IIMPWIYU ohayi vulu okukala ya fa iinima iidhigu yi li komutima gwetu. (Omayel. 12:25) Mbela opu na oshikando shimwe wa li wa gwililwa po kiimpwiyu? Mbela opu na ethimbo limwe wa li wu uvite itoo vulu oku yi idhidhimikila? Ngele osho, hangoye awike. Oyendji yomutse otashi vulika tu na mboka hatu sile oshimpwiyu, twa silwa, twa dhengwa kiiponga yopaunshitwe, nenge tu li monkalo ndjoka ye tu lolodha palutu, pamadhiladhilo nopamaiyuvo. Oshike nduno tashi vulu oku tu kwathela tu ungaunge niimpwiyu yetu nomupondo? *

Otatu vulu okwiilonga oshindji kombinga yankene tu na okuungaunga niimpwiyu yetu, mokutala koshiholelwa shOmukwaniilwa David. Okwa li a adhika komaudhigu ogendji monkalamwenyo ye, niikando yimwe nokuli yamwe oya li ya hala oku mu dhipaga. (1 Sam. 17:34, 35; 18:10, 11) David okwa ungaunga ngiini niimpwiyu ye nomupondo? Ongiini tatu vulu oku mu holela?

Oshikando shimwe David okwa li moonkalo oondhigu dha yoolokathana. Pashiholelwa, opwa li pwa holoka onkalo yimwe manga ta fadhuka po Saul, ngono a li a hala oku mu dhipaga. Sho David naalumentu ye ya galuka kiita, oya li ya kumwa sho ya adha aatondi ya yaka po iinima yawo, ya fika po omagumbo gawo, noya kwata po aakulukadhi naanona yawo. David okwi inyenge ngiini? “David naantu ye oya tameke okulila noinaa hala okumwena sigo ya vulwa thiluthilu.” Shoka ishewe sha li sha ningitha David a kale a gwililwa po, aantu ye oya li “ya hala ye mu dhipage nomamanya.” (1 Sam. 30:1-6) Onkee ano, David okwa li moonkalo oondhigu ndatu. Uukwanegumbo we owa li wu li moshiponga, aantu ye oya li ya hala oku mu dhipaga, nOmukwaniilwa Saul okwa li e mu li mokashoko. Onkee ano, otashi vulika David a li a gwililwa po konkalo noonkondo.

David okwa ningi po shike? Nziya okwi “ikumikike omukumo gwOmuwa, Kalunga ke.” (OB-1954) Ngiini mbela? David okwa li e na omukalondjigilile gwokugalikana kuJehova e mu kwathele, nokwa li ha dhiladhila kunkene a li e mu kwathele monakuziwa. (1 Sam. 17:37; Eps. 18:2, 6) David okwa li a mono kutya okwa pumbwa okupula ekwatho kuJehova, onkee okwe Mu pula e mu lombwele shoka e na okuninga. Konima sho Jehova e mu lombwele shoka e na okuninga, okwa katuka meendelelo. Oshizemo osha li shini? Ye naantu ye oya li ya yambekwa kuJehova noya li ya vulu okuhupitha omaukwanegumbo gawo, niinima yawo oya li ye yi mono. (1 Sam. 30:7-9, 18, 19) Mbela owa ndhindhilika ngaa kutya David okwa li a ningi iinima itatu yini? Okwa li a galikana kuJehova e mu kwathele, okwa dhiladhila kunkene Jehova e mu kwathelele monakuziwa, nokwa katuka metsokumwe nomalombwelo ga Jehova. Ongiini tatu vulu okuholela David? Natu ka tale komikalo ndatu.

1. Galikana. Oshikando kehe tu na iimpwiyu, otatu vulu okugalikana kuJehova e tu kwathele noku tu pe uunongo. Otatu vulu oku mu lombwela uudhigu wetu auhe mboka tu na okupitila megalikano, noku mu mbumbulila omutima gwetu. Otatu vulu wo okugalikana paufupi meimweneneno, ngele oonkalo moka tu li otadhi tu pitike owala tu ninge ngaaka. Oshikando kehe tatu pula ekwatho kuJehova, ohatu ulike kutya otwe mu inekela, ngaashi David a li a popi a ti: “Omuwa oye omugameni gwandje; oye epopilongulu lyandje lya kola. Kalunga kandje oye omugameni gwandje, puye ondi li nawa.” (Eps. 18:2) Egalikano ohali kwathele ngaa? Eeno! Omumwameme gwedhina Kahlia ota ti: “Konima shampa nda galikana ohandi kala ndi uvite ombili. Egalikano oha li kwathele ndje ndi dhiladhile ngaashi Jehova, nokukala nde mu inekela  shi vulithe nale.” Egalikano omagano shili omawanawa ga za kuJehova ngoka hage tu kwathele uuna tu na iimpwiyu.

2. Dhiladhila konakuziwa. Ngele owa tala kwaashono sha ningwa monkalamwenyo yoye monakuziwa, mbela uudhigu wuni wa li wu na, ihe owa li wa vulu oku wu idhidhimikila molwashoka Jehova e ku kwathele? Uuna twa dhiladhila kunkene Jehova e tu kwathela nankene a kwathela aapiya ye monakuziwa, ohatu kala tu na ombili nohatu kala lela twe mu inekela. (Eps. 18:17-19) Omukuluntugongalo gwedhina Josua okwa ti: “Ondi na omusholondondo gwomagalikano gandje ngoka ga yamukulwa. Shino ohashi kwathele ndje ndi dhimbulukwe iikando mbyoka nda pula Jehova a ningile ndje oshinima shokondandalunde, e ta pe ndje naanaa shoka nda li nda pumbwa.” Uuna twa dhiladhila kwaashoka Jehova e tu ningila, ohashi tu ningitha lela tu kale tu na oonkondo dhokukondjitha omadhiladhilo ngoka hatu kala tu na uuna tu na iimpwiyu.

3. Katuka. Manga inaatu tokola kutya natu ninge shike monkalo yontumba, otwa pumbwa okukonakona oohapu dhaKalunga, oshoka omu na ewiliko li shi okwiinekelwa. (Eps. 19:7, 11) Oyendji ohaye shi mono kutya uuna ya ningi omapekapeko kombinga yenyolo lyontumba, ohaya vulu okuuva ko nawa kutya enyolo ndyono otali ya kwathele ngiini monkalamwenyo yawo. Omukuluntugongalo gwedhina Jarrod okwa ti: “Okuninga omapekapeko ohaku kwathele ndje ndi mone kutya ovelise yontumba otayi longo ndje naanaa shike, nohandi uvu ko nawa kutya Jehova ota lombwele ndje shike. Shika ohashi kwathele ndje ndi itaale lela shono tandi lesha, opo ndi katuke metsokumwe newiliko lye.” Ngele otwa kongo ewiliko lyaJehova momanyolo nokutula miilonga ewiliko ndyoka, ohashi kala oshipu tu kale tu na ombili notwa nyanyukwa uuna tu na iimpwiyu.

David okwa li e shi kutya opo u ungaunge niimpwiyu ye nomupondo, okwa pumbwa ekwatho lyaJehova. Okwa li a pandula Jehova sho e mu kwathele, shoka she mu inyengitha a popye ta ti: “Oto tsu ndje omukumo okuhomona aatondi yandje, noonkondo okusinda omaigameno gawo.” Okwa popi wo a ti kutya “oye Kalunga ngoka ta koleke ndje.” (2 Sam. 22:30; Eps. 18:32) Otashi vulika tu kale tu uvite kutya omaudhigu getu oga fa omaigameno nenge tu tye ekuma itaatu vulu oku li nuka, ihe kekwatho lyaJehova otatu vulu oku ga idhidhimikila. Ngele otwa kala hatu galikana kuJehova e tu kwathele, hatu dhiladhila kwaashono e tu ningila monakuziwa, nohatu katuka metsokumwe newiliko lye, otatu vulu okukala nuushili kutya ote ke tu pa oonkondo nuunongo mboka twa pumbwa, opo tu ungaunge niimpwiyu yetu nomupondo!