ELENGBI ti hakangɔ sɔngɔ bɛ na kumba ti kilo mɛ ando hɛ̃ bɛ zo pɛnɔ. (Mas. 12:25) Ngoi mɛndɛ̃, mɔ ndo ma nga asɔngɔ bɛ ti ngaso na ya dungɔ lɛ ngɛ̃́ tɛ mɔ? Ngoi mɛndɛ̃, mɔ ndo hũ ya, ta mɔ lengbi ti gbengɔ bɛ mɔ na ya ni ngoi yɔngɔrɔ ni ma? Se adu ngaso ko, hĩnga ya, ta kpale niko ndo si na mɔ kɔi ma. Azi gba so popo tɛ e ndo tengbi na akpale mɛ ndo hɛ̃ sɔngɔ bɛ, vundu nga na nzɛ̃ngɔ na lo ti aye mabere zangɔ zo kɔi ti ndasewa mɛ tɛrɛ lo ndo sɔ kpengbani, zo kpi ti ala, bere ala tengbi na pɛnɔ mɛ alo na ndo yengingɔ ti sese bere kpengba yá. Kanda aye mɛ alengbi ti zangɔ e ya, e nwɔ asɔngɔ bɛ tɛ e nɛ? *

Elengbi ti luangɔ awangɔ gba na omɛ aba se ti nwɔngɔ na sɔngɔ bɛ se du ya, e ba se lɛlo tɛ Gbia Davidi. Lo tengbindó na akpale ti pɛnɔ gba na ya dungɔ lɛ ngɛ̃́ tɛ lo, ngoi mɛndɛ̃ a ngbãndó yakere mɛ lo kpi kwá na lo ti akpengba kpale mɛndó lo tengbi na ni. (1 Sam. 17:34, 35; 18:10, 11) Ngasia la Davidi nwɔndó sɔngɔ bɛ tɛ lo nɛ? Ngasia la elengbi ti landangɔ se lɛlo tɛ lo nɛ?

Davidi tengbindó na akpale ti pɛnɔ gba na mbala kɔi. Zia e ba akpale mɛndó lo tengbi na ni na ngoi mɛndó lo ndo kpɛ Gbia Saulo mɛndó ndo gi lége ti hongɔ lo. Lá kɔi, na ngoi mɛndó Davidi ná azi tɛ lo alo ka lɛ to adiri ko, ala tãndó awa kula tɛ ala anzĩ aye ti ya da tɛ la zu, azɔlɔ ada tɛ la, wa ala gbɔ̃nɔ nga awoti (aweti) la ná ayati la agwe na ni. Ye mɛndó Davidi li nɛ? “Davidi ná azi tɛ lo atondó to kpengbani tee ka ngunu awɛ tɛrɛ la.” Hãngɔ ni zingɔ asoda tɛ lo mɛndó lo ndo kpã bɛ lo na ndo ala “apandó ya, ani bolo lo na tɛ̃nɛ” ye mɛndó abakisa pɛnɔ na ndo pɛnɔ tɛ lo. (1 Sam. 30:1-6) Na ngoi niko, Davidi tengbindó na akpale ti pɛnɔ taa na mbala kɔi: Ndasewa tɛ lo na ya kaka, asoda tɛ lo ayendó hongɔ lo, wa Gbia Saulo dɛ bondó gi lége ti hongɔ lo. Da bɛ mɔ na sɔngɔ bɛ mɛndó Davidi lengbi ti dungɔ na ni!

Ye mɛndó Davidi li na gesi nɛ? Ngbangɔ tɛnɛ ya, Davidi “luandó ngunu na lége tɛ Yehova.” Lo lindó ni ngasia? Davidi mɛsɛnɛndó na lingɔ sambela hɛ̃ Yehova ti nɛngɔ ya, lo za lo, wa lo ndo gbɔ̃ ngandó li lo na ndo se mɛndó Yehova za lo na ngoi ti uzu. (1 Sam. 17:37; Nz. 18:2, 6) Davidi hĩngandó ya, ayɔ ya, lo hũnda Yehova ti nɛngɔ ya, lo hĩnga ye mɛ lo lengbi ti lingɔ, na lo ni la lo hũndandó Yehova. Wa ngoi mɛndó Yehova pa hɛ̃ lo aye mɛ lo lengbi ti lingɔ ko, lo lindó ni mbala kɔi. Ni lindó ya, Yehova sulu Davidi ná azi tɛ lo, wa ala dirindó lɔ aye tɛ la mɛndó awa kula anzĩ ni, wa ala zindó azi ti ndasewa tɛ la mɛ agbɔ̃nɔ la. (1 Sam. 30:7-9, 18, 19) Mɔ hũ aye Taa mɛndó Davidi li? Ti uzu, lo lindó sambela hɛ̃ Yehova ya, lo za ni. Ti sɛ, lo gbɔ̃ndó li lo na ndo aye mɛndó Yehova li tɛrɛ lo gã, wa ti Taa lo lindó aye na mangbi na wangɔ tɛ Yehova. Ngasia la elengbi ti landangɔ se lɛlo tɛ Davidi nɛ? Zia e ba se mɛ elengbi ti lingɔ ni na ya kpale taa.

1. Li sambela. Ngoi zu ko la mɔ ma sɔngɔ bɛ ko, li sambela hɛ̃ Yehova ya, lo hɛ̃ mɔ ndara. Zi bɛ mɔ hɛ̃ lo, wa kambisa hɛ̃ lo na lége ti sambela na ya ngoi yɔngɔrɔ ni asɔngɔ bɛ nga na akpale zu mɛ ka bɛ mɔ. Bere mɔ lengbi nga ti lingɔ sambela ti ndunu ni ka bɛ mɔ hɛ̃ lo, se du ya, ta kɔdɛ ti mɔ lingɔ sambela ti ngoi yɔngɔrɔ ni adu da ma. Ngoi zu ko la mɔ ndo gi ya, Yehova za mɔ ko, mɔ ndo fa ya, mɔ ndo kpã bɛ mɔ ka tɛ lo gba nga ma se mɛndó Davidi li na ni, lo pandó ya: “Yehova du tɛ̃nɛ tɛ mbi, kpengba ndo ti batangɔ na tɛrɛ mbi nga Wa songɔ mbi na kwá. Nzapa tɛ mbi adu kota  tɛ̃nɛ mɛ mbi lengbi ti kpɛngɔ batangɔ tɛrɛ mbi ka da.” (Nz. 18:2) Lingɔ sambela, ando hɛ̃ nvɛ̃ni zo nzɔ̃ kpale? Nyita wali Kahlia mɛ lo du wa sungɔ lége atɛnɛ ya: “Na pɛ lingɔ sambela ko, mbi ndo ma siriri ti bɛ. Lingɔ sambela ndo za mbi ya, mbi ba akpale nga ma se mɛ Yehova ndo ba na ni, wa ando li nga ya, mbi kpã bɛ mbi ndo lo fãni mɛndɛ̃ gba.” Sambela adu ye ti ngbondoni mɛ Yehova hɛ̃ e ti nɛngɔ ya, aza e, e nwɔ sɔngɔ bɛ tɛ e.

2. Da bɛ mɔ na se mɛndó Yehova za na mɔ. Se mɔ gbɔ̃ li mɔ na ndo dungɔ lɛ ngɛ̃́ tɛ mɔ, mɔ lengbi ti dangɔ bɛ mɔ na kpengba kpale kɔi mɛndó Yehova za mɔ ya, mɔ gbe bɛ mɔ na lo ni? Se mɔ da bɛ mɔ na se mɛndó Yehova za na mɔ bere na se mɛndó lo za na awa kwa tɛ lo mɛndɛ̃ ko, ni na hɛ̃ngɔ mɔ ngunu, wa mɔ nga na kpãngɔ bɛ mɔ fãni mɛndɛ̃ gba na ndo lo. (Nz. 18:17-19) Biazo kɔi mɛ ili lo la Joshua atɛnɛ ya: “Mbi na listɛ ti asambela mɛndó Yehova hɛ̃ mbi gbinya ni. Ni ndo za mbi ya, mbi da bɛ mbi na ngoi mɛndó mbi li sambela hɛ̃ Yehova ya, lo za mbi na ye kɔi wa lo hɛ̃ndó mbi aye mɛndó mbi na gwɛ̃ ni.” Ti biani ko, na ngoi mɛ e ndo gbɔ̃ li e na ndo aye zu mɛndó Yehova li na lo tɛ e ko, e ndo lua ngunu mɛndɛ̃ ti fãnani ti nɛngɔ ya, e nwɔ na sɔngɔ bɛ tɛ e.

3. Li aye na mangbi na wangɔ tɛ Yehova. Uzu ti nɛngɔ ya, mɔ mu ekateli ti lingɔ ye kɔi ngaso na ngoi mɛ mɔ na ya pɛnɔ ko, gi uzu awangɔ ti ya Tɛnɛ tɛ Nzapa. (Nz. 19:7, 11) Azi gba atɛnɛ ya, na ngoi mɛ ani ndo li bolukiluki na ndo vɛrse kɔi ti ya Ngbangɔ ko, ani ndo hĩnga nzɔ̃ni nvɛ̃ni se mɛ vɛrse niko aba akpale ti ya dungɔ lɛ ngɛ̃́ tɛ ani. Biazo kɔi mɛ ili lo la Jarrod atɛnɛ ya: “Lingɔ bolukiluki ndo za mbi ya, mbi hĩnga na seni nvɛ̃ni ye mɛ Yehova ye ya mbi li. Vɛrse niko ndo gbɔ̃ bɛ mbi nvɛ̃ni wa ni ndo to nga mbi ya, mbi li ye na mangbi na aye mɛ mbi manda.” Na ngoi mɛ e ndo gi litambwisi tɛ Yehova na lége ti Ngbangɔ, wa e ndo landa nga ni ko, ando za e ya, e lua dengɔ bɛ wa e nwɔ nga sɔngɔ bɛ tɛ e.

Davidi gbɔ̃ndó ndani ya, ti nɛngɔ ya, lo nwɔ sɔngɔ bɛ ko, ayɔ ya, Yehova za lo. Lo ndó na dengɔ bɛ gba na ndenge mɛndó Yehova ndo za na lo, na lo ni la, lo pandó ya: “Na lége ti ngunu tɛ Yehova, mbi lengbi ti hulungɔ gbágbá [efelo]. Nzapa ti mbilimbili la du zo mɛ ndo yu mbi na ngunu nga ma se mɛ ando yu zo na bɔngɔ.” (Nz. 18:29, 32) Ngoi mɛndɛ̃ akpengba kpale mɛndɛ̃ mɛ e ndo tengbi na ni ko, ni ndo du mabere gbágbá kɔi mɛ alo so gbɛlɛ e, ta kɔdɛ ti e ɔngɔ ni da ma. Kanda na lége ti lisalisi tɛ Yehova, elengbi ti nwɔngɔ akpengba kpale zu mɛ nga ma gbágbá mɛ alo so gbɛlɛ e! Biani, se e li sambela hɛ̃ Yehova ya lo za e, se e gbɔ̃ li e na ndo aye mɛndó lo li tɛrɛ e, wa e li aye na mangbi na wangɔ tɛ lo ko, elengbi ti yengɔ na bɛ e kɔi ya, lo na hɛ̃ngɔ e ngunu ná ndara mɛ alengbi ti zangɔ e ya, e nwɔ asɔngɔ bɛ tɛ e!