KULIZAKAMINA chinapu nge chiteli chachilemu mumuchima wamutu. (Vishi. 12:25) Uno mwamonaho lyehi ukalu uze wamilingishile mulizakamine chikuma tahi? Uno mwahitaho lyehi muukalu uze wamilingishile mwivwenga nge kamweshi kuhasa kutwalaho lika kumika tahi? Nge mukiko, kaha kamweshi ukawenuko. Etu vavavulu tunazakamanga vaveji, tunafwisa vausoko wetu, tunamononga ukalu wakulijila chipwe ukalu weka uze unatuzeyesanga kumujimba namuvishinganyeka. Vyuma muka navitukafwa tutwaleho lika kumika nge tunalizakamina? *

Kushinganyeka hamujimbu waMwangana Ndavichi nautukafwa tumone omwo tunahase kutwalaho lika kumika nge tunalizakamina. Amwene ukalu wauvulu mukuyoya chenyi, kaha shimbu jimwe vasakile nakumujiha. (Samwe. 1, 17:34, 35; 18:10, 11) Vyuma muka vyakafwile Ndavichi omike halwola alizakaminyine? Natuhasa ngachilihi kumulondezeza?

Ndavichi amwene ukalu wauvulu halwola lwolumwe. Achishinganyekenu ukalu amwene halwola apwile nakuchina Mwangana Saulu uze apwile nakutonda kumujiha. Ndavichi ayile kujita navatu jenyi, kahomu vakindulukile valikomokelele havyuma vawanyine. Vaka-kole javo vapupile luheto lwavo, nakwocha membo avo nakumbata jitanga javo nakujitwala muufunge. Uno Ndavichi alingile ngachilihi? “Ndavichi navatu jenyi valilile namazu akukanguka palanga nomu ngolo javakumine.” Kaha nawa Ndavichi ahombele chikuma mwomwo vatu jenyi vaze ayile navo kujita “vambile ngwavo navamwasa malolwa.” (Samwe. 1, 30:1-6) Ndavichi amwene ukalu wakulikavasana utatu. Watete, tanga yenyi yapwile muponde, wamuchivali, vatu jenyi vaze ayile navo kujita vasakile kumujiha, wamuchitatu, Mwangana Saulu apwile lika nakumuhangasana. Chikupu vene Ndavichi alizakaminyine chikuma.

Jino Ndavichi alingile ngachilihi haukalu wosena ou? “Alikolezezele muli Yehova Kalunga kenyi.” Uno Ndavichi alingile ngachilihi ngocho? Ndavichi alombele kuli Yehova mukafwe, kaha nawa ashinganyekele havyuma amulingililile Yehova kunyima. (Samwe. 1, 17:37; Samu 18:2, 6) Ndavichi asakile chikuma Yehova amutwaminyine, ngocho amuhulishile amulweze vyuma atela kulinga. Ndavichi kakwachile kumashindeko omu Yehova amulwezele vyakulinga. Ngocho Yehova amukiswile hamwe kaha navatu jenyi, kaha vapululwile jitanga javo naluheto lwavo. (Samwe. 1, 30:7-9, 18, 19) Kutala munamono vyuma vitatu alingile Ndavichi tahi? Chatete, alombele kuli Yehova amukafwe. Chamuchivali, ashinganyekele havyuma amulingililile Yehova mukuyoya chenyi. Chamuchitatu, alingile vyuma amulwezele Yehova chakuzeneka kukwata kumashinde. Tunahase kulondezeza ngachilihi Ndavichi? Tunahase kumulondezeza mujijila jitatu.

1. Kulomba. Nge tunaputuka kulizakamina, kaha twatela kulomba kuli Yehova atukafwe nakutuhana mangana. Nge natulembelela Yehova nakumulweza vyuma vili kumuchima wetu nachitukafwa tuunde muchima. Chipwe kulomba mukavatu muuholela kweseka nomu chili chiyoyelo chetu chinahase kutukafwa. Kala lwola natulomba kuli Yehova atukafwe, tweji kwivwanga ngana muze evwile Ndavichi hakwamba ngwenyi: “Yehova ikiye lilolwa lyami, ikiye chihela chami chakukola, ikiye Muka-kungupululula. Kalunga kami ikiye lilolwa lyami, muli ikiye mukiko ngweji kuchinyinanga.”  (Samu 18:2) Uno chikupu kulomba cheji kukafwanga tahi? Ndumbwetu wapwevo Kahlia uze apwa payiniya ambile ngwenyi: “Nge ngunalombo ngweji kuunda muchima. Kulomba cheji kungukafwanga ngumone vyuma ngana muze avimona Yehova, ngocho ngweji kumufwelelanga chikuma.” Chikupu vene, kulomba kuli Yehova chapwa chachilemu mwomwo cheji kutukafwanga tumike nge tunalizakamina.

2. Kushinganyeka. Achishinganyekenu hachiyoyelo chenu kunyima, kutala muli nakwanuka vyeseko vize mwomikile mwomwo yakumikafwa kuli Yehova tahi? Nge natushinganyeka omu Yehova atukafwile nomu nawa akafwile vangamba jenyi kunyima, kaha nachitukafwa tuunde muchima nakufwelela chikuma Yehova. (Samu 18:17-19) Kalama umwe walijina lyaJoshua ambile ngwenyi: “Ngwasonekele mukana wavyuma angukumbulwile Yehova mukulomba chami. Echi chinangukafwe ngwanuke mapapa ngunalombo Yehova angukafwe nomu nakumbululanga kulomba chami kweseka navyuma ngunamulombonga.” Chikupu vene nge natwanuka vyuma vize natulingila lyehi Yehova nachitukafwa tumike nge tunalizakamina.

3. Kulinga vyuma mwatulweza. Shimbu kanda tusakule vyakulinga nge tuli muukalu, twatela kutanga nakukekesa Mazu aKalunga atutwaminyine. (Samu 19:7, 11) Vatu vavavulu vamona ngwavo nge navawana lwola lwakuhehwojola vesi yimwe muMbimbiliya, kaha vanahase kutachikiza kanawa omwo vesi kana yinahase kuvakafwa mukuyoya chavo. Kalama walijina lyaJarrod ambile ngwenyi: “Kuhehwojola cheji kungukafwanga ngutachikize ulumbunwiso wavesi yosena nakwivwa vyuma ali nakusaka Yehova kungulweza. Echi cheji kungukafwanga ngufwelele vyuma nangutanga nakulinga kweseka navyuma mwangulweza Yehova.” Kachi nge natulomba Yehova atutwaminyine kuhichila muVisoneka nakwivwa vyuma mwatulweza natuunda muchima nakuhona kulizakamina.

Ndavichi atachikijile ngwenyi vatelelele kumukafwa kuli Yehova numba ahone kulizakamina. Evwile kuwaha chikuma omwo Yehova amukafwile, ngocho ambile ngwenyi: “Nanguhasa kunyina hakembwe mungolo jove. Kalunga wamuchano ikiye eji kunguhananga ngolo.” (Samu 18:29, 32) Tunahase kushinganyeka ngwetu vyeseko tuli nakumona vyavikalu chikuma mutu keshi kuhasa kuvifungulula chipwe kumikako. Oloze hakutukafwa kuli Yehova tunahase kufungulula vyeseko kana chipwe kumika. Chikupu vene, nge natulomba kuli Yehova atukafwe, nakushinganyeka havyuma natulingila kunyima mukuyoya chetu, nakulinga vyuma mwatulweza, kaha natufwelela chikupu ngwetu mwatuhana ngolo namangana akutukafwa tumike nge tunalizakamina.