KEMAN semi timotekipachouaj uelis kichiuas maj semi timotayokoltikan (Prov. 12:25). ¿Kemansa ijkon tionmomachiliani? ¿Kemansa tikonnemilia ke amo tiontaxikosok? Komo ijkon, amo sayoj tejuatsin ijkon tionmomachilia. Timiakej xa tikyekpixtokej aksa, xa momikilij aksa akin tiktasojtayaj, kampa tinemij xa panok se tetsauit oso xa tikpanokej teisa tein kichiuak maj tikmachilikan ke amo tikpiajok chikaualis oso maj amo kuali timomachilikan. ¿Toni uelis techpaleuis maj amo semi timotekipachokan? a

Tein kichiuak David uelis techpaleuis maj amo semi timotekipachokan. Yejua kipanok miak ouijkayomej uan hasta kinekiaj kimiktiskej (1 Sam. 17:34, 35; 18:10, 11). ¿Toni kipaleuij David maj amo semi motekipacho? ¿Keniuj uelis tikchiuaskej kemej yejua?

David kipiak miak ouijkayomej seki tonalmej. Kemej neskayot, maj tikitakan tein kipanok keman cholojtinemia porin tekiuaj Saúl kinekia kimiktis. Satepan ke yajkaj se neteuilis, David uan takamej akin iuan yajtinemiaj mokepkej kampa nemiaj uan kiitakej ke akin kintauelitayaj kintachtekijkaj, kinchichinouilijkaj ininchan uan kinuikakaj ininchankauan. ¿Toni kichiuak David? “David uan takamej akin iuan yajtinemiaj peuak semi chokaj. Chokakej hasta kemej amo uelkejok”. Uan no, takamej akin iniuan takuaujtamatia “kijtouayaj ke kinekiaj kitetemaskej” (1 Sam. 30:1-6). David kipiaya eyi uejueyi ouijkayomej: ichankauan ueliskia kinpanos tein amo kuali, takamej akin iuan yajtinemiaj kiluijkaj ke kimiktiskiaj uan tekiuaj Saúl kitemojtinemia. Yejua ika David xa semi motekipachojtoya.

¿Toni kichiuak David? Niman “kitemoj Jiova iDios porin kinekia maj kiyolchikaua”. ¿Uan keniuj kichiuak? David nochipa kitataujtiaya Jiova keman kinekia maj kipaleui uan itech tanemiliaya keniuj kipaleuijka achto (1 Sam. 17:37; Sal. 18:2, 6). David no kimatia ke monekia maj Jiova kiixyekana, yejua ika kitajtanij toni monekia kichiuas. Keman Jiova kinankilij niman kichiuak tein kiluij. Kemej ijkon kichiuak, yejuatsin kitatiochiuij David uan takamej akin iuan yajtinemiaj uan uelik kinmakixtijkej ininchankauan uan oksepa kinkepilijkej tein kinkuilijkaj (1 Sam. 30:7-9, 18, 19). ¿Tikonitak toni eyi taman kichiuak David? Kitataujtij Jiova porin kinekia maj kipaleui, itech tanemilij keniuj Jiova kipaleuijka achto uan kichiuak tein Jiova kiluijka. ¿Keniuj uelis tikchiuaskej kemej David? Maj tikitakan eyi taman.

1. Maj timotataujtikan. Nochipa keman semi timotekipachojtoskej uelis tiktataujtiskej Jiova maj techpaleui maj tikmatikan toni moneki tikchiuaskej. Komo uejkauak tiktataujtiaj Jiova uan tikiluiaj nochi tein techtekipachoua kuali timomachiliskej. Oso no uelis tiktataujtiskej maski amo uejkauak uan ichtaka komo ijkon moneki. Nochipa keman tiktajtaniaj Jiova maj techpaleui, tiknextiaj ke iuan titakuaujtamatij ijkon kemej David. Yejua kijtoj: “Jiova notepejxit, nonepaleuil, notemakixtijkauj. NoDios notepejxit kampa nimomatampauia” (Sal. 18:2). ¿Yekmelauj tepaleuia se motataujtis? Se precursora akin monotsa Kahlia kijtoua: “Satepan ke nikchiua netataujtil kuali nimomachilia. Netataujtil nechpaleuia maj nitanemili kemej Jiova uan maj okachi nitakuaujtamati  iuan”. Tein melauj, netataujtil se kualtsin netetayokolil tein Jiova techmaka uan techpaleuia maj amo semi timotekipachokan.

2. Maj titanemilikan. Keman itech tiontanemilia tein tikonpanouani, ¿tikonelnamiki keniuj Jiova mitsonpaleuiani xiontaxiko? Keman itech titanemiliaj keniuj Jiova kinpaleuiani itekitikauan ne uejkauj uan keniuj techpaleuiani tejuan, okachi iuan titakuaujtamatij uan amo semi timotekipachouajok (Sal. 18:17-19). Se tokniuj tayekankej akin monotsa Joshua kijtoj: “Nikijkuilojtok nochi tein Jiova nechnankiliani keman niktataujtiani. Ijkon nikelnamiki ke keman niktajtaniani se taman, yejuatsin nechmakani”. Yejua ika, keman itech titanemiliaj keniuj Jiova nochipa techpaleuiani, techyolchikaua uan nejon techpaleuia maj amo semi timotekipachokan.

3. Maj tikchiuakan. Achto ke tikixtaliskej tikchiuaskej se taman, uelis tikitaskej tein kijtoua Biblia porin yejua tein okachi techpaleuia (Sal. 19:7, 11). Miakej kiitanij ke keman okachi momachtiaj tein kijtoua se versículo, okachi kimatij keniuj kichiuaskej tein ompa kijtoua. Se tokniuj tayekankej akin monotsa Jarrod, kijtoua: “Keman okachi nimomachtia, ueli nikmati nochi tein ika motajtoua itech se versículo. Ijkon nikmati nochi tein Jiova kineki nechiluis, nejon nechpaleuia maj nikneltoka tein nimomachtia uan nimochikaua nikchiuas tein yejuatsin kiyolpaktia”. Keman timokauaj maj Jiova techixyekana ika iTajtol uan tiktakamatij itanauatiluan, techpaleuia maj amo semi timotekipachokan.

David kimatia ke sayoj Jiova ueliskia kipaleuis maj amo semi motekipacho. Kemej semi kitasojkamatia maj Dios kipaleui, kijtoj: “Ika ichikaualis Dios ueli nitejko itech se tepamit”. Uan no kijtoj: “Dios akin melauak yejua akin nechmaka chikaualis” (Sal. 18:29, 32). Xa tiknemiliskej ke semi ouij tikxikoskej tokuejmoluan, sayoj ke Jiova techpaleuia maj titaxikokan. Komo tiktataujtiaj maj techpaleui, itech titanemiliaj keniuj techpaleuiani uan tikchiuaj tein yejuatsin kiyolpaktia, uelis titakuaujtamatiskej ke techmakas chikaualis uan tamatilis tein techpaleuis maj amo semi timotekipachokan.