OTYIHO tyipondola okukala omulemo umunene kuonthwe. (Pro. 12:25) Okuti nthiki umwe weihamenenwa-le mokonda yokuakala notyiho? Okuti nthiki umwe wakaleliale ngatyina wahanda okututana mokonda yotyiho? Ine wakalele-ale ngotyo, haveko vala. Ovanthu ovanyingi vena otyiho mokonda yovipuka ovinyingi. Mongeleka, vamwe vakala notyiho tyina vamanyimisa umwe mombunga, natyina vavelesa umwe vehole, natyina vamamonekelwa novihuna. Mahi oityi matyitukuatesako tyina tuna otyiho? a

Onthwe tupondola okuluisa otyiho mokulilongesila ko Hamba Daviti. Daviti wakalele novitateka ovinyingi iya atee umwe pamwe ankho uhupila kononkhia. (1 Sam. 17:34, 35; 18:10, 11) Oityi tyakuatesileko Daviti okuluisa otyiho? Oñgeni tupondola okumuhetekela?

Daviti wakalele novitateka ovinyingi momuvo wike vala. Nkhele soka kuetyi tyemumonekelele, etyi ekahi nokuenda nkholo Ohamba Saulu ankho uhanda okumuipaa. Etyi Daviti nomafualali ae vatunda kovilwa, avasoyo unene etyi vanoñgonoka okuti onondyale mbavo mbapunda ovityuma viavo ambuyokopo omaumbo avo, tupu ambundyindipo onombunga mbavo. Oñgeni Daviti akalele? “Daviti nomafualali ae, avahimbika okulila unene, atee vehetyivilile vali okulila.” Pahe tyayawisile koluihamo lwae otyetyi ovalume ankho enavo vekahi nokumupopila okuti ‘mavemuiipa nomamanya.’ (1 Sam. 30:1-6) Daviti pahe ankho una ovitateka vitatu momuvo wike vala: Tyotete ombunga yae yatyinduapo, tyavali ovalume ankho enavo vahanda okumuipaa iya tyatatu Ohamba Saulu nae ankho tupu uhanda okumuipaa. Mokutyisoka, Daviti wakalele notyiho otyinene!

Oityi pahe Daviti alingile? Liwa-liwa Daviti “apamena mu Siovaa Huku yae.” Oñgeni etyilingile? Welikuambelele ku Siovaa emukuateseko, asoko oñgeni ehole-ale okumukuatesako. (1 Sam. 17:37; Sal. 18:2, 6) Daviti wetyimuene okuti ankho wesukisa okuhongolelwa na Siovaa, mokonda yotyo apulu etyi esukisa okulinga. Etyi Daviti apopilwa etyi ena okulinga, ngatyo umwe alinga. Oityi tyatundililako? Daviti nomafualali ae avayambwa na Siovaa avetyivili okuyovola ovipuka viavo nonombunga mbavo. (1 Sam. 30:7-9, 18, 19) Wamona ovipuka vitatu Daviti alingile? Tyotete welikuambelele ku Siovaa emukuateseko, tyavali wasokele oñgeni Siovaa emukuatesileko kohale, iya tyatatu wetavelele etyi Siovaa emupopila. Oñgeni matuhetekela Daviti? Tutalei ovipuka vitatu.

1. Likuambela. Apeho tyina wamakala notyiho likuambela ku Siovaa, omuiti ekuavele ounongo. Pokulikuambela mupopila umwe atyiho tyili momutima wove. Ine apa uli katyitavela okupopila peulu, upondola okulikuambela vala momutima. Apeho tyina tuita Siovaa etukuateseko, tukahi nokupopia ngetyi Daviti apopile okuti: “Siovaa onkhanda yange, omphangu yange yokuapama, omuyovoli wange, Huku yange oe onkhanda yange omu ame ndyitilila.” (Sal. 18:2) mahi okuti okulikuambela tyikuatesako umwe? Omukokoli-ndyila umwe utiwa o Kahlia wati: “Tyina namelikuambela, ndyilitehelela nawa. Okulikuambela tyinkhuatesako okusoka nokutala ovipuka ngetyi Siovaa evitala, iya nonthumbi yange mwe iliyawisa.” Naina, okulikuambela otyipuka tyimwe Siovaa etuavela tyitukuatesako tyina tualinga otyiho.

 2. Soka. Tyina usoka kovipuka viamonekele noove kohale, uhinangela ovipuka wetyivilile vala okukoleleya mokonda Siovaa oe wemukuatesileko? Tyina tusoka oñgeni Siovaa etukuatesileko, noñgeni akuatesileko ovaumbili vae vokohale, tyitukuatesako okulitehelela nawa atumuyumbu vali onthumbi. (Sal. 18:17-19) Omukulu umwe wewaneno utiwa Joshua wati: “Ame nahoneka omalikuambelo aeho nakumbululwa. Otyo tyinkhuatesako okuhinangela ovipuka aviho naetile ku Siovaa iya ngwe evimphe umwe.” Naina, tyina tusoka oñgeni Siovaa etukuatesakua-le kohale, tukala nononkhono atutyivili okuluisa otyiho.

3. Tavela. Tyina nkhele tuehenekoye etyi tuahanda okulinga, tete tuesukisa okuovola Mondaka ya Huku opo tuvase otyipuka tyikahi nawa tuesukisa okulinga. (Sal. 19:7, 11) Ovanthu ovanyingi vapopia okuti tyina vaovola okunoñgonoka otesitu imwe yo Mbimbiliya, opo vala vetyimona okuti ipondola okuvekuatesako. Omukulu umwe wewaneno utiwa o Jarrod wati: “Okuovolola tyikuatesako okunoñgonoka vali nawa ovelesikulu Yombimbiliya netyi Siovaa ekahi nokumphopila mo velesikulu oyo. Otyo tyinkhuatesako okuipaka momutwe andyitavela etyi Siovaa apopia.” Tyina tutanga Ombimbiliya opo Siovaa etukuateseko, atuendela muetyi etupopila, matukala tyafuapo opo tuluise otyiho.

Daviti ankho utyii okuti opo etyivile okuluisa otyiho wesukisa okukuatesuako na Siovaa. Wapandulile unene etyi Siovaa emukuatesako apopi okuti: “Kononkhono mba Huku ndyipondola okulonda otyimato. Huku yotyotyili oyo una umpha ononkhono.” (Sal. 18:29, 32) Ovitateka tuna vipondola okukala ngotyimato tyaya unene peulu tyehetavela okunamatua. Mahi tyina Siovaa etukuatesako matutyivili okulambela mu kese otyitateka tyelifwa notyimato tyaya unene peulu! Naina, tyina tulikuambela ku Siovaa etukuateseko, natyina tusoka oñgeni ehole okutukuatesako, nokutavela ovipuka etupopila, tupondola okukala nonthumbi yokuti ngwe metuavela ononkhono nounongo tuesukisa opo tutyivile okuluisa otyiho!