THUPO lingakhale ninga mtolo wakulemera omwe uli mu mtima mwathu. (Mimwani 12:25) Kodi imwepo mudakhala kale na thupo likulu kwene-kwene pa moyo wanu? Kodi mudabzibva kuti mungakwanise lini kumalisa thupolo? Penu n’tenepo, dziwani kuti muli lini mwekha. Azinji wa ifepano timbabva thupo na kuneta thangwe ra bzinthu bzakusiyana-siyana bzomwe bzimbaticitikira. Bzimwebzi bzimbacitika pinango thangwe rakuti tikufuwa adzinza wathu omwe akuduwala, tidasaikidwa adzinza wathu ayai tikubonera thangwe ra malengwa ya pantsi. Tsono n’ciyani comwe tingacite tikakhala na thupo? a

Ifepano tingapfunze bzomwe tingacite kuti timalise thupo na bzomwe bzidacitika na Mambo Davide. Iye adagumana na mabvuto pa moyo wace ndipo pa nthawe inango wanthu akhafuna kumupha. (1 Samuweri 17:34, 35; 18:10, 11) Kodi n’ciyani comwe Davide adacita pomwe akhana thupo? Ndipo ifepano tingamutewezerembo tani?

Davide adagumana na mabvuto mazinji kabodzi na kabodzi. Kumbukirani bzomwe bzidacitika pomwe akhathawa Mambo Sauli, omwe akhafuna kumupha. Pomwe Davide na acikunda wace adandoti fikeni kucokera ku nkhondo, adafikira anyamadulanthaka wawo awatenthera nyumba zawo, awabera bzinthu bzawo na kutenga mabanja yawo kuti akakhale akapolo. Pomwe iye adawona bzimwebzi, kodi n’ciyani comwe adacita? “Davide na acikunda wace adayamba kulira kwene-kwene mwakuti adamala mphanvu.” Kuthimizira pa mabvuto yomwe iye akhanayo kale, acikunda wace adayamba kulewa kuti “animuboma na minyala.” (1 Samuweri 30:1-6) Pa nthawe imweyi Davide adagumana na mabvuto matatu kabodzi na kabodzi. Banja lace likhali pa ngozi, acikunda wace akhafuna kumupha ndipo Mambo Sauli akhapitiriza kumunyang’ana kuti amuphembo. Kulewa cadidi Davide akhana thupo kwene-kwene!

Kodi n’ciyani comwe Davide adacita? Pa nthawe imweyo iye “adagumana mphanvu mwa Yahova Mulungu wace.” Kodi iye adacita tani bzimwebzi? Davide akhambapemba kwa Yahova kuti amuthandize na kukumbukira momwe iye adamuthandizira kale m’mbuyo. (1 Samuweri 17:37; Salimo 18:2, 6) Davide adawona kuti akhafunika kukumbira thandizo kwa Yahova. Ndipopa adabvunza Yahova bzomwe angadacita. Pomwe Davide adadziwa bzomwe Yahova akhafuna kuti iye acite, adacitiratu bzimwebzo. Bzimwebzi bzidacitisa kuti iye na acikunda wace asimbidwe na Yahova thangwe iwo adakwanisa kulombola mabanja yawo na bzinthu bzawo m’manja mwa anyamadulanthaka wawo. (1 Samuweri 30:7-9, 18, 19) Kodi mwawona bzinthu bzitatu bzomwe Davide adacita? Iye adapemba kwa Yahova, adakumbukira bzinthu bzomwe Yahova akhadamucitira kale ndipo adacita bzomwe Yahovayo adamuuza. Kodi ifepano tingatewezere tani Davide? Mbatiwoneni bzinthu bzitatu bzomwe tingacite.

1. Kupemba. Tikabva kuti tina thupo, ifepano tingapembe kwa Yahova kuti atithandize na kutipasa nzeru. Tikambauza Yahova bzomwe bzikuticitisa thupo, tingabve bwino mu mtima mwathu. Penu tin’kwanisa lini kucita kuzimbula fala pa kupemba, ifepano tingapembe kazewe-zewe. Tikambakumbira Yahova kuti atithandize, timbalatiza kuti timbamuthemba ninga momwe Davide adacitira. Iye adati: “Yahova ni tsendwa langu na mphanvu yangu ndipo ndiye omwe ambandipulumusa. Mulungu wangu ni tsendwa langu, inepano nin’dzathawira kwa iye.” (Salimo 18:2) Kodi mpembo umbathandizadi? Mpainiya munango  wakucemeredwa Kahlia adalewa kuti: “Ndikamala kupemba, nimbabva bwino mu mtima mwangu. Mpembo umbandithandiza kukumbuka ninga momwe Yahova ambakumbukira na kumuthemba kwene-kwene.” N’cadidi, mpembo ni cinthu camphanvu kwene-kwene comwe Yahova adatipasa, comwe cimbatithandiza tikakhala na thupo.

2. Kukumbukira. Mukakhala phee mucikumbukira bzomwe bzidakucitikirani pa moyo wanu, kodi mumbakwanisa kuwona momwe Yahova adakuthandizirani? Tikambakumbukira momwe Yahova ambatithandizira na momwe adathandizirambo atumiki wace m’mbuyomu, timbakhala na mphanvu pabodzi na citsimikizo cakuti iye an’dzatithandizambo tikagumana na mabvuto. (Salimo 18:17-19) Mkulu munango wa gwere wakucemeredwa Joshua adalewa kuti. “Ndina lista ya bzinthu bzizinji bzomwe Yahova adanditawira mu mpembo. Bzimwebzi bzimbandithandiza kukumbukira nthawe yomwe ndidakumbira cinthu Yahova na momwe iye adanditawirira.” Inde, tikambakumbukira momwe Yahova ambatithandizira pa moyo wathu, timbakhala na mphanvu ndipo timbamalisa thupo.

3. Kucita. Pomwe tikanati kukumbuka bzakucita, tin’funika kufufudza m’Fala la Mulungu kuti tigumane malango yomwe yangatithandize. (Salimo 19:7, 11) Abale na mpfumakazi winango ambawona kuti kufufudza vesi kumbawathandiza kubvesesa momwe angaphatisire basa vesiro pa moyo wawo. Mkulu wa gwere wakucemeredwa Jarrod adafotokoza kuti: “Kufufudza kumbandithandiza kuwona mbali zentse za vesi na kubvesesa bzomwe Yahova akundiuza mwakuphatisa basa vesiro. Bzimwebzi bzimbandithandiza kukhulupira bzomwe ndawerenga ndicicita bzinthu mwakubverana na bzomwe ndawerengabzo.” Tikambanyang’ana malango ya Yahova m’Fala lace na kuyaphatisa basa, timbakhala wakukonzeka kumalisa thupo.

Davide akhadziwa kuti akhafunika thandizo la Yahova kuti akwanise kumalisa thupo. Iye akhatenda kwene-kwene thandizo lomwe akhapasidwa na Yahova, ndipopa adalewa mafala yakuti: “Na mphanvu za Mulungu ningakwanise kukwira mpanda. Mulungu wacadidi ndiye omwe ambandipasa mphanvu.” (Salimo 18:29, 32) Ifepano tingawone mabvuto yathu ninga mpanda utali omwe ungakwirike lini. Tsono na thandizo la Yahova, ifepano tingakwanise kukunda mabvuto yali-yentse yomwe tingagumane nayo! Inde, tikambapemba kwa Yahova kuti atithandize, kumbakumbukira bzomwe iye adaticitira kale na kucita bzomwe iye akutiuza, ifepano tingakwanise kukhala na mphanvu pabodzi na nzeru kuti tikwanise kumalisa thupo!