LUNGKHAMNA chu kan dâra phurrit tak phurh ang a ni a. (Thuf. 12:25) I nunah lungkhamna nasa tak i hmachhawn tawh ṭhîn em? Tuar thei tawh lo khawpa inhriat châng i nei ṭhîn em? I nei ṭhîn a nih chuan, nang chauh i ni lo. Kan zînga a tam zâwk chu dam lo enkawltu te, thihnaa hmangaih tak chân te, leilung chhiatna tâwk te, a nih loh leh tisa lam, rilru lam, leh ngaihtuahna lama min tichau thei dinhmun ṭhenkhat tawng tawhte kan ni a. A nih chuan, lungkhamnate hlawhtling taka hmachhawn tûrin engin nge min ṭanpui thei? a

Lal Davida entîrna ngaihtuahna hmangin lungkhamna hmachhawn theih dân chungchângah thil tam tak kan zir thei a. Ani chuan a nunah dinhmun harsa tak tak a tâwk a, thih hlauhawm khawp dinhmunte pawh hmachhawn châng a nei a ni. (1 Sam. 17:34, 35; 18:10, 11) Engtin nge Davida’n lungkhamnate chu hlawhtling taka a hmachhawn? Engtin nge a entawn tûr siam chu kan zui theih?

Davida chuan ṭum khatah harsatna eng emaw zât a hmachhawn a. Entîr nân, amah thah tumtu Lal Saula hnên aṭanga a tlân chhiat laia a hmachhawn dinhmun kha han ngaihtuah teh. Davida leh a mite râl beihna ata an lo kîr leh khân, hmêlmate’n an thil neihte an rûksak a, an inte an hâl a, an chhûngte salah an man tih an hriat chuan an thin a ṭhâwng hle a ni. Engtin nge Davida’n a chhân lêt? “Davida leh a hnêna awmte chuan an aw an chhuah a, ṭap hlei thei tawh lo khawpin an ṭap a.” Davida manganna chu a mi rinte’n “amah chu lunga den thu an sawi avângin” a nasa lehzual a ni. (1 Sam. 30:1-6) Davida’n ṭum khatah buaina lian tham tak pathum a hmachhawn a ni: A chhûngte chu dinhmun hlauhawmah an awm a, a mite’n amah an tihhlum a hlau va, Lal Saula’n thah tumin a la ûm reng bawk. Davida lungkhamna a nasat dân tûrzia mai chu han mitthla teh!

Davida’n eng nge a tih tâk? Ani chu “a Pathian LALPAAH chuan a intichak a.” Engtin nge chutianga a tih theih? Ani chuan Jehova hnêna ṭanpuina dîla a ṭawngṭai bâkah, tûn hmaa a ṭanpui dânte chu a ngaihtuah lêt a ni. (1 Sam. 17:37; Sâm 18:2, 6) Jehova kaihhruaina zawn a ngai tih hriain a tih tûrte a hriat theih nân a hnênah kaihhruaina a zawng a ni. Davida chuan Jehova kaihhruaina a dawn hnu chuan hma a la nghâl vat a. Chuvângin, amah leh a mite chu Jehova’n mal a sâwm a, hmêlmate kut aṭanga an chhûngte an chhan chhuah bâkah, an thil lâkte pawh an chhuhsak leh a ni. (1 Sam. 30:7-9, 18, 19) Davida hma lâk dân pathum kha i lo chhinchhiah em? Jehova ṭanpuina dîlin a ṭawngṭai a, Jehova’n tûn hmaa a lo ṭanpui tawh dânte chu a ngaihtuah lêt a; tichuan, Jehova kaihhruaina milin hma a la a ni. Engtin nge Davida chu kan entawn theih? Kan entawn theih dân kawng thum i lo ngaihtuah ang u.

1. Ṭawngṭai rawh. Lungkhamna kan neih apiangin Jehova hnênah ṭanpuina leh finna dîlin kan ṭawngṭai thei a. Kan lungkhamna zawng zawng a hnêna thlenin kan phurritte chu kan tizâng thei a ni. A nih loh leh, kan dinhmun azirin ri chhuak lo leh tâwi tê pawhin kan ṭawngṭai thei bawk. Jehova hnêna ṭanpuina kan dîl apiangin: “LALPA chu ka lungpui leh, ka kulhpui leh, mi chhanhimtu a ni; Ka Pathian, ka lungpui nghet  tak a ni a, amahah chuan rinna ka nghat ang,” tia sawitu Davida angin Jehova kan rinzia kan lantîr a ni. (Sâm 18:2) Ṭawngṭaina chuan min ṭanpui tak zet em? Pioneer unaunu Kahlia-i chuan: “Ka ṭawngṭai hian ka rilru a hahdam huai ṭhîn a. Ṭawngṭaina chuan Jehova ngaihtuah anga ngaihtuah lehzual tûr leh a chunga ka rinna tinghet lehzual tûrin min ṭanpui a ni,” tiin a sawi. Ni e, ṭawngṭaina hi kan lungkhamnate hmachhawn thei tûra min ṭanpuitu Jehova hnên aṭanga kan dawn thilpêk hlu tak a ni.

2. Ngaihtuah lêt rawh. I nuna thilthlengte i han ngaihtuah lêt hian, Jehova ṭanpuina avâng chauhva i tawrh chhuah theih fiahnate chu i hre chhuak thei em? Jehova’n min ṭanpui dân leh tûn hmaa a chhiahhlawhte a ṭanpui dân kan ngaihtuah lêt hian, rilrua thlamuanna kan nei lehzualin, amah kan rinchhan lehzual a ni. (Sâm 18:17-19) Kohhran upa Joshua-a chuan, “Ka ṭawngṭaina chhânna ka dawnte chu ziakin ka chhinchhiah a. Chu chuan Jehova hnêna dîl bîk eng emaw ka neih lai leh ka mamawh tak chhânna min pêk hun laite chu min hriat chhuahtîr ṭhîn,” tiin a sawi. Ni e, tûn hmaa Jehova min lo ṭanpui tawh dânte kan ngaihtuah lêt hian, kan lungkhamnate do lêt thei tûra kan mamawh chaknate kan nei a ni.

3. Hma la rawh. Thiltih tûr kan rêl thlûk hmain, kaihhruaina rinchhan tlâk ber hre tûrin Bible-ah kan zawng thei a. (Sâm 19:7, 11) Mi tam takin Bible châng eng emaw bîk tak an zir chian hian, chu Bible châng an nunpui theih dânte chu an hre thiam lehzual a ni. Kohhran upa Jarrod-a chuan: “Zir bingna neihna chuan Bible châng hre thiam lehzual tûr leh Jehova min hrilhte hre thiam tûrin min ṭanpui a. Chu chuan a kaihhruaina mila hma ka lâk theih nân ka thu chhiarte chu ring tlat tûrin min ṭanpui a ni,” tiin a sawi. Bible aṭanga Jehova kaihhruainate kan zawn a, kan zui chuan lungkhamnate hmachhawn thei tûrin kan inbuatsaih ṭha lehzual ang.

Davida chuan lungkhamnate hlawhtling taka hmachhawn thei tûrin Jehova ṭanpuina a mamawh tih a hria a. A ṭanpuina avânga a lâwm êm avângin: ‘Ka Pathian ṭanpuinain kulh bang ka zuan khûm a ni. Chakna ka taia mi hrêngtu Pathian chu,’ tiin a sawi hial a ni. (Sâm 18:29, 32) Fiahna kan tawhte chu tâwn tlang theih loh bang ang mai niin kan ngai mai thei. Mahse, Jehova ṭanpuinain, eng fiahna pawh kan pal tlang thei a ni. Ni e, Jehova hnêna ṭanpuina dîla kan ṭawngṭai hunah kan tâna min tihsak zawng zawngte kan ngaihtuah lêt a, a kaihhruaina mila hma kan la a nih chuan, lungkhamnate hlawhtling taka hmachhawn thei tûra kan mamawh chakna leh finna min pe ang tih kan ring tlat thei a ni.