KʼIANGA nikjáojiaan tsín nda satío tokoán (Prov. 12:25). A sakʼoa kʼoasʼe tokuin. A sakʼoa kʼoasʼin nikjaʼaitsjain nga tsín tichókjoajinnili. Kʼoasatío sakʼoa tokoán ngatsʼiaa. Tobʼelañá, kʼianga tjín xi nikuindaa, nga jngo xíngiaa biya, kʼiatsa jme kjoaxkón kuichonená kʼoa tsa jetíchóbekaoná kjoa xi tibitjatojiaan tsínjin titsjoa tjínni tokoán. Jméni xi koasenkaoná nga tsín nʼio si̱kjáojiaan. a

Je choa̱le rey David koasenkaoná josʼiaan nga tsín nʼio si̱kjáojiaan. Nʼio tse kjoa jaʼatojin kʼoa nʼio xkón tsakʼejna (1 Sam. 17:34, 35; 18:10, 11). Jmé xi kisʼin nga tsín tinʼio kisikjáojinni. Jósʼin koa̱n chjénngilee.

Je David nʼio tse kjoa jaʼatojin. Tobʼelañá, jókoan kʼianga títokachjingale je rey Saúl kʼianga koanmele kisikʼien. Kʼianga jejaʼaini nga ki kjoajchán je David, je chjotakontrale kisiché tsojmi xi kisʼele, tsakaká niʼyale kʼoa kʼoati kikao je familiale. Je David kao chjotale kiskiʼndá nga̱ nʼio aon koanle. Kʼoa je chjotale kʼoakitso nga la̱jao̱ katanikʼienni je David (1 Sam. 30:1-6). Xi tiʼakʼiani, jan koya tjínni je kjoa xi jaʼatojin, kinikatíonʼio je familiale, je chjotale kʼoakitso nga sikʼien kʼoa je rey Saúl kʼoati tíbásjai nga sikʼien. Nʼiojin kisikjáojin je David nga kui kjoa jaʼatojin.

Jókisʼin. Tokjoan jé Jeobá kisijéle nganʼio. Tsakʼétsʼoale nga kisijéle nganʼio, kʼoati kisikjaʼaitsjenjin josasʼin jetsakasenkao (1 Sam. 17:37; Sal. 18:2, 6). Kʼoati koanjinle David nga machjén nga je Jeobá koandiaale, kʼoa jé kiskonangile jmeni xi sʼin. Xijekoan, tokjoan kisitjoson David jmeni xi kitsole Jeobá. Je Jeobá kisichikontʼain je David kao chjotale, kʼoa kitjoénile je familiale kao tsojmi xi koanchéle (1 Sam. 30:7-9, 18, 19). Jméni xi kisʼin je David. Tsakʼétsʼoale je Jeobá nga kisijéle nganʼio, kisikjaʼaitsjenjin josasʼin tsakasenkao kʼoa kisitjoson jmeni xi kitsole Jeobá. Janla koya kataʼyaa josʼin koa̱n chjénngilee je David.

1. Kʼoétsʼoaa. Kʼianga nikjáojiaan koaan kʼoétsʼoalee je Jeobá nga katabasenkaoná jokoa̱n sʼiaan. Koaan tse chja̱kaonajmiá nga kʼoéyanajmílee jmeni xi tinikjáojiaan. Nda sʼe̱ tokoán tsa kʼoasʼiaan. Kʼoa koaan nga tochoa én kuinókjoaa kʼianga kʼoétsʼoalee kʼoa tsakui nichxin saʼnda tsín kuinókjoaa nga kʼoakʼuínle jotjín tokoán. Kʼianga si̱jélee nganʼio je Jeobá kʼoasʼin koakoñá nga je ninʼiotʼaa tojo kisʼin David. I kitso: “Jé Jeobá na̱xi̱na, xjáo tajana, xi síkʼéjnandáina. Jé Ninána xi na̱xi̱na mani, jé sinʼiotʼa” (Sal. 18:2). A basenkaoná kʼianga bʼetsʼoaa. Jngo tichjaa xi precursora sʼin tísíxá xi Kahlia ʼmi itso: “Kʼianga jebʼetsʼoa nda sʼe tokoan. Kʼianga bʼetsʼoa  basenkaona nga kʼoatisʼin sikjaʼaitsjen josʼin síkjaʼaitsjen je Jeobá kʼoa ngisaa sinʼiotʼa”. Kʼianga ma bʼetsʼoaa jngoo kjoatjao xi kitsjoaná Jeobá xi basenkaoná nga nda sʼe tokoán kʼianga nikjáojiaan.

2. Si̱kjaʼaitsjenjiaan. A faʼaitsjenli josasʼin jetsakasenkaoli Jeobá. Kʼianga nikjaʼaitsjenjiaan josʼin tsakasenkao Jeobá je choʼndale nichxin kjoatse kʼoa josʼin tíbasenkaoná ndʼaibi kui xi nda bʼé tokoán kʼoa ngisaa ninʼiotʼaa (Sal. 18:17-19). Jngo xi chjotajchínga sʼin tíjna xi Joshua ʼmi, i kitso: “Tjítʼaxo̱nna jojetjínkʼa tíbasenkaona Jeobá kʼianga bʼetsʼoale, kʼoa kʼoasʼin faʼaitsjennina jmeni xi kisijéle kʼoa kuikjoán kitsjoana jmeni xi koanchjénna”. Kʼianga nikjaʼaitsjenjiaan josʼin tíbasenkaoná je Jeobá nda sʼe tokoán.

3. Si̱tjosoán. Kʼiatsa jme xi sʼiaan, ya Biblia kjoásjaiyaa nga̱ kui xi ngisa nda bándiaaná (Sal. 19:7, 11). Kʼianga básjaiya ndsʼee je textole Biblia ngisaa nda majinle josʼin sitjoson jmeni xi tso je Biblia. Je Jarrod, xi chjotajchínga sʼin tíjna, itso: “Kʼianga basjaiya ngisaa nda majinna jmeni xi tso jngo texto. Nga kʼoasʼian majinna jmeni xi tsona je Jeobá, bichókajin ni̱ma̱na kʼoa kʼoasʼian jmeni xi sasénle”. Kʼianga ya Biblia basjaiya kʼoa kʼianga nitjosoán jmeni xi tsoná je Jeobá, ngisaa basenkaoná nga tsín nʼio nikjáojiaan.

Je David koanjinle nga toje Jeobá xi koa̱nle koasenkao nga tsín tinʼio sikjáojinni. Kʼoa kitsjoale kjoanda Niná nga tsakasenkao. I kitso: “Xi kao nganʼiole Niná koaanna kjuímijoan jngo xjáo”. Kʼoa i kitsosa: “Jé Niná xi kixi tsjoána nganʼio” (Sal. 18:29, 32). Tsakui nichxin kʼoasʼin si̱kjaʼaitsjeen nga tsín tikoa̱n josʼin sʼe̱ndajinni je kjoa xi tjínná, tonga jé Jeobá koasenkaoná nga chókjoajinná. Kʼiatsa kʼoétsʼoalee nga si̱jéle nganʼio, tsa si̱kjaʼaitsjenjiaan josasʼin jetsakasenkaoná kʼoa tsa si̱tjosoán josʼin mele, alikui jao tjín tokoán nga je tsjoáná nganʼio xi koa̱nchjénná kʼianga tsín nʼio si̱kjáojiaan.