YƖƖR tõe n sãama ned sũur hal wʋsgo. (Yel. 12:25) Yãmb zoe n maoo ne yɩɩr sẽn nams yãmb hal wʋsg bɩ? Yãmb zoe n maoo ne zu-loɛɛg hal tɩ y raood koms bɩ? Sã n yaa woto, bãng-y tɩ y pa y yembr ye. Wala makre, d sʋkã neb wʋsg segd n gesa b zakã ned sẽn pa keem yelle, wall b ned n maan kaalem, bɩ tõe tɩ sabab-wẽng n paam-ba, hal tɩ pa nana ye. Bõe n tõe n sõng-d tɩ d tõog n mao ne yɩɩre? *

Rĩm a Davɩɩd kibarã tõe n sõng-d lame tɩ d bãng d sẽn tõe n mao ne yɩɩr to-to. A sega zu-loees wʋsgo, hal tɩ wakat ning menga ra na n tũ ne a yõore. (1 Sãm. 17:34, 35; 18:10, 11) Bõe n sõng a Davɩɩd t’a tõog n mao ne yɩɩrã? Yam-bʋg la d tõe n dɩk a kibarã pʋgẽ?

Wakat n zĩnd tɩ yɛl wʋsg paam a Davɩɩde. Tẽeg-y yell ning sẽn paam-a, rĩm a Sayull sẽn wa n baood-a n na n kʋ t’a zoet n na n põsã. A Davɩɩd ne a nebã sẽn wa n leb b tãb-sikẽ wã, b mikame tɩ bɛɛbã wʋka b teedã, n yõ b rotã, la b tall b zagsã neb n looge. A Davɩɩd manesem yɩɩ wãna? “A Davɩɩd ne neb nins sẽn dag n be ne yẽnda wã zẽka b koees n yãbe, hal tɩ b pãngã sɛ.” Bũmb sẽn paas a Davɩɩd sũ-sãangã, yaa t’a nebã rag n “gomdame tɩ b na n lob-a-la kuga.” (1 Sãm. 30:1-6) Hal yɛl a tãab la a Davɩɩd ra segd n mao ne masã: A zakã rãmb ra bee yell pʋgẽ, a rapã ra rat n kʋ-a lame, t’a Sayull me ra baood-a n na n kʋ. Tags-y n ges-y a Davɩɩd yɩɩrã sẽn da segd n yaa wʋsg to-to!

Bõe la a Davɩɩd maan-yã? A baoo “pãng sẽn yit Sẽn-Ka-Saab sẽn yaa yẽnda Wẽnnaamã nengẽ.” Wãn to? A ra minim n pʋʋsda a Zeova n kot sõngre, la a tẽegd bũmb nins a sẽn da maan pĩnd n sõng-a wã. (1 Sãm. 17:37; Yɩɩn. 18:3, 7) A Davɩɩd ra getame tɩ yaa tɩlɛ t’a bao a Zeova sõngre. Kɩtame t’a sok a Zeova n bãng a sẽn tog n maane. A sẽn bãng a Zeova sẽn dat t’a maan bũmb ningã, a sak n tũu rẽ. A Zeova ninga a Davɩɩd ne a rapã barka, tɩ b tõog n zab ne b bɛɛbã n deeg b zakã rãmb ne b teedã. (1 Sãm. 30:7-9, 18, 19) Bũmb a tãab la a Davɩɩd maan-yã. A pʋʋsa a Zeova n kos sõngre, a tẽega bũmb nins a Zeova sẽn maan n sõng-a pĩndã yelle, la a sak n tũ a Zeova sẽn yeelã. Wãn to la d tõe n dɩk a togs-n-taare? Ad bũmb a tãab d sẽn tõe n maane:

1. D pʋʋse. D sã n wa sɩng n maand yɩɩr fãa, d tõe n pʋʋsa a Zeova n kos-a t’a sõng-d la a kõ-d yam. D sã n pelg d pʋg n togs a Zeova bũmb nins sẽn namsd tõndã, d paamda sũur pʋgẽ bãane. La sã n mikame tɩ zĩig pʋgẽ d pa tõe n pʋʋs-a n kaoose, d tõe n pʋʋs-a-la d sũurẽ. Sẽn yaa wakat ning fãa la d kos a Zeova sõngre, wilgdame tɩ d teeg-a-la wa a Davɩɩde. Ad a sẽn yeele: “Sẽn-Ka-Saab sẽn yaa mam pĩiga, mam pãng zĩiga, la m fãagda! Mam Wẽnnaamã yaa mam pĩig sẽn yaa mam zĩ-soalgdga.” (Yɩɩn. 18:3) Pʋʋsgã sɩd nafdame bɩ? Saam-bi-poak sẽn yaa so-pakd t’a yʋʋr boond t’a Kaliya yeelame: “M sã n wa pʋʋs n sa fãa, m paamda sũur pʋgẽ bãane. Pʋʋsgã sõngd-m  lame tɩ m get yɛlã wa a Zeova sẽn get-b to-to wã, la m maneg n kɩs-a sɩda.” Pʋʋsgã sɩd yaa kũun a Zeova sẽn kõ-do, tɩ sõngd tõnd tɩ d tõogd n maood ne yɩɩre.

2. D tẽege. D sã n tẽeg zu-loees kẽer d sẽn tõog n mao ne yelle, d bãngdame tɩ sã n da pa tũ ne a Zeova sõngre, d ra pa na n tõog ye. D sã n tags a Zeova sẽn sõng tõndo, la a sẽn sõng pĩnd wẽn-sakdbã to-to wã, d paamda sũur pʋgẽ bãane, la d maneg n kɩs-a sɩda. (Yɩɩn. 18:18-20) Kãsem-soab a ye yʋʋr sẽn boond t’a Zozuwe yeelame: “M sã n pʋʋs a Zeova n kos bũmb t’a leoke, m gʋlsda rẽ sebr zugu. Rẽ sõngda maam tɩ m tẽeg wakat nins m sẽn kos a Zeova bũmb takɩ t’a sɩd kõ-ma.” D sã n sɩd tẽegd a Zeova sẽn maan bũmb nins n sõng-d pĩndã yelle, d manegd n paama pãng n tõog n mao ne yɩɩrã.

3. D sak n tũ. Nand tɩ d yãk yam n maan bũmbu, d sã n bao sagls Wẽnnaam Gomdã pʋgẽ, na n sõng-d lame n tɩ yɩɩda. (Yɩɩn. 19:8, 12) Neb wʋsg mikame tɩ b sã n maan vaeesg n na n wʋm vɛrse kẽer võore, b bãngda b sẽn tõe n tũ a saglsã to-to. Kãsem-soab a ye yʋʋr sẽn boond t’a Zarood yeelame: “M sã n maan vaeesgo, sõngda maam tɩ m wʋm vɛrse wã võor sõma, la m bãng a Zeova sẽn yet-m bũmb ningã. Rẽ kɩtdame tɩ m wʋm vɛrse wã võor sõma, n dat ne m sũur fãa n tũ a Zeova saglsã.” D sã n bao n bãng a Zeova raabã ne a Gomdã maasem la d sakd n tũud rẽ, na n sõng-d lame tɩ d tõog n mao ne yɩɩrã.

A Davɩɩd ra miime tɩ sẽn na yɩl n tõog n mao ne yɩɩrã, yaa tɩlɛ t’a paam a Zeova sõngre. A sũur da nooma wʋsg ne a Zeova sẽn sõng-a to-to wã, hal t’a yeel yaa: “Ne mam Wẽnnaamã pãnga, mam gãndgda lalga. Wẽnnaam-kãng n kõt maam pãnga.” (Yɩɩn. 18:30, 33) D tõe n wa geta d zu-loeesã wa lals d sẽn pa tõe n gãndge. La ne a Zeova sõngre, d tõe n maoo ne zu-loɛɛg buud fãa, baa b yaa wa lalse. D sã n pʋʋs a Zeova n kos a sõngre, n tẽeg bũmb nins a sẽn zoe n maan n sõng-dã yelle, la d sak n tũ a sẽn yetã, d tõe n basa d yam t’a na n kõ-d-la pãng la yam tɩ d tõog n mao ne yɩɩrã.