KUTHIMWA-THIMWA kwakadari inga mutoro unorema uri mu mwoyo mwedu. (Mazwi Akangwara 12:25) Imwimwi muri kuhwisana no kuthimwa-thimwa mu upenyu hwenyu? Makambojizwa kuti amucakwanisizve kucungirira here? Kudari ndizvona zviri kumuitikira, amuripi mwega. Uzinji hwedu tingajizwa takaremba no kuthimwa-thimwa ngo mathangwe akasiyana-siyana. Inga muezaniso, vamweni vedu vanodikana kutaja ukama huri kuhwaja, vamweni vafihwa ngo mundhu wavanoda kuveni vamweni vari kutambujika ngo ngozi jinoitika jega. Asi zvicinyi zvingatibesera kuti tihwisane ushoni no kuthimwa-thimwa? *

Tingajija zvakawanda maningi ngo pamusoro po kuhwisana no kuthimwa-thimwa ngo kuvona muezaniso wa Mambo Dhavhidhi. Iyena wakasongana no zvineso zvizinji mu upenyu hwake, nguva jimweni vaitoda kumuuraya. (1 Samueli 17:34, 35; 18:10, 11) Zvicinyi zvakabesera Dhavhidhi kuti ahwisane ushoni no kuthimwa-thimwa? Tingatevejeresa kudini muezaniso wake?

Dhavhidhi wainga ecisongana no zvineso zvakawanda pa nguva yondhoyo. Amborangariranyi zvakamuitikira paainga ecitiza Mambo Sauri, avo vaida kumuuraya. Dhavhidhi no masoca ake povakahwirira kanyi kwavo vecivha ku hondo, ivona vakakhanda vavengi vavo vapera kutora zviro zvavo zvese, vopisa muzi javo no kutora mbhuri javo kuita varanda. Dhavhidhi wakaitenyi? “Davidi no vese vainga naye vakakhuwa, vocema mbhera kupera musoji.” Kuitira kuengejera kusuruvara kwainga na Dhavhidhi, masoca ake aida “kumufura ngo mapuwe.” (1 Samueli 30:1-6) Wari Dhavhidhi wainga waano zvineso zvitatu pa nguva yondhoyo, mbhuri yake yainga pa ngozi, waithya kuurawa ngo masoca ake nokutizve mambo Sauri wainga ecindomuteverera. Munokwanisa kurangarira kuthimwa-thimwa kwakava na Dhavhidhi!

Dhavhidhi wakaitenyi? Ngo kukasika iyena “wakawana simba ka Tenji Mwari wake.” Wakazviitisa kudini izvi? Itusu tinoziva kuti nguva jese Dhavhidhi waikumbira kubesehwa ndi Jehovha no kurangarira manera aakabesehwa ndiyena kareko. (1 Samueli 17:37; Nduyo 18:3, 7) Iyena wakavona kuti waidikana kupsaka ndhungamiriro ya Jehovha. Ngo kudaro, wakakumbira Jehovha kuti azive zvaaidikana kuita. Pakupera kukumbira ndhungamiriro ya Jehovha, iyena wakaita ciri cese ngo kukasika. Inga muviyo, Dhavhidhi no masoca ake vakakomborehwa ndi Jehovha, vokwanisa kuwana mbhuri javo no zviro zvese zvaingaya zvatohwa. (1 Samueli 30:7-9, 18, 19) Makwanisa kuvona zviro zvitatu zvakaitwa ndi Dhavhidhi? Iyena wakaita mukumbiro ecikumbira besero ra Jehovha, worangarira manera Jehovha wakamubesera kareko no kuita ciri cese mukuzwirana no ndhungamiriro ya Jehovha. Tingatevejeresa kudini Dhavhidhi? Ngativone njira ndhatu.

1. Mukumbiro. Pa nguva iri yese yatinojizwa tecithimwa-thimwa, tinodikana kuita mukumbiro tecikumbira Jehovha besero no uzivi. Kudari tikamuvhunja zvese zvinotiita kuti tithimwe-thimwe, tinozojizwa ushoni. Tingaita mukumbiro wakafupika kana mucinyararire, kudari mugariro wedu ucititendera pa nguva yondhoyo. Nguva jese jatinokumbira besero kuna Jehovha, tinokhombija kuti itusu tinomuthemba maningi, inga zvakaita Dhavhidhi paakati: “Tenji Mwari i buwe rangu, guta rakabiiwa rangu, anondisujunura ndi Mwari  wangu. Ndinotizira kwaari, buwe rangu.” (Nduyo 18:3) Kureva kuti mukumbiro unoshandadi kamare? Hambzaji imweni inodanwa Kahira inoshanda inga piyona yakati: “Pandinopera kuita mukumbiro, ndinova no runyararo. Mukumbiro unondibesera kurangarira inga manera Jehovha anorangarira no kuengejera kuthemba kwandinomuita.” Hina mukumbiro icipo cinovha kuna Jehovha cinotibesera kuti tihwisane no kuthimwa-thimwa.

2. Kurangarira. Pamunorangarira ngo zviro zvakaitika mu upenyu hwenyu, munokwanisa kuvona zvineso zvamakakwanisa kucungirira ngo besero ra Jehovha basi? Patinorangarira ngo manera Jehovha anotibesera no manera aakabesera vashandiri vake vokare, zvinotiita kuti tiwane runyararo no kuengejera kuthemba kwatinomuita. (Nduyo 18:18-20) Mukuru umweni anodanwa Joshuwa wakati: “Ndino rista yo mupinguro jo mukumbiro jangu. Izvi zvinondibesera kuceukija mukuvo wondakazvikumbira kuna Jehovha no kuvona kamare kuti iyena wakandipa zvandaida.” Hina, patinorangarira ngo manera anoda Jehovha kutibesera, tinowana simba ratinoda kuti tienderere mberi tecihwisana no kuthimwa-thimwa.

3. Itanyi ciri cese. Ticikato tatema civaringo co kuti ngozvapi zvatingaita pa mugariro uri wese, tinodikana kupsaka ndhungamiriro jinothembeka mu Soko ra Mwari. (Nduyo 19:8, 12) Vandhu vazinji vakazwisisa kuti pavanopsakisisa ngo pamusoro po vhesi iri yese, zvinovarerukira kuvona manera ovangaishandisa mu upenyu hwavo. Mukuru umweni anodanwa Jarodhi wakasanangura kudari: “Kupsakisisa kunondibesera kuvona zvese zvandingajija ngo vhesiyo no kuzwisisa zvinonga zvecindivhunja Jehovha. Izvi zvinondibesera kuti ndithembe kamare zvandinongaya ndeciverenga no kuita ciri cese mukuzwirana no ndhungamiriro yondhoyo.” Tikapsaka ndhungamiriro ya Jehovha mu Soko rake no kuishandisa, tinozokwanisa kuhwisana no kuthimwa-thimwa.

Dhavhidhi wakazwisisa kuti iyena abudirire pa kuhwisana no kuthimwa-thimwa, waidikana kubesehwa ndi Jehovha. Iyena waibongesera maningi ngo besero raaipuwa ndi Jehovha, zvomuita kuti anange kudari: “Ngo simba raanondipa Mwari ndinotora maguta. Mwari anondivangisa.” (Nduyo 18:30, 33) Itusu tingatovona kuti zvineso zvedu zvinonesa maningi, zvokuti azvitokwanisiki kucungirira. Asi ngo besero ra Jehovha tingakwanisa kucungirira zvineso zvakakura maningi. Hina kudari tikaita mukumbiro tecikumbira besero ra Jehovha, torangarira zvese zvaakatiitira no kuita ciri cese mukuzwirana no ndhungamiriro yake, tingathemba kuti iyena anozotipa simba no uzivi hwatinoda kuti tikwanise kuhwisana no kuthimwa-thimwa kwedu.