NTIMA yina ke ve na kizunu ke faso kilo ya nene yina beto ke na nataka. (Bin. 12:25) Ya me kuminá nge na kuvanda na kilo ya faso yina na ntima mpe, kutala ti nge ke na lendá dyaka ve? Nge ke ve nge mosi. Bamambu mingi lenda kwiza katula beto kizunu na ntima, mpe kulembisa beto na nzutu mpe na makanisi. Ntangu ya nkaka, beto ke na kipeke muntu ya dikanda ya beto yina ke na belá, beto me fwidila muntu yina beto vandá zola, to mupepe ya ngolo to bamvula me natina beto bampasi. Na mantwala ya bamambu nyonso yayi, wa’ faso beto lenda bumba kizunu ya beto ya ntima? *

Beto lenda longoka mingi na faso ya kunwana na ntima yina ke ve na kizunu, si beto tala kifwani ya mfumu Davidi. Davidi kutaná na bamambu mingi ya mpasi na luzingu ya yandi. Bantangu ya nkaka, ya bikaná kaka fioti samu yandi kufwa. (1 Sa. 17:34, 35; 18:10, 11) Yinki Davidi salá na bantangu yina? Mpe wa’ faso beto lenda landa kifwani ya yandi?

Bamambu mingi ya mpasi kuminá Davidi na mbala mosi. Beto zonzila mambu mosi yina kuminak’ yandi ntangu yandi vandá kima mfumu Saule yina vandá sosa kufwa yandi. Kilumbu mosi Davidi na babakala yina vandá na yandi vutuká na Siklagi, bwala yina ba vandá vanda. Ntangu ba kumá, ba talá ti bantu ya Amaleki yoká bayinzo ya bawu, baká bima ya bawu mpe natá bakento mpe bana ya bawu. Yinki Davidi salaka? ‘Davidi na bantu yina vandaka na yandi bandaka kudila ngolo tii ba vandaka dyaka ve na ngolo ya kudila.’ Mpasi ya Davidi lutilá dyaka ntangu babakala yina vandá na yandi ‘tubaka ti ba ke fwa yandi na matadi.’ (1 Sa. 30:1-6) Na ntangu yina, Davidi vandá na bamambu 3 ya nene: yandi vandá na boma ba kufwa bakento na bana ya yandi, yandi vandá na boma babakala yina vandá na yandi kufwa yandi, mpe mfumu Saule vandá sosa kisika yina yandi vandá samu na kufwa yandi. Kanisa na mutindu mambu yayi katulá kizunu na ntima ya Davidi.

Na manima, yinki Davidi salaka? Na mbala mosi, yandi ‘kuzwaka bukindi na lubakusu ya Yehova Nzambi ya yandi.’ Samu na yinki Davidi kanisá ntete na kusambila? Samu ya vandá kifu ya yandi. Yandi vandá mpe na kifu ya kukanisá na yina Yehova salá samu na yandi na ntama. (1 Sa. 17:37; Nku. 18:2, 6) Davidi talá ti yandi vandá na nsatu Yehova twadisa yandi. Na yawu, yandi sosá kuzaba yinki Yehova ke zonza na yandi na kusala. Ntangu yandi zabá yinki Yehova zolá yandi sala, yandi salak’ yawu na mbala mosi. Ya salá ti Yehova sakumuna yandi na babakala yina vandá na yandi. Mpe ba lendá kubotola bima yina ba labá bawu mpe makanda ya bawu. (1 Sa. 30:7-9, 18, 19) Nge me tala bima tatu yina Davidi salaka? Yandi sambilá Yehova sadisa yandi, yandi kanisá na yina Yehova salá samu na yandi na ntama, mpe yandi sadilá mambu yina Yehova zonzá na yandi na kusala. Beto zonzila bafaso 3 yina beto lenda landa kifwani ya Davidi.

1.Sambila. Ntangu nyonso beto ke talá ti ntima ya beto ke ve na kizunu, beto lenda sambila Yehova samu yandi sadisa beto mpe pesa beto mayela. Kilo yina beto ke na yawu na ntima lenda katuka ntangu beto ke lutisá ntangu mingi na kusambila, mpe ke fungulá ntima ya beto na Yehova. Si beto lenda sambila ve mingi, beto lenda sala lusambu ya nkufi. Ntangu beto ke sosá ti Yehova sadisa beto, beto ke lakisá ti beto ke tulá ntima na yandi, mutindu Davidi. Yandi zonzaka: ‘Yehova kele ditadi ya munu, kisika ya munu ya ngolo ya kubumbana,  mpe muntu yina ke vuukisaka munu. Nzambi ya munu kele ditadi ya munu, mu ke kima na yandi.’ (Nku. 18:2) Lusambu lendá sadisa kwandi beto na kuvutula kizunu na ntima? Kahlia mpangi mosi ya kento yina ke pionnier me zonza: “Na manima ya kusambila, mu ke talá ti kizunu ya munu me vutuka. Lusambu ke sadisá munu na kutadila bamambu mutindu Yehova ke tadilak’ yawu, mpe ya ke kulisá kiminu ya munu na yandi.” Ya tsyeleka, lusambu ke dikabu ya nene ya Yehova yina ke sadisá beto na kuvutula kizunu na ntima.

2.Kanisa. Nge ke na zabá dyaka bambala nyonso yina Yehova sadisá nge na kunwana na bamambu yina vandá kwamisa nge? Ntangu beto ke kanisá na faso Yehova sadisá beto mpe bisadi ya yandi ya ntama, ya ke pesá beto kizunu na ntima, mpe kiminu ya beto na yandi ke kulaka. (Nku. 18:17-19) Joshua, kuluntu mosi me zonza: “Mu ke ya kusonika balusambu yina Yehova me pesá munu bamvutu. Ya ke salá ti mu zimbana ve bambala nyonso yina Yehova me pesa munu bima yina mu lombá na yandi na lusambu.” Ya tsyeleka, ntangu beto ke kanisá na bambala nyonso yina Yehova sadisá beto na ntama, beto ke zwá ngolo na kunwana na makanisi yina ke katulá beto kizunu na ntima.

3.Sadila. Ntangu beto ke vandá na bamambu yina ke kwamisá beto, beto me bonga kusosa na kati ya Biblia malongi samu na kuzaba yinki ya kusala. (Nku. 19:7, 11) Bampangi mingi ke talá ti ba ke lutilá kuzaba faso ya kusadila verse ya Biblia, ntangu ba ke tangá mikanda ya beto yina ke zonzilá verse yango. Jarrod kuluntu mosi ya kimvuka, me zonza: “Kusala ba-recherche ke sadisá munu na kuzaba mbote-mbote dikanisi yina ke na kati ya verse, mpe yina Yehova ke na zonzá na munu. Ya ke kulisá kiminu ya munu na yina mu ke na tangaka. Mpe na manima, ya ke vandá ve mpasi na munu na kusadila yawu.” Ntangu beto ke sosá dikanisi ya Yehova na Biblia mpe beto ke sadilá bamambu yina Yehova ke zonzá, beto ke zwá ngolo ya kuvutula kizunu na ntima.

Na bamambu ya mpasi nyonso yina vandá kumina yandi, Davidi zabá ti samu yandi bumba kizunu na ntima, yandi vandá na nsatu Yehova bakisa yandi. Yandi sepelá mingi na nyonso yina Yehova salá samu na yandi. Yandi zonzaka: “Na ngolo ya Nzambi, [munu] lenda mata na kibaka. Nzambi ya [tsyeleka] kele muntu yina ke lwatisaka [munu] ngolo.” (Nku. 18:29, 32) Ntangu ya nkaka, beto lenda tala ti bampasi ya beto ke mutindu bibaka ya yinda. Kasi, na ngolo ya Yehova beto lenda nunga bampasi ni bampasi yina beto lenda kutana na yawu. Ya tsyeleka, si beto sambila Yehova sadisa beto, beto kanisa na yina yandi salá samu na beto na ntama, mpe beto sadila yina yandi ke zonzá na beto, yandi ke pesa beto ngolo mpe mayela yina me lunga samu na kuvutula kizunu na ntima.