣ် အိၣ်ဧါ. မ့ၢ်နတူၢ်ဘၣ်လၢ နတူၢ်တၢ်တကဲလၢၤဘၣ်န့ၣ် အိၣ်တဘျီဘျီစ့ၢ်ကီးဧါ. မ့မ့ၢ်ဒ်န့ၣ်န့ၣ် တဘၣ်သးဟးဂီၤတဂ့ၤ. ပှၤလၢအတူၢ်ဘၣ်တၢ်ဒ်အံၤန့ၣ် တအိၣ်ထဲနၤတဂၤဘၣ်. ပဝဲအါဂၤန့ၣ် ပဘၣ်ကွၢ်ထွဲပှၤဆူးပှၤဆါ, ပှၤလၢပအဲၣ်ဘၣ်အီၤတဖၣ် သံသဒၣ်ကွံာ်ပှၤ, ပထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံး မ့တမ့ၢ် ပထံၣ်ဘၣ်ဒီး တၢ်အိၣ်သးလၢ အမၤလီၤစၢ်ပဂံၢ်ပဘါ လၢနီၢ်ခိဒီးနီၢ်သး အဃိ ပသူၣ်ဟးဂီၤသးဟးဂီၤသ့. ဘၣ်ဆၣ် တၢ်မနုၤမၤစၢၤပှၤဒ်သိး ပလဲၤခီဖျိတၢ်သူၣ်ကိၢ်သးဂီၤ ကန့ၢ်အဂီၢ်လဲၣ်. a
ပမ့ၢ်ဆိကမိၣ်ထံ စီၤပၤဒၤဝံးအတၢ်လဲၤခီဖျိန့ၣ် ပကဘၣ်လဲၤခီဖျိ ပတၢ်သူၣ်ကိၢ်သးဂီၤဒ်လဲၣ်န့ၣ် ပကသ့ၣ်ညါအါထီၣ်အီၤ. စီၤပၤဒၤဝံး ထံၣ်ဘၣ်ဒီးတၢ်အိၣ်သး လၢအကီအခဲ တကးဒံးဘၣ် တၢ်လီၤဘၣ်ယိၣ်အိၣ်ထီၣ်လၢ အသးသမူအဂီၢ် အဘျီအါမး. (၁ ၡမူၤအ့လး ၁၇:၃၄, ၃၅; ၁၈:၁၀, ၁၁) စီၤဒၤဝံးလဲၤခီဖျိ တၢ်သူၣ်ကိၢ်သးဂီၤတဖၣ် န့ၢ်ဒ်လဲၣ်. ဒီးပကွၢ်လိမၤဒိးအီၤ ကသ့ဒ်လဲၣ်.
စီၤဒၤဝံးလဲၤခီဖျိ အတၢ်သူၣ်ကိၢ်သးဂီၤန့ၢ်ဒ်လဲၣ်
လၢတကတီၢ်ဃီအပူၤန့ၣ် စီၤဒၤဝံးထံၣ်ဘၣ်ဒီး တၢ်ကီတၢ်ခဲအမၠိအါမး. ဆိကမိၣ်ကွၢ် ဖဲစီၤပၤစီလူးလူၤဃုမၤသံ စီၤဒၤဝံးအဆၢကတီၢ်န့ၣ် စီၤဒၤဝံးထံၣ်ဘၣ်ဒီးတၢ်အိၣ်သး မနုၤတဖၣ်လဲၣ်. ဖဲစီၤဒၤဝံးဒီးပှၤသုးဖိတဖၣ် ဟဲက့ၤအခါ အဝဲသ့ၣ် သ့ၣ်ညါဝဲလၢ အဒုၣ်အဒါတဖၣ် ဟံးန့ၢ်အတၢ်ဖိတၢ်လံၤ, ဒွဲၣ်အူထီၣ်အဟံၣ်အဃီ ဒီးက့ၤဖီၣ်အဟံၣ်ဖိဃီဖိအခါ အဝဲသ့ၣ်ကဖုးဘၣ်အသးဒိၣ်မး. အဃိ “စီၤဒၤဝံးဒီးပှၤဂီၢ်မုၢ်အိၣ်ဒီးအီၤန့ၣ် ထုထီၣ်အကလုၢ်, ဒီးဟီၣ်ဝဲတုၤအဟီၣ်တကဲလၢၤဘၣ်လီၤ.” စီၤဒၤဝံးထံၣ်ဘၣ်ဒီး တၢ်ကီတၢ်ခဲဒ်အံၤလံ သနာ်က့ ပှၤလၢအနာ်န့ၢ်ဝဲသ့ၣ်တဖၣ် အဲၣ်ဒိး “ကွံာ်အီၤလၢလၢၢ်” ဒံး. (၁ ၡမူၤအ့လး ၃၀:၁-၆) ဖဲအံၤန့ၣ် ပထံၣ်ဘၣ်လၢ စီၤဒၤဝံးထံၣ်ဘၣ်ဒီး တၢ်ကီတၢ်ခဲဖးဒိၣ် သၢခါတဘျီဃီ. အဟံၣ်ဖိဃီဖိ အိၣ်လၢတၢ်လီၤဘၣ်ယိၣ်အပူၤ ဒီးပှၤလၢအနာ်န့ၢ်ဝဲသ့ၣ်တဖၣ်န့ၣ် အဲၣ်ဒိးမၤသံအီၤ, တကးဒံးဘၣ် စီၤပၤစီလူးစ့ၢ်ကီး လူၤဃုမၤသံအီၤ. ထံၣ်တမှံကွၢ် ဖဲန့ၣ်အခါ စီၤဒၤဝံးကသူၣ်ကိၢ်သးဂီၤတၢ်ထဲလဲၣ်.
အဃိ ပကကွၢ်သကိး စီၤဒၤဝံးကမၤဝဲဒ်လဲၣ်. စီၤဒၤဝံး “ပာ်ဆူၣ်အသးလၢယွၤအပူၤ” တဘျီဃီ. စီၤဒၤဝံး ပာ်ဆူၣ်သးလၢယွၤအပူၤ လၢကျဲဒ်လဲၣ်. ညီနုၢ်န့ၣ် စီၤဒၤဝံးဃ့ ယဟိဝၤယွၤအတၢ်မၤစၢၤ ဒီးအဝဲဆိကမိၣ်ထံဝဲဒၣ် ကစၢ်ယွၤမၤစၢၤတ့ၢ်အီၤဒ်လဲၣ်. (၁ ၡမူၤအ့လး ၁၇:၃၇; စံးထီၣ်ပတြၢၤ ၁၈:၂, ၆) စီၤဒၤဝံးလိၣ်ဘၣ်ဝဲဒၣ် ယဟိဝၤယွၤအတၢ်ဟံးစုနဲၣ်ကျဲ အဃိ အဃ့တၢ်လၢယဟိဝၤယွၤအအိၣ် ဒ်သိး အကသ့ၣ်ညါဝဲလၢ အကမၤတၢ်မနုၤလဲၣ်. ဖဲစီၤဒၤဝံး သ့ၣ်ညါ ယဟိဝၤယွၤအတၢ်ဟံးစုနဲၣ်ကျဲအခါ အမၤထွဲဝဲ တဘျီဃီ. အဃိ စီၤဒၤဝံးဒီးအပှၤသ့ၣ်တဖၣ် ဒိးန့ၢ်ဘၣ်ဝဲ ယဟိဝၤယွၤတၢ်ဆိၣ်ဂ့ၤ ဒီးအဝဲသ့ၣ် ဒိးန့ၢ်ဘၣ်က့ၤ အဖိအမါ အဟံၣ်ဖိဃီဖိ ဒီးအတၢ်ဖိတၢ်လံၤတဖၣ်. (၁ ၡမူၤအ့လး ၃၀:၇-၉, ၁၈, ၁၉) အဃိ ဖဲအံၤပထံၣ်ဘၣ်လၢ စီၤဒၤဝံးမၤဝဲတၢ်သၢမံၤ. စီၤဒၤဝံး ဃ့ယဟိဝၤယွၤအတၢ်မၤစၢၤ, အဆိမိၣ်ထံက့ၤဝဲ တၢ်လၢယဟိဝၤယွၤ မၤစၢၤတ့ၢ်အီၤ ဒီးမၤထွဲဝဲ ယဟိဝၤယွၤ တၢ်ဟံးစုနဲၣ်ကျဲလီၤ. ပကွၢ်လိမၤဒိး စီၤဒၤဝံးကသ့ဒ်လဲၣ်န့ၣ် ပကကွၢ်သကိး ကျဲသၢဘိ.
ဖဲပထံၣ်ဘၣ် တၢ်သူၣ်ကိၢ်သးဂီၤအခါ ပကွၢ်လိဝဲ စီၤဒၤဝံးသ့
၁. ဃ့ဘါထုကဖၣ်. ဖဲပအိၣ်ဒီးတၢ်သူၣ်ကိၢ်သးဂီၤ တဘျီဂ့ၤတဘျီဂ့ၤအခါ ပဃ့ယဟိဝၤယွၤအတၢ်မၤစၢၤ ဒီးတၢ်ကူၣ်သ့ သ့ဝဲ. ပမ့ၢ်တဲဘၣ် ယဟိဝၤယွၤလၢ ပတၢ်ဘၣ်ယိၣ်ဘၣ်ဘှီခဲလၢာ်န့ၣ် ပသးမုာ်ထီၣ်က့ၤသ့. မ့တမ့ၢ် လၢပတၢ်အိၣ်သးအဖီခိၣ် ပဃ့ဘါထုကဖၣ်လၢ ပသးပူၤဖုၣ်ဖုၣ်ဖိသ့. ဖဲပဃ့ယဟိဝၤယွၤတၢ်မၤစၢၤ တဘျီဂ့ၤတဘျီဂ့ၤအခါ မ့ၢ်ဒၣ်ပသန့ၤပသးလၢ လၢယဟိဝၤယွၤအအိၣ်ဒ်သိးဒီး စီၤဒၤဝံးလီၤ. စီၤဒၤဝံးတဲဝဲလၢ “ယွၤမ့ၢ်ယလ့, ဒီးယတိာ်, ဒီးယတၢ်မၤပူၤမၤဖျဲးယၤ, ယကစၢ်, ယလၢၢ်, ယကသန့ၤယသးလၢအီၤ.” (စံးထီၣ်ပတြၢၤ ၁၈:၂) တၢ်ဃ့ဘါထုကဖၣ်န့ၣ် မၤစၢၤပှၤသပှၢ်ကတၢၢ်ဧါ. ဒီပုၢ်ဝဲမုၣ်ခါလံယါ လၢအမၤပှၤလဲၤလၢညါန့ၣ် တဲဝဲလၢ “ဖဲယဃ့ဘါထုကဖၣ် ဝံၤအလီၢ်ခံန့ၣ် ယသးမုာ်ထီၣ်. တၢ်ဃ့ဘါထုကဖၣ် မၤစၢၤယၤဒ်သိးဒီး ယကဆိကမိၣ်တၢ် ဒ်ယဟိဝၤယွၤ ဆိကမိၣ်ဝဲအသိး, ဒီးယတၢ်နာ်န့ၢ်အီၤန့ၣ် ဟဲအါထီၣ်ဝဲ.” တၢ်ဃ့ဘါထုကဖၣ်န့ၣ် မ့ၢ်ဝဲ တၢ်ဟ့ၣ်အဂ့ၤဒိၣ်မးတခါလၢ အဟဲလၢယဟိဝၤယွၤအအိၣ်လၢ ကမၤစၢၤပှၤဒ်သိးဒီး ပလဲၤခီဖျိတၢ်သူၣ်ကိၢ်သးဂီၤကန့ၢ်အဂီၢ်.
၂. ဆိကမိၣ်ထံက့ၤတၢ်. တၢ်မၤကွၢ်လၢ နလဲၤခီဖျိအီၤ န့ၢ်ထဲဒၣ်လၢ ယဟိဝၤယွၤ အတၢ်မၤစၢၤန့ၣ် အိၣ်တဘျီဘျီဧါ. ပမ့ၢ်ဆိကမိၣ်ထံက့ၤ တၢ်လၢယဟိဝၤယွၤမၤစၢၤတ့ၢ် အခ့အပှၤလၢပျၢၤတဖၣ်ဒ်လဲၣ်န့ၣ် ပဂံၢ်ပဘါကဆူၣ်ထီၣ် ဒီးပတၢ်နာ်န့ၢ်အီၤ ကဟဲအါထီၣ်. (စံးထီၣ်ပတြၢၤ ၁၈:၁၇-၁၉) ဒီပုၢ်ဝဲၢ်ခွါကၠါၡဝၤ လၢအမ့ၢ်တၢ်အိၣ်ဖှိၣ်သးပှၢ်န့ၣ် တဲဝဲလၢ “ယကွဲးလီၤဃာ် ယတၢ်ဃ့ထုကဖၣ်လၢ ကစၢ်ယွၤစံးဆၢဝဲတဖၣ် အဃိ အမၤစၢၤယၤဒ်သိး ယကသ့ၣ်နီၣ်က့ၤ တၢ်ဆၢကတီၢ်လၢ ယဃ့ထုကဖၣ်လၢ ယဟိဝၤယွၤအအိၣ် ဒီးတၢ်ဂ့ၢ်တၢ်ကျိၤလၢ ယဃ့အီၤ, ဒီးအစံးဆၢယတၢ်ထုကဖၣ် ဒ်ယလိၣ်ဘၣ်အီၤအသိး.” ဖဲပဆိကမိၣ်ထံက့ၤ တၢ်လၢယဟိဝၤယွၤမၤစၢၤတ့ၢ်ပှၤ လၢအပူၤကွံာ်အခါ ပကအိၣ်ဒီး တၢ်ဂံၢ်တၢ်ဘါလၢ ပကလဲၤခီဖျိ ပတၢ်သူၣ်ကိၢ်သးဂီၤအဂီၢ်.
၃. မၤထွဲအီၤ. ကစၢ်ယွၤအကလုၢ်ကထါ လံာ်စီဆှံ ပာ်ဖျါထီၣ်န့ၢ်ပှၤ တၢ်ဟံးစုနဲၣ်ကျဲလၢ အဂ့ၤကတၢၢ်အဃိ တချုးလၢ ပဆၢတဲာ်တၢ်ဒံးဘၣ်အခါ ပကဘၣ်ဃု တၢ်ဟံးစုနဲၣ်ကျဲလၢ အပူၤ. (စံးထီၣ်ပတြၢၤ ၁၉:၇, ၁၁) ပှၤအါတက့ၢ်န့ၣ် ဖဲအဝဲသ့ၣ်ဃုသ့ၣ်ညါဝဲ လံာ်စီဆှံတဆၢဆၢအခါ အဝဲသ့ၣ် သ့ၣ်ညါအါထီၣ်ဝဲလၢ ကဘၣ်မၤထွဲဝဲဒၣ်ဒ်လဲၣ်. ဒီပုၢ်ဝဲၢ်ကၠါရိၣ် လၢအမ့ၢ်တၢ်အိၣ်ဖှိၣ်သးပှၢ်တဂၤ တဲဝဲလၢ “ဖဲယဃုသ့ၣ်ညါဝဲ လံာ်စီဆှံအဆၢဖိ တဆၢအခါ အမၤစၢၤယၤဒ်သိး ယကသ့ၣ်ညါအါထီၣ် လံာ်စီဆှံတဆၢန့ၣ် ဒီးယကနၢ်ပၢၢ် တၢ်လၢယဟိဝၤယွၤတဲယၤ. ယမၤဒ်န့ၣ်အဃိ ယနာ်ဝဲ တၢ်လၢယဖးအီၤ ဒီးယအဲၣ်ဒိးမၤထွဲအီၤ.” ဖဲပဃုယဟိဝၤယွၤ အတၢ်ဟံးစုနဲၣ်ကျဲလၢ လံာ်စီဆှံအပူၤဒီး မၤထွဲအီၤအခါ ပလဲၤခီဖျိပတၢ်သူၣ်ကိၢ်သးဂီၤ ကညီဒိၣ်ထီၣ်.
ယဟိဝၤယွၤ ကမၤစၢၤနၤလၢ နလဲၤခီဖျိ တၢ်သူၣ်ကိၢ်သးဂီၤကန့ၢ်
စီၤဒၤဝံးသ့ၣ်ညါဝဲလၢ ဒ်သိးအလဲၤခီဖျိ တၢ်သူၣ်ကိၢ်သးဂီၤကန့ၢ်အဂီၢ် အလိၣ်ဘၣ်ယဟိဝၤယွၤအတၢ်မၤစၢၤ. စီၤဒၤဝံးပာ်လုၢ်ပာ်ပှ့ၤ ယဟိဝၤယွၤအတၢ်မၤစၢၤအဃိ အတဲဝဲလၢ “ယစံၣ်ကပာ်လံတၢ်အဒူၣ်လၢ ယကစၢ်တဂၤန့ၣ်လံ. ပှၤလၢအကံၢ်တူာ်ယယီၢ်ဒ့ဒီး တၢ်ဂံၢ်တၢ်ဘါန့ၣ် မ့ၢ်ယွၤလီၤ.” (စံးထီၣ်ပတြၢၤ ၁၈:၂၉, ၃၂) ဘၣ်သ့ၣ်သ့ၣ် ပကတူၢ်ဘၣ်လၢ ပတၢ်ကီတၢ်ခဲတဖၣ် လီၤဂာ်ဒ်သိးဒီး တၢ်ဒူၣ်ကပာ်လၢ ပဖုကပာ် (စံၣ်ကပာ်) အီၤတန့ၢ်ဘၣ်. ဘၣ်ဆၣ် ယဟိဝၤယွၤ ကမၤစၢၤပှၤဒ်သိးဒီး ပလဲၤခီဖျိအီၤကန့ၢ်အဂီၢ်. ပမ့ၢ်ဃ့ ယဟိဝၤယွၤအတၢ်မၤစၢၤ, ဆိကမိၣ်ထံက့ၤ တၢ်လၢအမၤစၢၤတ့ၢ်ပှၤတဖၣ် ဒီးမၤထွဲအတၢ်ဟံးစုနဲၣ်ကျဲန့ၣ် ပနာ်သ့သပှၢ်ကတၢၢ်လၢ အကဟ့ၣ်ပှၤတၢ်ဂံၢ်တၢ်ဘါဒီး တၢ်ကူၣ်သ့ ဒ်သိးပလဲၤခီဖျိ ပတၢ်သူၣ်ကိၢ်သးဂီၤကန့ၢ်အဂီၢ်.
a ပှၤလၢအသူၣ်ကိၢ်သးဂီၤတၢ် အါတလၢန့ၣ် ဘၣ်သ့ၣ်သ့ၣ် အကဘၣ်လဲၤပၠးအသးလၢ ကသံၣ်သရၣ်အအိၣ်.
