BANN traka, zot kouma enn pwa bien lour lor nou leker. (Prov. 12:25) Eski to pe soufer akoz to bann traka? Eski parfwa to panse ki to nepli kapav tini? Si to dan sa sitiasion-la, to pa tousel. Boukou parmi nou trakase, strese, ouswa extra fatige pou plizir rezon. Par exanp, kitfwa nou bizin okip enn manb nou fami ki malad, ouswa kitfwa nou pe soufer akoz enn katastrof natirel ouswa akoz lamor enn kikenn ki nou kontan. Ki kitsoz kapav ed nou pou sirmont nou bann traka? a

Kan nou examinn lexanp Lerwa David, nou kapav aprann kouma pou sirmont nou bann traka. David ti gagn boukou difikilte dan so lavi. Li ti mem pas pre ar lamor plizir fwa. (1 Sam. 17:34, 35; 18:10, 11) Kouma David ti sirmont so bann traka? Ek kouma nou kapav imit li?

David ti bizin fer fas ar plizir difikilte anmemtan. Par exanp, reflesi lor seki ti arive pandan ki li ti pe sove parski Lerwa Sail ti pe rod touy li. Kan David ek so bann zom ti retourn kot zot, dan Ziklag, zot bann lennmi ti kokin tou zot bann dibien, ti bril zot lakaz, ek ti pran zot fami kouma prizonie. Kouma David ti reazir? “David ek so bann zom ti plore bien for, ziska ki zot ti nepli ena lafors pou plore.” David ti plis strese ankor parski so bann zom ti anvi touy li. (1 Sam. 30:1-6) David ti bizin fer fas ar trwa difikilte anmemtan: So fami ti an-danze, so bann zom ti anvi touy li, ek Sail ti pe rod li pou touy li. Mazine ki kantite David ti trakase dan sa ler-la!

Ki David ti fer? Deswit li ti “fortifie limem par Zeova.” Kouma David kitfwa ti fer sa? Nou kone ki David ti priye Zeova pou gagn So led ek li ti reflesi lor kouma Zeova ti ed li dan lepase. (1 Sam. 17:37; Ps. 18:2, 6) David ti kone ki li ti bizin demann Zeova seki li ti bizin fer. Alor, li ti demann Zeova seki li bizin fer. Apre ki Zeova ti dir li seki li ti bizin fer, deswit David ti azir. Lerla, Zeova ti beni David ek so bann zom, ek zot ti reisi sov zot fami ek repran zot bann dibien. (1 Sam. 30:7-9, 18, 19) Eski to’nn trouv sa trwa kitsoz ki David ti fer la? Li ti priye Zeova pou gagn so led, li ti reflesi lor kouma Zeova ti ed li dan lepase, ek li ti azir, li ti fer seki Zeova ti dir li. Kouma nou kapav swiv lexanp David? Anou get trwa fason.

1. Priye. Kan nou trakase, nou kapav priye Zeova pou ki Li ed nou ek Li donn nou so sazes. Nou kapav ouver nou leker ar Zeova ek dir Li tou seki pe trakas nou, ouswa si nou sitiasion pa permet nou fer sa, nou kapav fer enn ti lapriyer bien kourt. Sa pou ed nou pou nou santi nou bien. Sak fwa ki nou rod led Zeova, nou montre ki nou ena konfians an Li, parey kouma David, ki ti dir: “LESEGNER, limem mo sitadel, mo veritab fortres, mo liberater, mo Bondie, sitadel kot mo santi mwa ansekirite.” (Ps. 18:2) Me eski lapriyer vremem efikas? Enn pionie ki apel Kahlia, dir: “Kan mo fini priye Zeova, mo santi mwa anpe. Lapriyer ed mwa pou pans parey kouma Zeova ek pou fer Li plis konfians.”  Wi, lapriyer enn kado bien pwisan ki Zeova inn donn nou ek li ed nou pou sirmont nou bann traka.

2. Reflesi lor kouma Zeova inn ed twa dan lepase. Kan to reflesi lor tou seki’nn ariv twa dan to lavi, mazinn bann sitiasion ki to’nn reisi andire gras-a led Zeova. Kan nou reflesi lor kouma Zeova inn ed nou ek kouma Li’nn ed so bann serviter dan lepase, nou santi nou anpe ek nou ena plis konfians an Li. (Ps. 18:17-19) Enn ansien ki apel Joshua, dir: “Mo ena enn lalis bann lapriyer ki Zeova inn reponn. Sa ed mwa pou rapel bann kitsoz presi ki mo’nn demann Li ek pou rapel kouma Li’nn donn mwa seki mo ti bizin.” Wi, kan nou reflesi lor tou seki Zeova inn fer pou nou, sa donn nou lafors pou kontign fer fas ar nou bann traka.

3. Azir. Dan ninport ki sitiasion, avan ki nou pran enn desizion, nou bizin rod bann konsey dan Labib. (Ps. 19:7, 11) Boukou frer ek ser inn trouve ki, kan zot fer bann resers lor bann verse, sa ed zot pou konpran kouma zot kapav aplik sa bann verse-la dan zot lavi. Enn ansien ki apel Jarrod, dir: “Kan mo fer bann resers lor enn verse, mo konpran verse-la pli bien ek mo konpran seki Zeova anvi mo fer. Lerla, sa plis tous mo leker ek sa motiv mwa pou aplik seki mo’nn aprann.” Kan nou rod bann konsey ar Zeova dan Labib ek nou met an pratik seki nou aprann, nou pou anpe ek zwaye mem si nou ena bann traka.

David ti konpran ki li ti bizin led Zeova pou ki li kapav sirmont so bann traka. Li ti telman rekonesan anver Zeova, ki li ti dir: “Ar to lafors mo kapav fransi enn miray. Limem ki donn mwa lafors.” (Ps. 18:29, 32) Parfwa, nou kapav panse ki nou pa pou kapav andire parski nou ena tro boukou problem. Me avek led Zeova, nou kapav sirmont ninport ki problem! Wi, kan nou priye Zeova pou gagn so led, kan nou reflesi lor tou seki Li’nn fer pou nou, ek kan nou fer seki Li demann nou, nou kapav sir ki Li pou donn nou lafors ek sazes ki nou bizin pou sirmont nou bann traka!