ເຮົາຈະຮັບມືກັບຄວາມອຸກໃຈໄດ້ແນວໃດ
ຄວາມອຸກໃຈເຮັດໃຫ້ເຮົາຮູ້ສຶກໜັກໃຈ. (ສຸພາ. 12:25) ເຈົ້າເຄີຍເຈິເລື່ອງທີ່ເຮັດໃຫ້ອຸກໃຈບໍ? ແລະເຈົ້າເຄີຍຮູ້ສຶກອຸກໃຈຈົນຊິທົນບໍ່ໄດ້ແລ້ວບໍ? ຖ້າແມ່ນ ເຈົ້າກໍບໍ່ໄດ້ຮູ້ສຶກແບບນັ້ນຜູ້ດຽວ ເພາະພວກເຮົາຫຼາຍຄົນກໍຮູ້ສຶກເມື່ອຍ ກັງວົນ ແລະອຸກໃຈກັບບັນຫາຫຼາຍຢ່າງ ເຊັ່ນ: ບາງຄົນຕ້ອງໄດ້ເບິ່ງແຍງຄົນໃນຄອບຄົວທີ່ເຈັບປ່ວຍ ຄົນທີ່ຮັກຕາຍຈາກໄປ ແລະບາງຄົນກໍເຈິກັບໄພທຳມະຊາດ. ແລ້ວເຮົາຈະຮັບມືກັບຄວາມອຸກໃຈໄດ້ແນວໃດ? a
ຕົວຢ່າງຂອງດາວິດຈະຊ່ວຍເຮົາໃຫ້ຮັບມືກັບຄວາມອຸກໃຈໄດ້. ດາວິດເຈິກັບບັນຫາຫຼາຍຢ່າງ ແລະຫຼາຍເທື່ອຊີວິດຂອງລາວກໍຕົກຢູ່ໃນອັນຕະລາຍ. (1 ຊາມ. 17:34, 35; 18:10, 11) ແລ້ວດາວິດຮັບມືກັບບັນຫາເຫຼົ່ານີ້ທີ່ເຮັດໃຫ້ລາວອຸກໃຈໄດ້ແນວໃດ? ແລະເຮົາຈະຮຽນແບບຕົວຢ່າງຂອງລາວໄດ້ແນວໃດ?
ດາວິດຮັບມືກັບຄວາມອຸກໃຈໄດ້ແນວໃດ?
ດາວິດມີບັນຫາຫຼາຍຢ່າງພ້ອມໆກັນ. ຕົວຢ່າງເຊັ່ນ: ລາວຖືກຊາອູນໄລ່ຂ້າ ແລະຕອນທີ່ລາວກັບທະຫານກັບມາຈາກການຕໍ່ສູ້ ເຂົາເຈົ້າກໍຕົກໃຈຫຼາຍເມື່ອເຫັນວ່າສັດຕູໄດ້ລັກເອົາເຄື່ອງຂອງ ຈູດເຮືອນ ແລະຈັບຄອບຄົວຂອງເຂົາເຈົ້າໄປ. ໃນຕອນນັ້ນ ດາວິດຮູ້ສຶກແນວໃດ? “ດາວິດກັບຄົນທີ່ຢູ່ນຳລາວຮ້ອງໄຫ້ສຽງດັງຈົນບໍ່ມີແຮງຈະຮ້ອງອີກ.” ຊ້ຳບໍ່ໜຳພວກທະຫານຂອງລາວກໍຍັງ “ລົມກັນວ່າຈະເອົາຫີນຄວ່າງໃສ່ລາວໃຫ້ຕາຍ.” (1 ຊາມ. 30:1-6, ລ.ມ.) ຕອນນີ້ດາວິດມີບັນຫາສາມຢ່າງພ້ອມກັນ ນັ້ນກໍຄື: ຄອບຄົວຂອງລາວຕົກຢູ່ໃນອັນຕະລາຍ ພວກທະຫານຂອງລາວຢາກຂ້າລາວ ແລະຊາອູນຍັງຢາກຂ້າລາວຢູ່. ລອງນຶກພາບວ່າດາວິດຊິຮູ້ສຶກອຸກໃຈຫຼາຍສ່ຳໃດ.
ດາວິດເປັນແນວໃດຕໍ່ຈາກນັ້ນ? ລາວ “ມີກຳລັງໃຈຫຼາຍຂຶ້ນເພາະລາວເພິ່ງພະເຢໂຫວາພະເຈົ້າຂອງລາວ.” ເປັນຫຍັງດາວິດຈຶ່ງຮູ້ສຶກແນວນັ້ນ? ກໍຍ້ອນວ່າລາວໄດ້ອະທິດຖານຂໍຄວາມຊ່ວຍເຫຼືອຈາກພະເຢໂຫວາແລະຄິດເຖິງສິ່ງທີ່ພະເຢໂຫວາເຄີຍຊ່ວຍລາວມາແລ້ວ. (1 ຊາມ. 17:37; ເພງ. 18:2, 6, ລ.ມ.) ດາວິດເຫັນວ່າລາວຈຳເປັນຕ້ອງຂໍຄວາມຊ່ວຍເຫຼືອຈາກພະເຢໂຫວາ ລາວຈຶ່ງຖາມພະເຢໂຫວາວ່າລາວຄວນເຮັດແນວໃດ. ແລະຫຼັງຈາກທີ່ພະເຢໂຫວາໃຫ້ຄຳແນະນຳລາວ ລາວກໍໄດ້ລົງມືເຮັດຕາມທັນທີ. ນີ້ຈຶ່ງເຮັດໃຫ້ລາວແລະທະຫານສາມາດຊ່ວຍຄອບຄົວແລະເອົາສິ່ງຂອງກັບຄືນມາໄດ້ຍ້ອນພະເຢໂຫວາອວຍພອນ. (1 ຊາມ. 30:7-9, 18, 19) ເຮົາເຫັນວ່າດາວິດໄດ້ເຮັດ 3 ຢ່າງຄື: ລາວອະທິດຖານ ຂໍຄວາມຊ່ວຍເຫຼືອຈາກພະເຢໂຫວາ ຄິດເຖິງ ວິທີທີ່ພະເຢໂຫວາເຄີຍຊ່ວຍລາວມາແລ້ວ ແລະລົງມືເຮັດ ຕາມຄຳແນະນຳຂອງພະເຢໂຫວາ. ຕອນນີ້ໃຫ້ເຮົາມາເບິ່ງວ່າ ເຮົາຈະຮຽນແບບດາວິດໃນສາມວິທີນີ້ແນວໃດ?
ຮຽນແບບດາວິດເມື່ອຮູ້ສຶກອຸກໃຈ
1. ອະທິດຖານ. ເມື່ອໃດກໍຕາມທີ່ເຮົາຮູ້ສຶກອຸກໃຈ ເຮົາສາມາດອະທິດຖານຂໍຄວາມຊ່ວຍເຫຼືອຈາກພະເຢໂຫວາແລະຂໍສະຕິປັນຍາຈາກເພິ່ນ. ເມື່ອເຮົາລະບາຍຄວາມອຸກໃຈທຸກຢ່າງໃຫ້ພະເຢໂຫວາຟັງ ເຮົາກໍຈະຮູ້ສຶກດີຂຶ້ນ. ແຕ່ຖ້າສະພາບການຂອງເຮົາບໍ່ເອື້ອອຳນວຍໃຫ້ເຮັດແບບນັ້ນ ເຮົາກໍອາດຈະອະທິດຖານສັ້ນໆຫຼືອະທິດຖານໃນໃຈກໍໄດ້. ທຸກເທື່ອທີ່ເຮົາຂໍຄວາມຊ່ວຍເຫຼືອຈາກພະເຢໂຫວາກໍສະແດງໃຫ້ເຫັນວ່າ ເຮົາໄວ້ໃຈເພິ່ນຄືກັບດາວິດທີ່ບອກວ່າ: “ພະເຢໂຫວາເປັນຫີນຜາ ເປັນທີ່ໝັ້ນຂອງຂ້ອຍ ແລະເປັນຜູ້ຊ່ວຍຊີວິດຂ້ອຍເອົາໄວ້. ພະເຈົ້າຂອງຂ້ອຍເປັນຫີນທີ່ແຂງແກ່ນທີ່ຂ້ອຍເຂົ້າໄປລີ້ໄພໄດ້.” (ເພງ. 18:2, ລ.ມ.) ແລ້ວການອະທິດຖານຊ່ວຍໄດ້ແທ້ໆບໍ? ພີ່ນ້ອງຍິງຄົນໜຶ່ງທີ່ຊື່ ຄາເລຍເຊິ່ງເປັນໄພໂອເນຍໄດ້ບອກວ່າ: “ຫຼັງຈາກອະທິດຖານ ຂ້ອຍກໍຮູ້ສຶກສະຫງົບໃຈ. ການອະທິດຖານຊ່ວຍຂ້ອຍໃຫ້ຄິດຄືກັບພະເຢໂຫວາແລະໄວ້ໃຈເພິ່ນຫຼາຍຂຶ້ນ.” ເຮົາເຫັນວ່າການອະທິດຖານເປັນຄືກັບຂອງຂວັນຈາກພະເຢໂຫວາທີ່ຊ່ວຍເຮົາໃຫ້ຮັບມືກັບຄວາມອຸກໃຈໄດ້.
2. ຄິດເຖິງວິທີທີ່ພະເຢໂຫວາເຄີຍຊ່ວຍເຮົາມາແລ້ວ. ເມື່ອຄິດຄືນຫຼັງ ເຈົ້າໄດ້ຄິດເຖິງບັນຫາຕ່າງໆທີ່ພະເຢໂຫວາເຄີຍຊ່ວຍເຈົ້າໃຫ້ຜ່ານມາແລ້ວບໍ? ເມື່ອເຮົາຄິດເຖິງສິ່ງທີ່ພະເຢໂຫວາເຄີຍຊ່ວຍເຮົາແລະຊ່ວຍຜູ້ຮັບໃຊ້ຂອງເພິ່ນໃນອະດີດ ເຮົາກໍຈະມີກຳລັງໃຈແລະໄວ້ໃຈເພິ່ນຫຼາຍຂຶ້ນ. (ເພງ. 18:17-19) ຜູ້ດູແລຄົນໜຶ່ງທີ່ຊື່ ໂຈຊົວບອກວ່າ: “ຂ້ອຍຈະຂຽນລາຍການອອກມາວ່າ ພະເຢໂຫວາໄດ້ຕອບຄຳອະທິດຖານຂອງຂ້ອຍໃນເລື່ອງຫຍັງແດ່. ນີ້ຊ່ວຍຂ້ອຍໃຫ້ຈື່ຕອນທີ່ຂ້ອຍຂໍບາງຢ່າງກັບພະເຢໂຫວາແລະເພິ່ນກໍໃຫ້ໃນສິ່ງທີ່ຂ້ອຍຕ້ອງການແທ້ໆ.” ຈາກເລື່ອງນີ້ເຮັດໃຫ້ເຮົາເຫັນວ່າ ຖ້າເຮົາຄິດເຖິງວິທີທີ່ພະເຢໂຫວາເຄີຍຊ່ວຍເຮົາມາແລ້ວ ເຮົາກໍຈະມີກຳລັງໃຈຫຼາຍຂຶ້ນແລະຮັບມືກັບຄວາມອຸກໃຈໄດ້.
3. ລົງມືເຮັດຕາມ. ເມື່ອຈະຕັດສິນໃຈເຮັດສິ່ງໃດສິ່ງໜຶ່ງ ເຮົາຢາກຈະເບິ່ງຄຳແນະນຳຈາກຄຳພີໄບເບິນກ່ອນ ເພາະນັ້ນເປັນຄຳແນະນຳທີ່ດີທີ່ສຸດ. (ເພງ. 19:7, 11) ຫຼາຍຄົນເຫັນວ່າເມື່ອເຂົາເຈົ້າຄົ້ນຄວ້າພະຄຳພີຂໍ້ໃດຂໍ້ໜຶ່ງ ເຂົາເຈົ້າກໍຮູ້ວ່າຈະໃຊ້ຂໍ້ຄຳພີນັ້ນແນວໃດໃນຊີວິດ. ຜູ້ດູແລຄົນໜຶ່ງທີ່ຊື່ ຈາຣ໋ອດບອກວ່າ: “ການຄົ້ນຄວ້າຂໍ້ພະຄຳພີຊ່ວຍຂ້ອຍໃຫ້ເຂົ້າໃຈວ່າພະເຢໂຫວາຢາກໃຫ້ຂ້ອຍເຮັດຫຍັງ ແລະເອົາຂໍ້ນີ້ໄປໃຊ້ແນວໃດໃນຊີວິດ. ນີ້ຊ່ວຍຂ້ອຍໃຫ້ໝັ້ນໃຈວ່າຂ້ອຍສາມາດເຮັດຕາມຄຳແນະນຳຂອງພະເຢໂຫວາໄດ້.” ເມື່ອເຮົາຊອກຫາຄຳແນະນຳຂອງພະເຢໂຫວາທີ່ຢູ່ໃນຄຳພີໄບເບິນແລະເຮັດຕາມຄຳແນະນຳນັ້ນ ເຮົາກໍຈະຮັບມືກັບຄວາມອຸກໃຈໄດ້ງ່າຍຂຶ້ນ.
ພະເຢໂຫວາຈະຊ່ວຍເຈົ້າໃຫ້ຮັບມືກັບຄວາມອຸກໃຈໄດ້
ດາວິດຮູ້ວ່າລາວຕ້ອງໄດ້ຮັບຄວາມຊ່ວຍເຫຼືອຈາກພະເຢໂຫວາເພື່ອຈະຮັບມືກັບຄວາມອຸກໃຈໄດ້ ແລະລາວກໍເຫັນຄ່າຄວາມຊ່ວຍເຫຼືອນີ້ຫຼາຍແທ້ໆຈົນເຖິງຂັ້ນບອກວ່າ: “ເພາະພະເຈົ້າໃຫ້ພະລັງ ຂ້ອຍຈຶ່ງໂດດຂ້າມກຳແພງໄດ້. ພະເຈົ້າທ່ຽງແທ້ເຮັດໃຫ້ຂ້ອຍມີກຳລັງ.” (ເພງ. 18:29, 32, ລ.ມ.) ເຮົາອາດຮູ້ສຶກວ່າບັນຫາທີ່ເຮົາເຈິປຽບຄືກັບກຳແພງສູງໆທີ່ຂ້າມໄປບໍ່ໄດ້ ແຕ່ດ້ວຍຄວາມຊ່ວຍເຫຼືອຈາກພະເຢໂຫວາເຮົາຈຶ່ງສາມາດຜ່ານບັນຫາເຫຼົ່ານີ້ໄປໄດ້. ດັ່ງນັ້ນ ເມື່ອເຮົາອະທິດຖານ ຂໍຄວາມຊ່ວຍເຫຼືອຈາກພະເຢໂຫວາ ຄິດເຖິງວິທີທີ່ພະເຢໂຫວາເຄີຍຊ່ວຍເຮົາມາແລ້ວ ແລະລົງມືເຮັດຕາມ ຄຳແນະນຳຂອງເພິ່ນ ເຮົາກໍໝັ້ນໃຈໄດ້ວ່າເພິ່ນຈະໃຫ້ເຮົາມີກຳລັງແລະສະຕິປັນຍາເພື່ອຈະຮັບມືກັບຄວາມອຸກໃຈໄດ້.
a ຜູ້ທີ່ຮູ້ສຶກວິຕົກກັງວົນອາດຕ້ອງໄປພົບທ່ານໝໍ
