MITUNGISI lenda vuanda lokola kizitu mosi na ntima na beto. (Bin. 12:25) Yamekuminaka nge nge tungisama na luzingu na nge? Yamekuminaka nge nge kukimona ti nge kelenda diaka ve kukanga ntima? Kana yakele mutindu yina, nge kele nge mosi ve. Mingi kati na beto melembaka, metungisamaka, mpe meniokuamaka na makanisi samu na bamfunu mingi. Na kifuani, bayankaka vuandaka tanina mpangi mosi ya dibuta na bau, bayankaka mezimbisaka muntu yina bavuandaka zola mingi, mpe bayankaka meniokuamaka samu na bisumbula yina kebimaka yau mosi. Kasi yinki kesadisa beto samu beto nunga mbotembote mitungisi? *

Beto lenda baka malongi mingi na mutindu ya kununga mitungisi na kutadilaka kifuani ya ntinu Davidi. Yandi kutanaka na mambu mingi ya mpasi na luzingu na yandi, mpe luzingu na yandi vuandaka na kivonza na bantangu yankaka. (1Sa 17:34, 35; 18:10, 11) Yinki mutindu Davidi nungaka mbotembote mitungisi? Yinki mutindu beto lenda landa kifuani na yandi?

Davidi kutanaka na mambu mingi ya mpasi na mbala mosi. Na kifuani, kanisa na diambu yina kuminaka yandi ntangu yandi vuandaka tina ntinu Saulo yina vuandaka sosa kufua yandi. Ntangu Davidi kintuadi na bantu na yandi vutukaka na Ziklage samu na mvita, yasalaka bau mpasi ntangu bamonaka bambeni na bau yibaka bima na bau, bayokaka bayinzo na bau, mpe banataka mabuta na bau na kinanga. Yinki Davidi salaka? ‘Davidi mpe bantu yina vuandaka na yandi bandaka kudila ngolo tii ntangu bavuandaka diaka ve na ngolo ya kudila.’ Davidi kukitungisaka diaka mingi, samu bantu na yandi ya kukuikama ‘tubaka ti bakekufua yandi na mabanga.’ (1Sa 30:1-6) Na ntangu yango Davidi vuandaka na mambu tatu ya nene yina yandi kutanaka na yau na mbala mosi: Dibuta na yandi vuandaka na kivonza, yandi vuandaka banga ti bantu na yandi vuandaka sosa kufua yandi, mpe ntinu Saulo vuandaka tatamana kusosa yandi. Kanisa na mitungisi yina Davidi vuandaka na yau!

Yinki Davidi salaka na manima? Na mbala mosi ‘yandi bakaka lukindusu na lusadusu ya Yehova Nzambi na yandi.’ Yinki mutindu Davidi bakaka lukindusu yango? Beto mezaba ti Davidi sambilaka Yehova samu na kulomba lusadusu mpe yandi kanisaka na mutindu Yehova sadisaka yandi na ntama. (1Sa 17:37; Nk. 18:2, 6) Davidi monaka mfunu ya kusosa lutuadusu ya Yehova, na yau yandi yuvusaka Yehova diambu yina yandi fueti sala. Na manima ya kubaka lutuadusu ya Yehova, Davidi salaka diambu mosi kondua kuvingila. Yau salaka ti, Yehova sakumuna yandi mpe bantu na yandi mpe babakaka mabuta na bau mpe bima na bau. (1Sa 30:7-9, 18, 19) Nge mesimba mambu tatu yina Davidi salaka? Yandi sambilaka Yehova samu na kubaka lusadusu, yandi yindulaka na mutindu Yehova sadisaka yandi na ntama, mpe yandi salaka diambu na kulandaka lutuadusu ya Yehova. Yinki mutindu beto lenda landa kifuani ya Davidi? Beto tadila mambu tatu.

1. Kisambu. Konso ntangu yina beto lenda banda kukitungisa, beto lenda sambila Nzambi samu na kulomba lusadusu mpe nduenga na yandi. Yalenda sadisa beto beto kukimona mbote ntangu beto kena kutubila yandi konso diambu yina kena kutungisa beto. To beto lenda sala kisambu mosi ya nkufi, ya yinsi ya ntima na kutadila mambu yina beto kena kukutana na yau na ntangu yina. Konso ntangu yina beto kesosaka lusadusu na Yehova, beto kemonisaka ti beto ketudilaka yandi ntima lokola Davidi yina tubaka: ‘Yehova kele dibanga na munu, kisika na munu ya ngolo ya lutanunu mpe muntu yina kevukisaka munu.  Nzambi na munu kele dibanga na munu, munu ketinaka na yandi.’ (Nk. 18:2) Kisambu kesimbaka mpenza? Mpasudi nzila mosi ya nketo na nkumbu ya Kahlia metuba: “Na manima ya kusala kisambu, munu kekumaka na kiyenge ya ntima. Kisambu kesadisaka munu munu vuanda na makanisi ya mutindu mosi na ya Yehova, mpe yau kesalaka ti munu tudila yandi ntima mingi.’ Na yau, kisambu kele dikabu mosi ya kilendo ya Yehova yina kesadisaka beto beto nunga mitungisi.

2. Yindula. Ntangu nge kena kuyindula na mambu yina mesalamaka na luzingu na nge, nge lenda kanisa na bampasi yina nge vuandaka na dikoki ya kukangila ntima kaka samu Yehova sadisaka nge? Ntangu beto keyindulaka na mutindu Yehova kesadisaka beto mutindu yandi sadisaka bisadi na yandi ya ntama, beto kekumaka na kiyenge mingi mpe beto ketudilaka diaka Yehova ntima mingi. (Nk. 18:17-19) Nkulutu mosi na nkumbu ya Joshua metuba: “Munu kele na liste ya bamvutu ya bisambu na munu. Yau sadisaka munu munu kanisa na bantangu yina munu lombaka Yehova diambu mosi ya mfunu mpe yandi vuandaka pesa munu yina munu vuandaka na yau nsatu.” Ee, ntangu beto kena kuyindula na mambu yina Yehova mesalaka deja samu na beto, beto kebakaka ngolo yina beto kele na yau nsatu samu beto tatamana kunuanisa mitungisi.

3. Sala diambu. Tekila ya kubaka nzengolo ya kusala diambu mosi, beto lenda sosa lutuadusu ya mbote na nzila ya Mpova ya Nzambi. (Nk. 19:7, 11) Bantu mingi kemonaka ti ntangu bakena kusosa verse mosi ya Biblia, bakevuandaka na dikoki ya kubakusa mbote mutindu ya kusadila verse yango na luzingu na bau. Nkulutu mosi na nkumbu ya Jarrod metuba: “Kusosasosa sadisaka munu munu longuka mambu mingi na yina metadila verse yango mpe kubakusa yina Yehova kena kutubila munu. Yau kesadisaka munu munu ndima mambu yina mukena kutanga samu munu sala mambu na kulandaka lutuadusu na yandi.” Ntangu beto kena kusosa lutuadusu ya Yehova na nzila ya Masonukua mpe kusadila lutuadusu yango, yakevuanda pete samu na beto beto baka kiyenge mpe kiese ntangu beto kele na mitungisi.

Davidi bakusaka ti samu na kununga mbotembote mitungisi, yandi vuandaka na nsatu ya lusadusu ya Yehova. Yandi vuandaka sepela na lusadusu ya Yehova mingi yau tindaka yandi yandi tuba: ‘Na ngolo ya Nzambi munu lenda monte na kibaka. Nzambi ya kedika kele muntu yina kevuatisaka munu ngolo.’ (Nk. 18:29, 32) Beto lenda kukimona ti bampasi na beto kele ngolo kuluta, yakele na solision ve mpe beto kelenda ve kukangila yau ntima. Kasi na lusadusu ya Yehova, beto lenda monte konso kibaka ya bampasi! Ee, ntangu beto kena kusambila Yehova sadisa beto, kuyindula na mambu nionso yina yandi mesalaka samu na beto mpe kusala diambu na kulandaka lutuadusu na yandi, beto lenda ndimisama ti yandi kepesa beto ngolo mpe nduenga yina beto kele na yau nsatu samu na kununga mbotembote mitungisi na beto!