FAʼAOMBÖ dödö andrö tola muʼamaedolagö ia simane noro sebua bakha ba dödöda. (Amd. 12:25) Hadia no irai tefakao ndraʼugö börö waʼaombö dödö sebua ba waʼauriu? Hadia no irai aetu wanötönau börö waʼaombö dödöu? Na noa, böi olifu ndraʼugö wa tenga ha yaʼugö zorasoi daʼö. Ato ba gotaluada zorasoi faʼamarase, faʼaombö dödö, ba faʼafawuka gera-era börö zalua ba waʼaurida. Duma-dumania, tarorogö nösi nomoda sofökhö, mate niha niʼomasiʼöda, mazui göna ita bencana alam. Hizaʼi, hadia zanolo yaʼita enaʼö tola mofozu ita ba wanaögö faʼaombö dödö? a

Oya zi tola tahalö famahaʼö moroi ba waö-waö waʼauri Razo Dawido. Oya sibai gabula dödö salua ba waʼaurinia, ba no hauga kali arakhagö teʼala waʼaurinia. (1 Sa. 17:34, 35; 18:10, 11) Hadia zanolo Dawido irege mofozu ia wanaögö faʼaombö dödö salua khönia? Hewisa woloʼöda duma-dumania?

Itaria fendronga waʼalua gabula dödö khö Dawido. Duma-dumania, angeragö hadia zalua khönia me igohi-gohi ia si faʼudu khönia, yaʼia daʼö Razo Saulo. Me awena mangawuli Dawido hegöi ono buania moroi ba wasuwöta, tokea sibai ira me no ahori laʼoloiʼö gama-gamara ira si faʼudu khöra, latunu fefu nomora, ba laʼoloiʼö nösi nomora. Me laʼila daʼö, ”abölö-bölö sibai weʼe Dawido awö ndraono buania irege tebai saʼae meʼe ira”. Monönö nasa waʼabu dödö Dawido börö me ”edöna latebu ia kara” ira niha si no ifaduhusi tödö. (1 Sa. 30:1-6) Ba daʼa taʼila wa so tölu ngawalö gabula dödö sebua si fendronga alua ba waʼauri Dawido: No laʼoloiʼö nösi nomonia, ataʼu ia na labunu ia iraono buania, ba igohi-gohi ia Razo Saulo. Khalaigö waʼaombö dödö salua khö Dawido!

Hadia nifalua Dawido aefa daʼö? Iʼanemaiʼö ”iʼabölöʼö ia Dawido moroi ba wanolo Yehowa Lowalanginia”. Hewisa wamaluania daʼö? Mangandrö fanolo Dawido khö Yehowa ba iʼangerönusi hewisa wanolo Yehowa yaʼia ba zilalö. (1 Sa. 17:37; Si. 18:2, 6) Aboto ba dödö Dawido wa moguna iʼandrö wanuturu lala moroi khö Yehowa. Börö daʼö, manofu ia khö Yehowa enaʼö iʼila hadia zinangea ifalua. Me no itema wanuturu lala moroi khö Yehowa, iʼanemaiʼö ifalua. Buania, ifahowuʼö Dawido awö ndraono buania Yehowa ba ifuli mangawuli khöra nösi nomora hegöi okhötara si no larabu. (1 Sa. 30:7-9, 18, 19) Hadia önehegö zi tölu ngawalö nifalua Dawido? Mangandrö ia khö Yehowa, iʼangerönusi hewisa wanolo Yehowa yaʼia ba zilalö, ba ifalua wanuturu lala nibeʼe Yehowa. Hewisa woloʼöda duma-duma Dawido? Angeragö zi tölu ngawalö andre.

1. Fangandrö. Na alua khöda waʼaombö dödö, moguna taʼandrö wanolo hegöi faʼatua-tua khö Yehowa. Tola tarasoi waʼahono dödö na tafaehagö khönia nösi dödöda ba wangandrö. Mazui na lö tefaudu ginötönia, tola taʼadogoiʼö wangandröda bakha ba dödö. Ero taʼandrö wanolo khö Yehowa, no taforomaʼö wa tafaduhusi tödö ia simane nifalua Dawido, me imane, ”Hili kara khögu Yehowa ba baʼa-baʼagu, yaʼia Zangorifi yaʼo. Gowe saro khögu Lowalangigu, sawatögu ba wolumöʼö yaʼo.” (Si. 18:2) Hadia sindruhu-ndruhu mofaʼabölö wangandrö? Imane talifusöda ira alawe perintis sotöi Kahlia, ”Urasoi waʼahono  dödö me no aefa mangandrö ndraʼo. Fangandrö zanolo yaʼo enaʼö tefaudu wangera-ngeragu ba lala wangera-ngera Yehowa, ba itugu faduhu dödögu khönia.” Tola möi fanoloda wangandrö na tarasoi waʼaombö dödö. Sindruhu wa no buala sebua böli moroi khö Yehowa wangandrö!

2. Foʼangerönusi. Hadia no irai alua khöu wanandraigö ba tola ötaögö daʼö börö wanolo moroi khö Yehowa? Na taʼangerönusi hewisa wanolo Yehowa yaʼita hegöi ono mbanuania me götö föna, tobali famarou dödöda daʼö ba itugu faduhu dödöda khönia. (Si. 18:17-19) Imane si samösa satua sokubaloi sotöi Joshua, ”No usura hadia manö zi tobali fanema li moroi ba wangandrögu. Daʼa zanolo yaʼo enaʼö ifuli itörö tödögu wa no asese uzara-zara wanutunö hadia gangandröwagu, ba sindruhu-ndruhu ibeʼe khögu hadia niʼandrögu khönia.” Börö daʼö, na taʼangerönusi hewisa wanolo Yehowa yaʼita ba zilalö, daʼö zi tobali fanolo khöda ba wanaögö faʼaombö dödö.

3. Famalua. Fatua lö tahalö gangetula, moguna taʼalui wanuturu lala si tola tafaduhusi tödö moroi ba Daromali Lowalangi. (Si. 19:7, 11) Me lafalua riset ba zi sambua ayati Zura Niʼamoniʼö, ato zorasoi wa itugu aboto ba dödöra hewisa wamaluara ayati daʼö ba waʼaurira. Imane si samösa satua sokubaloi sotöi Jarrod, ”Na ufalua riset, itugu oya wamahaʼö si tola uhalö moroi ba zi sambua ayati ba uʼila hadia zomasi Yehowa enaʼö ufalua. Tofakha sibai daʼö ba dödögu irege terou dödögu wamalua fanuturu lala nibeʼenia.” Na taʼalui wanuturu lala moroi khö Yehowa ba Zura Niʼamoniʼö ba tafalua daʼö ba waʼaurida, tola möi fanoloda daʼö ba wanaögö faʼaombö dödö.

Aboto ba dödö Dawido wa moguna khönia wanolo moroi khö Yehowa enaʼö mofozu ia ba wanaögö faʼaombö dödö. Iʼandrö sibai saohagölö wanolo si otarai Yehowa irege imane, ”Börö waʼabölö si otarai Lowalangi, tola usawö göli. Lowalangi sindruhu zangabölöʼö yaʼo.” (Si. 18:29, 32) Tola manö tarasoi wa fanandraigö salua khöda andrö hulö göli si tebai musuʼa faʼalawa. Hizaʼi, börö wanolo moroi khö Yehowa, tola tataögö gabula dödö si no amaedola göli salawa! Na mangandrö fanolo ita khö Yehowa, taʼangerönusi zi no ifalua khöda ba zilalö, ba tafalua wanuturu lala nibeʼenia, tola faduhu dödöda wa hasambalö ibeʼe khöda waʼabölö ba faʼatua-tua enaʼö mofozu ita ba wanaögö faʼaombö dödö!