UKUKHATHAZEKA kungasiqeda amandla. (Zaga. 12:25) Uyake uthwale nzima yini ngenxa yokukhathazeka, uze uswele lokuthi wenzeni? Abanengi bethu siyake siphele amandla njalo sikhathazeke kakhulu. Ngokwesibonelo, abanye banakekela abangakibo abagulayo, abanye bafelwe njalo abanye behlelwe ngumonakalo wemvelo. Pho kuyini okungasinceda silwisane lokukhathazeka? *

Okwenzakala enkosini uDavida kungasinceda sibone ukuthi singalwisana njani lokukhathazeka. Wahlangana lobunzima obutshiyeneyo futhi ngezinye izikhathi wayephose abulawe. (1 Sam. 17:34, 35; 18:10, 11) Kuyini okwamncedayo? Singamlingisela njani?

UDavida wehlelwa zinhlupho ezinengi ngasikhathi sinye. Ngokwesibonelo, cabanga ngalokho okwenzakala ngesikhathi ebalekela iNkosi uSawuli eyayifuna ukumbulala. Yena lamadoda ayelawo bathi befika eZikhilagi lapho ababehlala khona bafica izitha sezitshontshe impahla yabo, zatshisa imizi yabo njalo zathumba lemuli zabo. Wenzani uDavida? “UDavida labantu bakhe bakhala kakhulu baze baphela amandla okukhala.” Esathi ukubonile lokho amadoda ayelawo aqalisa ‘ukukhuluma ngokumtshaya ngamatshe.’ (1 Sam. 30:1-6) Wayesephakathi kwelitshe lembokodo sibili. Imuli yakhe yayisengozini. Wayesesaba ukuthi amadoda ayelawo angambulala njalo iNkosi uSawuli yayilokhu imzingela. Kumele ukuthi uDavida wakhathazeka kakhulu.

Manje wenzani? “Wathola amandla kuJehova uNkulunkulu wakhe.” Angabe wakwenza njani lokhu? UDavida wayejayele ukuthandaza ecela ukuthi uJehova amncedise njalo wayehlala ecabanga ngendlela ayeke wamncedisa ngayo. (1 Sam. 17:37; Hubo. 18:2, 6) UDavida wayekwazi ukuthi kwakumele abuze kuJehova ukuthi enzeni njalo lokho yikho kanye akwenzayo. Wathi eseyitholile impendulo eyayivela kuJehova wahle wenza khona kanye okwakuthiwe akwenze. UJehova wamncedisa yena lamadoda ayelawo ukuthi baphinde bathole impahla yabo kanye lemuli zabo ezazithunjiwe. (1 Sam. 30:7-9, 18, 19) Uzinanzelele yini izinto ezintathu ezenziwa nguDavida? Wathandaza, wacabangisisa ngalokho uJehova ayemenzele khona njalo wenza lokho uJehova ayemtshele ukuthi akwenze. Singamlingisela njani? Nanzi indlela ezintathu.

1. Thandaza. Loba nini nxa sesifikelwa yikukhathazeka singathandaza kuJehova simcela ukuthi asincedise njalo asinike ukuhlakanipha. Ukutshela uJehova konke okusikhathazayo kuzakwenza sihlaliseke. Kwesinye isikhathi singathandazela enhliziyweni sisitsho amazwi amalutshwane. Sonke isikhathi nxa sithandaza sicela ukuthi uJehova asincedise siyabe sitshengisa ukuthi siyamthemba njengoDavida owathi: “UJehova ulidwala lami, inqaba yami, lomkhululi wami; uNkulunkulu wami ulidwala lami, ngiphephela kuye.” (Hubo. 18:2) Kodwa kuyanceda yini ukuthandaza? Udade oliphayona okuthiwa nguKahlia uthi: “Ngisala ngihlalisekile nxa ngingakhuleka. Ukuthandaza kwenza  ngicabange ngendlela uJehova acabanga ngayo njalo ngimthembe kakhulu.” Akuthandabuzwa ukuthi ukuthandaza yisipho esivela kuJehova esisinceda nxa sikhathazekile.

2. Cabangisisa. Uyazikhumbula yini izikhathi lapho uJehova akuncedisa khona ukuthi uqinisele ebunzimeni? Nxa singacabangisisa ngendlela uJehova asincedise ngayo thina kanye lezinceku zakhe zakudala sizahlaliseka futhi simthembe sibili. (Hubo. 17:18-19) Umdala webandla okuthiwa nguJoshua uthi: “Ngiyabhala phansi nxa uJehova engaphendula imithandazo yami. Lokhu kungincede ngakhumbula izikhathi lapho engicele khona into ethile kuye njalo wanginika khona kanye ebengikucelile.” Nxa singacabanga ngendlela uJehova asincedise ngayo sizabalamandla okuqhubeka silwisana lokukhathazeka.

3. Yenza okuthile. Kumele sidinge amacebo eLizwini likaNkulunkulu singakenzi isinqumo. (Hubo. 19:7, 11) Abanengi sebenanzelele ukuthi ukuchwayisisa ngevesi ethile kuyabanceda babone ukuthi bangayisebenzisa njani. Umdala webandla okuthiwa nguJarrod uthi: “Ukuchwayisisa kunginceda ngithole okunengi evesini ethile njalo ngizwisise ukuthi uJehova ungitshelani. Lokhu kwenza ithophele enhliziyweni njalo ngikwenze lokho engikutshelwa nguJehova.” Nxa singadinga ukuthi uJehova uthini eMibhalweni besesikusebenzisa lokho asitshele khona sizahlaliseka njalo sithokoze.

UDavida wayekwazi ukuthi wayedinga ukuncediswa nguJehova ukuze alwisane lokukhathazeka. Wayembonga sibili ngendlela ayemncedise ngayo okokuthi wathi: ‘NgoNkulunkulu wami ngingaweqa umduli. NguNkulunkulu ongihlomisa amandla.’ (Hubo. 18:29, 32) Singabona angani inhlupho zethu zinkulu kakhulu okokuthi ngeke senelise ukuqinisela kodwa uJehova uzasinika amandla okuthi siqinisele. Yikho nxa singathandaza kuye simcela ukuthi asincedise, sicabangisise ngakho konke asenzele khona njalo senze lokho asitshela khona singaqiniseka ukuthi uzasinika amandla kanye lamacebo azasinceda ukuthi silwisane lokukhathazeka.