Ukutshwenyeka kungaba njengomthwalo obudisi ehliziywenakho. (IzA. 12:25) Kghani khekwaba nesikhathi la khewatshwenyeka khona khulu epilwenakho? Kghani ukhewezwa ngasuthi indlela ozizwa ngayo angekhe wakghona ukuyikghodlhelelela? Nangabe kunjalo, awusiwedwa. Abanengi bethu kungenzeka khesaba batlhogomeli, sahlongakalelwa babantu esibathandako, sehlakalelwa ziinhlekelele zemvelo namkha saqalana nobunye ubujamo obuqeda amandla emzimbeni, emkhumbulweni nendleleni esizizwa ngayo. Khuyini engasisiza siqalane ngokuphumelelako nokutshwenyeka? *

Kunengi esingakufunda malungana nokuthi singaqalana njani nokutshwenyeka esibonelweni seKosi uDavida. Waqalana neentjhijilo ezinengi ekuphileni kwakhe, wapheze wafa ngezinye iinkhathi. (1 Sam. 17:34, 35; 18:10, 11) UDavida waqalana njani ngokuphumelelako nokutshwenyeka? Singasilingisa njani isibonelo sakhe?

UDavida waqalana neentjhijilo ezinengi ngesikhathi sinye. Ngokwesibonelo, akhesicoce ngobujamo aqalana nabo lokha nakabalekela iKosi uSawula, ebeyifuna ukumbulala. Ngesikhathi uDavida namadoda ebekakhamba nawo babuya epini, kwabathusa khulu ukufumana ukuthi amanababo abathathele izinto zabo, atjhisa imizabo begodu athumba nemindenabo. Wasabela njani uDavida? “UDavida namadoda agade akhamba nawo bakhihla isililo esikhulu bebabibitheka.” Okhunye okwamenza watshwenyeka khulu, kukuthi amadoda ebekawathembileko la ‘bewakhuluma ngokumkhanda ngamatje.’ (1 Sam. 30:1-6) Nje uDavida besekaqalene neentjhijilo ezintathu ngesikhathi sinye: Umndenakhe bewusengozini, bekasaba ukuthi amadoda akhamba nawo afuna ukumbulala ngapha neKosi uSawula beyimgijimisa. Akhucabange ngokugandeleleka uDavida ebekaqalene nakho!

Khuyini uDavida ayenzako? Msinyana “uDavida wafunyana amandla kuSomnini uZimakhe.” Wakwenza njani lokho? UDavida wakwenza umukghwa ukuthandaza kuJehova abawe isizo nokucabanga ngokuthi wamsiza njani esikhathini esidlulileko. (1 Sam. 17:37; Rhu. 18:3, 7) UDavida wabona itlhogeko yokufuna isinqophiso sakaJehova, yeke wabuza uJehova ukuthi khuyini ekufuze ayenze. Ngemva kokuthi uDavida afumene isinqophiso sakaJehova, akhenge ariyade. Umphumela kwaba kukuthi yena namadoda ebekakhamba nawo babusiswa nguJehova begodu bafumana imindenabo nezinto zabo. (1 Sam. 30:7-9, 18, 19) Kghani uwatjhejile amagadango amathathu uDavida awathathako? Wathandaza wabawa isizo lakaJehova, wacabanga ngezinto uJehova amenzela zona phambilini begodu wathatha amagadango ukwenza ngokwesinqophiso sakaJehova. Singamlingisa njani uDavida? Akhesicoce ngeendlela ezintathu.

1. Thandaza. Ngaso soke isikhathi nasithoma ukutshwenyeka, singathandaza kuJehova sibawe isizo nokuhlakanipha. Singazithula umthwalo ngokuthi sithandaze ngokubuyelelweko simthululele isifuba namkha singenza umthandazo omfitjhani buthule nangabe ngilokho ubujamo obusivumela ukuthi sikwenze ngesikhatheso. Ngaso soke isikhathi nasibawa isizo lakaJehova, siba nethemba elinjengelakaDavida: “USomnini ulidwala lami,  isiphephelo nomsindisami. UZimami ulirholo lami engiphephela kilo; usihlangu sami namandla wesindiswami.” (Rhu. 18:3) Kghani umthandazo uyasiza? Udade oliphayona ibizo lakhe nguKahlia uthi: “Ngemva kokuthandaza, ngizizwa nginokuthula. Umthandazo ungisiza ngilungise umkhumbulwami bona ukhambisane nentando kaJehova bengimthembe khulu.” Kwamambala, umthandazo uyindlela enamandla uJehova asisiza ngayo siqalane nokutshwenyeka.

2. Cabangisisa. Nawucabanga ngalokho okwenzeka ekuphileni kwakho, kghani kuneentjhijilo owakghona ukuzikghodlhelelela ngebanga lokusizwa nguJehova? Nasicabanga ngendlela uJehova asisekele ngayo kunye neenceku zakhe zekadeni, sifumana amandla besimthemba okukhulu. (Rhu. 18:18-20) Umdala ibizo lakhe nguJoshua uthi, “Nginerhelo lemithandazo uJehova aliphendulileko. Lokhu kungisize bona ngikhumbule isikhathi engabawa ngaso uJehova into ethileko ngokunqophileko begodu wanginikela yona.” Nasicabanga ngalokho uJehova asenzele khona, amandlethu ayavuseleleka begodu sikghona ukulwisana nokutshwenyeka.

3. Thatha amagadango. Ngaphambi kokuqunta bona yini okufuze siyenze ebujamweni obuthileko, kufuze sivule iliZwi lakaZimu bona sifumane isinqophiso esingasithemba. (Rhu. 19:8, 12) Abanengi bafumene ukuthi nabenza irhubhululo ngomtlolo othileko, bazwisisa ngcono bona usebenza njani ekuphileni kwabo. Umdala ibizo lakhe nguJarrod uthi: “Ukwenza irhubhululo kungisiza ngibone zoke iingcenye zomtlolo begodu ngizwisise nalokho uJehova angitjela khona. Lokhu kwehlela ehliziywenami ukwenzela bona ngikghone ukulandela isinqophiso sakhe.” Nasifuna isinqophiso sakaJehova emiTlolweni begodu senze ngokuvumelana naso, sikghona ukuqalana kuhle nokutshwenyeka.

UDavida bekazwisisa ukuthi nakazakuqalana ngokuphumelelako nokutshwenyeka, bekatlhoga isizo lakaJehova. Wakuthabela khulu ukusekelwa nguJehova kangangobana wathi: “NgoZimami ngingeqa umthangala wedorobho. NguZimu ongihlomisa ngamandla.” (Rhu. 18:30, 33 [29, 32] NW) Singabona ngasuthi iintjhijilo esiqalene nazo zinjengemithangala engeqeki kodwana ngesizo lakaJehova, singeqa nanyana ngiziphi iintjhijilo ezinjengeboda! Nasithandaza kuJehova sibawa isizo, sicabangisisa ngakho koke asenzele khona begodu senze ngokuvumelana nesinqophiso sakhe, singaqiniseka bona uzosipha amandla nokuhlakanipha esikutlhogako ukuthi siqalane ngokuphumelelako nokutshwenyeka!