WUUKHUWA onanwerya okhala ntoko echu yoohokola eri mmurimani mwahu. (Masi. 12:25) Apwanne mohintoko ohooxeya nthowa na okhala awuukhuwa? Apwanne mohintoko wiisoona wi hanwerya ovilela ni wuukhuwa? Yaarimwi eri hiiha, hamuri mukhatiinyu. Ancipale a hiyo ninnakhala awuukhuwa naari awiiniwa murima ni mathowa oohiyanahiyana. Ntoko yootakiherya, akinaaku annaakhapelela amusi aya ari awiiceliwa, akinaaku ahaayeleela oosiveliwaaya mookhwani nave akina annahoolela ipahu sa maphacuwelo. Nyenya tiheeni enahaala onikhaviherya vaavaa nnakhalaahu awuukhuwa? *

Nnanwerya ohuserya sincipale vooloca sa mukhalelo wa ovootha wuukhuwa moorweela wa othokororya yootakiherya ya Mwene Tavite. Mu ikwaha sincipale owo aanahoolela mikhalelo soovila mu okumi awe, nave ophiyerya wi mu ilukuluku ikina aahala vakhaani wiiphiwa. (1 Sam. 17:34, 35; 18:10, 11) Tiheeni yaamukhaviherya Tavite ovilela vaavaa aakhaleiye awuukhuwa? Nni niwerye hai ochariha yootakiherya awe?

Tavite aahihoolela makacamiho mancipale mu elukuluku emohamoha. Ntoko yootakiherya, muupuwele yeeyo yaamweerenle Tavite vaavaa Mwene Sawuli aachuneiye omwiipha. Vaavaa Tavite ni anakhoco awe yaakookenlaaya owaani o Sikilaki, yaahiphwanya wi amwiicani aya yaahikuxa sookhalano saya, yaahimwarya ipa saya nave yaahikuxa imusi saya ekerihaka wookapuroni. Tavite aakhulenle hai? “Tavite ni achu aareiyeno yaahinla, ikuru saamalela.” Voocharela Tavite aahitepa wiiniwa murima nthowa nawi anakhoco awe “yaakhwela omvonya maluku.” (1 Sam. 30:1-6) Tavite aahikhalano makacamiho mararu matokotoko mu elukuluku emohamoha. Emusi awe yaari va yawoopiha, anakhoco awe yaanachuna omvonya maluku nave nlelo Mwene Sawuli aanatitelela omwaavyavya. Nkaanyiheryani mukhalelo Tavite aareiye awuukhuwa!

Tiheeni Tavite eenreiye voocharela? Mwawaakuveya owo “aahilipiherya ni Apwiya Muluku awe.” Ikwaha kavi Tavite eenreiyeno yeela? Ninnasuwela wi Tavite aanavekela wa Yehova wi amukhaviherye ni wuupuwelela mukhalelo owo aamukhavihenreiye khalai. (1 Sam. 17:37; Sal. 18:2, 6) Tavite aahoona ochuneya waya waavya ohoolela wa Yehova, mwa yeeyo owo aamukoha Yehova echu aaphwaneleiye weera. Tavite amaanle waakhela ohoolela wa Yehova, owo aahichariha mwawaakuveya. Ntoko yookhumelela, yene ni achu awe yaahireelihiwa ni Yehova nave yaahiwerya woopola sookhalano saya vamoha ni imusi saya. (1 Sam. 30:7-9, 18, 19, BNM) Apwanne mohoona ichu raru Tavite eenreiye? Owo aahivekela wa Yehova wi amukhaviherye, aahuupuwelela mukhalelo Yehova aamukhavihenreiye muculi nave aahichariha ohoolela wa Yehova. Nni nimutakiherye hai Tavite? Muthokororye mikhalelo miraru.

1. Ovekela. Ilukuluku soothene vaavaa nnakhalaahu awuukhuwa, nnaphwanela ovekela wa Yehova wi anikhaviherye ni onivaha miruku. Wakhala wi noomuleela Yehova echu eri yoothene enanuukhula, eyo enanwerya onikhaviherya okhala phaama. Naari mwawiiwanana ni mikhalelo sahu mu elukuluku yeeyo nnanwerya ovekela mwawaakuveya ni moomaaleleya. Ilukuluku soothene nnamvekaahu Yehova nikhaviheryo, ninnooniherya wi ninnamuroromela yoowo hiiha ntoko Tavite eenreiye. Owo aaloca: “Apwiya ti mwaako aka, nipuro naka  noolipa, tanakaakiha. Muluku aka ti nikhuku weiwo kiniipithaakawo.” (Sal. 18:2) Apwanne nivekelo ninnaphara muteko chiryene? Piyoneera mmoha awiichaniwa Kahlia ooloca: “Kimanle ovekela, kinnakhalano murecele. Ovekela onnakikhaviherya wuupuwela hiihaa ntoko Yehova, nave kinnamuroromela yoowo moopwahaxa.” Chiryene, nivekelo yoovaha yasisapo yoorweela wa Yehova yeeyo enanikhaviherya ovilela ni wuukhuwa.

2. Wuupuwelela. Vaavaa munuupuwelelaanyu ichu seiho seeren’ye mu okumi anyu, apwanne munnawerya wuupuwela makacamiho yaawo nwenryaanyu ovilela pahiru nthowa na nikhaviheryo na Yehova? Vaavaa nnuupuwelelaahu mukhalelo Yehova onikhavihenryeiye hiiha ntoko aakhavihenryeiye alapeli awe akhalai ninnakhalano ikuru nave nroromelo nahu mwa yoowo ninnakhala noolipa. (Sal. 18:17-19) Mutokweene awiichaniwa Joshua ooloca: “Kookhalano elista ya mavekelo aka yaakhuliwe. Ela ennakikhaviherya wuupuwelela ilukuluku seiho kaamvenkaaka Yehova echu yooluluwanya nave akivaha hiiha ntoko kaachunelaaka.” Chiryene vaavaa ilukuluku soothene nnuupuwelaahu mukhalelo Yehova onikhavihenryeiye khalai, ninnakhalano ikuru seiho nnachunaahu wi niwanihe ni wuukhuwa.

3. Weeravo echu. Nihaakumve olakelela echu ya weera mmukhalelo vyakala, nnaphwanela waavya Mmasu a Muluku ohoolela woophwanelela ni woororomeleya. (Sal. 19:7, 11) Ancipale aasuwela wi vaavaa anapakaaya otholathola eversikulu yavameekhaaya, annawerya wiiwexexa phaama ti mwawiihai eversikulu eyo enaphariheleyaaya mu okumi aya. Mutokweene mmoha awiichaniwa Jarrod ooloca: “Opaka otholathola onnakikhaviherya osuwela sincipale vooloca sa eversikulu nave kinniiwexexa yeeyo Yehova onakileeleiye. Eyo ennakikhaviherya chiryene weemererya yeeyo kinaalakhanyaaka ni weeravo echu mwawiiwanana ni ohoolela wawe.” Vaavaa nnaavyaahu ohoolela wa Yehova mu Soorempwa nave nnachariha, onahaala okhala wookhweya wa hiyaano ophwanya murecele ni ohakalala vaavaa nnakhalaahu awuukhuwa.

Tavite aahiiwexexa wi aariki avilele ni wuukhuwa, waanachuneya nikhaviheryo na Yehova. Owo aanamuthamalela vancipale Yehova wa nthowa na nikhaviheryo nenno aamvaheiye. Ophiyerya wi aaloca: “Ni ikuru sanyu kineeraaka kivolowe mwiipooma saya. Ti yoowo, Muluku, onakilipiha.” (Sal. 18:29, 32) Nnanwerya woona wi makacamiho ahu toovilaxa nave ti woohiweryeya omaliha naari ovilela. Nyenya nnikhaviheryo na Yehova, nnanwerya ovilela nikacamiho noovila nri noothene! Chiryene, vaavaa nnavekelaahu wa Yehova wi anikhaviherye, vaavaa nnuupuwelelaahu ichu soothene oneerenleiye ni ochariha ohoolela wawe, nnanwerya ororomela wi owo onahaala onivaha ikuru ni miruku nnachunaahu wi niwerye ovilela ni wuukhuwa!