KO TIJATY njantsy myëmäˈäy njantsy myëdäjëm, mbäät nmëjeˈemtsyˈoˈkëm ets axëëk xyajnayjyäˈäwëm (Prov. 12:25). ¿Të näˈä duˈun mˈoknayjyäˈäwëbë? ¿Waˈan näˈäty mwinmay ko kyaj xyˈokmëmadäˈäganë? Pën duˈun, kyaj myijtsëty jeˈeyë duˈun mjaty. Ta nimayë nmëguˈukˈäjtëm mëdiˈibë kyuentëˈäjttëbë jyëëky myëguˈuk, mëdiˈibë kyuˈayoˈowëdëp ko tijaty yˈayoˈonbëjktaˈaky, mëdiˈibë të yˈook të tyëgoytyë jyëëky myëguˈuk, o wiˈixëmë net tpäättë amay jotmay ets yëˈë yajkëjx yaˈˈanuˈkxëdëp, pëjkxëdëp ja jyot myëjääw ets kyaj oy nyekynyayjyawëdë. ¿Ti mbäät pyudëkëdë parë kyaj nëgoo tijaty tjantsy myëmay tjantsy myëdäjtët? *

Mbäät xypyudëjkëmë yˈijxpajtënë rey David parë kyaj nëgoo tijaty ndimmëmäˈäy ndimmëdäjëm. David mëjwiin kajaa amay jotmay tpaty, axtë oˈkën jëjpˈamë jyukyˈäjtënë yˈijty (1 Sam. 17:34, 35; 18:10, 11). Per ¿ti pudëjkë parë kyaj nëgoo tijaty ojts tmëmay tmëdäjy? ¿Ti mbäät nduˈunëm parë nbanëjkxëmë yˈijxpajtën?

David mëjwiin kajaa amay jotmay tpaty. Min nˈokˈijxëm wiˈix tëgok jyajty ko nety kyeˈekyjyëdity mët ko Saúl yaˈoogäˈänyëty. Ko David ojts nyëjkxtë tsiptuumbë mët ja jyaˈayëty, ta ja myëtsipëty jyäjttë mä nety të nyaynyikojëdë mëdë fyamilyë ets tmënëjkxtääytyë tijatyë nety myëdäjt jyaygyajptëp, tnoˈktääytyë ja jëën tëjk ets ojts yajmënëjkxtë ja yˈuˈunk yˈënäˈk ets ja kyujëën kyudëjkëty. ¿Ti tyuunë David? Biiblyë jyënaˈany: “David mët ja jyaˈayëty, ta jyantsy tyëjkëdë jëëy yaxpë kuwopy kukäˈätsypyëm. Ojtsën nyaywyinjëˈëy nyaywyinˈyäˈäxëdë axtë ko ja wyinëë ojts tyëtstääynyëdë”. Per kyaj jeˈeyë duˈun jyotmaybyatyë David, pes ja jyaˈayëty mëdiˈibë nety tyukjotkujkˈäjtypy ojts jyakukäˈätsäˈänëdë (1 Sam. 30:1-6). Mä tuˈukpë xëëw, David tëgëk pëky ja jotmay twinguwäˈkë. Myëduˈuk, të nety ja fyamilyë myënëjkxëdë ja myëtsipëty, myëmajtsk, yaˈooganëdëbë nety ja jyaˈayëty, ets myëdëgëëk, yëˈë nety ëxtääyëbë Saúl parë yaˈoogäˈänyëty. ¿Mbawinmaapy wiˈixë David ojts jyantsy myay jyantsy tyajy?

¿Ti net tyuun? Ta netyë David “tpëjkyë myëjääw mä Jyobaa mëdiˈibë Diosˈäjtypy”. ¿Ets wiˈixën duˈun ttuuny? David xëmë tmënuˈkxtakyë Jyobaa parë tˈamdooyë naybyudëkë ets tpawinmääy tijatyë netyë Dios të tyukmëdunyëty (1 Sam. 17:37; Sal. 18:2, 6). David, ta nanduˈun tpëjkyë kuentë ko tsojkëbë netyë Jyobaa nyëˈëmoˈoy tyuˈumoˈoyëdët. Pääty dyajtëëy ti mbäät ttuny. Ko Jyobaa tˈatsoowëmbijty ja nuˈkxtakën, ta David netyë duˈun ttuuny. ¿Wiˈix wyimbëtsëëmy? Jyobaa ojts tkunuˈkxy ja David ets nanduˈun ja jyaˈayëty, ojts dyaˈˈawäˈätspëtsëmy ja fyamilyë ets yajmooytyë jatëgok tijatyë nety ja myëtsipëty të tmënëjkxtë (1 Sam. 30:7-9, 18, 19). ¿Të xypyëkyë kuentë ti tëgëk pëky tyuunë David? Jawyiin tmënuˈkxtakyë Jyobaa parë tˈamdooyë naybyudëkë, pyawinmääy tijatyë netyë Dios të yˈoktukmëduunëbë, ets ok, ta net ttuuny extëmë netyë Jyobaa të yˈanëˈëmxëty. ¿Wiˈix mbäät nbanëjkxëmë yˈijxpajtënë David? Min nˈokˈijxëm tëgëk pëky.

1. Nˈoknuˈkxtakëm. Ko tijaty njantsy myëmäˈäy njantsy myëdäjëm, oy ko xëmë Jyobaa nmënuˈkxtakëm parë yëˈë xypyudëjkëm ets nnijäˈäwëm ti nduˈunëm. Mbäät jekyë Jyobaa nmënuˈkxtakëm ets ndukmëtmaytyaktäˈäyëm tijatyën nmëmäˈäy nmëdäjëm, ko duˈun nduˈunëm, ta oy nnayjyawëyäˈänëm. O mbäät nanduˈun pojën nmënuˈkxtakëm jodoty winmäˈänyoty, pën kyaj mbäät ti nˈoktuˈunënë. Tëgok tëgokë Jyobaa nˈamdoˈowëmë nyaybyudëkë, yëˈë nety nyajnigëxëˈkëm ko ndukjotkujkˈäjtëm duˈun extëmë David ttuuny. Yëˈë jyënany: ‘Mijts  xykyuwäämp xynyixäjpëts, mijts ntsoktaknˈäjtypy, mijts xyajˈëwäˈätspëtsëëmbëts, mijts nDiosˈäjtypy, ja tsää mëdiˈibëts xyˈakëëytyujkp xyˈaxäjtujkpën, ja nguwäämbëts’ (Sal. 18:2, TY). ¿Mbäät xyjyantsy xypyudëjkëmë nuˈkxtakën? Kahlia mëdiˈibë tuump prekursoora, jyënaˈany: “Kots nmënuˈkxtaktäˈäyë Jyobaa, jantsy oyëts nnayjyawëty. Xypyudëjkëbëts parëts nwinmayët extëm yëˈë etsëts niˈigyë ndukjotkujkˈatët”. Duˈunë duˈun, ko nmënuˈkxtakëmë Jyobaa, xypyudëjkëm parë kyaj nëgoo tijaty ndimmëmäˈäy ndimmëdäjëm.

2. Nˈokpawinmäˈäyëm. Ko xyjyamyetsy wixatyë Jyobaa të mbudëkëty, waˈan mwinmay ko kyajxyëp ojts xymyëmadaˈaky ja mˈamay mjotmay koxyëp mgapudëjkë. Ko nbawinmäˈäyëm wixatyë Jyobaa tpudëjkë ja Diosmëduumbëty ets wiˈix tyam nanduˈun xypyudëjkëm, yajkëktëjkëp niˈigyë ja mëbëjkën ets xyjyotkujkmoˈoyëm (Sal. 18:17-19). Joshua mëdiˈibë tuump mëjjäˈäy, tnimaytyaky: “Nmëdäjtypyëts tuˈugë listë mäts ngujayë wixatyë Jyobaa tˈatsoowëmbityëtsë nuˈkxtakën. Duˈunëts njamyetsy tijatyëtsë Jyobaa nˈamdoow ets wiˈixën tˈatsoowëmbijty mäts meerë nyajtëgoyˈajty”. Ko nbawinmäˈäyëm tijatyë Jyobaa të xytyukmëduˈunëm, ta jatëgok nbëjkëmë jot mëjääw parë kyaj nëgoo tijaty ndimmëmäˈäy ndimmëdäjtëm.

3. Nˈoktuˈunëm. Tsojkëp jawyiin ngäjpxëmë Biiblyë pën kyaj nnijäˈäwëm wiˈix tijaty mbäät nduˈunëm, pes yëˈë mëdiˈibë mas oy mbäät xynyëˈëmoˈoy xytyuˈumoˈoyëm (Sal. 19:7, 11). Nimayë nmëguˈukˈäjtëm të tpëktë kuentë ko pën pyayeˈeytyëp tuˈugë tekstë, ta mas niˈigyë tjaygyukëdë wiˈix mbäät tkuytyundë mä jyukyˈäjtën. Jarrod, mëdiˈibë tuump mëjjäˈäy, jyënaˈany: “Kots yajxon nbayeˈey tuˈugë tekstë, niˈigyëts njaygyukë ets duˈunëts nˈixy titsë Jyobaa xytyukniˈˈixëyäämp, xyˈajäjt xyjyotjäjtëbëts ja yˈayuk ets tatsë net tijaty nduny extëm ttukjotkëdaˈaky”. Ko mä Biiblyë nˈëxtäˈäyëmë Jyobaa nyaybyudëkë ets nmëmëdoˈowëm ja yˈanaˈamën, yëˈë mëdiˈibë mbäät xypyudëjkëm parë kyaj nëgoo tijaty ndimmëmäˈäy ndimmëdäjëm.

David nyijäˈäwëbë nety ko tsojkëbë Jyobaa pyudëkëdët parë kyaj nëgoo tijaty tmëmay tmëdäjët. Ets pääty ojts tkuˈëw tkukäjpxë, duˈun jyënany: “Mëdë Diosë myëjääw mbäädëts ngëxpety mä tuˈugë potsy” ets ta yˈakjënany: “Diosë tëyˈäjtënbë, yëˈë duˈun mëdiˈibëts xymyoobyë jot mëjääw” (Sal. 18:29, 32). Mbäät näˈäty nwinmäˈäyëm ko tsip nmëmadakëm ja amay jotmay, per mbäät nmëmadakëm mëdë Jyobaa nyaybyudëkë. Ko nmënuˈkxtakëm parë xypyudëjkëm, ko nbawinmäˈäyëm tijaty të xytyukmëduˈunëm ets ko nduˈunëmë net extëm ttukjotkëdaˈaky, mbäät nˈijtëm seguurë ko Jyobaa xymyoˈoyäˈänëmë jot mëjääw etsë wijyˈäjtën mëdiˈibë nyajtëgoyˈäjtëm parë kyaj nëgoo tijaty ndimmëmäˈäy ndimmëdäjëm.