KU LISOSOMUA, ci hasa ku pua ngue citeli ca kama mu mutima uetu. (Visi. 12:25) Vuno nenu muomaho laza mutima ni? Vuno mua lizivaho laza nguenu, ka mu hasa naua ku kolesa ni? Nga mukemuo, ka muesi lika lienu. Cingi cetu, tua tsisaho muntu u tua lema, ni tua kala na visemi va ku kulupa va tua pande ku niunga ntsimbu yose, ni tua hita mu ciyovo ca mavu ni vene nkala cisoti ceka ca tu lolola ku muvila na mu visinganieka. Vuno, vika honi vi hasa ku tu kuasa nga tu nomu mutima? *

Tu hasa ku lilongesa via vingi ku tuala ha ku vula ku lisosomua ku lungano lua Muangana Ndaviti. Ndaviti, ua hitile mu visoti via vingi mu muono, vimo vie ku mu tualele vene na ku ku-tsa. (1 Sam. 17:34, 35; 18:10, 11) Vati Ndaviti ua hasele ku vula ku lisosomua ceni? Vati tu hasa ku tambuluisa lungano lueni?

Ndaviti, ua hitile mu visoti via ku liseza-seza, viose ha ntsimbu imo lika. Ca ku muenako, tu hilulenu cimo citanga ca mu solokelele tele ali na ku tina ku mu tsiha kuli Muangana Saulu. Tangua limo, omo Ndaviti na masualele veni va hilukile ku ndzita, va uanene vitozi va na tuvu cilombo cavo kaha va pupile vupite, ku tsimika vindzivo na ku ambata masoko avo. Vati ua lingile Ndaviti? Mbimbiliya nguayo: “Ndaviti na vantu va kele neni va tendekele lizi liavo na ku lila, noho ka va kele naua na ngolo ya ku lila.” Kaha vamala va a kulahelele, “va tumbuile ku mu asa mavue,” eci ca vuezele ku ku lisosomua ceni. (1 Sam. 30:1-6) Ndaviti, ua pindile na visoti vitatu via kama ha ntsimbu imo lika: (1) vusoko vueni vua kele mu vusonde, (2) masualale veni va tondele ku mu tsiha, kaha (3) Muangana Saulu kasi ua kele na ku mu tonda linga a mu tsihe. Mua vusunga, evi viomisile cikuma mutima ua Ndaviti!

Vika ua lingile Ndaviti? Mu ntsimbu oyo vene, Ndaviti “ua likolesele muli Yehova Njambi yeni.” Vati halumo ua lingilemo? Ndaviti ua kele na ciizilila ca ku vundila vukuasi kuli Yehova kaha na ku hilula ha cifua ca mu kuaselelemo mu visoti via ku nima. (1 Sam. 17:37; Visa. 18:2, 6) Ndaviti ua muene ngecize a tondeka ku tuamenena ca Yehova, ngeci ua tondele ku tuamenena ca Yehova ku tuala ha vika na pande ku linga. Omo Yehova ua mu lekele via na pande ku linga, Ndaviti ua lingilemo mu vuasi-vuasi. Ngeci Yehova ua mu vezikisile hamo lika na masualale veni kaha va hasele ku ka hiluisa masoko avo na vupite vuavo. (1 Sam. 30:7-9, 18, 19) Mua mono viuma vitatu via lingile Ndaviti ni? Ua vundilile vukuasi kuli Yehova, ua hiluile ha cifua ca mu kuaselelemo Yehova mu visoti via ku nima, kaha ua lingile via mu lekele. Vati tu hasa ku tambuluisa Ndaviti? Tu hilulenu vinjila vitatu.

1. Puenu na ku vundila. Ntsimbu yose i tu putuka ku lisosomua, tu puenu na ku vundila vukuasi na mana kuli Yehova. Ku vundila mu ntunda ya kama na ku leka Yehova viose vili mu mutima uetu, ci hasa ku tu tepulula vulemu vua ku lisosomua. Vunoni nga mu cisoti ci tuli, ka citava tu vundile mu ntunda ya kama, tu hasa ku vundila ambe mu vuihi lika mu mutima. Ntsimbu yose i tu vundila vukuasi kuli Yehova, tue ku muesa ngecize tua kulahela muli ikeye ngue mua lingile Ndaviti. Uze ua handekele ngueni: “Yehova ikeye livue liange, na cimpaka cange, na muovole uange; Njambi yange, livue liange, muli ikeye nji ka tinina.”  (Visa. 18:2) Vuno ku vundila, ce ku kuasa vene ni? Umo ndumbuetu ua pua pioneiro ua lizina Kahlia ngueni: “Mu nima ya ku vundila, nje ku ivua ciyulo. Ku vundila ce ku nji kuasa ku tombuesa visinganieka viange na via Yehova, na ku nji kuasa ku mu kulahela cikuma. Mua vusunga, ku vundila ca pua vukuasi vua kama vua tu hana Yehova mu ku tu kuasa nga tu nomu mutima.

2. Puenu na ku hilula. Mu mue ku singanieka ha muono uenu, vuno kuli vimo visoti vi mue ku mona ngecize mua hasele lika ku vi vula omo lia vukuasi vua Yehova ni? Mu tue ku singanieka ha vati Yehova ua tu kuasele ku nima ni ua kuasele vangamba veni veka, ce ku tu kuasa ku kolesa na ku mu kulahela mua kama. (Visa. 18:17-19) Umo mukuluntu ua lizina Joshua ngueni: “Ange nja soneka vivundilo viange viose via kumbulula Yehova. Eci ca nji kuasa ku vuluka vintsimbu vi nja vundilile mpundu Yehova cimo cuma, kaha ua nji hanene vize mpundu vi nja mu vundilile.” Ku singanieka ha cifua ca tu kuaselelemo Yehova ku nima, ce ku tu hana ngolo ya ku vula ku lisosomua cetu.

3. Puenu na ku lingako mumo. Ntsimbu kanda tu hangule via ku linga mu nkala cisoti, tu puenu na ku tonda ku tuamenena ca mu Lizi lia Njambi. (Visa. 19:7, 11) Vamo va nongonona ngecize ku tondesesa vuino ku tuala ha cimo cinimbu ce ku va kuasa ku mona vati va hasa ku pangesa cinimbu caco mu muono. Umo mukuluntu mu cikungulukilo ua lizina Jarrod, ua lomboluele ngueni: “Ku tondesesa ce ku nji kuasa ku mona mu vinjila viose vi ce ku pangelamo cimo cinimbu na ku ivuisisa vika mpundu Yehova a tonda kuli yange. Kaha eci ce ku nji lingisa nji tsiliele vi nji na tanda na ku mona vati nji hasa ku vi pangesa mu muono.” Mu tue ku tonda ku tuamenena ca Yehova mu Visoneka via ku lela na ku kava ku tuamenena caco, ce ku tu puila ca casi ku uana ciyulo na ku yoya mu ndzolela ambe nga tu nomu mutima.

Ndaviti uevuisisile ngecize linga a hase ku vula ku lisosomua ceni, ua tondekele vukuasi vua Yehova. Ndaviti ua tsilielele cikuma mu vukuasi vua Yehova, ngeci ua handekele ngueni: “Hali Njambi yange nji tumbuka citungu. Njambi uze a nji zika na ngolo.” (Visa. 18:29, 32) Vintsimbu vimo, tu hasa ku ivua ngecize visoti vietu vi na pu ngue civumbe ca laha cize ka tu hasa ku tumbuka. Vunoni na vukuasi vua Yehova, tu hasa ku tumbuka visoti via pua ngue vivumbe viaco! Ngeci mukemuo, tu puenu na ku vundila vukuasi vua Yehova, ku hilula ha cifua ca tu kuaselelemo ku nima na ku lingako mumo ku tuala ha vimamuna vie ku tu hana. Nga tu lingamo, tu kalenu na vusunga ngecize a ka tu hana ngolo na mana a tua tondeka linga tu hase ku vula viose vie ku tu lingisa ku lisosomua!