KULISUKAMA inga kwatupa kulinyumfwa anga tuliyumwite cintu cilemu mumoyo. (Tus. 12:25) Sa mwakalisukamawo mubuumi bwanu? Sa mulalinyumfwa ayi inga tamucikoonshi kutolelela kuliyumya? Na mbomutoolinyumfwa, tamubete nweenka. Buunji bwandiswe twakalinyumfwawo kale kulema, kulisukama, akulefuka ceebo cakwiinda mushintu shipusenepusene. Kucakubonenaako, bamwi batolama bashikamukowa balwashi, bamwi bakafwitwa shicibusa na shikamukowa, alimwi bamwi batokwiinda mumapensho ceebo ca mapensho anene alicitikila. Ano ino nciinshi ceenga catucafwa kuliyumya ndyetwalisukama? *

Inga tweeya shiinji pamakani ambweenga twaliyumya ndyetwalisukama kuswa kucakubonenaako ca Mwaami Defedi. Wakeenda mubukaalo buyumu bupusenepusene cimwi ciindi wakalinga kusuni kucaikwa. (1 Samwe. 17:34, 35; 18:10, 11) Ino nciinshi cakamucafwa kuliyumya? Ino cakubonenaako cakwe inga twacikonkela buyani?

Defedi wakeenda mumapensho aanji paciindi comwi. Kucakubonenaako, amuyeeye shakamucitikila paciindi ndyaakalinga kucica Mwaami Saulo, uyo wakalinga kusuni kumucaya. Defedi abashilumamba bakwe ndyebakaswa kunkondo, bakacana ayi balwani babo beepa shintu, kubatentela maanda, akutola mikwashi yabo mubusha. Ino Defedi wakacita buyani? “Defedi abashilumamba bakwe abo bakalila cakooloma kushikila nkusu shakulila shamana.” Kwiilikaawo, Defedi wakapenshekwa abuumbi mumoyo mukwiinga basankwa mbwaakalinga kushoma bakalinga kwaamba ayi “batoomuuma mabwe.” (1 Samwe. 30:1-6) Aboobo paciindi ici Defedi wakalinga kwiinda mumapensho anene otatwe paciindi comwi. Mukwashi wakwe wakalinga mumapensho, bashilumamba bakwe bakalinga kusuni kumucaya, alimwi Mwaami Saulo wakalinga kuya cimuyandoola kwaamba ayi amucaaye. Aboobo amuyeeyebo Defedi mbwaakalisukama!

Ino nciinshi cakakonkelawo Defedi ncaakacita? Lyalo peenkapo ‘wakaliyumya munkusu shakwe Yehova Lesa wakwe.’ Ino wakacita buyani? Tulishi kwaamba ayi liinji Defedi wakalinga kupaila kuli Yehova kwaamba ayi amucaafwe. Alimwi wakalinga kuyeeya Yehova mbwaakalinga kumucafwa. (1 Samwe. 17:37; Kulu. 18:2, 6) Defedi wakabona kwaamba ayi wakalinga kuyandika kusenga butanjilishi kuswa kuli Yehova, aboobo wakeepusha Yehova kwaamba ayi ashibe shakucita. Pesule lyakutambula butanjilishi kuswa kuli Yehova, Defedi wakacitawo comwi peenkaapo. Ici cakapa kwaamba ayi Yehova amupe shoolwe pomwi abashilumamba bakwe. Aboobo bakafuna mikwashi yabo akuboosha shintu shoonse. (1 Samwe. 30:7-9, 18, 19) Sa mwaboona shintu shotatwe Defedi nshaakacita? Wakapaila kuli Yehova kwaamba ayi amucaafwe, wakayeeya Yehova mbwakamucafwawo, lyalo akukonkela Yehova nshaakamulwiita. Ino cakubonenaako cakwe Defedi inga twacikonkela buyani? Amuleke tubandike nshila shotatwe.

1. Amupaile. Lyoonse na twalisukama inga twapaila kuli Yehova kwaamba ayi atucaafwe akutupa busongo. Kupaila inga kwatucafwa kulinyumfwa kabotu na twamulwiita Yehova shintu shoonse shitotusukamika. Cimwi ciindi inga twaambabo mupailo ufwiifwi mumoyo na nceenga cakonsheka mubukaalo mbotubeteemo. Lyoonse ndyetusenga lucafwo kuli Yehova tulatondesha kwaamba ayi tulamushoma bweenka mbuli Defedi wakaamba ayi: ‘Yehova ngomwandami wangu, ndyelilinga  lyangu lya mabwe alimwi ngumupulushi wangu. Ee, Lesa wangu ngomwaandami wangu, shikumfuna.’ (Kulu. 18:2) Ano sa ncakwiila kupaila kulacafwa? Nankashi painiya waliina lya Kahila wakaamba ayi: “Pesule lyakupaila, ndalinyumfwa kuba aluumuno. Kupaila kulancafwa kubona shintu bweenka mbuli Yehova mbwashibona, alimwi akucinka manungo muli nguwe.” Ncakwiila, mupailo ncipo cibotu abuumbi kuswa kuli Yehova citucafwa kuliyumya ndyetwalisukama.

2. Amuyeeye Yehova mbwakamucafwawo. Na mwayeeya nshemwakeendaamo mubuumi bwanu, sa kuli lipenshi ndyeenga mweebaluka ndyomwakacikonsha kuliyumya ceebo ca lucafwo lwakwe Yehova? Na twayeeya Yehova mbwakatucafwawo ambwakacafwawo basebenshi bakwe muciindi cakale kale, tulalinyumfwa kuba aluumuno. Alimwi cilatucafwa kucinka manungo muli nguwe. (Kulu. 18:17-19) Munene waliina lya Joshua wakaamba ayi: “Ndakalemba mulongo washintu shitondesha Yehova mbwakumbula mipailo yangu, kucita boobo kwancafwa kwiibaluka Yehova mbwakankumbula paciindi ndyendakamusenga cintu cimwi.” Ncakutatoonsha kwaamba ayi na katuyeeya Yehova mbwakatucafwawo, tulaba ankusu shakucikonsha kutolelela kuliyumya ndyetwalisukama.

3. Amukonkele butanjilishi bwakwe Yehova. Katutana kusalawo shakucita ndyetuli mubukaalo bumwi, inga twalangoola butanjilishi bucafwa kuswa mu Maswi akwe Lesa. (Kulu. 19:7, 11) Baanji balanyumfwishisha kabotu mbweenga bakonkela shaamba lilembo limwi na balangoola makani aamba pa lilembo ilyo. Mukwesu waliina lya Jarrod munene mulibungano wakaamba ayi: “Kulangoola makani kulancafwa kwiiya shiinji pavesi njentobelenga akunyumfwishisha Yehova nshatondwiita. Ici cilancafwa kushoma nshentobelenga akukonkela butanjilishi bwakwe.” Kulangoola butanjilishi bwakwe Yehova kuswa mu Malembo akubukonkela, kulaakutucafwa kuliyumya ndyetwalisukama.

Defedi wakalinga kucishi kwaamba ayi wakalinga kuyandika lucafwo lwakwe Yehova kwaamba ayi acikoonshe kuliyumya. Wakalumba abuumbi palucafwo lwakwe Yehova cakwaamba ayi wakalemba ayi: “Mulampa nkusu ayi nkonshe kulwana balwani bangu, alimwi mulanengesha kukonsha kuuluka malinga abo.” (Kulu. 18:29, 32) Mpashi inga twalinyumfwa anga mapensho ngotutokwiindaamo nganene abuumbi cakwaamba ayi inga tatucikoonshi kuliyumya. Nacibi boobo, kwiinda mulucafwo lwakwe Yehova, inga twacikonsha kuliyumya mumapensho ali woonse nabi akomene buyani! Ncakwiila, na twapaila akusenga lucafwo kuli Yehova, kuyeeya ciindi ndyaakatucafwawo, akukonkela butanjilishi bwakwe, inga twashoma ayi alaakutupa nkusu abusongo kwaamba ayi tucikoonshe kuliyumya ndyetwalisukama!