ADWENLEADWENLE kola yɛ kɛ debie ɛlomboɛ bie wɔ yɛ ahonle nu. (Mrɛ. 12:25) Adwenleadwenle kpole ɛdɔ ɛ nwo ɛlɛ ɔ? Ɛdele nganeɛ kɛ ɛnrɛhola ɔ nloa gyinla bieko ɔ? Saa ɔle zɔ a, ɛnee tɛ ɛ ngomekye. Bie a yɛ nuhua dɔɔnwo ɛlɛnea wuliravolɛma, yɛ dɔvolɛ bie ɛwu, esiane bie ɛdo yɛ anzɛɛ yɛlɛyia tɛnlabelɛ gyɛne mɔɔ yemaa yɛ anwosesebɛ ɛwie, adwenleadwenle ɛdɔ yɛ nwo na yɛ rɛle ɛbɔ a. Noko duzu a bahola aboa yɛ yeamaa yɛagyinla adwenleadwenle nloa a? a

Saa yɛsuzu Belemgbunli Devidi neazo ne anwo a, bie a yɛbanwu kɛzi yɛbahola yɛagyinla adwenleadwenle nloa la anwo ninyɛne dɔɔnwo. Ɔyiale ngyegyelɛ dɔɔnwo wɔ ye ɛbɛlabɔlɛ nu, ɔdwu mekɛ ne bie bɔbɔ a ɛnee ye ngoane la esiane nu. (1 Sa. 17:34, 35; 18:10, 11) Kɛzi Devidi holale gyinlanle adwenleadwenle nloa ɛ? Kɛ ɔkɛyɛ na yɛazukoa ye neazo ne ɛ?

Devidi yiale ngyegyelɛ dɔɔnwo wɔ mekɛ ko ne ala anu. Kɛ neazo la, suzu mɔɔ zile wɔ mekɛ mɔɔ ɛnee ɔlɛnriandi yeavi Belemgbunli Sɔɔlo mɔɔ ɛnee ɔlɛkpondɛ ye yeahu ye anyunlu la anwo. Mɔɔ Devidi nee mrenyia mɔɔ ɔ nee bɛ lua la hɔle konle rale na bɛnwunle kɛ bɛ agbɔvolɛ ɛrawua bɛ ninyɛne, bɛyela bɛ azua na bɛva bɛ mbusua ne mɔ bɛhɔ akɛlɛzonlenlɛ nu la, ɔzinle bɛ nwo kpole. Duzu a Devidi yɛle a? “Devidi nee ye menli ne zunle kpole kpalɛ hɔkpulale kɛ ɛnee bɛnlɛ anwosesebɛ mɔɔ bɛfa bɛazu bieko a.” Mɔɔ maanle Devidi lile nyane kpole kpalɛ la a le kɛ ɛnee ɔ gɔnwo mɔ mɔɔ ɔdie bɛ ɔdi la ɛlɛka kɛ “bɛsi ye awolɛ.” (1 Sa. 30:1-6) Kɛkala Devidi ɛlɛyia ngyegyelɛ mgbole nsa wɔ mekɛ ko ne ala anu: Ye abusua ne ngoane la esiane nu, ɛnee ɔsulo kɛ ye menli ne bahu ye yɛɛ Belemgbunli Sɔɔlo tɛkpondɛ ye. Nea adwenleadwenle mɔɔ ɔbayɛ kɛ ɔdɔle Devidi anwo a!

Duzu bieko a Devidi yɛle a? Ɛkɛ ne ala Devidi ‘kpondɛle anwosesebɛ vile Gyihova ye Nyamenle ne ɛkɛ.’ Kɛzi ɔyɛle ɛhye ɛ? Yɛze kɛ ɛnee Devidi ta yɛ asɔne kpondɛ Gyihova moalɛ yɛɛ ɔdwenledwenle mɔɔ yeyɛ yemaa ye dɛba la anwo. (1 Sa. 17:37; Edw. 18:2, 6) Devidi nwunle kɛ ɔhyia kɛ ɔkpondɛ adehilelɛ ɔfi Gyihova ɛkɛ ɔti ɔbizale Gyihova mɔɔ ɔwɔ kɛ ɔyɛ la. Mɔɔ Devidi asa hanle adehilelɛ vile Gyihova ɛkɛ la, ɔlile nwolɛ gyima ndɛndɛ. Ɛhye ati Gyihova yilale ye nee ye menli ne na bɛhɔliele bɛ mbusuafoɔ nee bɛ ninyɛne ne. (1 Sa. 30:7-9, 18, 19) Ɛnwunle ninyɛne nsa mɔɔ Devidi yɛle la ɔ? Ɔyɛle asɔne kɛ Gyihova ɛboa ye, ɔhakyele mɔɔ Gyihova ɛyɛ ɛmaa ye dɛba la yɛɛ ɔvale Gyihova adehilelɛ ne ɔlile gyima. Kɛ ɔkɛyɛ na yɛazukoa Devidi neazo ne ɛ? Maa yɛnlea ndenle nsa bie.

1. Yɛ asɔne. Mekɛ biala mɔɔ adwenleadwenle babɔ ɔ bo kɛ ɔfo yɛ nwo zo la, yɛbahola yɛazɛlɛ Gyihova kɛ ɔmaa yɛ nrɛlɛbɛ. Saa yɛka debie biala mɔɔ wɔ yɛ ahonle nu la yɛkile ye a, ɔbahola yeade yɛ adesoa ne azo. Anzɛɛ saa asɔne sikalɛ bie a yɛbahola yɛayɛ ye wɔ zɔhane tɛnlabelɛ ne anwo a, ɔwɔ kɛ yɛyɛ. Mekɛ biala mɔɔ yɛbakpondɛ moalɛ yɛavi Gyihova ɛkɛ la ɛnee yɛlɛda Devidi anwodozo ne bie ali, ɔhanle kɛ: “Gyihova le me bodane nee me aranemgbole yɛɛ me Dievolɛ. Me Nyamenle ne le me bodane, ye nuhua a menriandi mekɔfea a.” (Edw. 18:2) Asoo amgba asɔneyɛlɛ boa? Adiema raalɛ adekpakyelɛnli bie mɔɔ bɛfɛlɛ ye Kahlia la hanle kɛ: “Meyɛ asɔne mewie a me nzo nu dwo me. Asɔneyɛlɛ maa medwenle ninyɛne nwo kɛ Gyihova la, na ɔmaa anwodozo mɔɔ melɛ ye wɔ  ye nu la yɛ kpole.” Nɔhalɛ nu, asɔneyɛlɛ le ahyɛlɛdeɛ kɛnlɛma mɔɔ vi Gyihova ɛkɛ mɔɔ ɔboa yɛ ɔmaa yɛgyinla adwenleadwenle nloa a.

2. Kakye dɛba. Saa ɛnea wɔ ɛbɛlabɔlɛ nu a, ɛkakye ngyegyelɛ bie mɔɔ ɛyiale mɔɔ ɛholale ɛgyinlanle ɔ nloa ɔluakɛ Gyihova boale wɔ la ati ɔ? Saa yɛkakye kɛzi Gyihova boale yɛ nee ye azonvolɛ wɔ mekɛ bie mɔɔ ɛze la a, ɔmaa yɛnyia anwosesebɛ nee anwodozo kpole wɔ ye nu. (Edw. 18:17-19) Asafo nu kpanyinli bie mɔɔ bɛfɛlɛ ye Joshua la hanle kɛ: “Mehɛlɛ asɔne dɔɔnwo mɔɔ Gyihova ɛbua la megua ɛkɛ. Ɛhye maa mekakye mekɛ mɔɔ membizale Gyihova debie fɔɔnwo bie na ɔvale mɔɔ mehyia nwo la ɔmaanle me la.” Saa yɛdwenledwenle mɔɔ Gyihova ɛyɛ ɛmaa yɛ dɛba la anwo a, ɔmaa yɛnyia anwosesebɛ yɛgyinla adwenleadwenle nloa.

3. Yɛ nwolɛ debie. Kolaa na yɛazi kpɔkɛ wɔ mɔɔ ɔwɔ kɛ yɛyɛ ye wɔ tɛnlabelɛ bie anwo la, yɛbahola yɛakpondɛ adehilelɛ wɔ Nyamenle Edwɛkɛ ne anu. (Edw. 19:7, 11) Menli dɔɔnwo ɛnwu kɛ saa bɛyɛ ngɛlɛlera fɔɔnwo bie anwo neɛnleanu a, ɔmaa bɛte kɛzi ɔfale bɛ ɛbɛlabɔlɛ nwo la abo kpalɛ. Asafo nu kpanyinli bie mɔɔ bɛfɛlɛ ye Jarrod la hanle kɛ: “Saa meyɛ neɛnleanu a, ɔboa me ɔmaa mesukoa ninyɛne dɔɔnwo mefi ngɛlɛlera ne anu na ɔmaa mete mɔɔ Gyihova ɛlɛka ahile me la abo kpalɛ. Ɛhye ka me ahonle na ɔmaa mefa Gyihova adehilelɛ meyɛ gyima.” Saa yɛkpondɛ adehilelɛ yɛfi Gyihova ɛkɛ wɔ Ngɛlɛlera ne anu na yɛfa yɛyɛ gyima a, ɔboa yɛ ɔmaa yɛdi adwenleadwenle zo kpalɛ.

Devidi dele ɔ bo kɛ saa ɔbahola yeagyinla adwenleadwenle nloa a, kyesɛ Gyihova boa ye. Ɔ nye raliele moalɛ mɔɔ Gyihova vale maanle ye la anwo kpalɛ ɔti ɔhanle kɛ: “Ɔlua Nyamenle tumi zo, mekola mewulu bane. Nɔhalɛ Nyamenle ne a maa me anwosesebɛ a.” (Edw. 18:29, 32) Bie a yɛbade nganeɛ kɛ yɛ ngyegyelɛ ne mɔ le kɛ bane mɔɔ yɛngola ye wulu la. Noko ɔlua Gyihova moalɛ zo, yɛbahola yɛawulu ngyegyelɛ biala mɔɔ ɔle kɛ bane la! Nɔhalɛ nu, saa yɛyɛ asɔne kɛ Gyihova ɛboa yɛ, yɛkakye mɔɔ yeyɛ yemaa yɛ dɛba la amuala na yɛfa ye adehilelɛ yɛyɛ gyima a, yɛbahola yɛanyia anwodozo kɛ ɔbamaa yɛ anwosesebɛ nee nrɛlɛbɛ mɔɔ yɛhyia nwo amaa yɛahola yɛagyinla adwenleadwenle nloa la!