Ngaˬ hui dawˇ haˍ ve kʼo, mawˇ teˇ ceuˬ ceuˬ hehnˇ ve htaꞈ taˆ taˍ ve hkʼe hpehꞈ ve yoˬ. (Tawˇ naˉ ve 12:25) Nawˬ chi hkʼe dawˇ jaw˗aw laˇ? Maˇ heˆ leh nawˬ caˉ leh yeunˇ hkanˍ maˇ gʼa˗oˬ tehꞈ dawˇ jaw˗aw laˇ? Dawˇ jaw ve kʼo, chi hkʼe dawˇ ve nawˬ teˇ gʼaˇ ceh tiˉ maˇ heˆ. Laiˉ gʼaˇ kʼo yehˬ kʼa hkʼaw ve chaw naˬ maw jaˇ˗oˬ ve htaꞈ gʼa nyi haꞈ shaˉ ve, haꞈ ve chaw suh˗e ve, mvuhˇ yeˬ mvuhˇ haw hpawˇ gʼa hpuˇ ve, maˇ heˆ leh dawˇ haˍ jaˇ leh awˬ gʼaˇ nuˇ tuˬ te laˇ ve htaꞈ kaꞈ gʼa hpuˇ ve yoˬ. Ngaˬ hui chi hkʼe gʼa hpuˇ ve kʼo, dawˇ haˍ ve htaꞈ gu gʼa tuˬ aˬ htoꞈ ma ga laˇ gʼa ve le? a

Daˍviˆ ve awˬ lawn htaꞈ ngaˬ hui henˇ yuˬ gʼa ve yoˬ. Daˍviˆ yawˇ a shaꞈ teꞈ kuiˬ hkʼaw dawˇ haˍ ve laiˉ ceuˬ gʼa hpuˇ ve yoˬ. Leh teˇ pawˆ pawˆ kʼo, yawˇ gʼa suh˗e tuˬ kaꞈ te piˇ ve yoˬ. (1 Saˍmo˗eˍlaˆ 17:34, 35; 18:10, 11) Yaꞈ hkʼaˇ, Daˍviˆ dawˇ haˍ ve htaꞈ hkʼaˬ hkʼe te gu gʼa ve le? Leh ngaˬ hui yawˇ htaꞈ hkʼaˬ hkʼe te henˇ yuˬ gʼa tuˬ le?

Daˍviˆ dawˇ haˍ jaˇ ve laiˉ ceuˬ gʼa hpuˇ ve yoˬ. Tawˇ pa haˉ te kʼo, Sawˉluꞈ Daˍviˆ htaꞈ gʼaꞈ tiˇ pehˍ htaˇ ve htaꞈ dawˇ nyi sheˍ. Teˇ pawˆ htaˇ Daˍviˆ leh yawˇ ve chaw venˇ hkʼaw kʼawꞈ la ve yoˬ. Canˇ paˍ yawˇ hui ve venˇ htaꞈ ca bawˆ la leh venˇ htaꞈ kaꞈ tuˉ baˬ ve gʼa mawˬ htaˇ cheˆ˗ehꞈ kʼai ve yoˬ. Leh yawˇ hui ve miˇ yaˇ hkʼa peu˗eˬ shu hpeh kʼai ve htaꞈ gʼa mawˬ ve yoˬ. Oˇ ve teˇ yanˇ Daˍviˆ hkʼaˬ hkʼe te ve le? Liꞈ hpu hkʼaw kʼoˆ ve, “Daˍviˆ leh yawˇ ve maꞈ yaˇ teˇ hpaˍ gʼaˇ nuˇ jaˇ htaˇ hkʼa gaˬ gʼaˇ hteꞈ kuˬ hawˬ ve yoˬ.” Yaꞈ hkʼaˇ, chi hkʼe ceh tiˉ maˇ heˆ. “Daˍviˆ htaꞈ haˉ pui baˬ pehˍ˗a tehꞈ” yawˇ hui kʼoˆ daꞈ ve pa taw, Daˍviˆ dawˇ haˍ jaˇ ve yoˬ. (1 Saˍmo˗eˍlaˆ 30:1-6) Daˍviˆ dawˇ haˍ jaˇ ve 3 ceuˬ gʼa hpuˇ ve lehˬ, yawˇ ve yehˬ kʼa kawˆ tuˬ cawˬ ve, yawˇ ve chaw yawˇ htaꞈ tiˇ pehˍ˗a te ve, leh Sawˉluꞈ yawˇ htaꞈ gʼaꞈ tiˇ pehˍ chehˇ ve, chi ve teˇ hpaˍ htaꞈ Daˍviˆ gʼa hpuˇ ve hkʼaˬ hkʼe taw dawˇ haˍ ve htaꞈ dawˇ nyi sheˍ.

Daˍviˆ dawˇ haˍ tuˬ chi hkʼe taw gʼa hpuˇ ve yawˇ hkʼaˬ hkʼe te gu ve le? Yawˇ Yaˬhoˉvaˬ Gʼuiˬ sha htaꞈ laꞈ haˉ gʼaˇ va ve yoˬ. Hkʼe te leh, yawˇ awˬ gʼaˇ kʼawꞈ cawˬ la ve yoˬ. Daˍviˆ Yaˬhoˉvaˬ htaꞈ gʼaˇ va ve tehꞈ hkʼaˬ hkʼe hpeuꞈ maw laˇ ve le? Daˍviˆ Yaˬhoˉvaˬ ga laˇ tuˬ yawˇ te muiˬ te jaw ve hkʼe hkʼaˬ htaˆ kaꞈ yawˇ geh bon lawˬ ve yoˬ. Ponˬ laˬ htaˇ Yaˬhoˉvaˬ yawˇ htaꞈ hkʼaˬ hkʼe ga laˇ jaw ve htaꞈ kaꞈ dawˇ nyi ve yoˬ. (1 Saˍmo˗eˍlaˆ 17:37; Chiˇ mvuh ve 18:2, 6) Daˍviˆ Yaˬhoˉvaˬ beˆ maˍ laˇ tuˬ htaꞈ loˍ ve yoˬ. Hkʼe te leh, Yaˬhoˉvaˬ yawˇ htaꞈ aˬ htoꞈ ma te tcuh gaˇ ve yawˇ na nyi ve yoˬ. Yaˬhoˉvaˬ yawˇ htaꞈ beˆ maˍ piˇ peuˬ hkʼawꞈ nawˉ, yawˇ laꞈ haˉ gʼaꞈ te ve yoˬ. Daˍviˆ leh yawˇ ve chaw mawˇ teˇ ceuˬ le le yuˬ hkʼawꞈ gʼa tuˬ, leh miˇ yaˇ kaꞈ shiˍ hkʼawꞈ gʼa tuˬ, Yaˬhoˉvaˬ ga piˇ ve yoˬ. (1 Saˍmo˗eˍlaˆ 30:7-9, 18, 19) Daˍviˆ 3 ceuˬ aˬ htoꞈ ma te ve nawˬ mawˬ˗aw laˇ? Yawˇ Yaˬhoˉvaˬ ga laˇ tuˬ bon lawˬ ve, bon lawˬ htaˇ Yaˬhoˉvaˬ yawˇ htaꞈ hkʼaˬ hkʼe ga laˇ jaw ve htaꞈ dawˇ nyi ve, leh Yaˬhoˉvaˬ beˆ maˍ piˇ ve htaꞈ laꞈ haˉ gʼaꞈ te ve yoˬ. Daˍviˆ htaꞈ ngaˬ hui hkʼaˬ hkʼe henˇ yuˬ gʼa tuˬ le? 3 ceuˬ htaꞈ teˇ geh nyi sheˍ.

1. Bon lawˬ ve. Ngaˬ hui dawˇ haˍ htaˇ, Yaˬhoˉvaˬ ga laˇ tuˬ leh cuˇ yiˍ peꞈ laˇ tuˬ, yawˇ geh bon lawˬ cawˇ ve yoˬ. Ngaˬ hui dawˇ haˍ ve teˇ ceuˬ le le bon lawˬ htaˇ, yawˇ htaꞈ kʼoˆ maˍ piˇ gʼa ve yoˬ. Chi hkʼe te ve lehˬ, ngaˬ hui nyi ma sha tuˬ ga laˇ ve yoˬ. Teˇ pawˆ pawˆ kʼo, ngaˬ hui nyi ma hkʼaw bon chi suhˉ˗ehˍ lawˬ kaꞈ gʼa ve yoˬ. Chi hkʼe te ve lehˬ ngaˬ hui htaꞈ ga laˇ gʼa ve yoˬ. Daˍviˆ Yaˬhoˉvaˬ ga laˇ tuˬ lawˬ ve hkʼa shuˍ, ngaˬ hui teˇ pawˆ le le Yaˬhoˉvaˬ ga laˇ tuˬ lawˬ ve lehˬ yawˇ htaꞈ gʼaˇ va ve tehꞈ hpeuꞈ  maw piˇ ve yoˬ. Yawˇ kʼoˆ ve, “Gʼuiˬ sha lehˬ, ngaˬ htaꞈ haꞈ shaˉ laˇ shehˍ hpaˇ hpehꞈ leh, ngaˬ ve yeˬ jaˇ ve taꞈ yehˬ hpehꞈ ve yoˬ.” (Chiˇ mvuh ve 18:2) Bon lawˬ ve lehˬ awˬ tehˬ ga laˇ gʼa ve laˇ? Gʼuˇ suhˍ peuˍ ve Hka˗li˗a kʼoˆ ve, “ngaˬ bon lawˬ htaˇ nyi ma gawˬ lehˍ cawˬ leh nyi ma sha ve yoˬ. Bon lawˬ ve lehˬ ngaˬ Yaˬhoˉvaˬ hkʼe dawˇ leh yawˇ htaꞈ gʼaˇ hkʼa dehꞈ va ve yoˬ.” Ngaˬ hui dawˇ haˍ ve htaꞈ gu gʼa tuˬ bon lawˬ ve lehˬ, Yaˬhoˉvaˬ ngaˬ hui htaꞈ peꞈ laˇ ve daꞈ jaˇ ve laꞈ shawnˍ hpehꞈ ve yoˬ.

2. Dawˇ nyi ve. Peuˬ taˉ ve htaꞈ nawˬ kʼawꞈ dawˇ nyi htaˇ, shoꞈ shaꞈ jaˇ ve awˬ lawn nawˬ gʼa hpuˇ ve Yaˬhoˉvaˬ maˇ ga laˇ ve kʼo, gu maˇ gʼa ve tehꞈ nawˬ gʼa mawˬ˗aw laˇ? Yaˬhoˉvaˬ ngaˬ hui leh yawˇ ve chaw htaꞈ hkʼaˬ hkʼe taw ga piˇ jaw ve ngaˬ hui dawˇ nyi htaˇ, ngaˬ hui nyi ma gawˬ lehˍ cawˬ leh yawˇ htaꞈ gʼaˇ hkʼa dehꞈ va ve yoˬ. (Chiˇ mvuh ve 18:17-19) Nyi haꞈ shaˉ paˍ Caw˗chu˗a kʼoˆ ve, “Yaˬhoˉvaˬ geh teˇ ceuˬ ceuˬ lawˬ tuˬ ngaˬ bon lawˬ ve teˇ pawˆ le le yawˇ ngaˬ ve bon lawˬ hkawˇ htaꞈ hkʼawꞈ laˇ ve yoˬ. Yaˬhoˉvaˬ ngaˬ htaꞈ hkʼaˬ hkʼe ga laˇ jaw ve ngaˬ bvuhꞈ keu taˍ ve htaꞈ teˇ pawˆ kʼawꞈ nyi htaˇ tawnˇ gʼa ve yoˬ.” Ponˬ laˬ htaˇ Yaˬhoˉvaˬ ngaˬ hui htaꞈ hkʼaˬ hkʼe taw ga laˇ jaw ve htaꞈ dawˇ nyi htaˇ, chi ngaˬ hui dawˇ haˍ ve htaꞈ tawˍ daꞈ gʼaˇ tuˬ ga laˇ ve yoˬ.

3. Laꞈ haˉ gʼaꞈ te ve. Ngaˬ hui teˇ ceuˬ ceuˬ te tuˬ maˇ dawˇ cheˆ sheˍ htaˇ, Liꞈ hpu hkʼaw beˆ maˍ laˇ taˍ ve htaꞈ hpfuhˆ nyi sheˍ. (Chiˇ mvuh ve 19:7, 11) Laiˉ gʼaˇ Liꞈ hpu hkʼaw teˇ tawn htaꞈ hkʼa dehꞈ hpfuhˆ nyi htaˇ, Liꞈ hpu awˬ tawn oˇ ve yawˇ hui hkʼa dehꞈ na gʼa tuˬ ga piˇ leh chi yawˇ hui a shaꞈ teꞈ kuiˬ hkʼaw hkʼaˬ hkʼe yuˬ yehˇ gʼa tuˬ shiˍ ve yoˬ. Nyi haꞈ shaˉ paˍ Caˬ˗lawˆ kʼoˆ ve, “Liꞈ hpu teˇ tawn htaꞈ caˉ daꞈ ve ngaˬ hkʼa dehꞈ hpfuhˆ nyi htaˇ, oˇ ve teˇ tawn htaꞈ ngaˬ hkʼa dehꞈ na gʼa leh Yaˬhoˉvaˬ ngaˬ htaꞈ aˬ htoꞈ ma kʼoˆ laˇ chehˇ ve kaꞈ shiˍ ve yoˬ. Chi ngaˬ gʼaw taˍ ve awˬ ceuˬ htaꞈ yonˍ gʼa tuˬ ga laˇ leh ngaˬ laꞈ haˉ gʼaꞈ te tuˬ kaꞈ ga laˇ ve yoˬ.” Liꞈ hpu hkʼaw beˆ maˍ laˇ taˍ ve htaꞈ ngaˬ hui hpfuhˆ nyi leh laꞈ haˉ gʼaꞈ te ve kʼo, ngaˬ hui dawˇ haˍ ve htaꞈ gu gʼa tuˬ yoˬ.

Daˍviˆ dawˇ haˍ ve htaꞈ gu gʼa ve lehˬ Yaˬhoˉvaˬ ga laˇ ve tehꞈ shiˍ ve yoˬ. Yawˇ Yaˬhoˉvaˬ ga laˇ ve htaꞈ awˬ hpfuhˇ shiˍ leh kʼoˆ ve, “ngaˬ ve canˇ paˍ teˇ hpaˍ htaꞈ tawˍ daꞈ gʼaˇ hpehꞈ tuˬ, nawˬ ngaˬ htaꞈ awˬ gʼaˇ awˬ shaˉ leh kanˇ paˆ piˇ laˇ ve yoˬ.” (Chiˇ mvuh ve 18:29, 32) Teˇ pawˆ pawˆ kʼo, ngaˬ hui gʼa hpuˇ ve shoꞈ shaꞈ ve awˬ lawn lehˬ, ngaˬ hui canˇ paˍ htaꞈ tawˍ daꞈ maˇ gʼaˇ ve hkʼe hpehꞈ ve yoˬ. Yaꞈ hkʼaˇ, Yaˬhoˉvaˬ ngaˬ hui htaꞈ ga laˇ ve pa taw, ngaˬ hui canˇ paˍ htaꞈ awˬ tehˬ awˬ na tawˍ daꞈ gʼaˇ tuˬ yoˬ. Yaˬhoˉvaˬ ga laˇ tuˬ ngaˬ hui bon lawˬ htaˇ, yawˇ ngaˬ hui htaꞈ hkʼaˬ hkʼe ga laˇ jaw ve htaꞈ dawˇ nyi leh yawˇ beˆ maˍ laˇ ve htaꞈ laꞈ haˉ gʼaꞈ te ve yoˬ. Ngaˬ hui dawˇ haˍ ve htaꞈ gu gʼa tuˬ Yaˬhoˉvaˬ awˬ gʼaˇ leh cuˇ yiˍ peꞈ laˇ tuˬ yoˬ tehꞈ yonˍ gʼa ve yoˬ!