NAKHALAKA nimasukhuli unkhala khampa nirina nrintti woolemela wanrimani wihu. (Miru. 12:25) Nyuuva nhopaca wiicoona commo nlattu wookhala nimasukhuli? Nhopaca ukhala nimasukhuli mpaka wuupuwela wiira khannohala ukhitiri uvilela? Wakhala wiira iyo itthwiiyo ihopaca uwiirannyeelani, khanri veekha. Atthu enci ankhala owoocya, niiwasiwaasi ni ooriipiya nrima cinene nlattu wo citthu cinci cinwiirannyeela. Ahaavo anonwacera mmucyaaya nowerennya, akhwaawe unawaariipa nrima nlattu wookhwa ntthu anfentaaya ni ahaavo anhuva nlattu wo waakhumelela ihasara. Masi isiyani inhala unikavihera uvilela masukhuliihu? *

Usoma ihantisi ya mwene Davidi pooti unikavihera uvukula masukhuliihu. Uyo yahonkhumelela masakha menci ni aahala vakaani ukhwa. (1 Sam. 17:34, 35; 18:10, 11) Isiyani yankavihenre mwene Davidi uhitepa ukhala nimasukhuli ukati wankhumelenlyaaya citthu cotheenennyo? Ninhala untakiha cani?

Davidi yahonkhumelela masakha menci wonkwaha mmoca. Muupuwele itthu yankhumelenle Davidi ukati waatthawaawe wiira hiiviye ni mwene Sawuli. Davidi ni anatoropaawe umaliha waya uwaattakanana alupatthyaaya, yahoturuwela nipuro naamakalyaaya. Masi ukati waaphiilyaaya nno nipuronno, yahotuthuwa woona waya wiira atakhali yahowa, yahennya citthu caya, upaha inupa caya ni waacisa asaaraya ni asaanaaya. Isiyani Davidi yaapankilyaawe woona wawe iyo itthwiiyo? “Davidi ni anatoropaawe yahancera wunla ikuttho cinene mpaka ikuru caya cahaamalela.” Ni kahi iyo paahi. Alopwana Davidi yaakhuluvelaawe ‘yahosikisana unvonyakaca nimaluku.’ (1 Sam. 30:1-6) Davidi yahonkhumelela masakha mararu wonkwaha mmoca: malatarawu yahaacisa amucyaawe, aapheela wiiviya naalopwana yaakhuluvelaawe ni mwene Sawuli nanlelo aananlupattha. Nkoopuwelani masukhuli Davidi yaarinaawe uyo ukatyuuyo!

Vano Davidi aapankileni? “Davidi ahototha ulipihiya ni Yehova, Nlukwaawe.” Masi manannani Davidi caatothilyaawe ulipihiya ni Yehova? Uyo aheelemaleliha unlompa Yehova anlepelaka wiira ankavihere. Ciicammo, khaahiya wuupuwela mananna Yehova cankavihenryaawe khalayi. (1 Sam. 17:37; Isaa. 18:2, 6) Davidi ancuwela wiira ahaana ankohaka Yehova itthu yaalamuliyaawe upanka ule ukatyuule. Phimaana, uyo ahonkoha Yehova isiyani yaalamuliyaawe upanka. Ucuwela wawe itthu Yehova yaapheelaawe wiira apanke, Davidi ahopanka iyo itthwiiyo woohipicapica. Phimaana, uyo ni anatoropaawe yahocaalihiya ni Yehova ni yahokhitiri uphwanya mihakhu caacisiye ni yahowoopola asaaraya ni asaanaaya. (1 Sam. 30:7-9, 18, 19) Nhoona citthu tthaaru Davidi caapankilyaawe? Uyo ahonlompa Yehova anlepelaka unkavihera, ahoopuwela mananna caakaviheriyaawe ni Yehova khalayi ni ahopanka itthu yaahimyeeriyaawe ni Yehova. Ninhala untakiha cani Davidi? Nttwee noone citthu tthaaru cinlamuliyeehu upanka wiira nintakihe.

1. Ulompa. Khula ikwaha inkhaleehu nimasukhuli, hiiva pooti unlompa Yehova ninlepelaka wiira anikavihere ni anivahe ankhili wiira nicuwele cowiira. Unlompa Yehova woohaakuvyaaca ni unhimyeera citthu cotheene cinnihela isukhuli unaahala unikavihera wiicoona saana. Masi naahikhitiriki uviriha ukati mwinci ninlompaka, pooti wanlompeehu wowaakuvyaaca woohikumihera ncu nihu vate. Khula ikwaha ninonlepeleehu Yehova wiira anikavihere, ninaathoonyera wiira ninankhuluvela khampa Davidi  cankhuluvelaawe. Uyo aheera: “Yehova khanle mwalaaka, nikhikicero naka ni moopolyaaka. Nlukwaaka khanle mwalaaka, khanle ntthawelo naka.” (Isaa. 18:2) Masi niireke ulompa khweeliini unaanikavihera? Arokorihu anvara nteko weepiyoneeru aneehaniya Kahlia aheera: “Kalompaka kinaakhalana nnema wanrimani waka. Ulompa unaakikavihera unkhuluvela Yehova ni wuupuwela khampa uyova cinoopuwelaawe.” Khweeliini, pooti waneereehu wiira ulompa ikhanle itthu Yehova inivahilyaawe wiira anikavihere uhitepa ukhala nimasukhuli.

2. Wuupuwela. Nnaakhitiri wuupuwela masakha yookhumelenleni khalayi Yehova ookavihenryaaweni uvilela? Noopuwelaka mananna Yehova caakavihenryaawe apoovwaawe khalayi ni mananna cinnikaviheraawe, ninaatepa unkhuluvela. (Isaa. 18:17-19) Humu mmoca neehaniya Joshua neera: “Mi kihantikha nipuro mavekelo Yehova akaakhunlyaawe. Iyo itthwiiyo inaakikavihera wuupuwela ikwaha Yehova caakivahilyaawe itthu yanlepenlyaaka.” Khweeli, noopuwelalaka ikwaha Yehova caanikavihenryaawe khalayi, ninaalipa wiira naanane citthu cinnihela isukhuli.

3. Upanka itthu. Nihinaaya ulakela itthu yoopanka, nihaana nitothaka ucuwela mbiiblyani isiyani Yehova impheelaawe wiira nipanke. (Isaa. 19:7, 11) Atthu enci ahoonelela wiira yatothaka ucuweleeha itthu inhimyaaya iveerusu yo mbiiblyani, khunaarika wiitthuca itthu yoohala weettela muukumini waya. Humu mmoca neehaniya Jarrod neera: “Utotha ucuweleeha itthu inhimyaaya iveerusu yo mbiiblyani unaakikavihera ucuwela isiyani impheelaaya uhimya iyo iveeruswiiyo ni isiyani Yehova impheelaawe ukiitthuciha nhina iyo iveeruswiiyo. Kapankaka commo, kinaakhitiri usunka wanrimani waka ni weettela itthu Yehova inkiitthucihaawe.” Natothaka ikano ca Yehova mbiiblyani ni neettelaka nnyo ikanonnyo muukumini wihu, khaninhala utepa ukhala nimasukhuli.

Davidi ancuwela wiira ahaana akaviheriyaka ni Yehova wiira akhitiri umaliha masukhuli yaarinaawe. Davidi ansukhurweela citthu cotheene caapankeliyaawe ni Yehova, mpaka aheera co: “Niikuru ca Nluku, mi kinaakhitiri uwela isiri yoorekama. Nluku eekhweeli thi ule nokivaha ikuru.” (Isaa. 18:29, 32) Ukati nkhwaawe, masakha annikhumelela ankhala moolupale khampa isiri yoorekama ihinkhitiriihu uwela. Masi Yehova anikaviheraka, hi pooti ukhitiri uwela khula isiri inhala ukhumelela uhoolo wihu! Phimaana, wiira nikhitiri uhitepa ukhala nimasukhuli, nihaana ninlompaka Yehova ni unlepela wiira anikavihere, wuupuwela mananna Yehova cinikavihenryaawe khalayi ni upanka itthu inniirelaawe wiira nipanke. Napankaka commo, pooti wankupaliihu wiira uyo naahala univaha ikuru ni ankhili anhala unikavihera uhitepa ukhala nimasukhuli!