LWAKA lulendi bâ ntiana tima tia dema mu mutima. (Bin. 12:25) Ngano weka bâ na lwaka lwa ngolo? Ngano weka mona ti kuvutu’â lenda mu korela lwaka lwaku ko? Tala ti ni bo, ka wena nge kaka ko. Bantu babingi ha kati dieto bafweti kipa muntu we na timbevo, bahombesa muntu wu bazolo, babwila catastrophe naturelle peleko babwabana na misamu miakaka miafwatikisa nitu zawu, peleko mbanzulu zawu. Kâ, nti bilendi tu bakisa mu lenda mu telamana lwaka? *

Mbo tulongoka misamu miamingi mu mpila ya telamana lwaka bu tutaluzula tifwani tia mutinu Davide. Misamu miamingi mia mpasi kabwabana na mio mu luzingu lwandi, ntangu zakaka waketi fwa. (1 Sam. 17:34, 35; 18:10, 11) Bwe Davide kalendela mu telamana lwaka lwandi? Bwe tulendi landila tifwani tiandi?

Davide wabwabana na misamu miamingi mia mpasi ha timosi. Mu tifwani, tataluzuleno misamu miamuturila mu ntangu yi keri kwe dioke mutinu Sawule weri dingaka mu mu honda. Mu ntangu Davide na bantu bandi yi bakâla ku nzo zawu ku Ziklage, bamona ti mbeni zawu zasa laba bima biawu, bayoka nzo zawu, mpe basa bwila makanda mawu. Ngano Davide bwe kasa? ‘Davide na bantu beri nandi balokana, babolota bidilu na tii bwa ba wa ngolo za dirila.’ Tiari tia Davide tiavutu yikama mu ntangu bantu bandi ba keri sikirilaka bawisana mu mu kamuna matari. (1 Sam. 30:1-6) Buna, Davide wayizi bâ na misamu mitatu mia minene ha timosi: Kanda diandi mu mpasi dieri, bunkuta bweri nandi ngatu bantu bandi bamuhondele, mpe mutinu Sawule dinga kwa keri kwe mu dingi. Banza’eti lwaka lweri na Davide!

Ngano Davide nti kayizi sa? Ho nkatika bendo, ‘wavutu baka butindi mu Yehova, Nzambi’andi.’ Nti biabakisa Davide mu sila bo? Davide wasambila Yehova mu mu lomba lubakusu mpe wadimbitila mu mpila zi katoko mu bakisila. (1 Sam. 17:37; Mik. 18:2, 6) Davide wabakula ti wafweti dinga lutwalusu lwa Yehova; buna wayula kwe Yehova ka nti kafweti sa. Davide bu kamana baka lutwalusu lwa Yehova, ka lembeketa ko mu sala. Buna, yandi na bantu bandi babaka lusakumunu lwa Yehova, mpe bakûla makanda mawu na bima biawu. (1 Sam. 30:7-9, 18, 19) Ngano mweni misamu mitatu mia yirika Davide? Wasambila Yehova ngatu kamubakisa, wadimbitila mu mpila Yehova yi katoko mu bakisila mu ntama, mpe wasala tintwari na lutwalusu lwa Yehova. Bwe tulendi landila tifwani tia Davide? Tataluzuleno mpila zitatu.

1. Sambila. Ntangu zazansoni zi tubatikaka mu bâ na lwaka, tulendi sambila Yehova ngatu katubakisa mpe katuhana ndwenga. Tulendi mona bubote tala ti tusambiri Yehova mpe tumuziburiri mutima’eto. Peleko tulendi sa lusambulu lwa nkufi ku nsi’a mutima, tala ti misamu ni bo mita têla. Ntangu zazansoni zi tudingaka lubakusu lwa Yehova, mbo tusongelaka ti Yandi tusikirilaka ntiana bwa sa Davide, yandi watâ ti: “Yehova ni tari diani, mbuka’ani ya ngolo yikunkengerelaka, mpe ni Yandi kumvukisaka. Nzambi’ani ni tari diani di niswaminaka.” (Mik. 18:2, NWT) Ngano lusambulu lwa lusalaka? Mpangi ya yikento, Kahlia we mupasuri-nzila têle ti: “Bu nimana sambilaka,  mbo nikwizi bâka na tidzunu. Lusambulu mbo lukumbakisaka mu kwelesa mabanza mani na ma Yehova, mpe lukwikulu lwani mu Yandi mbo luyikamaka.” Wa matieleka, lusambulu kabu dia ngolo diena diatûka kwe Yehova, mpe ditubakisaka mu telamana lwaka.

2. Dimbitila. Bu vutu tala misamu miaku mia ntama, ngano lendi banza misamu mia mpasi mi walenda mu korela na lubakusu lwa Yehova? Bu tudimbitilaka mu mpila Yehova yi katubakisila mu ntama, mpe yi kabakisila bisari biandi bia mu ntama, mbo tukwizi bâka na ngolo zazingi, mpe lukwikulu lweto mu Yandi mbo luyikamaka ngolo. (Mik. 18:17-19) Joshua we mukuluntu têle ti: “Mukanda we nani mu natsoneka mvutu za tusambulu twani. Wakumbakisa mu bambukila ntangu zi nalomba tima kwe Yehova, mpe yi kakungana tio buna bu nalombela tio.” Wa matieleka, bu tudimbitila mu mpila Yehova yi katoko tu bakisila, mbo tukwizi bâka na ngolo zifwanakane mu nwanisa lwaka lweto.

3. Sala. Ntete tabonga nzengolo ya sa tima bu tubâka na musamu, tulendi dinga lutwalusu lwa mbote mu Zu dia Nzambi. (Mik. 19:7, 11) Bantu babingi bamonaka ti bu badingaka mu tomo taluzula verse yimosi, mbo bakwizi bâka na lenda dia bakula ka bwe verse yo yita ba tarila mu luzingu lwawu. Jarrod we mukuluntu têle ti: “Bu nidingaka mu bisalulu bieto, mbo wukumbakisaka mu mona misamu miamiansoni mitariri verse, mpe mbo nibakulaka misamu mi kuntêlaka Yehova. Mbo wukumbakisaka mu tomo kwikila misamu mi nitangaka, buna mbo nisalaka tintwari na lutwalusu lwandi.” Bu tudingaka lutwalusu lwa Yehova mu Matsonoko, mpe bu tulandaka lo, mbo wukwizi bâka musamu wa fioti kwe beto mu telamana lwaka lweto.

Davide wabakula ti mu lenda mu telamana lwaka lwandi, wafwanakana ti Yehova kamubakisa. Lubakusu lwa Yehova lwa keri tomo zoloko, ntiangu katâ: ‘Bu ndiena na Nzambi’ani, mbo niyomboka bikaku. Nzambi ni Yandi kundwika ngolo.’ (Mik. 18:29, 32) Tulendi mona ti misamu mieto nguria mpasi miena, mpe ka tulendi’â tayirika mio ko peleko takorela mio. Kâ na lubakusu lwa Yehova, tulendi telamana musamu ni musamu wa mpasi! Wa matieleka, bu tusambilaka Yehova mu baka lubakusu, bu tudimbitilaka mu miamiansoni mi keka sa mu bungu dia beto, mpe bu tusala tintwari na lutwalusu lwandi, tulendi bâ na lukwikulu ti mbo katuhana ngolo na ndwenga zifwanakane mu lenda mu telamana lwaka lweto!