KWAKAMA kudi neyi chiteli chidi mumuchima. (Yish. 12:25) Kudihu yuma yayakamishahu dehi muchihandilu chenu? Komana mwatiyahu dehi nenu mukutwesha wanyi kuumika? Neyi mwatiyahu dehi chuma chamuchidiwu, himudi nkawenuku. Etu amavulu twekalahu dehi anhembi, twafwishahu dehi muntu itwakeña, twamonahu dehi wubanji wadimwekenaña, hela twamonahu dehi kukala kwatuzeyesheli kumujimba nimuyitoñojoka. Chumanyi chinateli kutukwasha kuumika neyi tunakumona kukala? *

Kuhanjeka hayuma yamumwekeneni Mwanta Davidi muchihandilu chindi kukutukwasha kwiluka chitunateli kuumika neyi tunakwakama. Wamweni kukala kwakuvulu muchihandilu chindi, mpinji yimu akeñeleña nikumujaha. (1 Sam. 17:34, 35; 18:10, 11) Davidi womikili ñahi hampinji yakameneneñayi? Tunateli kumwimbujola ñahi?

Davidi wamweni kukala kwakuvulu hampinji yimu. Talenu chuma chamumwekeneni hatemukileñayi Mwanta Sawulu wakeñeleña kumujaha. Mpinji yafuntiliyi Davidi niantu jindi kufuma kunjita kwayiliwu, awanini ayilumbu jawu aneyi yuma yawu, anochi matala awu nawa anasendi yisaka yawu muwunkoli. Davidi welili ñahi? “Davidi niamayala indi atachikili kudila makumbu nichazeyeliwu.” Kubombelahu, Davidi wakameneni nankashi muloña amayala akuhweleleliyi “ahanjekeleña nsañu yakumwasa malola.” (1 Sam. 30:1-6) Haniyi mpinji Davidi wamweni kukala kwamaneni kusatu: Chisaka chindi chadiña muwubanji, watiyili woma nindi antu jindi akumujaha, nawa Mwanta Sawulu wachidiña nakumukumpisha. Davidi watela wakameneni chikupu!

Chumanyi cheliliyi Davidi? Hohenohu “wadikolesheleli mudi Yehova Nzambi yindi.” Davidi welili ñahi mwenimu? Chuma cheliliyi Davidi hikulomba kudi Yehova kulonda amukwashi nikwanuka chamukwashiliyi kunyima. (1 Sam. 17:37; Mas. 18:2, 6) Davidi welukili nindi watela kumwihula Yehova, dichi wamwihwili Yehova chatela kwilayi. Chelili Davidi amuleji kudi Yehova chatela kwilayi, welili mwenomu chakadi kunata mpinji. Chafuminimu, yena niantu jindi ayikiswilili kudi Yehova nawa yisaka yawu niyuma yawu yejima yafuntili. (1 Sam. 30:7-9, 18, 19) Munamoni yuma yisatu yeliliyi Davidi? Walombeli wukwashu kudi Yehova, wanukili chamukwashiliwu kudi Yehova kunyima, nawa welili mwamulejeliwu kudi Yehova. Tunateli kumwimbujola ñahi Davidi? Talenu iji njila jisatu.

1. Kulomba. Mpinji yejima neyi tunatachiki kwakama, twatela kulomba kudi Yehova kulonda atukwashi nawa atwinki maana. Tukwikala nakuwunda mumuchima neyi tumulejamu Yehova mukulomba yuma yejima yinakutwakamisha. Hela tunateli kulomba muwihi, kulomba kwamumuchima kwesekeja nachidi yuma hanoyu mpinji. Mpinji yejima yitunakulomba wukwashu kudi Yehova twanukeña mazu aDavidi ahosheliyi nindi: “Yehova diyi ilola dami, diyi mpwembu yami nawa diyi wampulwishaña. Nzambi yami diyi ilola dami, mudi yena  dimunabatamaña.” (Mas. 18:2) Komana mwamweni kulomba kwatukwashaña? Muhela payiniya wejina daKahlia wahosheli nindi: “Hanyima yakulomba nekalaña nakuwunda. Kulomba kwankwashaña kutoñojoka neyi chatoñojokañayi Yehova, nikumukuhwelela chikupu.” Mwamweni, kulomba hichawaana chatwinkayi Yehova chatukwashaña kuumika neyi tunakwakama.

2. Anukenuña Yehova chayikwashiliyi kunyima. Chimukwanukaña yuma yayimwekeneni kunyima, kwila mutoñojoka hakukala kumwamweni nawa kumwomikili nawukwashu waYehova nehi? Neyi twanuka Yehova chinatukwashiyi kushilahu nichakwashiliyi ambuñindi akunyima, tukwikala nakuwunda kwamuyitoñojoka nawa tukumukuhwelela chikupu. (Mas. 18:17-19) Mukulumpi wejina daJoshua wahosheli nindi: “Nasoneka yuma yayivulu yañakwiliyi Yehova mukulomba, chumichi chankwashaña kwanuka mpinji yinamulombeli Yehova chuma nawa anyikachu.” Neyi twanukaña mapampa anatukwashiyi Yehova kunyima, tukwikala nañovu yakuleka kwakama.

3. Zatilenuhu. Henohu kanda tufuukuli chakwila nanoku kukala, twatela kusandujola Mwizu daNzambi kulonda ditulomboli. (Mas. 19:7, 11) Amavulu eluka nawu neyi asandujola Nsona, elukaña chikupu chakuyizatisha oyu vasi muchihandilu chawu. Mukulumpi wejina daJarrod walumbulwili nindi: “Kusandujola kwankwashaña kwiluka mwatalisha oyu vasi nikwiluka chinakunlejayi Yehova. Chumichi chankwashaña kukuhwelela nsañu yinakutaña kulonda niyizatisheña.” Neyi tulombaña wukwashu waYehova kuhitila mukusandujola Mwizu Dindi nikuzatisha yuma yitunadizi, chikutukwasha kuumika neyi tunakwakama.

Davidi welukili nindi hakwila nawu aleki kwakama, wakeñekeleña wukwashu waYehova. Wasakilileña nankashi hawukwashu waYehova chakwila wahosheli nindi: “Nañovu yaNzambi, ami nateli kukiluka mpwembu. Nzambi walala diyi wanvwikaña ñovu.” (Mas. 18:29, 32) Tunateli kutoñojoka netu kukala kwetu kudi neyi Mpwembu jamaneni, jitukubula kutwesha kukiluka. Ilaña nawukwashu waYehova tukutwesha kukiluka kukala kudi kwejima kudi neyi mpwembu! Eña, neyi tulomba kudi Yehova netu atukwashi, twanuka yuma yejima yatwililiyi kunyima, nikwila yuma yejima yinakutulejayi, tunateli kukuhwelela netu wukutwinka ñovu nimaana akutukwasha kuleka kwakama!